Oʻzbekiston Respublikasining “2026-yil uchun Oʻzbekiston Respublikasining Davlat budjeti toʻgʻrisida”gi Qonuni ijrosini taʼminlash chora-tadbirlari toʻgʻrisida (PQ-388-son)
26.12.2025
Oʻzbekiston Respublikasi Prezidentining
qarori
[Koʻchirma]
Oʻzbekiston Respublikasining “2026-yil uchun Oʻzbekiston Respublikasining Davlat budjeti toʻgʻrisida”gi Qonuni ijrosini taʼminlash maqsadida qaror qilaman:
1. Quyidagilar:
(a) 2026-yilda ikkinchi darajali budjet mablagʻlarini taqsimlovchilarga ajratiladigan budjet mablagʻlarining cheklangan miqdorlari 1-ilovaga muvofiq;
(b) 2026-yil uchun Oʻzbekiston Respublikasining respublika budjeti, Qoraqalpogʻiston Respublikasi budjeti, viloyatlar va Toshkent shahar mahalliy budjetlari aylanma kassa mablagʻlarining yoʻl qoʻyiladigan eng kam miqdorlari 2-ilovaga muvofiq;
(v) 2026-yil uchun Oʻzbekiston Respublikasi Davlat budjeti daromadlari prognozi 3-ilovaga muvofiq;
(g) 2026-yilda foyda va qoʻshilgan qiymat soliqlari toʻliqligicha Oʻzbekiston Respublikasining respublika budjetiga yoʻnaltiriladigan yirik soliq toʻlovchilar roʻyxati 4-ilovaga muvofiq tasdiqlansin.
2. Quyidagi soliq turlari boʻyicha daromadlar prognozining oshirib bajarilgan qismi Qoraqalpogʻiston Respublikasining respublika budjeti, viloyatlarning viloyat budjetlari va Toshkent shahrining shahar budjetida quyidagi miqdorlarda qoldirilsin:
(a) jismoniy shaxslardan olinadigan daromad soligʻi toʻliq hajmda;
(b) foyda soligʻi toʻliq hajmda (mazkur qarorga 4-ilovada koʻrsatilgan yirik soliq toʻlovchilar, Oʻzbekiston Respublikasida doimiy faoliyat olib boruvchi muassasa orqali faoliyat yurituvchi Oʻzbekiston Respublikasi norezidentlari tomonidan, shuningdek, norezidentlarning toʻlov manbaida ushlab qolinadigan daromadlaridan toʻlanadigan foyda soligʻi bundan mustasno);
(v) qoʻshilgan qiymat soligʻi boʻyicha Qoraqalpogʻiston Respublikasida daromadlar prognozining oshirib bajarilgan qismining 100 foizi, qolgan hududlarda esa 60 foizi (mazkur qarorga 4-ilovada koʻrsatilgan yirik soliq toʻlovchilar tomonidan toʻlanadigan qoʻshilgan qiymat soligʻi bundan mustasno). Bunda soliq turlari boʻyicha daromadlar prognozining oshirib bajarilgan qismini hisoblashda yirik soliq toʻlovchilardan tushumlar (mazkur qarorga 4-ilovada koʻrsatilgan yirik soliq toʻlovchilar tomonidan toʻlanadigan foyda va qoʻshilgan qiymat soliqlari bundan mustasno) hududlar kesimida inobatga olinadi.
3. Belgilansinki, 2025-yil IV chorak yakunlari boʻyicha Oʻzbekiston Respublikasining respublika budjetidan Qoraqalpogʻiston Respublikasining respublika budjeti, viloyatlarning viloyat budjetlari va Toshkent shahrining shahar budjetiga daromadlar prognozining oshirib bajarilgan qismini oʻtkazish 2026-yil yanvar oyida amalga oshiriladi va 2025-yilgi hisobotlarda aks ettiriladi.
4. Belgilab qoʻyilsinki, 2026-yil 1-yanvardan boshlab ijtimoiy soliq tushumlari quyidagicha taqsimlanadi:
(a) budjet tashkilotlari boʻyicha:
(i) budjetdan tashqari Pensiya jamgʻarmasiga — 98,0 foiz;
(ii) Davlat ijtimoiy sugʻurta jamgʻarmasiga — 1,2 foiz;
(iii) Bandlikka koʻmaklashish davlat jamgʻarmasiga va Kambagʻallikni qisqartirish davlat maqsadli jamgʻarmasiga — 0,4 foiz;
(iv) Oʻzbekiston kasaba uyushmalari federatsiyasi kengashiga — 0,4 foiz;
(b) boshqa toʻlovchilar boʻyicha:
(i) budjetdan tashqari Pensiya jamgʻarmasiga — 95,9 foiz;
(ii) Davlat ijtimoiy sugʻurta jamgʻarmasiga — 2,5 foiz;
(iii) Bandlikka koʻmaklashish davlat jamgʻarmasiga va Kambagʻallikni qisqartirish davlat maqsadli jamgʻarmasiga — 0,8 foiz;
(iv) Oʻzbekiston kasaba uyushmalari federatsiyasi kengashiga — 0,8 foiz.
5. Belgilansinki, 2026-yil 1-yanvardan boshlab jismoniy shaxslardan olinadigan daromad soligʻi (jismoniy shaxslar mol-mulkni ijaraga berishdan olinadigan yillik daromad toʻgʻrisidagi deklaratsiyaga asosan toʻlaydigan hamda toʻlov manbaida ushlab qolingan jismoniy shaxslarning dividend va foizlar koʻrinishida oladigan daromadlariga solinadigan soliq bundan mustasno) boʻyicha soliq stavkasining 0,2 foiz bandi Ijtimoiy himoya milliy agentligining Davlat ijtimoiy sugʻurta jamgʻarmasiga sugʻurta badali sifatida yoʻnaltiriladi.
6. 2026-yil uchun quyidagi soliq stavkalari:
(a) “Navoiy kon-metallurgiya kombinati” AJ va “Olmaliq kon-metallurgiya kombinati” AJ uchun rentabellik darajasidan kelib chiqqan holda foyda soligʻi boʻyicha 5-ilovaga muvofiq;
(b) yer qaʼridan foydalanganlik uchun soliq boʻyicha quyidagi miqdorlarda:
(i) “Navoiy kon-metallurgiya kombinati” AJ va “Olmaliq kon-metallurgiya kombinati” AJ uchun oltin boʻyicha — 10 foiz va palladiy, kumush, mis boʻyicha — 15 foiz;
(ii) “Navoiyuran” AJ uchun uran boʻyicha — 16 foiz;
(iii) “Oʻzbekneftgaz” AJ uchun neft, tabiiy gaz va gaz kondensati boʻyicha — 15 foiz miqdorida tasdiqlansin.
7. Belgilansinki, mazkur qarorning 6-bandi “b” kichik bandi ikkinchi va uchinchi xatboshilarida nazarda tutilgan soliq stavkalari ushbu korxonalarning barcha litsenziyalangan yer qaʼri uchastkalariga nisbatan qoʻllanadi.
8. Belgilab qoʻyilsinki, 2026-yil 1-yanvardan boshlab:
(a) uy-joy fondining koʻchmas mulk obyektlariga, shu jumladan, ommaviy baholashdan oʻtkazilgan obyektlarga 2018-yilda belgilangan kadastr qiymati asosida hisoblangan jismoniy shaxslarning mol-mulkiga solinadigan soliq summasi 2025-yil uchun hisoblab chiqarilgan soliq summasining 1,3 baravaridan oshmasligi lozim;
(b) uy-joy fondining koʻchmas mulk obyektlari joylashgan yer uchastkalarida jismoniy shaxslardan undiriladigan qishloq xoʻjaligiga moʻljallanmagan yerlar uchun yer soligʻi summasi 2025-yilda hisoblab chiqarilgan soliq summasining 1,3 baravaridan oshmasligi lozim.
