Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga oʻzgartirishlar va qoʻshimcha kiritish haqida (2634-9-son)

24.01.2026

Oʻzbekiston Respublikasi iqtisodiyot va moliya vazirining

buyrugʻi

[Oʻzbekiston Respublikasi Adliya vazirligi tomonidan 2026-yil 24-yanvarda roʻyxatdan oʻtkazildi, roʻyxat raqami 2634-9]

Oʻzbekiston Respublikasining Budjet kodeksi va Oʻzbekiston Respublikasining 2025-yil 25-dekabrdagi OʻRQ-1107-son “Budjet jarayoni takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi Qonuniga muvofiq buyuraman:

1. Oʻzbekiston Respublikasi moliya vazirining 2014-yil 14-noyabrdagi 74-son buyrugʻi (roʻyxat raqami 2634, 2014-yil 15-dekabr) (Oʻzbekiston Respublikasi qonun hujjatlari toʻplami, 2014-y., 51-son, 612-modda) bilan tasdiqlangan Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir D. KUCHKAROV

Toshkent sh.,

2026-yil 12-yanvar,

318-son

Oʻzbekiston Respublikasi iqtisodiyot va moliya vazirining 2026-yil 12-yanvardagi 318-son buyrugʻiga ILOVA

Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga kiritilayotgan oʻzgartirishlar va qoʻshimcha

1. Muqaddimadan “vaqtinchalik xarajatlar smetalarini,” degan soʻzlar chiqarib tashlansin.

2. 11-bandning toʻrtinchi xatboshisi va 4-bandning ikkinchi xatboshisi chiqarib tashlansin.

3. 5-bandning ikkinchi xatboshisi quyidagi tahrirda bayon etilsin:

“barcha tashkilotlar (mavsumiy yoki moliya yili mobaynida yangidan tuzilayotgan tashkilotlardan tashqari) boʻyicha — mazkur smetalar tuzilayotgan joriy moliya yilining 1-dekabrida amalda boʻlgan shartlarda;”.

4. 7-band quyidagi tahrirda bayon etilsin:

“7. Xarajatlar smetasi, daromadlar va xarajatlar smetasi, jamlanma xarajatlar smetasi, jamlanma daromadlar va xarajatlar smetasi, shuningdek shtat jadvallari va jamlanma shtat jadvallari soʻmda tuziladi.

Oʻzbekiston Respublikasining xorijdagi har bir diplomatik vakolatxonasi va konsullik muassasasi hamda vazirlik va idoralarning vakolatxonalari boʻyicha xarajatlar smetalari Oʻzbekiston Respublikasining xorijdagi diplomatik vakolatxonalari va konsullik muassasalari hamda vazirlik va idoralar vakolatxonalarining Oʻzbekiston Respublikasi Iqtisodiyot va moliya vazirligi bilan kelishilgan yillik jamlanma xarajatlar smetalari asosida xorijiy va milliy valyutada tuziladi.”.

5. 71-bandning birinchi va ikkinchi xatboshilaridan hamda 73-banddan “vaqtinchalik xarajatlar smetalari,” va “, jamlanma vaqtinchalik xarajatlar smetalari” degan soʻzlar chiqarib tashlansin.

6. 72-bandning yigirmanchi xatboshisidagi “Toshkent shahar hokimliklarining Iqtisodiyot va moliya bosh boshqarmalari, tumanlar va shaharlar hokimliklarining iqtisodiyot va moliya boʻlimlari” degan soʻzlar “Toshkent shahar iqtisodiyot va moliya bosh boshqarmalari, tumanlar va shaharlar iqtisodiyot va moliya boʻlimlari” degan soʻzlar bilan almashtirilsin.

7. 8-bandning ikkinchi xatboshisi quyidagi tahrirda bayon etilsin:

“Oʻzbekiston Respublikasi Tashqi ishlar vazirligi hamda vazirlik va idoralarning har bir diplomatik muassasalari va vakolatxonalari boʻyicha xarajatlar smetasi xorijiy va milliy valyutalarda har bir diplomatik muassasa va vakolatxonalar boʻyicha alohida mazkur Nizomning 1a-ilovasiga muvofiq shaklda tuziladi.”.

