“Tashabbusli budjet jarayonlarini oʻtkazish hamda moliyalashtirish tartibi toʻgʻrisida”gi Nizomga oʻzgartish va qoʻshimchalar kiritish toʻgʻrisida (KQ-280-V-son)
17.12.2025
Oʻzbekicton Respublikasi Oliy Majlisi Senati Kengashining
qarori
Oliy Majlis Qonunchilik palatasi deputatlarining saylov okruglaridagi ijtimoiy masalalarni hal etishdagi tashabbuskorligini kuchaytirish, tashabbusli budjet loyihalarini aholi va davlat oʻrtasida sheriklik asosida moliyalashtirish tartibini joriy qilish va ayrim masalalar boʻyicha tashabbusli budjet jarayonlarini soddalashtirish, xalqimizning kundalik hayotida ijobiy oʻzgarishlarga erishish boʻyicha tizimli harakatlarni izchil davom ettirish maqsadida “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 16-moddasiga asosan Oʻzbekiston Respublikasi Oliy Majlisi Senatining Kengashi qaror qiladi:
1. Oʻzbekiston Respublikasi Prezidentining 2025-yil 29-avgustdagi PQ-264-sonli va 2025-yil 28-noyabrdagi PQ-364-sonli qarorlariga asosan :
tegishli saylov okrugida tashabbusli budjet jarayonlari doirasida gʻolib boʻlmagan loyihalar orasidan har mavsumda bitta loyihani Oliy Majlis Qonunchilik palatasi deputati tanloviga asosan, shuningdek, ijtimoiy ahamiyatga ega loyihalarni aholi va davlat oʻrtasida sheriklik asosida moliyalashtirish amaliyoti joriy etilganligi;
“Eng yaxshi soliq toʻlovchi mahalla” nominatsiyasi gʻoliblari uchun tashabbusli budjet jarayonlari doirasida loyiha kiritish imkoniyati cheklanmasligi hamda sheriklik asosida moliyalashtirishda loyiha qiymatining 75 foizi Davlat budjetidan moliyalashtirilishi belgilanganligi maʼlumot uchun qabul qilinsin.
2. Oʻzbekiston Respublikasi Oliy Majlis Senati Kengashining 2024-yil 30-yanvardagi KQ-666-IV-sonli qarori bilan tasdiqlangan “Tashabbusli budjet jarayonlarini oʻtkazish hamda moliyalashtirish tartibi toʻgʻrisida”gi nizomga 1-ilovaga muvofiq oʻzgartirish va qoʻshimchalar kiritilsin.
3. Tashabbusli budjet jarayoni doirasida loyihalarni sheriklik asosida birgalikda moliyalashtirish tartibi toʻgʻrisidagi nizom 2-ilovaga muvofiq tasdiqlansin.
4. Belgilansinki, tashabbusli budjet jarayonlari doirasida loyihalar ovoz berish bosqichiga oʻtkazilishidan avval:
tabiiy gaz va elektr energiyasi bilan taʼminlash boʻyicha Oʻzbekiston Respublikasi Energetika vazirligi;
ichimlik suv taʼminoti va oqova suv tizimi boʻyicha “Oʻzsuvtaʼminot” AJ loyihani amalga oshirish imkoniyatlari mavjudligi yuzasidan Iqtisodiyot va moliya vazirligiga xulosalar taqdim etadi.
5. Iqtisodiyot va moliya vazirligi hamda boshqa manfaatdor tashkilotlar ushbu Qaror bilan tashabbusli budjet jarayonlariga kiritilgan oʻzgartirish va qoʻshimchalarni aholiga yetkazish boʻyicha zarur choralar koʻrsin.
6. Mazkur Qarorning ijrosini nazorat qilish Oʻzbekiston Respublikasi Oliy Majlisi Senatining Budjet va iqtisodiy masalalar qoʻmitasi raisi E. Gadoyev zimmasiga yuklansin.
