Oʻzbekiston Respublikasi davlat mulkini boshqarish va tadbirkorlikni qoʻllab-quvvatlash davlat qoʻmitasi tuzilmasini takomillashtirish toʻgʻrisida (133-son)

27.03.1998

Oʻzbekiston Respublikasi Vazirlar Mahkamasining

qarori

Davlat tasarrufidan chiqarish va xususiylashtirish dasturlarini amalga oshirishda javobgarlikni kuchaytirish va ishlarni tashkil etish darajasini oshirish, kichik va oʻrta tadbirkorlikni rivojlantirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasi (Davlat mulki qoʻmitasi) markaziy apparatining tuzilmasi, uning xodimlarining belgilangan cheklangan sonini saqlab qolgan holda 1-ilovaga muvofiq;

Oʻzbekiston Respublikasi Davlat mulki qoʻmitasi hududiy boshqarmalarining namunaviy tuzilmasi 2-ilovaga muvofiq tasdiqlansin.

2. Oʻzbekiston Respublikasi Bosh vaziri Oʻ.T.Sultonovga, Bosh vazirning oʻrinbosari, Oʻzbekiston Respublikasi Davlat mulki qoʻmitasi raisi V.A.Chjenga Oʻzbekiston Respublikasi Prezidentining Davlat maslahatchilari T.A.Alimov va V.A.Golishev (kelishuvga koʻra), Oʻzbekiston Respublikasi Moliya vazirligi ishtirokida Davlat mulki qoʻmitasi va uning hududiy organlarining tuzilmasi va shtatlar jadvalini bir oy muddatda markaziy apparat va hududiy boshqarmalarning tasdiqlangan tuzilmalariga muvofiqlashtirish topshirilsin.

3. Oʻzbekiston Respublikasi Davlat mulki qoʻmitasi Oʻzbekiston Respublikasi Prezidentining “Qimmatli qogʻozlar bozorini rivojlantirish va respublikaning fond bozorida xorijiy investorlar ishtirokini kengaytirish borasidagi qoʻshimcha chora-tadbirlar toʻgʻrisida” 1997-yil 31-martdagi PF-1740-son, “Fond bozorini yanada rivojlantirish hamda davlat mulki negizida tashkil etilgan aksiyadorlik jamiyatlarini qoʻllab-quvvatlash chora-tadbirlari toʻgʻrisida” 1998-yil 4-martdagi PF-1939-son Farmonlarida belgilangan qoidalar, Vazirlar Mahkamasining “Davlat korxonalari negizida tashkil etilgan aksiyadorlik jamiyatlarida aksiyalarni joylashtirishning belgilangan tartibiga rioya qilishni tekshirish natijalari toʻgʻrisida” 1998-yil 5-martdagi 96-son qarori amalga oshirilishiga alohida eʼtiborni qaratsin.

Yuqorida koʻrsatib oʻtilgan qarorlarni amalga oshirish boʻyicha Oʻzbekiston Respublikasi Davlat mulki qoʻmitasi faoliyati natijasida 1998-yil birinchi yarim yillik yakunlari boʻyicha Vazirlar Mahkamasining majlisida koʻrib chiqilsin.

4. Belgilansinki, tasdiqlangan Qishloq xoʻjaligida iqtisodiy islohotlarni chuqurlashtirish dasturiga muvofiq mulkiy paylarni joriy etish asosida qishloq xoʻjaligi korxonalarini qishloq xoʻjaligi shirkatlariga aylantirish Oʻzbekiston Respublikasi Davlat mulki qoʻmitasi va uning hududiy organlarining ustuvor vazifalari hisoblanadi.

5. Belgilab qoʻyilsinki, Iqtisodiy nochor korxonalar ishlari qoʻmitasi raisi va Qimmatli qogʻozlar bozori faoliyatini muvofiqlashtirish va nazorat qilish markazi bosh direktori lavozimlariga koʻra Oʻzbekiston Respublikasi Davlat mulki qoʻmitasi raisining oʻrinbosarlari hisoblanadilar. Iqtisodiy nochor korxonalar ishlari qoʻmitasi raisi ayni paytda korxonalar bankrotligi va sanatsiyasi masalalari boʻyicha Hukumat komissiyasining kotibi hisoblanadi.

Iqtisodiy nochor korxonalar ishlari qoʻmitasi raisi M.T. Umarov, Qimmatli qogʻozlar bozori faoliyatini muvofiqlashtirish va nazorat qilish markazi bosh direktori M.S.Yunusmatovning ular uchun belgilangan amaldagi lavozim maoshlari saqlab qolinsin.

6. 1998-yilda davlat tasarrufidan chiqarish va xususiylashtirish Dasturi 3—5-ilovalarga* muvofiq tasdiqlansin.

*3—5-ilovalar berilmaydi.

Oʻzbekiston Respublikasi Davlat mulki qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Dasturda belgilangan topshiriqlarni amalga oshirish yuzasidan ishlarning yuqori darajada tashkil etilishini taʼminlasinlar.

Oʻzbekiston Respublikasi Davlat mulki qoʻmitasiga Vazirlar Mahkamasining tegishli komplekslari, Qoraqalpogʻiston Respublikasi Vazirlar Kengashi va viloyatlar hamda Toshkent shahar hokimliklari bilan kelishgan holda davlat tasarrufidan chiqarish va xususiylashtirish boʻyicha tasdiqlangan topshiriqlar parametrlariga tuzatishlar kiritish huquqi berilsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda 1998-yilda korxonalarni davlat tasarrufidan chiqarish va xususiylashtirishning mintaqaviy dasturlarini ishlab chiqsinlar va Oʻzbekiston Respublikasi Davlat mulki qoʻmitasi bilan kelishgan holda tasdiqlasinlar.

7. Oʻzbekiston Respublikasi Vazirlar Mahkamasining 1994-yil 14-fevraldagi 72-son qarori 1-bandi va 3-bandining birinchi xatboshi, Vazirlar Mahkamasining 1996-yil 30-martdagi 126-son qarori 2-bandining birinchi xatboshi, Vazirlar Mahkamasining 1996-yil 28-dekabrdagi 465-son qarori 2-bandining ikkinchi xatboshi oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 27-mart,

133-son

Vazirlar Mahkamasining 1998-yil 27-martdagi 133-son qaroriga 1-ILOVA

Oʻzbekiston Respublikasi Davlat mulki qoʻmitasi markaziy apparati

TUZILMASI

Vazirlar Mahkamasining 1998-yil 27-martdagi 133-son qaroriga 2-ILOVA

Oʻzbekiston Respublikasi Davlat mulki qoʻmitasi hududiy boshqarmasining

NAMUNAVIY TUZILMASI