9. Qishloq xoʻjaligi vazirligi 2026-yil 1-aprelga qadar “Oʻzdaverloyiha” davlat ilmiy-loyihalash instituti va Soliq qoʻmitasi bilan birgalikda qishloq xoʻjaligi yerlariga ega boʻlgan barcha yuridik shaxslar va yer toifasidan qatʼi nazar issiqxona xoʻjaliklariga yer soligʻini hisoblash uchun ushbu yer maydonlarining normativ qiymati toʻgʻrisidagi maʼlumotlarni yetkazsin.
10. Soliq qoʻmitasi:
(a) Iqtisodiyot va moliya vazirligi bilan birgalikda 2026-yil 1-aprelga qadar xalqaro ekspertlarni jalb qilgan holda yuridik va jismoniy shaxslarni yirik soliq toʻlovchilar toifasiga kiritishning amaldagi mezonlarini takomillashtirgan holda qayta tasdiqlasin;
(b) Iqtisodiyot va moliya vazirligi bilan birgalikda 2026-yil 1-iyulga qadar yuridik shaxslarning mol-mulkiga solinadigan soliq va yuridik shaxslardan olinadigan yer soligʻi boʻyicha berilgan soliq imtiyozlarini maqsadli koʻrsatkichlarga asosan qoʻllash tartibini nazarda tutuvchi qaror loyihasini ishlab chiqib, belgilangan tartibda Vazirlar Mahkamasiga kiritsin;
(v) Kadastr agentligi bilan birgalikda ikki oy muddatda chorvachilik xoʻjaliklarining bino-inshootlari egallagan yer uchastkalarini foydalanish maqsadi boʻyicha xatlovdan oʻtkazgan holda ushbu yer uchastkalariga yer soligʻini hisoblashda Xalq deputatlari tuman va shahar kengashlari tomonidan belgilangan soliq stavkalariga nisbatan 0,2 kamaytiruvchi koeffitsiyent qoʻllanishini taʼminlasin.
11. Shunday tartib oʻrnatilsinki, unga koʻra:
(a) 2026-yil 1-apreldan boshlab yirik soliq toʻlovchilar toifasiga kiritilgan yuridik shaxslarga qoʻshilgan qiymat soligʻining salbiy farq summasini tezlashtirilgan tarzda qoplash tartibi faqatgina mazkur qarorning 4-ilovasiga muvofiq tasdiqlangan roʻyxatda belgilangan yirik soliq toʻlovchilarga nisbatan tatbiq qilinadi. Soliq qoʻmitasi Iqtisodiyot va moliya vazirligi bilan birgalikda ikki oy muddatda yuqoridagilardan kelib chiqib, Soliq kodeksiga oʻzgartirish kiritish boʻyicha qonun loyihasini Vazirlar Mahkamasiga kiritsin;
(b) 2026-yil 1-yanvardan boshlab yirik soliq toʻlovchilar toifasiga kiritilgan yuridik shaxslar tomonidan ustav fondida (ustav kapitalida) 20 foiz miqdorida va undan ortiq ulush bilan yangi tashkil etilgan hamda oʻzaro hisobvaraq-fakturalarni rasmiylashtirgan yuridik shaxslar avtomatik ravishda yirik soliq toʻlovchilar toifasiga kiritiladi.
12. Belgilansinki, 2026-yil 1-apreldan boshlab toʻlov tashkiloti, toʻlov tizimi operatori, marketpleyslar (elektron toʻlov tizimlari) va mikromoliya tashkilotlariga nisbatan Dasturiy mahsulotlar va axborot texnologiyalari texnologik parki, Kibernetika innovatsiyalar IT-parki hamda “Inno texnopark” MCHJ rezidentlariga maxsus rejim doirasida, shu jumladan, boshqa rejimlar doirasida taqdim etilgan soliq va bojxona imtiyozlari qoʻllanmaydi.
13. Birinchi darajali budjet mablagʻlari taqsimlovchilari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari budjet mablagʻlarini tejash va samaradorligini oshirish boʻyicha barcha zaruriy choralarni koʻrsin. Bunda:
(a) Oʻzbekiston Respublikasi konsolidatsiyalashgan budjeti taqchilligi cheklangan miqdorining oshib ketishiga olib kelishi mumkin boʻlgan Oʻzbekiston Respublikasi Davlat budjeti va davlat maqsadli jamgʻarmalari hisobidan qoʻshimcha xarajatlar faqat qoʻshimcha daromad manbai mavjud boʻlganda yoki boshqa xarajatlarni qisqartirish hisobiga amalga oshiriladi;
(b) budjet tashkilotlarining 2026-yil uchun xarajatlar smetasini tuzish jarayonida mebel va ofis jihozlari hamda tovar-moddiy zaxiralarini xarid qilish xarajatlari miqdorini 2025-yilgi miqdorlarda saqlab qolgan holda (maktabgacha taʼlim tashkilotlari, umumtaʼlim muassasalari, oʻrta maxsus va kasbiy taʼlim tashkilotlari, Ijtimoiy himoya milliy agentligining ijtimoiy qoʻllab-quvvatlash markazlari, “Gʻamxoʻrlik” markazlari, sanatoriylar, nogironligi boʻlgan shaxslarni reabilitatsiya qilish va protezlash markazlari, ayollarni reabilitatsiya qilish markazi, “Inson” ijtimoiy xizmatlar markazlari, ixtisoslashtirilgan maktablar va maktab-internatlar, ixtisoslashtirilgan maktabgacha taʼlim tashkilotlari, bolalar uylari, mehribonlik uylari, “SOS — Oʻzbekiston bolalar mahallalari” uyushmasi va kasb-hunar maktablari hamda sogʻliqni saqlash muassasalaridan tashqari) rejalashtiriladi.
14. Qoraqalpogʻiston Respublikasi Joʻqorgʻi Kengesi, Xalq deputatlari viloyatlar va Toshkent shahar kengashlariga tegishincha tumanlar va shaharlar budjetlarining zaxira jamgʻarmalarini 2025-yildagi hajmlardan kam boʻlmagan miqdorda shakllantirish, bunda tuman va shaharlar budjetlari uchun zarur boʻladigan qoʻshimcha mablagʻlarni tegishli yuqori turuvchi budjetlarning zaxira jamgʻarmalari mablagʻlarini kamaytirish hisobiga rejalashtirish tavsiya etilsin.
15. Birinchi darajali budjet mablagʻlarini taqsimlovchilarning 2026 — 2028-yillar uchun budjet mablagʻlaridan foydalanish bilan bogʻliq maqsadli indikatorlari 6-ilovaga muvofiq tasdiqlansin.