Oʻzbekiston Respublikasi Oliy Majlisi Senatining Raisi T. NARBAYEVA
Toshkent sh.,
2025-yil 17-dekabr,
KQ-280-V-son
Oʻzbekiston Respublikasi Oliy Majlisi Senati Kengashining 2025-yil 17-dekabrdagi KQ-280-V-sonli qaroriga 1-ILOVA
“Tashabbusli budjet jarayonlarini oʻtkazish hamda moliyalashtirish tartibi toʻgʻrisida”gi Nizomga kiritilayotgan oʻzgartish va qoʻshimchalar
Oʻzbekiston Respublikasi Oliy Majlis Senati Kengashining 2024-yil 30-yanvardagi KQ-666-IV-sonli qarori bilan tasdiqlangan “Tashabbusli budjet jarayonlarini oʻtkazish hamda moliyalashtirish tartibi toʻgʻrisida”gi Nizomga quyidagi oʻzgartirish va qoʻshimchalar kiritilsin:
1) 2-band quyidagi mazmundagi oʻn ikkinchi xatboshi bilan toʻldirilsin:
“deputat tashabbusi loyihasi — Oliy Majlis Qonunchilik palatasi deputatlari tanloviga koʻra qoʻshimcha ravishda gʻolib deb topilgan loyihalar”;
2) 5-band quyidagi tahrirda bayon etilsin:
“5. Har bir tuman va shahar boʻyicha Iqtisodiyot va moliya organlaridan Tashabbusli budjet masalalariga masʼul etib biriktirilgan xodimlar Ishchi komissiyaning ishchi organi (keyingi oʻrinlarda — ishchi organ) hisoblanadi. Ishchi organ Portalda oʻziga biriktirilgan vakolatlardan elektron raqamli kalit orqali foydalanadi”;
3) 6-bandning
ikkinchi xatboshi quyidagi tahrirda bayon etilsin:
“tuman (shahar)lar budjetlarida Tashabbusli budjet jarayoni uchun rejalashtirilgan mablagʻlar. Bunda, har yili tuman va shahar budjetida tegishli moliya yilida ishtirok etadigan mahallalar sonidan kelib chiqib (tanaffusga tushgan mahallalar mustasno), qoida tariqasida 6 tadan kam boʻlmagan, koʻpi bilan 30 ta loyiha uchun yetarli mablagʻlar rejalashtiriladi”;
quyidagi mazmundagi beshinchi xatboshi bilan toʻldirilsin:
“aholi va davlat oʻrtasida sherikchilik asosida loyihalarni moliyalashtirish maqsadida fuqarolarning ixtiyoriy ravishda yoʻnaltirgan mablagʻlari”;
beshinchi xatboshi tegishincha oltinchi xatboshi deb hisoblansin;
4) quyidagi mazmundagi 61-band bilan toʻldirilsin:
“61. Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi “Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi toʻgʻrisida nizom”ga muvofiq belgilanadi”.
5) 8-bandning beshinchi xatboshi quyidagi tahrirda bayon etilsin:
“Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tegishli moliya yilining 1-yanvar holatiga qayd etilgan aholi va mahallalar sonidan kelib chiqib, har chorak (yil) yakunlari boʻyicha shakllangan qoʻshimcha mablagʻlarning 30 foiz qismini teng taqsimlagan holda tuman (shahar) jamgʻarmalariga yoʻnaltirish boʻyicha takliflarni tasdiqlash uchun tegishincha Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlariga kiritadi”;
6) 9-bandning beshinchi xatboshi quyidagi tahrirda bayon etilsin:
“Tashabbusli budjet jarayoni uchun hukumat qarorlari yoki boshqa hujjatlar asosida qoʻshimcha mablagʻlar ajratilganda — bir hafta muddatda (agar hujjatda boshqa muddat belgilanmagan boʻlsa) qoʻshimcha tarzda gʻolib deb eʼlon qilingan loyihalar uchun ochilgan hisob raqamlariga oʻtkaziladi”;
7) 11-band quyidagi mazmundagi ikkinchi xatboshi bilan toʻldirilsin:
“Bunda, Oʻzbekiston Respublikasi Bosh prokuraturasi huzuridagi Majburiy ijro Byurosi va boshqa undiruvchi organlar tomonidan tuman/shahar hokimliklari huzuridagi fuqarolar tashabbusi jamgʻarmalariga sud va boshqa organlar ijro hujjatlariga asosan undiruvlar qoʻllash taqiqlanadi”.
