Oʻzbekiston Respublikasi Fanlar akademiyasi faoliyatini takomillashtirish chora-tadbirlari toʻgʻrisida (PQ-390-son)

27.12.2025

Oʻzbekiston Respublikasi Prezidentining

qarori

Mamlakatimizda ilm-fanni tizimli isloh qilishning ustuvor yoʻnalishlarini belgilash, fundamental va amaliy tadqiqotlar sifatini oshirish, oliy taʼlim, ilm-fan va ishlab chiqarish oʻrtasidagi integratsiyani mustahkamlash hamda Fanlar akademiyasi ilmiy tashkilotlarining xalqaro miqyosda raqobatbardoshligini taʼminlash maqsadida qaror qilaman:

I. Asosiy maqsadlar va ustuvor yoʻnalishlar

1. Ushbu qarorni qabul qilishning asosiy maqsadlari Fanlar akademiyasining iqtisodiyot sohalari uchun qoʻshilgan qiymat yaratishdagi ishtirokini kengaytirish, quyidagilarni amalga oshirish orqali uning faoliyatini takomillashtirish hisoblanadi:

(a) Fanlar akademiyasida 2030-yilga qadar 1-ilovada belgilangan ustuvor yoʻnalishlar boʻyicha ilmiy tadqiqotlarni yoʻlga qoʻyish;

(b) 2030-yilga qadar Fanlar akademiyasi va uning tizim tashkilotlarida:

(i) yangi ilmiy ishlanmalar soni va tijoratlashtirishdan olinadigan mablagʻlar hajmini 3 baravarga;

(ii) ilmiy xodimlar tarkibida yoshlar ulushini 60 foizgacha;

(iii) nufuzli xalqaro ilmiy nashrlarda chop etilgan maqolalar sonini 4 baravarga;

(iv) akademiklar va professorlarning taʼlim jarayonidagi ishtirokini 5 baravarga;

(v) xalqaro hamkorlikda amalga oshirilgan ilmiy tadqiqotlar sonini 3 baravarga oshirish;

(v) xorijiy mamlakatlarda faoliyat koʻrsatayotgan ilmiy diasporani Oʻzbekiston ilm-faniga reintegratsiya qilish;

(g) Fanlar akademiyasining ilmiy muassasalarini (keyingi oʻrinlarda — ilmiy muassasalar) raqobat tamoyili asosida moliyalashtirish tizimiga oʻtish;

(d) yoshlarning akademik fanlarda ishtirokini kuchaytirish uchun ularni ragʻbatlantirish tizimini yaratish.

II. Real iqtisodiyot tarmoqlariga yangi ishlanmalar joriy etishni tubdan isloh qilish

2. Ilm-fan va sanoat tarmoqlari oʻrtasidagi oʻzaro integratsiyani kuchaytirish, Fanlar akademiyasining yangi ishlanmalarini tijoratlashtirish tizimini tubdan takomillashtirish maqsadida yuridik shaxs maqomiga ega boʻlmagan Fan va sanoat integratsiyasi kengashi (keyingi oʻrinlarda — Integratsiya kengashi) tashkil etilsin.

3. Belgilab quyilsinki, Integratsiya kengashi:

(a) iqtisodiyot tarmoqlariga masʼul vazirlik, korxona va tashkilotlar rahbarlari, shuningdek, ilmiy muassasalar vakillaridan iborat boʻladi hamda uning tarkibi Oʻzbekiston Respublikasi Prezidenti Administratsiyasi rahbari tomonidan tasdiqlanadi;

(b) tegishli tarmoq korxona va tashkilotlarining yaqin va oʻrta hamda uzoq muddatga moʻljallangan rivojlanish rejalaridan kelib chiqqan holda amalga oshirilishi lozim boʻlgan loyihalar roʻyxatini shakllantiradi, muhokama qiladi va tasdiqlaydi;

(v) iqtisodiyot tarmoqlarida ilmiy yechim talab etadigan muammolar roʻyxatini shakllantiradi, uni ilmiy muassasalar oʻrtasida taqsimlaydi hamda ularni moliyalashtirishning manbalarini koʻrsatgan holda davlat tomonidan kafolatlanadigan buyurtmani belgilaydi;

(g) ijobiy baholangan loyihalarni ilmiy muassasalar ilmiy-texnik dasturlariga kiritadi hamda ularning Oliy taʼlim, fan va innovatsiyalar vazirligi tomonidan shakllantiriladigan amaliy va innovatsion grantlar tanlovi dasturlarida ustuvor mavzu sifatida belgilanishini taʼminlaydi;

(d) ilmiy muassasalarda mavjud yangi ishlanmalarning taqdimotini koʻrib chiqadi hamda ijobiy xulosa berilgan taqdirda, ularni real iqtisodiyot tarmoqlarida joriy etishning aniq chora-tadbirlar dasturini belgilaydi.