16. Belgilansinki:
(a) vazirlik va idoralar rahbarlari Davlat budjetidan ajratilgan mablagʻlarning maqsadli sarflanishi va maqsadli indikatorlarning toʻliq bajarilishi uchun shaxsan masʼul hisoblanadi;
(b) vazirlik va idoralar maqsadli indikatorlarning ijrosi toʻgʻrisidagi hisobotlarni hisobot choragidan keyingi oyning 20-sanasiga qadar Iqtisodiyot va moliya vazirligiga taqdim etadi hamda 25-sanasiga qadar oʻz rasmiy veb-saytlarida joylashtirib boradi;
(v) har chorak yakuni boʻyicha har bir vazirlik va idoraning maqsadli indikatorlari bajarilishi Vazirlar Mahkamasi Rayosati majlisida tizimli va tanqidiy tahlil qilinadi. Bunda vazirlik va idoralarning maqsadli indikatorlar bajarilishida sustkashlik va masʼuliyatsizlikka yoʻl qoʻygan tegishli rahbarlariga taʼsirchan choralar koʻriladi;
(g) tasdiqlangan budjet parametrlariga oʻzgartirish kiritilgan taqdirda, vazirlik va idoralar maqsadli indikatorlarni mablagʻlarning aniqlashtirilgan miqdoriga mutanosib ravishda oʻzgartiradi hamda Iqtisodiyot va moliya vazirligi bilan kelishgan holda Vazirlar Mahkamasiga kiritadi;
17. Vazirlar Mahkamasi birinchi darajali budjet mablagʻlarini taqsimlovchilar uchun belgilangan budjet mablagʻlaridan foydalanish bilan bogʻliq maqsadli indikatorlarning bajarilishi boʻyicha Hisob palatasining tashqi audit xulosasini Oʻzbekiston Respublikasi Oliy Majlisining Qonunchilik palatasiga kiritadi.
18. Iqtisodiyot va moliya vazirligi birinchi darajali budjet mablagʻlarini taqsimlovchilarning budjet mablagʻlaridan foydalanish bilan bogʻliq maqsadli indikatorlari hamda budjet dasturlarining ijrosi toʻgʻrisidagi hisobotlarni hisobot choragidan keyingi ikkinchi oyning 10-sanasiga qadar Oliy Majlis Qonunchilik palatasiga hisobot berish uchun Vazirlar Mahkamasiga kiritib borsin.
19. Iqtisodiyot va moliya vazirligi, Ijtimoiy himoya milliy agentligi, Ekologiya va iqlim oʻzgarishi milliy qoʻmitasi, Maktabgacha va maktab taʼlimi vazirligi, Oliy taʼlim, fan va innovatsiyalar vazirligi, Qishloq xoʻjaligi vazirligi, Suv xoʻjaligi vazirligi hamda Davlat aktivlarini boshqarish agentligining 2026 — 2028-yillar uchun budjet va budjetdan tashqari mablagʻlar budjet dasturlari kesimida ishlab chiqilganligi maʼlumot uchun qabul qilinsin. Bunda mazkur vazirlik va idoralar tomonidan 2026 — 2028-yillar uchun budjet dasturlari 2026-yil 10-yanvarga qadar tasdiqlanadi va ushbu budjet dasturlari Iqtisodiyot va moliya vazirligida roʻyxatdan oʻtkaziladi.
20. Kambagʻallikni qisqartirish va bandlik vazirligi, Madaniyat vazirligi, Sport vazirligi, Transport vazirligi, Qurilish va uy-joy kommunal xoʻjaligi vazirligi hamda Milliy statistika qoʻmitasi 2026-yil 1-avgustga qadar 2027 — 2029-yillar uchun budjet va budjetdan tashqari mablagʻlarni taqsimlashni nazarda tutuvchi budjet dasturlarini ishlab chiqsin va 2027-yil Davlat budjeti loyihasida koʻzda tutish uchun Iqtisodiyot va moliya vazirligiga kiritsin.
21. Belgilansinki, bir oy muddatda dasturiy budjetlashtirish tizimi joriy etilayotgan vazirlik va idoralar tuzilmasida belgilangan shtat birliklari doirasida 3 ta shtat birligidan iborat Budjet dasturlarini shakllantirish, monitoring qilish va ularning ijrosini muvofiqlashtirish boʻlimi tashkil etiladi. Bunda vazirlik va idoralarga budjet dasturlarini shakllantirish jarayonida tarkibiy boʻlinmalarning samaradorlik va natijadorlikka yoʻnaltirilganligini taʼminlash maqsadida oʻz tuzilmalariga tegishli oʻzgartirishlar kiritish tavsiya etiladi.
22. Dasturiy budjetlashtirish amaliyoti joriy etilgan (etilayotgan) vazirlik va idoralar 2027-yildan boshlab budjet dasturlarini shakllantirishda gender tengligi va “yashil” maqsadlar boʻyicha indikatorlarning inobatga olinishini taʼminlasin.
23. Gʻaznachilik xizmati qoʻmitasi 2026-yil 1-yanvardan boshlab davlat hokimiyati va boshqaruvi organlari, vazirlik va idoralarning budjetdan tashqari jamgʻarmalariga majburiy yigʻimlar, bojlar va jarimalar, amaldagi qonunchilikka muvofiq budjetdan tashqari jamgʻarmalarga yoʻnaltiriladigan boshqa manbalar (homiylik mablagʻlari, budjet va budjetdan tashqari jamgʻarmalardan ajratiladigan mablagʻlar hamda tijorat banklariga qoʻyilgan depozitlardan olingan daromadlar bundan mustasno) hisobidan kelib tushgan mablagʻlarning hamda mazkur jamgʻarmalarning boʻsh turgan mablagʻlarini tijorat banklariga joylashtirishdan olingan daromadlarning 40 foizini Iqtisodiyot va moliya vazirligining axborot tizimi orqali avtomatik tarzda Oʻzbekiston Respublikasining respublika budjetiga oʻtkazsin, bundan Sud hokimiyati organlarini rivojlantirish jamgʻarmasiga kelib tushgan mablagʻlar va Majburiy ijro byurosini rivojlantirish jamgʻarmasiga undiriladigan ijro yigʻimi mustasno.
24. Belgilansinki, 2026-yil 1-maydan boshlab:
(a) taʼlim kreditini olish uchun arizalar Iqtisodiyot va moliya vazirligining “Taʼlim krediti” axborot tizimi (talim-krediti.mf.uz) yoki Yagona interaktiv davlat xizmatlari portali (my.gov.uz) orqali taqdim etiladi;
(b) Iqtisodiyot va moliya vazirligi huzuridagi Taʼlim kreditini moliyalashtirish jamgʻarmasi tomonidan tijorat banklariga resurslar Iqtisodiyot va moliya vazirligining “resurs.imv.uz” platformasi orqali ajratiladi.
25. Iqtisodiyot va moliya vazirligi:
(a) Oʻzbekiston Respublikasi Prezidenti Administratsiyasiga:
(i) Davlat budjeti taqchilligini moliyalashtirish manbalarini diversifikatsiya qilish hamda Oʻzbekiston emitentlari uchun xalqaro moliya bozorlaridan mablagʻ jalb qilish uchun qulay sharoit yaratishni nazarda tutgan holda bozor sharoitidan kelib chiqib 2026-yilda Oʻzbekiston Respublikasining navbatdagi suveren xalqaro obligatsiyalarini joylashtirish;
(ii) 2026-yil 1-mayga qadar suveren xalqaro obligatsiyalarni mahalliy fond bozorlarida joylashtirish boʻyicha xalqaro tajribani oʻrgangan holda Oʻzbekistonda ushbu mexanizmni qoʻllash istiqbollari yuzasidan takliflar kiritsin;
(b) 2026-yil 1-avgustga qadar vazirlikning axborot tizimlarida kelgusi yillar uchun budjet tashkilotlari tomonidan taqdim etiladigan xarajat yuzasidan budjet buyurtmalarini (soʻrovlarini) budjet tasnifi boʻyicha budjet buyurtmasini tuzishda foydalanilgan dastlabki maʼlumotlarni elektron shakllantirish mexanizmini ishga tushirsin.