8. 9-bandning beshinchi xatboshisidagi “joriy” degan soʻz “kelgusi” degan soʻz bilan almashtirilsin.

9. 20-bandning uchinchi va toʻrtinchi xatboshilari quyidagi tahrirda bayon etilsin:

“Oʻzbekiston Respublikasining xorijdagi diplomatik vakolatxonalari va konsullik muassasalari, vazirlik va idoralar vakolatxonalarining yillik jamlanma xarajatlar smetasi Oʻzbekiston Respublikasi Tashqi ishlar vazirligi hamda vazirlik va idoralar tomonidan Oʻzbekiston Respublikasi Iqtisodiyot va moliya vazirligi bilan kelishilgan holda joriy yilning 20-dekabriga qadar Oʻzbekiston Respublikasi tashqi ishlar vazirining hamda vazirlik va idoralar rahbarining ERIsi bilan tasdiqlanadi.

Dasturiy majmuaga ulanmagan Oʻzbekiston Respublikasining xorijdagi diplomatik vakolatxonalari va konsullik muassasalari, vazirlik va idoralar vakolatxonalarining xarajatlar smetasi Oʻzbekiston Respublikasi tashqi ishlar vaziri hamda vazirlik va idoralar rahbari tomonidan tasdiqlanadi, tasdiqlangan kuni koʻrsatilgan holda ularning imzolari hamda mazkur smetaning barcha nusxalari tashkilot muhri izini aks ettirish bilan rasmiylashtiriladi.”.

10. 22-band quyidagi tahrirda bayon etilsin:

“22. Xarajatlar smetalarini tasdiqlash joriy moliya yilining 20-dekabridan kechiktirmay amalga oshiriladi. Bunda, budjet mablagʻlarini taqsimlovchi boʻysunuvidagi budjet tashkilotlari va budjet mablagʻlari oluvchilar xarajatlar smetasini budjet mablagʻlarini taqsimlovchi tomonidan belgilangan muddatlarda, biroq joriy moliya yilining 20-dekabridan kechiktirmay tasdiqlaydi.”.

11. 24-bandning ikkinchi xatboshisi quyidagi tahrirda bayon etilsin:

“qonunchilik hujjatlariga muvofiq shakllantiriladigan Budjet tashkilotlari xodimlarini moddiy ragʻbatlantirish maxsus fondi (tibbiyot muassasalari, barcha tipdagi umumtaʼlim maktablari va oʻrta maxsus, kasbiy taʼlim tashkilotlari bundan mustasno);”.

12. 25-bandning birinchi xatboshisi quyidagi tahrirda bayon etilsin:

“25. Budjet tashkilotining shtat jadvalini va markazlashtirilgan moliya-buxgalteriya xizmatining jamlanma shtat jadvalini tasdiqlash joriy moliya yilining 20-dekabridan kechiktirmay amalga oshiriladi. Budjet mablagʻlarini taqsimlovchi boʻysunuvidagi budjet tashkilotlari shtat jadvallarini budjet mablagʻlarini taqsimlovchi tomonidan belgilangan, biroq joriy moliya yilining 20-dekabridan kechiktirmay tasdiqlaydi.”.

13. 3-bob oʻz kuchini yoʻqotgan deb topilsin.

14. 30-bandning beshinchi xatboshisi quyidagi tahrirda bayon etilsin:

“budjet tashkilotlariga undiriladigan ota-onalar toʻlovlari hisobidan shakllantiriladigan budjetdan tashqari mablagʻlar, shu jumladan oʻquvchilar va tarbiyalanuvchilar davlat maktabgacha taʼlim tashkilotlarida, umumtaʼlim maktablarining kuni uzaytirilgan guruhlarida, maktab-internatlarda, olimpiya va paralimpiya sport turlariga tayyorlash markazlari va boshqa taʼlim tashkilotlarida tarbiyalanayotganligi uchun, oʻquvchilar bolalar musiqa va sanʼat maktablari hamda qoʻshimcha taʼlim tashkilotlarida taʼlim olganligi uchun, oliy, oʻrta maxsus va kasbiy taʼlim tashkilotlarida taʼlim olganlik uchun, statsionar davolash-profilaktika muassasalarida davolanayotganlar tarkibi ovqatlanishi uchun hamda qonunchilik hujjatlariga muvofiq boshqa turdagi toʻlovlar;”.