4. Fanlar akademiyasi hamda Oliy taʼlim, fan va innovatsiyalar vazirligi 2026-yil 1-noyabrga qadar nufuzli xalqaro ilmiy markazlar bilan hamkorlikda materialshunoslik, genetika, nanotexnologiyalar ixtisosliklarida tayanch doktorantura (PhD) va doktorantura (DSc) qoʻshma taʼlim dasturlarini (double degree) ishlab chiqish, shuningdek, xalqaro tashkilotlar grant dasturlariga qoʻshma loyihalar tayyorlash ishlarini amalga oshirsin.

5. 2026-yildan boshlab shunday tartib oʻrnatilsinki, unga koʻra ilmiy faoliyatga oid davlat dasturlari doirasidagi barcha ilmiy loyihalarning sifatini oshirish maqsadida ularni ilmiy ekspertizadan oʻtkazish boʻyicha ilmiy-texnik kengashlar tarkibiga Fanlar akademiyasi taklifiga asosan hamrais nomzodi kiritiladi.

III. Fanlar akademiyasi va uning ilmiy muassasalari faoliyatini takomillashtirish

6. Quyidagilar:

(a) Oʻzbekiston Respublikasi Fanlar akademiyasi faoliyatini takomillashtirish boʻyicha chora-tadbirlar dasturi 2-ilovaga muvofiq;

(b) Oʻzbekiston Respublikasi Fanlar akademiyasining 2030-yilgacha maqsadli koʻrsatkichlari 3-ilovaga muvofiq;

(v) Oʻzbekiston Respublikasi Fanlar akademiyasining ilmiy xodimlari sonini bosqichma-bosqich oshirish rejasi 4-ilovaga muvofiq tasdiqlansin.

7. Belgilab quyilsinki, Fanlar akademiyasida:

(a) boshqaruv apparati xodimlarining umumiy cheklangan soni 50 nafar etib belgilanadi;

(b) umumiy boshqaruv apparati xodimlari doirasida bir nafar prezidentning moliyaviy va xoʻjalik ishlari boʻyicha oʻrinbosari lavozimi kiritiladi;

(v) prezidentning moliyaviy va xoʻjalik ishlari boʻyicha oʻrinbosari Vazirlar Mahkamasi bilan kelishilgan holda Fanlar akademiyasi prezidenti tomonidan lavozimga tayinlanadi va lavozimidan ozod etiladi.

8. Fanlar akademiyasi:

(a) 2026-yil 1-apreldan boshlab oʻz tizimidagi ilmiy muassasalarda xorijiy ekspertlarni jalb etgan holda ilmiy xodimlar faoliyatining eng muhim samaradorlik koʻrsatkichlarini (KPI) va ilmiy muassasalar faoliyat samaradorligini baholash boʻyicha reyting tizimini joriy etsin. Bunda:

(i) ilmiy muassasalar reytingi yil yakuni boʻyicha kompleks indikatorlar asosida aniqlanadi va “yashil”, “sariq”, “qizil” toifalarga ajratiladi;

(ii) reytingdagi toifasidan kelib chiqib, ilmiy muassasalarning yangi loyihalari qoʻshimcha moliyalashtiriladi, ular uchun yangi laboratoriya va boʻlimlar tashkil etiladi yoki shtat birliklari boshqa ilmiy muassasalarga oʻtkazilgan holda yopiladi;

(iii) ilmiy xodimlar uchun KPI ularning faoliyat natijadorligi koʻrsatkichlari boʻyicha ballar asosida baholanadi;

(b) 2026-yil 1-martga qadar xalqaro ekspertlarni jalb etgan holda ilmiy muassasalar faoliyatini toʻliq xatlovdan oʻtkazib, istiqbolsiz va samaradorligi past boʻlgan mavjud ilmiy yoʻnalishlar hamda laboratoriyalar sonini maqbullashtirish orqali yangi ilmiy guruh va laboratoriyalar tashkil etsin;

(v) manfaatdor vazirlik va idoralar bilan birgalikda bir oy muddatda quyidagilarni nazarda tutuvchi Fanlar akademiyasining yangilangan ustavini ishlab chiqsin:

(i) Umumiy yigʻilish va Direktorlar kengashining vakolatlarini qayta koʻrib chiqish, ularning takrorlanuvchi funksiya va vazifalarini qisqartirish;

(ii) Umumiy yigʻilishning ahamiyatini oshirish, akademiklar faolligini kuchaytirish;

(iii) ilmiy muassasalar rahbarlarini lavozimga tayinlash va lavozimidan ozod etish tartibini, shuningdek, yosh chegaralarini aniq belgilash. Bunda, nomzodlar 5 yil muddatga tayinlanadi hamda lavozimni ketma-ket 2-martadan ortiq egallashiga yoʻl qoʻyilmaydi.

9. Oliy taʼlim, fan va innovatsiyalar vazirligi, Fanlar akademiyasining:

(a) Oliy taʼlim, fan va innovatsiyalar vazirligi huzuridagi Ilgʻor texnologiyalar markazi hamda Innovatsion rivojlanish agentligining Xalqaro molekulyar allergologiya markazini Fanlar akademiyasi tizimiga oʻtkazish;

(b) hududlarda ilm-fanni rivojlantirish va yoshlarni ilm-fanga kengroq jalb qilish maqsadida Namangan, Samarqand va Termiz shaharlarida Fanlar akademiyasining hududiy boʻlimlarini (keyingi oʻrinda — hududiy boʻlinmalar) tashkil etish;

(v) Xalqaro ilm-fan kengashining Markaziy Osiyo mintaqaviy ofisini (keyingi oʻrinlarda — Mintaqaviy ofis) tashkil etish;

(g) Fanlar akademiyasi huzuridagi Milliy arxeologiya markazini Antropologiya instituti deb qayta nomlash toʻgʻrisidagi takliflari maʼqullansin.

10. Belgilansinki:

(a) hududiy boʻlinmalar:

(i) yuridik shaxs hisoblanmaydi va Fanlar akademiyasi tizimida faoliyat yuritadi;

(ii) xodimlarining umumiy cheklangan soni 3 nafar etib belgilanadi hamda 5-ilovada koʻzda tutilgan shtat birliklari Fanlar akademiyasining ilmiy xodimlari sonini bosqichma-bosqich oshirish doirasida shakllantiriladi;

(iii) rahbari Fanlar akademiyasi prezidenti tomonidan tegishli hududiy oliy taʼlim yoki ilmiy tashkilotlarning rahbarlari orasidan tanlab olinadi;

(iv) hududiy oliy taʼlim yoki ilmiy tashkilotlarning bino va inshootlariga joylashtiriladi, ularni saqlash hamda kommunal toʻlovlar boʻyicha xarajatlarini qoplash tegishli oliy taʼlim yoki ilmiy tashkilotning budjet va budjetdan tashqari mablagʻlari hisobidan amalga oshiriladi;

(v) ilmiy-tadqiqot ishlarini Fanlar akademiyasi tomonidan tasdiqlangan ish reja doirasida amalga oshiradi;

(b) Mintaqaviy ofis:

(i) Fanlar akademiyasi tizimidagi yuridik shaxs maqomiga ega boʻlmagan boʻlinma hisoblanadi;

(ii) 2 ta shtat birliklaridan iborat boʻladi. Bunda mazkur shtat birliklari Fanlar akademiyasiga mazkur qarorga 4-ilovaga muvofiq koʻzda tutilgan shtatlar doirasida ajratiladi;

(iii) Fanlar akademiyasi boshqaruv apparati binosida joylashtiriladi va uning faoliyati uchun zarur sharoitlar Fanlar akademiyasi tomonidan taʼminlanadi;

(iv) Fanlar akademiyasi prezidenti hamda oliy taʼlim, fan va innovatsiyalar vaziri bilan kelishilgan holda Xalqaro ilm-fan kengashi tomonidan tayinlanadigan va lavozimidan ozod qilinadigan rahbar tomonidan boshqariladi.

IV. Ilmiy xodimlarni ragʻbatlantirish hamda ilmiy tashkilotlarning moddiy-texnika bazasini mustahkamlash

11. Fanlar akademiyasi:

(a) bir oy muddatda ilmiy muassasalarning noyob obyektlari roʻyxatini shakllantirsin va ularni tegishli institutlar tarkibiga kiritsin;

(b) uch oy muddatda Iqtisodiyot va moliya vazirligi hamda Kambagʻallikni qisqartirish va bandlik vazirligi bilan kelishgan holda noyob obyektlar biriktirilgan institutlarga shtat birliklarini ajratish meʼyorlari hamda xodimlar ish haqi miqdorlarini tasdiqlasin.