26. Bosh vazir oʻrinbosari — iqtisodiyot va moliya vaziri J.A. Qoʻchqorov va Hisob palatasi (M.R. Abdullayev) ikki hafta muddatda baholashdan oʻtkaziladigan imtiyozlar va davlat tomonidan koʻrsatiladigan qoʻllab-quvvatlash choralari roʻyxatini tasdiqlasin va roʻyxatda belgilangan muddatlarda baholash yakunlari yuzasidan Oʻzbekiston Respublikasi Prezidenti Administratsiyasiga takliflar kiritsin.
27. Vazirlik va idoralar oʻzlari qabul qilgan normativ-huquqiy hujjatlarni uch oy muddatda mazkur qarorga muvofiqlashtirsin hamda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
28. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga 7-ilovaga muvofiq oʻzgartirish va qoʻshimchalar kiritilsin.
29. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlari 8-ilovaga muvofiq oʻz kuchini yoʻqotgan deb hisoblansin.
30. Mazkur qarorning ijrosini samarali tashkil qilishga masʼul va shaxsiy javobgar etib Bosh vazir oʻrinbosari J.A. Qoʻchqorov belgilansin.
31. Qaror ijrosini muhokama qilib borish, ijro uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
32. Belgilansinki, ushbu qaror 2026-yil 1-yanvardan eʼtiboran kuchga kiradi.
Oʻzbekiston Respublikasining Prezidenti Sh. MIRZIYOYEV
Toshkent sh.,
2025-yil 26-dekabr,
PQ-388-son
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 1-ILOVA
2026-yilda ikkinchi darajali budjet mablagʻlarini taqsimlovchilarga ajratiladigan budjet mablagʻlarining cheklangan miqdorlari
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 2-ILOVA
2026-yil uchun Oʻzbekiston Respublikasining respublika budjeti, Qoraqalpogʻiston Respublikasi budjeti, viloyatlar va Toshkent shahri mahalliy budjetlari aylanma kassa mablagʻlarining yoʻl qoʻyiladigan eng kam miqdorlari
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 3-ILOVA
2026-yil uchun Oʻzbekiston Respublikasi Davlat budjeti daromadlari prognozi
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 4-ILOVA
2026-yilda foyda va qoʻshilgan qiymat soliqlari toʻliqligicha Oʻzbekiston Respublikasining respublika budjetiga yoʻnaltiriladigan yirik soliq toʻlovchilar
ROʻYXATI
Izoh: roʻyxatda qayd etilgan korxonalar boshqa korxonalar tarkibiga kirganda, boshqa korxona bilan birlashganda yoki qayta tashkil etilgan holatlarda ushbu roʻyxatga toʻgʻridan-toʻgʻri kiritiladi.
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 5-ILOVA
“Navoiy kon-metallurgiya kombinati” AJ va “Olmaliq kon-metallurgiya kombinati” AJ uchun foyda soligʻi stavkalari
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 6-ILOVA
Birinchi darajali budjet mablagʻlarini taqsimlovchilarning 2026 — 2028-yillar uchun budjet mablagʻlaridan foydalanish bilan bogʻliq maqsadli indikatorlari
* 2027-2028-yillar uchun budjet xarajatlari va maqsadli indikatorlarning reja koʻrsatkichlari kelgusi yillar uchun Davlat budjeti hisobidan ajratiladigan mablagʻlarning cheklangan miqdorlari doirasida qayta tasdiqlanishi mumkin.
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 7-ILOVA
Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2019-yil 28-martdagi “Oʻzbekiston Respublikasi Veterinariya va chorvachilikni rivojlantirish davlat qoʻmitasi faoliyatini tashkil etish toʻgʻrisida”gi PQ-4254-son qarorining 2-bandida:
a) uchinchi xatboshi chiqarib tashlansin;
b) toʻrtinchi va beshinchi xatboshilar tegishincha uchinchi va toʻrtinchi xatboshilar deb hisoblansin.
2. Oʻzbekiston Respublikasi Prezidentining 2019-yil 14-maydagi “Oliy taʼlim muassasalariga test sinovlari orqali qabul qilish tizimini takomillashtirish boʻyicha qoʻshimcha chora-tadbirlar toʻgʻrisida”gi PQ-4319-son qarorining 4-bandida:
a) toʻrtinchi xatboshi chiqarib tashlansin;
b) beshinchi — toʻqqizinchi xatboshilar tegishincha toʻrtinchi — sakkizinchi xatboshilar deb hisoblansin;
3. Oʻzbekiston Respublikasi Prezidentining 2019-yil 27-noyabrdagi “Osiyo taraqqiyot banki ishtirokidagi “Chorvachilik sohasida qoʻshilgan qiymat zanjirini yaratishni rivojlantirish” loyihasini amalga oshirishga doir qoʻshimcha chora-tadbirlar toʻgʻrisida”gi PQ-4538-son qarori 2-bandining beshinchi xatboshisi quyidagi tahrirda bayon etilsin:
“Loyihani amalga oshirish davri 6 yilni (2020 — 2025-yillar) tashkil etadi”.
4. Oʻzbekiston Respublikasi Prezidentining 2020-yil 22-iyundagi “Oʻzbekiston Respublikasining xalqaro shartnomalaridan va xalqaro tashkilotlarga aʼzolikdan kelib chiqadigan majburiyatlarini bajarish tartibini takomillashtirish chora-tadbirlari toʻgʻrisida”gi PQ-4756-son qarorida:
a) 1-ilovada:
12-pozitsiya quyidagi tahrirda bayon etilsin:
15-16-pozitsiyalar quyidagi tahrirda bayon etilsin:
quyidagi mazmundagi 161-pozitsiya bilan toʻldirilsin:
quyidagi mazmundagi 391-pozitsiya bilan toʻldirilsin:
quyidagi mazmundagi 66-pozitsiya bilan toʻldirilsin:
b) 2-ilovaning 5-bandi quyidagi mazmundagi ikkinchi xatboshi bilan toʻldirilsin:
“Budjet va budjetdan tashqari mablagʻlar hisobidan toʻlovchi tashkilot tomonidan toʻlanadigan har qanday ixtiyoriy badallar faqatgina Oʻzbekiston Respublikasi Prezidenti hujjatlariga asosan amalga oshiriladi”.
5. Oʻzbekiston Respublikasi Prezidentining 2021-yil 30-dekabrdagi “Oʻzbekiston Respublikasining “2022-yil uchun Oʻzbekiston Respublikasining davlat budjeti toʻgʻrisida”gi Qonuni ijrosini taʼminlash chora-tadbirlari toʻgʻrisida”gi PQ-73-son qarorining 11-bandida:
a) birinchi xatboshidagi “2026” raqami “2028” raqami bilan almashtirilsin;
b) ikkinchi xatboshidagi “2025” raqami “2027” raqami bilan almashtirilsin.
6. Oʻzbekiston Respublikasi Prezidentining 2022-yil 29-apreldagi “Ijtimoiy himoyaga va yordamga muhtoj aholi qatlamlarini moddiy qoʻllab-quvvatlashga doir qoʻshimcha chora-tadbirlar toʻgʻrisida”gi PQ-230-son qarori 7-bandi toʻrtinchi xatboshisidagi “Moliya vazirligi” soʻzlari “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari” soʻzlari bilan almashtirilsin.
7. Oʻzbekiston Respublikasi Prezidentining 2022-yil 6-iyundagi “Davlat sport-taʼlim muassasalari faoliyatini mutlaqo yangi tizim asosida tashkil qilish chora-tadbirlari toʻgʻrisida”gi PQ-268-son qarorining 10-bandi quyidagi tahrirda bayon etilsin:
“10. Sportni rivojlantirish vazirligi tasarrufidagi mazkur qarorning 1 va 2-ilovalaridagi sport maktablari trenerlarining bazaviy tarif stavkalari 2022-yil 1-sentabrdan oʻrtacha 1,35 baravarga oshirilsin”.