8) 12-bandning birinchi xatboshi quyidagi tahrirda bayon etilsin:
“12. Gʻolib loyihada nazarda tutilgan tadbirlar toʻliq amalga oshirilib, loyiha foydalanishga qabul qilib olingandan soʻng ushbu loyiha uchun ochilgan hisob raqamidagi qoldiq mablagʻlar (kafolat mablagʻlari bundan mustasno) tejalgan mablagʻ hisoblanadi”;
9) 16-bandning birinchi xatboshi quyidagi tahrirda bayon etilsin:
“16. Vakolatli organ mavsum boshlanishidan kamida yigirma kun avval rasmiy veb-sayt va ommaviy axborot vositalari orqali:”;
10) 17-band quyidagi tahrirda bayon etilsin:
“17. Har bir mavsum qoida tariqasida quyidagi bosqichlarda va muddatlarda oʻtkaziladi:
fuqarolar tomonidan loyihalarni shakllantirish bosqichi — 20 kun;
ishchi komissiya tomonidan loyihalarni saralab olish bosqichi — 20 kun;
targʻibot bosqichi — 7 kun;
ovoz berish bosqichi — 10 kun.
qoʻshimcha ravishda gʻolib loyihalarni aniqlash — 10 kun.
Bosqichlarning davomiyligiga vakolatli organ tomonidan har bir mavsumning oʻziga xosligidan hamda texnologik shartlarni inobatga olgan holda aniqlik kiritilishi mumkin”;
11) 19-band quyidagi mazmundagi uchinchi va toʻrtinchi xatboshi bilan toʻldirilsin:
“Quyidagilarga tashabbusli budjet doirasida ketma-ket ikki marotaba gʻolib deb topilgani munosabati bilan loyiha kiritish imkoniyatini cheklash qoidasi qoʻllanmaydi:
mahalla soni 15 va undan kam boʻlgan tuman va shaharlardagi barcha mahallalarga;
“Eng yaxshi soliq toʻlovchi mahalla” sifatida TOP-100 talik roʻyxatga kirgan mahallalarga;
aholi va davlat oʻrtasida sheriklik asosida moliyalashtiriladigan loyihalarga.
Bunda, loyiha kiritish imkoniyati cheklangan mahallalarga istisno tariqasida sherikchilik asosida loyihalarni ilgari surishga ruxsat etiladi”;
12) quyidagi mazmundagi 191-band bilan toʻldirilsin:
“191. Agar yil davomida loyiha kiritish imkoniyati cheklangan mahallalar boshqa mahallalar bilan birlashtirilsa, loyiha kiritish boʻyicha cheklov birlashish natijasida hosil boʻlgan (yoki yangi tashkil etilgan) mahalla uchun tegishli davr mobaynida amal qiladi.
Agar tanaffusga tushgan mahalla hududida yangi mahalla tashkil etilsa (mahalla hududi boʻlinsa), ushbu hudud boʻyicha soʻnggi ikki mavsumda gʻolib boʻlgan loyihalar qaysi mahalla hududiga tegishli boʻlsa ushbu mahallaga nisbatan tanaffus saqlab qolinadi.”;
13) 22-band quyidagi tahrirda bayon etilsin:
“22. Loyihalarni amalga oshirish turiga koʻra qurilish-taʼmirlash yoki jihozlash yoʻnalishlari boʻyicha ilgari surilishi mumkin. Bir loyiha tarkibida ikki xil turdagi tadbirlar kiritilishiga ruxsat berilmaydi.
Jihozlash boʻyicha xarid qilinishi ruxsat etilgan tovar (xizmat)lar roʻyxati vakolatli organ tomonidan tegishli vazirliklar bilan kelishilgan holda tasdiqlanadi.