15. 35-bandning oltinchi va yettinchi xatboshilari quyidagi tahrirda bayon etilsin:

“Budjet tashkilotlari xodimlarini moddiy ragʻbatlantirish maxsus fondining toʻgʻri tashkil qilinganligini;

Umumtaʼlim, oʻrta-maxsus, kasbiy taʼlim tashkilotlarining direktor jamgʻarmasining toʻgʻri tashkil qilinganligini;”.

16. 39-banddagi “moliya yilining 1-apreliga” degan soʻzlar “joriy moliya yilining 25-dekabriga” degan soʻzlar bilan almashtirilsin.

17. 51-band quyidagi tahrirda bayon etilsin:

“51. Xarajatlar smetasi, daromadlar va xarajatlar smetasi, shtat jadvallari, shuningdek jamlanma xarajatlar smetasi, jamlanma daromadlar va xarajatlar smetasi va jamlanma shtat jadvallarini roʻyxatdan oʻtkazish:

budjet mablagʻlarini taqsimlovchilarning jamlanma xarajatlar smetasi, jamlanma daromadlar va xarajatlar smetasi va jamlanma shtat jadvallari — Oʻzbekiston Respublikasi Iqtisodiyot va moliya vazirligi tomonidan (bunda boʻysunuvida budjet tashkilotlari hamda budjet mablagʻlari oluvchilari boʻlmagan budjet mablagʻlarini taqsimlovchilar boʻyicha xarajatlar smetasi, daromadlar va xarajatlar smetasi hamda shtat jadvallari roʻyxatdan oʻtkaziladi);

Qoraqalpogʻiston Respublikasining respublika budjetidan, viloyatlarning viloyat budjetlaridan va Toshkent shahrining shahar budjetidan moliyalashtiriladigan budjet tashkilotlari hamda budjet mablagʻlari oluvchilar xarajatlar smetasi, daromadlar va xarajatlar smetasi, shtat jadvallari — Qoraqalpogʻiston Respublikasining Iqtisodiyot va moliya vazirligi, viloyatlar va Toshkent shahar iqtisodiyot va moliya bosh boshqarmalari tomonidan;

shahar va tuman budjetlaridan moliyalashtiriladigan budjet tashkilotlari, markazlashtirilgan moliya-buxgalteriya xizmatlari hamda budjet mablagʻlari oluvchilarning (jamlanma) xarajatlar smetasi, daromadlar va xarajatlar smetasi, shtat jadvallari — tegishli tumanlar va shaharlar iqtisodiyot va moliya boʻlimlari tomonidan amalga oshiriladi.

Bunda, Qoraqalpogʻiston Respublikasining Iqtisodiyot va moliya vazirligi, viloyatlar va Toshkent shahar iqtisodiyot va moliya boshqarmalari kasbiy taʼlim tashkilotlarining xarajatlar smetasi va shtat jadvallarini, ular uchun Oʻzbekiston Respublikasi respublika budjeti shaxsiy gʻazna hisobvaraqlarini ochib, roʻyxatdan oʻtkazadi va Qoraqalpogʻiston Respublikasi, viloyatlar va Toshkent shahri boʻyicha kasbiy taʼlim tashkilotlarining jamlanma xarajatlar smetasi va jamlanma shtat jadvallarini Oʻzbekiston Respublikasi Iqtisodiyot va moliya vazirligiga belgilangan muddatlarda roʻyxatdan oʻtkazish uchun taqdim etadi.”.

18. 52-band “diplomatik muassasalarini” degan soʻzlardan soʻng “hamda vazirlik va idoralar vakolatxonalarini” degan soʻzlar bilan toʻldirilsin.

19. 6-bobning 2-paragrafi nomidan “, vaqtinchalik xarajatlar smetasi” degan soʻzlar chiqarib tashlansin.