8. Oʻzbekiston Respublikasi Prezidentining 2022-yil 7-iyuldagi “Qoraqalpogʻiston Respublikasida 2022 — 2024-yillarda aholi salomatligini muhofaza qilishni yanada kuchaytirish toʻgʻrisida”gi PQ-310-son qarorining 7-bandi quyidagi mazmundagi uchinchi xatboshi bilan toʻldirilsin:
“Bunda xususiy sherik tomonidan koʻrsatilgan gemodializ xizmatlari uchun toʻlovlar 2022-yildan Oʻzbekiston Respublikasi Sogʻliqni saqlash vazirligi, 2026-yil 1-yanvardan boshlab Davlat tibbiy sugʻurtasi jamgʻarmasi tomonidan amalga oshiriladi hamda mablagʻlarning maqsadli sarflanishi toʻliq nazoratga olinadi”.
9. Oʻzbekiston Respublikasi Prezidentining 2023-yil 11-sentabrdagi “Oʻzbekiston — 2030” strategiyasini 2023-yilda sifatli va oʻz vaqtida amalga oshirish chora-tadbirlari toʻgʻrisida”gi PQ-300-son qarorining 11-bandi “b” kichik bandining uchinchi xatboshisi chiqarib tashlansin.
10. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qarori 10-bandining beshinchi xatboshisi chiqarib tashlansin.
11. Oʻzbekiston Respublikasi Prezidentining 2024-yil 1-fevraldagi “Raqamlashtirish sohasida malakali mutaxassislar tayyorlash faoliyatini qoʻllab-quvvatlash boʻyicha qoʻshimcha chora-tadbirlar toʻgʻrisida”gi PQ-51-son qarorida:
a) 3-band quyidagi tahrirda bayon etilsin:
“3. Shunday tartib oʻrnatilsinki, unga muvofiq quyidagilar Raqamli texnologiyalarni rivojlantirish jamgʻarmasi mablagʻlari hisobidan qoplab beriladi:
har bir bitiruvchi uchun ajratiladigan subsidiya;
xalqaro IT-sertifikatlarga ega yoshlarning oʻqish hamda ushbu sertifikatlarni olish xarajatlarining 60 foizgacha boʻlgan qismini va ingliz tilini bilish boʻyicha B2 va undan yuqori darajadagi sertifikatga ega boʻlgan yoshlarning xalqaro IT-sertifikatlarni olish xarajatlari toʻliq miqdorda”;
b) 5-band oʻz kuchini yoʻqotgan deb hisoblasin.
12. Oʻzbekiston Respublikasi Prezidentining 2024-yil 2-apreldagi “Oilaviy tadbirkorlikni rivojlantirish dasturlari doirasida aholining biznes tashabbuslarini moliyalashtirishni takomillashtirishga doir qoʻshimcha chora-tadbirlar toʻgʻrisida”gi PQ-149-son qarorining 5-bandidagi “2 027” va “790” raqamlari tegishincha “1 220” va “490” raqamlari bilan almashtirilsin.
13. Oʻzbekiston Respublikasi Prezidentining 2024-yil 4-oktabrdagi “Kambagʻallikni qisqartirish va bandlik sohasida davlat siyosatini takomillashtirish va samaradorlikni oshirish chora-tadbirlari toʻgʻrisida”gi PQ-347-son qarorining 12-bandi quyidagi mazmundagi “g” kichik band bilan toʻldirilsin:
“g) 2026-yil 1-yanvardan boshlab tuman (shahar) kambagʻallikni qisqartirish va bandlikka koʻmaklashish boʻlimlariga (tuman (shahar) hokimliklari tuzilmasiga oʻtkazilgan boʻlimlardan tashqari) amaldagi moliyalashtirish tartibi saqlab qolingan holda Kambagʻallikni qisqartirish va bandlik vazirligining Qoraqalpogʻiston Respublikasi, viloyatlar va Toshkent shahar hududiy boshqarmalari moliya-buxgalteriya xizmati tomonidan xizmat koʻrsatiladi”.
15. Oʻzbekiston Respublikasi Prezidentining 2024-yil 25-dekabrdagi “Oʻzbekiston Respublikasining “2025-yil uchun Oʻzbekiston Respublikasining Davlat budjeti toʻgʻrisida”gi Qonuni ijrosini taʼminlash chora-tadbirlari toʻgʻrisida”gi PQ-455-son qarorining 9-bandida:
a) “b” kichik band quyidagi tahrirda bayon etilsin:
“b) respublika ijro etuvchi hokimiyat organlarining boshqaruv xodimlari ish haqi miqdorlarini oshirish (mehnatga haq toʻlashning eng kam miqdorini oshirish bundan mustasno) boʻyicha takliflar kiritish taqiqlansin”;
b) “v” kichik band oʻz kuchini yoʻqotgan deb hisoblansin.
16. Oʻzbekiston Respublikasi Prezidentining 2025-yil 19-martdagi “Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasi faoliyatini samarali tashkil etish chora-tadbirlar toʻgʻrisida”gi PQ-115-son qarorida:
a) 6-bandning “a” kichik bandi quyidagi tahrirda bayon etilsin:
“(a) Qoʻmita boshqaruv xodimlarining lavozim maoshini aniqlashda yagona tarif setkasi boʻyicha mehnatga haq toʻlash razryadlariga koʻra tarif koeffitsiyentlari 3 baravar (Qoʻmita rahbariyatiga 4 baravar) oshirilgan miqdorda qoʻllaniladi”;
b) 1-ilovaning 48-bandi quyidagi tahrirda bayon etilsin:
“48. Qoʻmita boshqaruv xodimlarining lavozim maoshini aniqlashda yagona tarif setkasi boʻyicha mehnatga haq toʻlash razryadlariga koʻra tarif koeffitsiyentlari 3 baravar (Qoʻmita rahbariyatiga 4 baravar) oshirilgan miqdorda qoʻllaniladi”.
17. Oʻzbekiston Respublikasi Prezidentining 2025-yil 17-iyuldagi “Moʻgʻulistonga oliy darajadagi tashrif davomida qishloq xoʻjaligi va oziq-ovqat sohalarida erishilgan kelishuvlarni amalga oshirish chora-tadbirlari toʻgʻrisida”gi PQ-225-son qarorining 3-bandi quyidagi tahrirda bayon etilsin:
“3. Iqtisodiyot va moliya vazirligi boshqa xarajatlarni qayta koʻrib chiqish hisobidan 2027-yil uchun Davlat budjeti parametrlarida ushbu qarorning 2-bandi “b” kichik bandida koʻrsatilgan toʻlovlarni qoplab berish boʻyicha xarajatlarni nazarda tutsin.
Bojxona qoʻmitasi Veterinariya va chorvachilikni rivojlantirish qoʻmitasi bilan birgalikda mazkur tartibdan foydalangan tadbirkorlik subyektlari reyestrini, kechiktirilgan qoʻshilgan qiymat soligʻi summasi koʻrsatilgan xolda Iqtisodiyot va moliya vazirligiga taqdim etsin. Bunda:
(i) Iqtisodiyot va moliya vazirligi taqdim etilgan roʻyxat asosida zarur mablagʻlarni Bojxona qoʻmitasiga oʻtkazib beradi;
(ii) Bojxona qoʻmitasi oʻtkazilgan mablagʻlarni tadbirkorlik subyektlarining shaxsiy hisobvaragʻiga oʻtkazish orqali ularning qarzdorliklarini soʻndirish choralarini koʻradi;
(iii) mazkur tartib doirasida tadbirkorlik subyektlarining shaxsiy hisobvaraqlariga oʻtkazilgan qoʻshilgan qiymat soligʻi summalari hisobga olinmaydi”.
