Mediatorlar tomonidan statistika maʼlumotlarini taqdim etish tartibi toʻgʻrisidagi nizomni tasdiqlash haqida (3740-son)

05.01.2026

Oʻzbekiston Respublikasi Adliya Vazirining

Buyrugʻi

[Oʻzbekiston Respublikasi Adliya vazirligi tomonidan 2026-yil 5-yanvarda roʻyxatdan oʻtkazildi, roʻyxat raqami 3740]

Oʻzbekiston Respublikasining “Mediatsiya toʻgʻrisida”gi Qonuniga muvofiq buyuraman:

1. Mediatorlar tomonidan statistika maʼlumotlarini taqdim etish tartibi toʻgʻrisidagi nizom ilovaga muvofiq tasdiqlansin.

2. Ushbu buyruq rasmiy eʼlon qilingan kundan eʼtiboran kuchga kiradi.

Vazir A. TASHKULOV

Toshkent sh.,

2025-yil 30-dekabr,

30-mh-son

Oʻzbekiston Respublikasi adliya vazirining 2025-yil 30-dekabrdagi 30-mh-son buyrugʻiga ILOVA

Mediatorlar tomonidan statistika maʼlumotlarini taqdim etish tartibi toʻgʻrisidagi

NIZOM

Mazkur Nizom mediatorlar tomonidan statistika maʼlumotlarini taqdim etish tartibini belgilaydi.

1-bob. Umumiy qoidalar

1. Mazkur Nizomda quyidagi asosiy tushunchalar qoʻllaniladi:

statistika maʼlumotlari — mediatorlar tomonidan mustaqil taqdim etiladigan maʼlumotlar asosida ushbu Nizomning 1-ilovasiga keltirilgan hisobot shakllariga muvofiq beriladigan maʼlumotlar;

hisobot davri — kalendar yil hisobidagi choraklik davr.

2. Mediatorlar tomonidan statistika maʼlumotlari avvalgi hisobot davri maʼlumotlari asosida oʻsib borish tartibida taqdim etiladi hamda kalendar yilning boshidan yangidan boshlanadi.

3. Faoliyat yuritayotgan mediatorlar tomonidan statistika maʼlumotlari har bir hisobot davri uchun taqdim etiladi.

Mediator Mediatorlar reyestridan (bundan buyon matnda Reyestr deb yuritiladi) chiqarilayotganda, u Reyestrdan chiqarilguniga qadar amalga oshirgan faoliyatiga oid statistika maʼlumotlarini taqdim etadi.

2-bob. Statistika maʼlumotlarini taqdim qilish va umumlashtirish

4. Mediatorlar tomonidan shakllantirilgan statistika maʼlumotlari ularni Reyestrga kiritgan Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalariga (bundan buyon matnda hududiy adliya organlari deb yuritiladi) ushbu Nizomning 1-ilovasiga muvofiq har chorak uchun hisobot davridan keyingi oyning 5-sanasiga qadar yozma yoki elektron shaklda taqdim etiladi. Bunda, statistika maʼlumotlari mediator tomonidan qoʻlda imzo qoʻyiladi yoki elektron raqamli imzo bilan tasdiqlanadi.

Bunda, mediator tomonidan statistika maʼlumotlari kiritilayotgan vaqtda tegishli katakchada koʻrsatkich yoʻq boʻlgan holda nol qiymati bilan toʻldiriladi.

5. Statistika maʼlumotlarini taqdim etish muddatining soʻnggi kuni dam olish yoki ishlanmaydigan bayram kuni yoxud boshqa ishlanmaydigan kunga toʻgʻri kelsa, u holda statistika maʼlumotlarini taqdim etish muddati keyingi ish kuniga qadar uzaytiriladi.

6. Statistika maʼlumotlarining har bir katakchasidagi koʻrsatkich ushbu Nizomning 1-ilovasidagi hisobot shakllarida keltirilgan oʻlchov birliklariga muvofiq koʻrsatiladi.

Bunda, mediator tomonidan statistika maʼlumotlari kiritilayotgan vaqtda tegishli katakchada koʻrsatkich yoʻq boʻlgan holda nol qiymati bilan toʻldiriladi.

7. Mediator tomonidan statistika maʼlumotlari ishonchli maʼlumotlar asosida toʻliq toʻldirilgan va ularni mantiqiy tekshirish natijasida aniqlangan xato va (yoki) kamchiliklar toʻliq bartaraf etilgan boʻlishi lozim.

8. Hududiy adliya organlari statistika maʼlumotlarida xato va (yoki) kamchiliklarning mavjudligini aniqlagan holatlarda shu kunning oʻzida mediatorni mazkur xato va kamchiliklarni bartaraf etish haqida xabardor qiladi hamda mediator tomonidan tuzatilgan statistika maʼlumotlari ushbu Nizomning 10-bandida belgilangan tartibda taqdim etilishini nazoratga qiladi.

9. Mediatorlar hududiy adliya organlariga statistika maʼlumotlarini taqdim qilgandan soʻng, mazkur maʼlumotlarda xato va (yoki) kamchiliklarni aniqlagan holatlarda bu haqda hududiy adliya organlarini shu kunning oʻzida xabardor qiladi.

10. Mediatorlar statistika maʼlumotlarida aniqlangan xato va (yoki) kamchiliklar toʻgʻrisida xabardor qilinganidan soʻng, ularni bartaraf etishi hamda tuzatilgan statistik maʼlumotlarni bir ish kuni ichida hududiy adliya organlariga taqdim etishi lozim.

11. Hududiy adliya organlari tomonidan statistika maʼlumotlari ushbu Nizomning 2-ilovasidagi hisobot shakllariga muvofiq umumlashtiriladi va har bir hisobot davridan keyingi oyning 10-sanasidan kechiktirmay Oʻzbekiston Respublikasi Adliya vazirligiga taqdim etiladi.

12. Oʻzbekiston Respublikasi Adliya vazirligi hududiy adliya organlari tomonidan taqdim etilgan statistika maʼlumotlarini umumlashtiradi va vazirlikning rasmiy veb-saytiga har bir hisobot davridan keyingi oyning 20-sanasidan kechiktirmay joylashtiradi.

3-bob. Yakuniy qoida

13. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradi.

Mediatorlar tomonidan statistika maʼlumotlarini taqdim etish tartibi toʻgʻrisidagi nizomga 1-ILOVA

Mediatorlar tomonidan taqdim etiladigan statistika hisoboti

SHAKLLARI

Mediatorlar tomonidan statistika maʼlumotlarini taqdim etish tartibi toʻgʻrisidagi nizomga 2-ILOVA

Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari tomonidan umumlashtiriladigan mediatorlar faoliyatiga oid statistika hisoboti

SHAKLLARI