20. 69-bandda:

birinchi xatboshidan “, vaqtinchalik xarajatlar smetasi” degan soʻzlar chiqarib tashlansin;

uchinchi va toʻrtinchi xatboshilardan “hokimliklarining” degan soʻzlar chiqarib tashlansin.

21. 70-bandning birinchi xatboshisidagi “oʻn” degan soʻz “uch” degan soʻz bilan almashtirilsin.

22. 75-bandda:

ikkinchi xatboshi quyidagi tahrirda bayon etilsin:

“Oʻzbekiston Respublikasining respublika budjetidan moliyalashtiriladigan budjet tashkilotlari va budjet mablagʻlari oluvchilar, Oʻzbekiston Respublikasining xorijdagi diplomatik vakolatxonasi va konsullik muassasasi hamda vazirlik va idoralarning vakolatxonalari, shuningdek, ikkinchi darajali budjet mablagʻlari taqsimlovchilar boʻyicha birinchi darajali budjet mablagʻlarini taqsimlovchi tomonidan. Bunda, budjet mablagʻlarini taqsimlovchilar tomonidan tasarrufidagi tizim tashkilotlariga budjetdan ajratiladigan mablagʻlari doirasida faqat guruhlar boʻyicha oʻzgartirishlar kiritilishi mumkin;”;

toʻrtinchi va beshinchi xatboshilardan “hokimliklarining” degan soʻzlar chiqarib tashlansin.

23. 83-bandning birinchi xatboshisidagi “kanalizatsiya” degan soʻz “oqova suvlarni chiqarib yuborish” degan soʻzlar bilan almashtirilsin.

24. 86-band quyidagi tahrirda bayon etilsin:

“86. Har yili iqtisodiyot va moliya organlari kelgusi moliya yilining birinchi choragida barcha budjet tashkilotlari va budjet mablagʻlari oluvchilarning xarajatlar smetasi (daromadlar va xarajatlar smetasi), budjet mablagʻlarini taqsimlovchining va markazlashtirilgan moliya-buxgalteriya xizmatlarining jamlanma xarajatlar smetasi tuzilishi, tasdiqlanishining toʻgʻriligini va oʻz vaqtida yetkazilishini tekshirishdan oʻtkazishi, hududiy iqtisodiyot va moliya organlari tomonidan mazkur ishlarning oʻz vaqtida va sifatli olib borilganligini tizimli nazorat qilishi, tekshiruvlarni tashkillashtirishda va oʻtkazishda ularga zarur yordamni koʻrsatishi lozim.”.

25. 1 va 8-ilovalardan “_______ ga bajarildi (haqiqiy xarajat)” ustuni chiqarib tashlansin.

26. 1a-ilova mazkur oʻzgartirishlar va qoʻshimchaning ilovasiga muvofiq tahrirda bayon etilsin.

27. 4, 4a va 14a-ilovalar oʻz kuchini yoʻqotgan deb topilsin.

Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga kiritilayotgan oʻzgartirishlar va qoʻshimchaga ILOVA

“Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga 1a-ILOVA

* Aviachiptalarni sotib olish uchun Oʻzbekiston Respublikasi Markaziy banki tomonidan xarid kunida belgilangan kurs boʻyicha milliy valyutada ajratiladigan mablagʻlar.

** Mazkur shakl boʻyicha jamlanma xarajatlar smetasi (“Boshqa xarajatlar” boʻyicha IV guruh xarajatlari yoyilmasi ilova qilingan holda) Oʻzbekiston Respublikasi Iqtisodiyot va moliya vazirligi bilan kelishilgan holda tasdiqlanadi..

Xarajatlar smetasiga ILOVA

* Aviachiptalarni sotib olish uchun Oʻzbekiston Respublikasi Markaziy banki tomonidan xarid kunida belgilangan kurs boʻyicha milliy valyutada ajratiladigan mablagʻlar.

** Mazkur shakl boʻyicha jamlanma xarajatlar smetasi (“Boshqa xarajatlar” boʻyicha IV guruh xarajatlari yoyilmasi ilova qilingan holda) Oʻzbekiston Respublikasi Iqtisodiyot va moliya vazirligi bilan kelishilgan holda tasdiqlanadi”.