18. Oʻzbekiston Respublikasi Prezidentining 2025-yil 14-avgustdagi “Qoraqalpogʻiston Respublikasini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish toʻgʻrisida”gi PQ-248-son qarorida:
a) 3-band quyidagi tahrirda bayon etilsin:
“3. Iqtisodiyot va moliya vazirligi hamda “Qoraqalpogʻiston Respublikasida loyihalarni amalga oshirish markazi” loyiha ofisi (keyingi oʻrinlarda — Loyiha ofisi) 2026-yil may oyiga qadar aniq chora-tadbirlar koʻrsatilgan Dasturni ishlab chiqib, Vazirlar Mahkamasiga kiritsin”;
b) 6-ilovaning 1-pozitsiyasi “Ijro muddati” ustunidagi “2025-yil yakuniga qadar” soʻzlari “2026-yil may oyiga qadar” soʻzlari bilan almashtirilsin.
19. Oʻzbekiston Respublikasi Prezidentining 2025-yil 19-sentabrdagi “Oʻzbekiston Respublikasi milliy investitsiya jamgʻarmasi faoliyatini yanada takomillashtirish chora-tadbirlari toʻgʻrisida”gi PQ-289-son qarorining 4-bandi quyidagi tahrirda bayon etilsin:
“4. Belgilab qoʻyilsinki, Jamgʻarmaning investitsion portfelidagi korxonalar va tijorat banklarining ustav kapitalida davlat ulushi oshirilgan taqdirda, shu jumladan, xalqaro moliya institutlarining konvertatsiya qilinadigan kredit liniyalari konvertatsiya qilinganda Jamgʻarmaga uning ulushini saqlab qolish uchun mutanosib ravishda aksiyalar oʻtkazib beriladi”.
20. Vazirlar Mahkamasining 2010-yil 23-sentabrdagi “Sport maktablari faoliyatini hamda sport maktablari trenerlari va mutaxassislari mehnatini moddiy ragʻbatlantirish tizimini yanada takomillashtirish toʻgʻrisida”gi 211-son qarorida:
a) 1-ilovaning 30-bandi ikkinchi xatboshisi quyidagi tahrirda bayon etilsin:
“Sport maktabining guruhlari soni, shuningdek, ulardagi oʻquvchi-sportchilar roʻyxati Oʻzbekiston Respublikasi Sport vazirligi, Iqtisodiyot va moliya vazirligi hamda ularning hududiy organlari bilan majburiy tartibda kelishilishi kerak”;
b) 2-ilovada:
23-band quyidagi tahrirda bayon etilsin:
“23. Sport maktablarining direktorlari, direktorlarning oʻquv ishlari, sport, ommaviy sportni rivojlantirish va seleksiya, futbolni rivojlantirish boʻyicha oʻrinbosarlari, instruktor-metodistlari, trener-oʻqituvchilari, raqamlashtirishni joriy qilish boʻyicha mutaxassislari, buxgalterlari, kadrlar boʻyicha (xodimlar bilan ishlash boʻlimi) inspektorlari, tibbiyot xodimlari va xoʻjalik mudirlari mehnatini ragʻbatlantirish maqsadida ularga oʻquvchi-sportchilar yuqori sport natijalariga erishgan taqdirda, bazaviy tarif stavkasidan (lavozim maoshi) kelib chiqib, yuklamasiga (tarif stavkasi) nisbatan, biroq bir stavkadan ortiq boʻlmagan miqdorda quyidagi har oylik ustamalar belgilanadi:
Izoh. Direktorning futbolni rivojlantirish boʻyicha oʻrinbosari lavozimi sport maktablarida joriy etiladi hamda ularga har oylik ustamalar faqat futbol boʻyicha erishilgan yuqori sport natijalari uchun belgilanadi.
Trener-oʻqituvchilar mehnatiga bir nafar oʻquvchi-sportchi uchun normativlar boʻyicha haq toʻlanadigan sport maktablarida jadvalda koʻrsatib oʻtilgan trener-oʻqituvchilarga ustamalar belgilanmaydi”;
25-bandning uchinchi — beshinchi xatboshilaridagi “bazaviy tarif stavkasining” soʻzlari “lavozim maoshining” soʻzlari bilan almashtirilsin.
21. Vazirlar Mahkamasining 2017-yil 11-dekabrdagi “2017 — 2027-yillarda davlat muzeylari faoliyatini takomillashtirish va moddiy-texnik bazasini mustahkamlash boʻyicha kompleks chora-tadbirlar dasturini tasdiqlash toʻgʻrisida”gi 975-son qaroriga 4-ilovada:
a) “Oʻzbekiston Respublikasining respublika budjetidan moliyalashtiriladigan muzeylar” boʻlimining 131-pozitsiyasi chiqarib tashlansin;
b) “Qoraqalpogʻiston Respublikasi budjeti, viloyatlar va Toshkent shahar mahalliy budjetlaridan moliyalashtiriladigan muzeylar” boʻlimi quyidagi mazmundagi 131-pozitsiya bilan toʻldirilsin:
22. Vazirlar Mahkamasining 2018-yil 28-iyundagi “Oʻzbekiston Respublikasi Qishloq xoʻjaligi vazirligining faoliyatini tashkil etishni takomillashtirish toʻgʻrisida”gi 487-son qaroriga 3-ilovaning 2-bandi “a” kichik bandining oltinchi va yettinchi xatboshilari chiqarib tashlansin.
23. Vazirlar Mahkamasining 2018-yil 9-oktabrdagi “Oʻzbekiston Respublikasi Soliq qoʻmitasining moddiy yordam, ijtimoiy himoya, soliq organlarini rivojlantirish va koʻzda tutilmagan xarajatlar maxsus jamgʻarmasi toʻgʻrisidagi nizomni tasdiqlash haqida”gi 811-son qaroriga ilovaning 6-bandidan “hamda jamgʻarma mablagʻlari hisobidan davlat soliq xizmati organlari boshqaruv xodimlari mutaxassislarining qoʻshimcha shtat birliklari jadvali” soʻzlari chiqarib tashlansin.
24. Vazirlar Mahkamasining 2019-yil 12-iyuldagi “Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspeksiyasi faoliyatini tartibga soluvchi normativ-huquqiy hujjatlarni tasdiqlash toʻgʻrisida”gi 575-son qaroriga 3-ilova 11-bandining oʻninchi va oʻn birinchi xatboshilari chiqarib tashlansin.
25. Vazirlar Mahkamasining 2019-yil 15-iyuldagi “Dasturiy mahsulotlar va axborot texnologiyalari texnologik parki faoliyatini tashkil etish chora-tadbirlari toʻgʻrisida”gi 589-son qaroriga ilovaning 18-bandi beshinchi xatboshisi quyidagi tahrirda bayon etilsin:
“har oyda hisobot davridan keyingi oyning 20-kunidan kechikmay Direksiyaning talab qilib olinadigan depozit hisobvaragʻiga jami daromadidan qonunchilik hujjatlari bilan belgilangan miqdorlarda ajratma oʻtkazishi”.
26. Vazirlar Mahkamasining 2019-yil 24-dekabrdagi “Ilm-fan va taʼlim sohasidagi davlat tashkilotlarida ilmiy, ilmiy-pedagogik va mehnat faoliyati bilan shugʻullanuvchi ilmiy darajaga ega xodimlarga qoʻshimcha haq toʻlash tartibi toʻgʻrisida”gi 1030-son qarorida:
a) 3-bandning “v” kichik bandidagi “tashkilotlar” soʻzi “ilm-fan va taʼlim sohasidagi davlat tashkilotlari” soʻzlari bilan almashtirilsin;
b) 1-ilovaning 26-bandi birinchi xatboshisidagi “mazkur Nizom talablari asosida” soʻzlari “qonunchilikda belgilangan tartibda” soʻzlari bilan almashtirilsin.