12. Belgilansinki, 2026-yil 1-yanvardan boshlab:

(a) ilmiy muassasalar tomonidan reagent, reaktiv, sarflov materiallari va butlovchi qismlar xaridi davlat xaridlari boʻyicha maxsus axborot portaliga kamida ikki ish kunida eʼlonni joylashtirish hamda Xarid komissiyasi tomonidan salohiyatli yetkazib beruvchining taklifini yoki ofertasini “taklif soʻrovi” tartiboti asosida oʻrganish orqali amalga oshiriladi;

(b) Fanlar akademiyasining Temuriylar tarixi davlat muzeyi, Alisher Navoiy nomidagi davlat adabiyot muzeyi, Oʻzbekistonning eng yangi tarixi masalalari boʻyicha muvofiqlashtiruvchi metodik markazi, Xalqaro molekulyar allergologiya markazi rahbar va ilmiy xodimlarining ish haqlari ilmiy muassasalarning rahbar va ilmiy xodimlari bazaviy lavozim maoshlariga tenglashtiriladi.

13. 2026-yil 1-yanvardan boshlab ilmiy tadqiqotlarni qoʻllab-quvvatlash, yosh olimlarni jalb qilish va strategik ahamiyatga ega ilmiy yoʻnalishlarni barqaror moliyalashtirish maqsadida Fanlar akademiyasi jamgʻarmasi (keyingi oʻrinlarda — Jamgʻarma) tashkil etilsin.

14. Quyidagilar Jamgʻarma mablagʻlarini shakllantirish manbalari etib belgilansin:

(a) Davlat budjetidan har yili ajratiladigan 80 milliard soʻm miqdoridagi mablagʻlar;

(b) Jamgʻarmaning vaqtincha boʻsh turgan mablagʻlarini tijorat banklariga joylashtirishdan olinadigan daromadlar;

(v) jismoniy va yuridik shaxslarning, shu jumladan, xorijiy homiylarning xayriya mablagʻlari;

(g) xalqaro moliya tashkilotlari va xorijiy davlatlarning grantlari va texnik koʻmak mablagʻlari;

(d) qonunchilik hujjatlarida taqiqlanmagan boshqa manbalar.

15. Quyidagilar:

(a) 2026-yil 1-yanvardan boshlab Fanlar akademiyasi boshqaruv apparati va uning Qoraqalpogʻiston Respublikasi boʻlimi xodimlari uchun Fanlar akademiyasi jamgʻarmasi hisobidan toʻlanadigan moddiy ragʻbatlantirishning turlari 6-ilovaga muvofiq;

(b) Oʻzbekiston Respublikasi Fanlar akademiyasi jamgʻarmasi mablagʻlari yoʻnaltiriladigan xarajatlar yoʻnalishlari 7-ilovaga muvofiq;

(v) Oʻzbekiston Respublikasi Fanlar akademiyasining tashkiliy tuzilmasi 8-ilovaga muvofiq tasdiqlansin.

V. Qaror ijrosini tashkil etish, taʼminlash va nazorat

16. Fanlar akademiyasi Iqtisodiyot va moliya vazirligi, Oliy taʼlim, fan va innovatsiyalar vazirligi bilan birgalikda 2026-yil 1-dekabrga qadar ilmiy muassasalarni zarur asbob-uskunalar bilan taʼminlash boʻyicha 5 yilga moʻljallangan dasturni ishlab chiqsin hamda Vazirlar Mahkamasiga kiritsin.

17. Belgilansinki:

(a) Fanlar akademiyasi ilmiy xodimlari sonini yilma-yil oshirish va Jamgʻarmaga har yili Davlat budjetidan mablagʻlar ajratish Ilm-fanni moliyalashtirish va innovatsiyalarni qoʻllab-quvvatlash jamgʻarmasiga ajratiladigan transfertlarni qisqartirish hisobidan amalga oshiriladi;

(b) mazkur qarorda belgilangan boshqa tadbirlarni amalga oshirish bilan bogʻliq xarajatlar 2026-yildan boshlab Davlat budjeti parametrlarida nazarda tutiladi.

18. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga 9-ilovaga muvofiq oʻzgartirish va qoʻshimchalar kiritilsin.