Bunda, ruxsat etilgan tovar (xizmat)lar roʻyxati tegishli vazirliklar tomonidan har mavsum boshlanishidan kamida oʻn kun avval vakolatli organga taqdim etilishi lozim. Roʻyxat taqdim etilmagan hollarda tegishli soha boʻyicha jihozlash loyihalarini shakllantirish imkoniyati cheklanadi.”;
14) 23-bandning
ikkinchi xatboshi quyidagi tahrirda bayon etilsin:
“loyihada aks etgan muammo/tadbir tegishli tuman (shahar) hududiga tegishli boʻlishi (maʼlum bir tuman (shahar)ga tegishli boʻlgan (roʻyxatdan oʻtgan) ammo joylashuvi boʻyicha boshqa tuman (shahar) hududida joylashgan tashkilotlar bundan mustasno);”
beshinchi xatboshi quyidagi tahrirda bayon etilsin:
“jamoatchilik tomonidan bildirilgan takliflar idoraviy yoki shaxsiy xususiyatga ega boʻlmasligi (barcha turdagi avtomashinalar, turar joy, bino-inshootlarni xarid qilish, maʼmuriy binolarni taʼmirlash);”
oltinchi xatboshi quyidagi tahrirda bayon etilsin:
“xoʻjalik yurituvchi subyekt sifatida faoliyat yuritmasligi va tadbirkorlik faoliyatini qoʻllab-quvvatlamasligi;”
oʻninchi xatboshi quyidagi tahrirda bayon etilsin:
“loyihani amalga oshirishning umumiy qiymati qurilish-taʼmirlash loyihalari boʻyicha bazaviy hisoblash miqdorining toʻrt ming, jihozlash loyihalari boʻyicha ikki ming barobaridan oshmasligi lozim.”;
15) 25-bandning ikkinchi xatboshi quyidagi tahrirda bayon etilsin:
“Bunda kelib tushgan loyihalar Ishchi komissiya tomonidan buyurtmachilarga saralash bosqichining dastlabki kunidan kechiktirilmasdan yuborilishi taʼminlanadi.”;
16) 26-banddagi “Namunaviy” degan soʻzi chiqarib tashlansin;
17) 27-band quyidagi tahrirda bayon etilsin:
“27. Buyurtmachilar tomonidan loyihalar qabul qilingan kundan boshlab 10 ish kuni mobaynida qonun hujjatlarida belgilangan mezonlarga muvofiqligi yuzasidan loyihalarni koʻrib chiqadi.
Bunda, buyurtmachilar belgilangan mezonlarga muvofiq loyihalarni qabul qilish yoki mezonga zid loyihalarni asoslantirilgan holda rad etish yuzasidan ishchi komissiyaga xulosa taqdim etadi. Taqdim etilgan xulosada qabul qilingan loyihalarning hisob-kitoblar asosida dastlabki qiymati koʻrsatilishi shart.
Umumtaʼlim maktablari hamda maktabgacha taʼlim muassasalari boʻyicha loyihalarning dastlabki qiymatiga istisno tariqasida tegishincha tuman (shahar) maktabgacha va maktab taʼlimi boʻlimining tegishli boʻlinmalar tomonidan aniqlik kiritiladi. Bunda, tegishli boʻlinmalar loyihani amalga oshirish boʻyicha dastlabki texnik smetani Ishchi komissiyaga taqdim etishi shart.”;
18) 28-band quyidagi tahrirda bayon etilsin:
“28. Loyihalarni amalga oshirish uchun talab etiladigan mablagʻning dastlabki qiymati tegishliligiga koʻra buyurtmachilar xulosasi yoki tegishli boʻlinmalarning hisob-kitoblari asosida Ishchi organ tomonidan Portalga kiritiladi.”;
19) 29-bandning ikkinchi xatboshi quyidagi tahrirda bayon etilsin:
“Mazkur qaror asosida Ishchi organ Portalda rad etiladigan va ovoz berishga oʻtkaziladigan loyihalar roʻyxatini shakllantiradi hamda masʼul xodimlar tomonidan elektron kalit orqali ushbu roʻyxat tasdiqlanadi”;
20) 37-band quyidagi tahrirda bayon etilsin:
“37. Har bir tuman (shahar)da loyihalar gʻolib deb topilishi uchun 50 tadan kam boʻlmagan ovozlarga ega boʻlishi lozim”;
21) 38-band quyidagi mazmundagi oltinchi xatboshi bilan toʻldirilsin:
“Agar ovoz berish bosqichi yakunlariga koʻra, ayrim loyihalar teng ovoz toʻplagan boʻlsa gʻoliblarni aniqlashda ushbu loyihalardan mazkur ovozni Portalda birinchi boʻlib qayd etgan loyiha tanlab olinadi.”;
22) 381-bandning
birinchi xatboshi quyidagi tahrirda bayon etilsin:
“Ovoz berish jarayoni davomida fuqarolar tomonidan loyihalarga majburiy ovoz toʻplashga jalb etilishi yuzasidan shikoyatlar kelib tushsa, vakolatli organ tomonidan mazkur holatga aniqlik kiritish yuzasidan mehnat munosabatlari boʻyicha vakolatli tashkilotga soʻrov yuboriladi.”;
ikkinchi xatboshi quyidagi tahrirda bayon etilsin:
Agar holat oʻz tasdigʻini topsa majburiy ovoz toʻplangan loyihalarni ovoz berish bosqichidan chetlatish yoki gʻoliblar roʻyxatidan chiqarish boʻyicha vakolatli organ tomonidan tegishli tuman (shahar) xalq deputatlari Kengashiga taqdimnoma yuboriladi.”;
23) 40-bandning
birinchi xatboshi quyidagi tahrirda bayon etilsin:
“Gʻoliblar aniqlanganidan soʻng Jamgʻarmada shakllangan qoldiq mablagʻlar qoʻshimcha gʻolib loyihalarni aniqlashga, gʻolib deb topilgan loyihalarning yakuniy qiymatiga aniqlik kiritilishi munosabati bilan qoʻshimcha talab etiladigan farqni qoplashga yoki kelgusida oʻtkaziladigan tashabbusli budjet jarayonlariga yoʻnaltiriladi.”;
ikkinchi va uchinchi xatboshilari chiqarib tashlansin;
24) quyidagi mazmundagi 401-band bilan toʻldirilsin:
“401. Ovoz berish bosqichi yakunlangandan soʻng gʻolib boʻlmagan loyihalar orasidan qoʻshimcha ravishda gʻolib loyihalarni aniqlash bosqichi oʻtkaziladi. Ushbu bosqich ovoz berish jarayoni yakunlangan kundan boshlab oʻn kun davomida oʻtkaziladi.
Qoʻshimcha gʻolib loyihalar quyidagi usulda aniqlanishi mumkin:
xalq deputatlari tuman (shahar) kengashlari tomonidan Jamgʻarmaga qoʻshimcha mablagʻ yoʻnaltirish orqali;
Oliy Majlis Qonunchilik Palatasi deputatlari tomonidan tegishli saylov okruglaridagi loyihalardan birini Portalda tanlash orqali.”;
25) quyidagi mazmundagi 402-band bilan toʻldirilsin:
“402. Xalq deputatlari tuman (shahar) kengashlariga mahalliy budjetning qoʻshimcha mablagʻlari yoki iqtisod qilinib Jamgʻarmaga qaytarilgan mablagʻlar hisobidan keyingi oʻrinlardagi loyihalarni (ushbu loyihalarga yetmagan mablagʻni toʻliq ajratgan holda) qoʻshimcha tarzda gʻolib deb eʼlon qilish vakolati beriladi.
Bunda, tegishli xalq deputatlari tuman (shahar) kengashlari Jamgʻarmaga mablagʻlar oʻtkazilganligi hamda qoʻshimcha gʻoliblarni aniqlash yuzasidan vakolatli organga ovoz berish jarayoni yakunlangan kundan boshlab 10 kun ichida soʻrov yuborishi lozim.”;
26) quyidagi mazmundagi 403-band bilan toʻldirilsin:
“403. Qoʻshimcha gʻolib loyihalarni aniqlash bosqichi doirasida Oliy Majlis Qonunchilik palatasi deputatlariga tegishli saylov okruglarida gʻolib boʻlmagan loyihalar orasidan bitta loyihani deputat tashabbusi loyihasi sifatida qoʻshimcha ravishda gʻolib deb eʼlon qilish vakolati beriladi.
Deputatlar saylovchilarning manfaatlarini inobatga olgan holda oʻzlarining Portaldagi shaxsiy sahifalari orqali loyihalardan birini tanlaydi hamda ushbu loyihalar Portalda gʻolib loyihalar roʻyxatiga kiritiladi.
Deputatlar tomonidan tanlangan loyihalar Oʻzbekiston Respublikasi respublika budjetidan moliyalashtiriladi. Bunda, ushbu loyihalar uchun mablagʻlar tegishli tuman (shahar) Jamgʻarmalariga oʻtkazib beriladi.