27. Vazirlar Mahkamasining 2020-yil 14-avgustdagi “Qoʻshilgan qiymat soligʻi hamda chet el yuridik shaxslari bilan bogʻliq soliq maʼmurchiligini takomillashtirish chora-tadbirlari toʻgʻrisida”gi 489-son qaroriga 2-ilova 591-bandining birinchi xatboshisi qoʻyidagi tahrirda bayon etilsin:
“591. Aylanmadan olinadigan soliq toʻlovchilarga soliq solish obyekti sifatida quyidagi xarajat va boshqa daromadlarga bir tomonlama elektron hisobvaraq-faktura rasmiylashtiriladi”.
28. Vazirlar Mahkamasining 2021-yil 24-fevraldagi “Ichki va ziyorat turizmini rivojlantirish boʻyicha qoʻshimcha chora-tadbirlar toʻgʻrisida”gi 100-son qaroriga 5-ilovaning 31-bandidagi “2026” raqami “2027” raqami bilan almashtirilsin.
29. Vazirlar Mahkamasining 2022-yil 21-apreldagi “Ijtimoiy va ishlab chiqarish infratuzilmasini rivojlantirish dasturlarini shakllantirish va davlat investitsiyalarini boshqarish tizimini takomillashtirish boʻyicha qoʻshimcha chora-tadbirlar toʻgʻrisida”gi 206-son qaroriga 2-ilovaning 34-bandida:
a) quyidagi mazmundagi beshinchi xatboshi bilan toʻldirilsin:
“birinchi darajali budjet mablagʻlarini taqsimlovchilar kapital qoʻyilmalar hisobidan obyektlarni loyihalashtirish, qurish (rekonstruksiya qilish) va jihozlash uchun oʻzlariga ajratilgan mablagʻlar boʻyicha xarajatlar yoyilmasini (bazaviy smeta) shakllantiradilar va axborot tizimi (“UzASBO” DM) orqali tasdiqlash uchun kiritadilar”;
b) beshinchi — yettinchi xatboshilar tegishlicha oltinchi — sakkizinchi xatboshilar deb hisoblansin.
30. Vazirlar Mahkamasining 2022-yil 1-avgustdagi “Davlat organlari va tashkilotlarining ichki audit xizmati toʻgʻrisidagi namunaviy nizomni tasdiqlash haqida”gi 416-son qaroriga ilovaning 8-bandi birinchi xatboshisi qoʻyidagi tahrirda bayon etilsin:
“8. Ichki audit xizmati davlat organlari va tashkilotlarining tegishincha markaziy apparati va boshqaruv apparatida mustaqil tarkibiy tuzilma sifatida tashkil etiladi”.
31. Vazirlar Mahkamasining 2023-yil 14-martdagi “Elektron hukumat” tizimining maʼlumotlarni qayta ishlash markazi faoliyatini tashkil etish chora-tadbirlari toʻgʻrisida”gi 107-son qaroriga 1-ilovada:
a) 1-band quyidagi tahrirda bayon etilsin:
“1. Mazkur Nizom “Elektron hukumat” tizimining maʼlumotlarni qayta ishlash markazida davlat organlari va tashkilotlari, startap va sunʼiy intellekt loyihalari, xususiy sektor hamda xorijiy kompaniyalarning axborot tizimlari va resurslarini joylashtirish, saqlash va qayta ishlash tartibini belgilaydi”;
b) 2-bandning uchinchi xatboshisi quyidagi tahrirda bayon etilsin:
“buyurtmachi — “Elektron hukumat” tizimining maʼlumotlarni qayta ishlash markazida oʻzining axborot tizimlari va resurslarini joylashtirishga talabgor boʻlgan yoki joylashtirgan respublika ijro etuvchi hokimiyat organlari, mahalliy ijro etuvchi hokimiyat organlari hamda ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlari, shuningdek, startap va sunʼiy intellekt loyihalarining egalari, xususiy sektor hamda xorijiy kompaniyalar”.
32. Vazirlar Mahkamasining 2024-yil 17-fevraldagi “Xalqaro IT-sertifikatlarga ega boʻlgan yosh mutaxassislarni ragʻbatlantirishga oid qoʻshimcha chora-tadbirlar toʻgʻrisida”gi 95-son qaroriga ilovaning 1-bandidagi “Oʻzbekiston Respublikasi Davlat budjeti” soʻzlari “Raqamli texnologiyalarni rivojlantirish jamgʻarmasi” soʻzlari bilan almashtirilsin.
33. Vazirlar Mahkamasining 2024-yil 29-maydagi “Raqamli texnologiyalar sohasidagi istiqbolli startap loyihalarni qoʻllab-quvvatlash va sohadagi yirik tashkilotlar faoliyatini eksportga yoʻnaltirishga oid qoʻshimcha chora-tadbirlar toʻgʻrisida”gi 303-son qarorida:
a) 9-bandda:
“b” kichik band quyidagi tahrirda bayon etilsin:
“b) IT-park rezidentlari uchun eksportning minimal koʻrsatkichlari hamda mazkur koʻrsatkichlardan kelib chiqqan holda ular tomonidan IT-park direksiyasiga jami daromadidan oʻtkaziladigan ajratmalarning tabaqalashtirilgan miqdorlarini 21-ilovaga muvofiq joriy etish.
Bunda:
eksportning minimal koʻrsatkichlarini kalendar yil davomida xizmatlarni (tovarlarni) eksport qilishdan olinadigan daromadlar ushbu davrdagi jami daromadning 2024-yil 1-oktabrdan boshlab — 10 foizi, 2026-yil 1-apreldan boshlab — 20 foizi, 2027-yil 1-yanvardan boshlab — 35 foizi etib belgilanadi”;
quyidagi mazmundagi “v” kichik band bilan toʻldirilsin:
“v) ajratmalarning tabaqalashtirilgan miqdorlarini 2026-yil 1-apreldan boshlab Oʻzbekiston Respublikasi Prezidentining 2017-yil 30-iyundagi “Respublikada axborot texnologiyalari sohasini rivojlantirish uchun shart-sharoitlarni tubdan yaxshilash chora-tadbirlari toʻgʻrisida”gi PF-5099-son Farmonida nazarda tutilgan imtiyoz va preferensiyalardan foydalanayotgan Kibernetikada innovatsiyalar IT-parki rezidentlari (ishtirokchilari) boʻlgan yuridik shaxslarga tatbiq etish.