19. Oʻzbekiston Respublikasi Prezidentining ayrim qarorlari 10-ilovaga muvofiq oʻz kuchini yoʻqotgan deb hisoblansin.

20. Adliya vazirligi Fanlar akademiyasi va Innovatsion rivojlanish agentligi bilan birgalikda uch oy muddatda olimlar tomonidan taklif etilayotgan va yaratilgan ishlanmalarni tijoratlashtirish uchun intellektual mulkni baholash tizimini yoʻlga qoʻysin.

21. Mazkur qarorning ijrosini samarali tashkil qilishga masʼul va shaxsiy javobgar etib Fanlar akademiyasi prezidenti Sh.A. Ayupov hamda oliy taʼlim, fan va innovatsiyalar vaziri K.A. Sharipov belgilansin.

22. Qaror ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti Administratsiyasi rahbarining taʼlimni isloh qilish boʻyicha oʻrinbosari X.U. Umarova zimmasiga yuklansin.

Oʻzbekiston Respublikasining Prezidenti Sh. MIRZIYOYEV

Toshkent sh.,

2025-yil 27-dekabr,

PQ-390-son

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 1-ILOVA

Fanlar akademiyasi tomonidan amalga oshiriladigan ilmiy-tadqiqot ishlarining 2030-yilgacha moʻljallangan ustuvor yoʻnalishlari

1. Biotexnologiya va gen muhandisligi — tibbiyot, qishloq xoʻjaligi va sanoat sohalarida biotexnologiyalarni qoʻllash, preventiv va personallashtirilgan tibbiyot, sogʻlom va uzoq umr koʻrishga yoʻnaltirilgan genom texnologiyalari va farmatsevtika yechimlarini ishlab chiqish;

2. Aqlli materiallar va nanotexnologiyalar — energetika, sogʻliqni saqlash, mashinasozlik va elektronika kabi ustuvor tarmoqlar uchun funksional va moslashuvchan materiallarni yaratish;

3. Sunʼiy intellekt, Big Data va kvant texnologiyalari — sogʻliqni saqlash, taʼlim, ekologiya va iqtisodiyot sohalarida qoʻllash uchun intellektual algoritmlarni rivojlantirish;

4. Qayta tiklanuvchi va vodorod energetikasi, yashil texnologiyalar — quyosh, shamol va vodorod energetikasi kabi barqaror va ekologik xavfsiz energetik tizimlarni qoʻllab-quvvatlash hamda resurs tejamkor va chiqindisiz texnologiyalar uchun ilmiy asoslar yaratish;

5. Tuproq shoʻrlanishiga qarshi kurashish hamda toza suv — tuproq xaritalarini yaratish, yer resurslaridan barqaror foydalanish, hosildorlikni tiklash, agrar sektorni iqlim oʻzgarishiga moslashtirish, suv tanqisligi sharoitida oqilona suv boshqaruvi va tozalash texnologiyalarini ilmiy asoslash;

6. Yadroviy fan va radiatsion texnologiyalar — yadroviy va radiatsion usullarni tibbiyot, sanoat va qishloq xoʻjaligida xalqaro xavfsizlik standartlariga mos ravishda ishlab chiqish va qoʻllash;

7. Raqamli tabiat — ekotizimlarni monitoring qilish, bioxilmaxillikni raqamli modellash va ilmiy maʼlumotlarga asoslangan tabiatni muhofaza qilish yechimlarini joriy etish;

8. Seysmik xavfsizlik — geodinamik jarayonlarni oʻrganish, seysmik hodisalarni monitoring qilish va bashoratlash tizimlarini yaratish orqali tabiiy xatarlarni kamaytirish;

9. Milliy tarix va jamiyat — arxeologik obyektlar va madaniy landshaftlarni tadqiq qilish, jamiyat tafakkurini rivojlantirishga qaratilgan fanlararo fundamental ilmiy tadqiqotlarni amalga oshirish, Oʻzbekistonning boy tarixiy-madaniy merosining ilmiy targʻibotini kuchaytirish;

10. Maʼnaviy meros va raqamli qoʻlyozma — tarixiy qoʻlyozmalar, arxivlar va kolleksiyalarni tadqiq etish va raqamlashtirish, zamonaviy texnologiyalarni jalb etgan holda til, adabiyot va sanʼatning raqamli resurslarini yaratish orqali raqamli bilimlar bazasini kengaytirish.