Bunda:
Kibernetikada innovatsiyalar IT-parki rezidentlari (ishtirokchilari) boʻlgan yuridik shaxslar uchun eksportning minimal koʻrsatkichlari talabi qoʻllanilmaydi hamda ajratmalar miqdori kalendar yil davomida jami daromadi 5 mlrd soʻmgacha boʻlgan qismida — 1 foiz, 5 mlrd soʻmdan 100 mlrd soʻmgacha boʻlgan qismida — 2 foiz, 100 mlrd soʻmdan yuqori boʻlgan qismida — 3 foizni tashkil etadi;
Kibernetikada innovatsiyalar IT-parkiga oʻz rezidentlarining ajratmalaridan har kalendar yil davomida 50 foizgacha shakllanadigan mablagʻlarning IT, kiberxavfsizlik va mudofaa sanoati sohalarida amalga oshiriladigan startap, ilmiy-tadqiqot va tajriba-konstruktorlik loyihalarni moliyalashtirish uchun maqsadli yoʻnaltirishga ruxsat beriladi”;
yettinchi xatboshidagi “mazkur band “b” kichik bandi toʻrtinchi xatboshisiga” soʻzlari “21-ilovaga” soʻzlari bilan almashtirilsin.
b) quyidagi mazmundagi 21-ilova bilan toʻldirilsin:
“Vazirlar Mahkamasining 2024-yil 29-maydagi 303-son qaroriga 21-ILOVA
IT-park rezidentlari uchun eksportning minimal koʻrsatkichlaridan kelib chiqqan holda IT-park direksiyasiga jami daromadidan oʻtkaziladigan ajratmalarning tabaqalashtirilgan
MIQDORLARI
* mazkur ajratmaning bir foiz bandigacha boʻlgan miqdorini IT-park tomonidan Davlat xavfsizlik xizmati va Mudofaa vazirligiga Raqamli texnologiyalar vazirligi bilan har yili tuziladigan chora-tadbirlar rejalariga muvofiq axborot xavfsizligi va kiberxavfsizlik sohalarida amalga oshiriladigan loyihalarni moliyalashtirish uchun maqsadli yoʻnaltirishga ruxsat beriladi”.
34. Vazirlar Mahkamasining 2024-yil 12-avgustdagi “Oʻzbekiston Respublikasi Oila va xotin-qizlar qoʻmitasi faoliyatini tartibga solish sohasidagi ayrim normativ-huquqiy hujjatlarni tasdiqlash toʻgʻrisida”gi 500-son qarorida:
a) 5-banddagi “soʻmdan kam boʻlmagan” soʻzlari “soʻmgacha” soʻzi bilan almashtirilsin;
b) 1-ilovaning 50-bandi “b” va “v” kichik bandlari oʻz kuchini yoʻqotgan deb hisoblansin.
35. Vazirlar Mahkamasining 2025-yil 8-apreldagi “Uchquduq, Zarafshon, Nurobod shaharlari va Konimex tumanining Zafarobod shaharchasidagi budjet tashkilotlari xodimlariga kompensatsiya xususiyatiga ega boʻlgan ustama toʻlash tartibi toʻgʻrisidagi nizomni tasdiqlash haqida”gi 206-son qaroriga ilovaning 1-bandi quyidagi tahrirda bayon etilsin:
“1. Mazkur Nizom Uchquduq, Zarafshon, Nurobod shaharlari va Konimex tumani Zafarobod shaharchasidagi (keyingi oʻrinlarda — shaharlar) budjet hisobidan moliyalashtiriladigan tashkilotlar, shu jumladan mahallalar uyushmasi va mahallalar (keyingi oʻrinlarda — budjet tashkilotlari) xodimlariga kompensatsiya xususiyatiga ega boʻlgan ustama toʻlash tartibini belgilaydi”.
36. Vazirlar Mahkamasining 2025-yil 8-apreldagi “2025 — 2030-yillarda davlat moliyasini boshqarish tizimini takomillashtirish strategiyasini tasdiqlash toʻgʻrisida”gi 210-son qaroriga 2-ilovada:
a) 9-pozitsiya “Ijro muddatlari” ustunidagi “2026-yil dekabr” soʻzlari “2027-yil dekabr” soʻzlari bilan almashtirilsin;
b) 14-pozitsiya “Ijro muddatlari” ustunidagi “mart” soʻzi “dekabr” soʻzi bilan almashtirilsin;
v) 21-pozitsiya quyidagi tahrirda bayon etilsin:
g) 24-pozitsiya “Ijro muddatlari” ustunidagi “mart” soʻzi “dekabr” soʻzi bilan almashtirilsin;
d) 35-pozitsiya “Ijro muddatlari” ustunidagi “mart” soʻzi “sentabr” soʻzi bilan almashtirilsin;
j) 36-pozitsiya quyidagi tahrirda bayon etilsin:
37. Vazirlar Mahkamasining 2025-yil 23-apreldagi “Oʻzbekiston Respublikasi Qishloq xoʻjaligi vazirligi huzuridagi Agrosanoatni rivojlantirish agentligi faoliyatini tartibga soluvchi normativ-huquqiy hujjatlarni tasdiqlash toʻgʻrisida”gi 255-son qaroriga 1-ilovaning 19-bandi “b” kichik bandida:
a) oltinchi va yettinchi xatboshilar chiqarib tashlansin;
b) sakkizinchi — oʻn ikkinchi xatboshilar tegishincha oltinchi — oʻninchi xatboshilar deb hisoblansin.
38. Vazirlar Mahkamasining 2025-yil 15-maydagi “Oʻzbekiston Respublikasi Iqtisodiyot va moliya vazirligi huzuridagi Kadastr agentligining Koʻchmas mulkni ommaviy baholash milliy markazi faoliyatini tashkil etish toʻgʻrisida”gi 320-son qarorida 3-bandning ikkinchi xatboshisidagi “40” raqami “10” raqami bilan almashtirilsin.
39. Vazirlar Mahkamasining 2025-yil 29-avgustdagi “Oʻzbekiston Respublikasi Telekommunikatsiyalarni tartibga solish agentligi faoliyatini tashkil etish chora-tadbirlari toʻgʻrisida”gi 550-son qaroriga 1-ilovaning 6-bandi quyidagi tahrirda bayon etilsin:
“6. Agentlik yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga, Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, shu jumladan, xorijiy valyutadagi shaxsiy gʻazna hisobvaraqlariga ega boʻladi”.
40. Vazirlar Mahkamasining 2025-yil 22-sentabrdagi “Oʻzbekiston Respublikasi Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspeksiyasi faoliyatini tartibga soluvchi normativ-huquqiy hujjatlarni tasdiqlash toʻgʻrisida”gi 602-son qaroriga 1-ilovaning 40-bandida:
a) “a” kichik bandda:
ikkinchi xatboshi chiqarib tashlansin;
uchinchi va toʻrtinchi xatboshilar tegishincha ikkinchi va uchinchi xatboshilar deb hisoblansin;
b) “b” kichik bandning oltinchi xatboshisi chiqarib tashlansin.
Oʻzbekiston Respublikasi Prezidentining 2025-yil 26-dekabrdagi PQ-388-son qaroriga 8-ILOVA
Oʻzbekiston Respublikasi Prezidentining va Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari
ROʻYXATI
1. Oʻzbekiston Respublikasi Prezidentining 2021-yil 30-dekabrdagi “Oʻzbekiston Respublikasining “2022-yil uchun Oʻzbekiston Respublikasining Davlat budjeti toʻgʻrisida”gi Qonuni ijrosini taʼminlash chora-tadbirlari toʻgʻrisida”gi PQ-73-son qarori 3-bandi.
2. Oʻzbekiston Respublikasi Prezidentining 2022-yil 6-iyundagi “Davlat sport-taʼlim muassasalari faoliyatini mutlaqo yangi tizim asosida tashkil qilish chora-tadbirlari toʻgʻrisida”gi PQ-268-son qarorining 9-bandi va qarorga 4-ilova.
3. Oʻzbekiston Respublikasi Prezidentining 2022-yil 29-iyundagi “Ozodlikdan mahrum etish jazosini oʻtab boʻlgan fuqarolarning ijtimoiy moslashuviga koʻmaklashish tizimini takomillashtirish chora-tadbirlari toʻgʻrisida”gi PQ-299-son qarori.
4. Vazirlar Mahkamasining 2019-yil 17-apreldagi 320-son qarori bilan tasdiqlangan Oʻzbekiston Respublikasi Soliq qoʻmitasi toʻgʻrisidagi nizomning 602-bandi.