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 2-ILOVA

Oʻzbekiston Respublikasi Fanlar akademiyasi faoliyatini takomillashtirish boʻyicha

CHORA-TADBIRLAR DASTURI

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 3-ILOVA

Oʻzbekiston Respublikasi Fanlar akademiyasining 2030-yilgacha

MAQSADLI KOʻRSATKICHLARI

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 4-ILOVA

Oʻzbekiston Respublikasi Fanlar akademiyasining ilmiy xodimlari sonini bosqichma-bosqich oshirish

REJASI

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 5-ILOVA

Oʻzbekiston Respublikasi Fanlar akademiyasining Samarqand, Namangan va Surxondaryo viloyatlari hududiy boʻlimlarining

NAMUNAVIY SHTAT JADVALLARI

Izoh:

hududiy boʻlimlar quyidagi oliy taʼlim muassasalari bino va inshootlarida tekin foydalanish huquqi asosida joylashtiriladi:

Samarqand viloyati boʻlimi — Samarqand davlat universiteti;

Namangan viloyati boʻlimi — Namangan davlat universiteti;

Surxondaryo viloyati boʻlimi — Termiz davlat universiteti;

hududiy boʻlimlarning shtat birliklari Fanlar akademiyasining ilmiy xodimlari sonini bosqichma-bosqich oshirish doirasida ajratiladi.

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 6-ILOVA

Fanlar akademiyasi boshqaruv apparati va Qoraqalpogʻiston boʻlimi xodimlarini ragʻbatlantirish

TURLARI

1. Fanlar akademiyasi boshqaruv apparati va Qoraqalpogʻiston boʻlimi xodimlari uchun xodimlarning lavozim maoshiga 200 foizgacha miqdorda oylik ragʻbatlantirish ustama toʻlovlari;

2. Fanlar akademiyasi boshqaruv apparati va Qoraqalpogʻiston boʻlimi xodimlariga (xizmat koʻrsatuvchi va texnik xodimlardan tashqari) koʻp yillik ishlaganlik uchun quyidagi hajmda oylik ustama toʻlovlari:

(a) 1 yildan 3 yilgacha — 0,3;

(b) 3 yildan 5 yilgacha — 0,6;

(v) 5 yildan 10 yilgacha — 0,8;

(g) 10 yildan 15 yilgacha — 1,0;

(d) 15 yildan 20 yilgacha — 1,2;

(j) 20 yildan yuqori — 1,5.

Bunda koʻp yillik ishlaganlik uchun oylik ustama toʻlovlari koeffitsiyentini hisoblashda mazkur xodimlarning Fanlar akademiyasi ilmiy tashkilotlaridagi rasmiy mehnat faoliyati davri hisobga olinadi.

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 7-ILOVA

Oʻzbekiston Respublikasi Fanlar akademiyasi jamgʻarmasi mablagʻlari yoʻnaltiriladigan xarajatlar

YOʻNALISHLARI

1. Xorijdagi iqtidorli vatandosh olimlarni Oʻzbekistonga qaytib kelishini qoʻllab-quvvatlashga qaratilgan reintegratsiya grantlarini tashkil etish.

2. Tayanch doktorantlar uchun nomli stipendiyalar hamda yosh tadqiqotchilar uchun grantlar va mukofotlar taʼsis qilish.

3. Ilmiy tadqiqot jarayonlarini raqamlashtirishni qoʻllab-quvvatlash, maʼlumotlarni saqlash va tahlil qilish uchun innovatsion axborot texnologiyalarini joriy etish, raqamli arxivlar va maʼlumotlar bazalarini rivojlantirish.

4. Ilmiy asbob-uskunalar, reagent, reaktiv, xomashyo, sarflov materiallar va butlovchi qismlarni xarid qilish.

5. Dolzarb ilmiy tadqiqot natijalariga oid monografiya va kitoblar chop etish.

6. Olimlarning malakasini oshirish uchun kurslar, seminarlar va treninglar tashkil etish.

7. Akademik almashinuv dasturlarini tashkil etish, xalqaro ilmiy markazlar bilan qoʻshma ilmiy tadqiqotlar olib borish va chet el mutaxassislarini jalb qilish.

8. Fanlar akademiyasi xodimlarini moddiy ragʻbatlantirish, ularni xorijga xizmat safarlariga yuborish xarajatlarini qoplash.

9. Ochiq maʼruzalar hamda ilmiy anjumanlar oʻtkazish, ilmiy-ommabop adabiyotlar nashr etish, ilmni targʻib qilishda raqamli platformalarni rivojlantirish, ilm-fanni ommalashtirish.

10. “Scopus”, “Web of science” va boshqa maʼlumotlar bazalariga obuna boʻlish xarajatlarini qoplash hamda xalqaro tashkilotlarda vakillik xarajatlarini moliyalashtirish.

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 8-ILOVA

Oʻzbekiston Respublikasi Fanlar akademiyasining

TASHKILIY TUZILMASI

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 9-ILOVA

Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2018-yil 14-iyuldagi “Ilmiy va ilmiy-texnikaviy faoliyat natijalarini tijoratlashtirish samaradorligini oshirish boʻyicha qoʻshimcha chora-tadbirlar toʻgʻrisida”gi PQ-3855-son qarori 6-bandining ikkinchi xatboshisidan “fundamental, amaliy va” hamda “fundamental tadqiqotlar natijalari, shuningdek,” soʻzlari chiqarib tashlansin.

2. Oʻzbekiston Respublikasi Prezidentining 2019-yil 21-noyabrdagi PQ-4526-son qarori bilan tasdiqlangan Oʻzbekiston Respublikasi Fanlar akademiyasi Yadro fizikasi institutining Oʻzbekiston Respublikasi Davlat budjeti hisobidan moliyalashtiriladigan ilmiy xodimlari sonini bosqichma-bosqich kamaytirib borish jadvalining “Ilmiy xodimlar shtat birliklari soni” ustunidagi “2025-yildan boshlab” ustuni chiqarib tashlansin.

3. Oʻzbekiston Respublikasi Prezidentining 2024-yil 22-noyabrdagi PQ-400-son qarori bilan tasdiqlangan Xodimlarining ish haqi miqdorlari oshirilayotgan davlat madaniyat muassasalari va tashkilotlari roʻyxatining “10. Fanlar akademiyasi tizimidagi tashkilotlar” boʻlimi “651. Fanlar akademiyasi Asosiy kutubxonasi” pozitsiyasi bilan toʻldirilsin.

4. Oʻzbekiston Respublikasi Prezidentining 2025-yil 8-sentabrdagi “Yangi avlod muhandislarini tayyorlash va muhandislik taʼlimini rivojlantirishga oid chora-tadbirlar toʻgʻrisida”gi PQ-278-son qarorida:

(a) 1-ilovada:

(i) 9-pozitsiyaning “Yangidan tashkil etiladigan muhandislik maktablari nomi” ustuni quyidagi tahrirda bayon etilsin:

“Mirzaobod tumanidagi muhandislik maktabi”;

(ii) 10-pozitsiyaning “Yangidan tashkil etiladigan muhandislik maktablari nomi” ustuni quyidagi tahrirda bayon etilsin:

“Jarqoʻrgʻon tumanidagi muhandislik maktabi”;

(iii) 11-pozitsiyaning “Yangidan tashkil etiladigan muhandislik maktablari nomi” ustuni quyidagi tahrirda bayon etilsin:

“Angren shahridagi muhandislik maktabi”;

(iv) 12-pozitsiyaning “Oʻrta maxsus va kasbiy taʼlim tashkilotlari nomi*” ustuni quyidagi tahrirda bayon etilsin:

“Fargʻona yuridik texnikumi”;

(b) 2-ilovada:

(i) 9-pozitsiyaning “Muhandislik maktabi” ustuni quyidagi tahrirda bayon etilsin:

“Mirzaobod tumanidagi muhandislik maktabi”;

(ii) 10-pozitsiyaning “Muhandislik maktabi” ustuni quyidagi tahrirda bayon etilsin:

“Jarqoʻrgʻon tumanidagi muhandislik maktabi”;

(iii) 11-pozitsiyaning “Muhandislik maktabi” ustuni quyidagi tahrirda bayon etilsin:

“Angren shahridagi muhandislik maktabi”;

(v) 3-ilovada:

(i) 9-pozitsiyaning “Qurilish-taʼmirlash ishlari amalga oshiriladigan muassasalar nomi” ustuni quyidagi tahrirda bayon etilsin:

“Mirzaobod tumanidagi muhandislik maktabi”;

(ii) 10-pozitsiyaning “Qurilish-taʼmirlash ishlari amalga oshiriladigan muassasalar nomi” ustuni quyidagi tahrirda bayon etilsin:

“Jarqoʻrgʻon tumanidagi muhandislik maktabi”;

(iii) 11-pozitsiyaning “Qurilish-taʼmirlash ishlari amalga oshiriladigan muassasalar nomi” ustuni quyidagi tahrirda bayon etilsin:

“Angren shahridagi muhandislik maktabi”.

5. Oʻzbekiston Respublikasi Prezidentining 2025-yil 23-oktabrdagi PQ-316-son qarori bilan tasdiqlangan 2026-2027-yillarda ilgʻor kasbiy mahorat texnikumlari binolarini qurish, rekonstruksiya qilish, kapital taʼmirlash va obodonlashtirish boʻyicha dasturning 13-14-pozitsiyalari quyidagi tahrirda bayon etilsin:

6. Vazirlar Mahkamasining 2012-yil 2-iyuldagi 190-son qarori bilan tasdiqlangan Dala sharoitlaridagi ishlarda band boʻlgan xodimlarga dala ustamasi toʻlash tartibi toʻgʻrisidagi nizom quyidagi mazmundagi 43-band bilan toʻldirilsin:

“43. Zoologik va botanik tadqiqotlar oʻtkazuvchi Oʻzbekiston Respublikasi Davlat budjeti mablagʻlari hisobiga moliyalashtiriladigan ilmiy tashkilotlarda dala ustamasi zoologik va botanik ilmiy-tadqiqot ishlarini bajaradigan ilmiy xodimlarga, egallab turgan lavozimi va oylik maoshidan qatʼi nazar, dala ustamasi hisoblab yoziladigan sanada Oʻzbekiston Respublikasida belgilangan bazaviy hisoblash miqdoriga nisbatan (koeffitsiyentlarda), biroq har oyda bazaviy hisoblash miqdorining 7 baravaridan ortiq boʻlmagan quyidagi miqdorlarda haq toʻlanadi:

a) kuniga 0,3 — dala sharoitlarida bevosita dala ishlari amalga oshiriladigan obyektlarda ishlaganda;

b) kuniga 0,11 — bazaviy dala shaharchalarida ishlaganda”.

7. Vazirlar Mahkamasining 2020-yil 8-iyundagi “Oʻzbekiston Respublikasi Fanlar akademiyasi ilmiy tashkilotlarini moliyalashtirish tizimini takomillashtirish hamda samaradorligini oshirish chora-tadbirlari toʻgʻrisida”gi 366-son qaroriga 12 — 15, 17 — 29-ilovalarning “Ilmiy xodimlarning shtat birligidagi soni” ustunidagi “2026-yildan boshlab” ustuni chiqarib tashlansin.

8. Vazirlar Mahkamasining 2021-yil 4-maydagi 273-son qarori bilan tasdiqlangan Oʻzbekiston Respublikasi Fanlar akademiyasi Energetika muammolari instituti Oʻzbekiston Respublikasi Davlat budjeti mablagʻlari hisobiga moliyalashtiriladigan ilmiy xodimlari sonini 2025-yil 1-yanvargacha bosqichma-bosqich maqbullashtirish jadvalining “Ilmiy xodimlarning shtat birligidagi soni” ustunidagi “2026-yildan boshlab” ustuni chiqarib tashlansin.

9. Vazirlar Mahkamasining 2006-yil 26-apreldagi 180-F-son farmoyishi bilan tasdiqlangan Islom Karimov nomidagi “Toshkent” xalqaro aeroportida alohida muhim yoʻlovchilarga xizmat koʻrsatish zali toʻgʻrisidagi nizomga ilovaning rus tilidagi matnida 5.7.-band quyidagi tahrirda bayon etilsin:

“5.7. Prezident Akademii nauk Respubliki Uzbekistan, vitse-prezidenti i perviy vitse-prezident — glavniy ucheniy sekretar”.

Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 10-ILOVA

Oʻzbekiston Respublikasi Prezidentining oʻz kuchini yoʻqotgan deb eʼtirof etilayotgan ayrim qarorlari

ROʻYXATI

1. Oʻzbekiston Respublikasi Prezidentining 2017-yil 17-fevraldagi “Fanlar akademiyasi faoliyati, ilmiy-tadqiqot ishlarini tashkil etish, boshqarish va moliyalashtirishni yanada takomillashtirish chora-tadbirlari toʻgʻrisida”gi PQ-2789-son qarorining 8-bandi, 1 va 2-ilovalari.

2. Oʻzbekiston Respublikasi Prezidentining 2021-yil 19-martdagi “Fizika sohasidagi taʼlim sifatini oshirish va ilmiy tadqiqotlarni rivojlantirish chora-tadbirlari toʻgʻrisida”gi PQ-5032-son qarorining 19-bandi hamda 12-ilovasi.