Portalda deputat tashabbusi asosida moliyalashtiriladigan loyihalar uchun alohida sahifa tashkil etilib, shu turdagi barcha loyihalarning jamoatchilik uchun ochiq roʻyxati yuritiladi.”;
27) quyidagi mazmundagi 404-band bilan toʻldirilsin:
“404. Deputatlar tomonidan loyihalarni tanlab olishda qoʻyidagilar inobatga olinadi:
loyiha deputat saylangan tegishli saylov okrugi hududida joylashgan boʻlishi;
loyiha ovoz berish bosqichiga oʻtgan hamda mazkur Nizom bilan belgilangan eng kam ovoz sonini toʻplagan boʻlishi;
birgalikda moliyalashtirish amaliyoti doirasida ishtirok etib sherikchilik asosida loyiha amalga oshirilayotgan mahallaga tegishli loyiha boʻlmasligi.
Bunda, bir mahalladan ketma-ket ikki mavsumda deputat tashabbusi sifatida loyihalarni tanlab olinishiga yoʻl qoʻyilmaydi.
Agar tegishli mavsum doirasida qoʻshimcha gʻolib loyihalarni aniqlash bosqichi yakuniga qadar deputatlar tomonidan qoʻshimcha gʻoliblar aniqlanmasa (loyihalar tanlanmasa), deputatlar oʻz vakolatidan foydalanmagan deb hisoblanadi hamda bu kelgusi mavsum(lar)da ushbu vakolatdan foydalanish huquqini bermaydi.”;
28) 47-bandning ikkinchi xatboshidagi “Namunaviy” degan soʻz chiqarib tashlansin;
29) 52-band quyidagi mazmundagi ikkinchi xatboshi bilan toʻldirilsin:
“Gʻolib deb topilgan loyihalar uchun nazarda tutilgan mablagʻlarni oʻtkazib berilishini asossiz tarzda kechiktirilishiga yoʻl qoʻyilmaydi.”;
30) 64-band quyidagi tahrirda bayon etilsin:
“64. Jamgʻarma mablagʻlari hisobidan 2025-yilga qadar xarid qilingan avtotransport vositalariga vakolatli organ tomonidan taqdim etilgan shablon boʻyicha maxsus belgi — stikerlar joylashtiriladi. Maxsus belgilari oʻrnatilmagan transport vositalaridan foydalanish taqiqlanadi.
Ishchi komissiya har yili 25-yanvarga qadar mazkur Nizomning 8-ilovasida keltirilgan shaklda jamgʻarma mablagʻlari hisobidan xarid qilingan avtotransport vositalaridan foydalanishi yuzasidan hisobotni mahalliy hokimlikning rasmiy veb-sayti hamda Portal orqali jamoatchilikka eʼlon qilib boriladi.”;
31) 75-band quyidagi tahrirda bayon etilsin:
“75. Tashabbusli budjet jarayonlari doirasida gʻolib deb topilgan qurilish-taʼmirlash bilan bogʻliq loyihalarni amalga oshirishda barcha turdagi buyurtmachi korxonalarning saqlash xarajatlari uchun toʻlovlar shaharsozlik hujjatlarini ekspertiza qilish Respublika markazining xulosasiga asosan aniqlangan loyiha yakuniy qiymatining uch foizidan ortmasligi lozim.
Bunda buyurtmachi korxonalarning saqlash xarajatlari uchun toʻlovlar dastlab boʻnak sifatida 50 foiz qismi, obyekt foydalanishga topshirilgandan soʻng qolgan 50 foiz qismi toʻlab beriladi.”;
32) 97-band quyidagi mazmundagi ikkinchi xatboshi bilan toʻldirilsin:
“Nazorat tadbirlari yakunlariga koʻra aniqlangan kamomad mablagʻlari toʻliq hajmda tegishli Jamgʻarmalarga qaytariladi.”;
33) 1-ilova quyidagi mazmundagi 41-bosqichi bilan toʻldirilsin:
34) 1-ilovaning 5-bosqichi quyidagi tahrirda bayon etilsin:
35) 1-ilova quyidagi mazmundagi 51-bosqichi bilan toʻldirilsin:
36) 2-ilovaning sarlavhasidan “shakllantirish” degan soʻz chiqarib tashlansin;
37) 2-ilovaning 5 va 6-bandlari quyidagi tahrirda bayon etilsin:
38) 3-ilovaning 7-bandi chiqarib tashlansin;
sakkizinchi — yigirmanchi bandlari tegishincha yettinchi — oʻn toʻqqizinchi bandlar deb hisoblansin.
39) quyidagi mazmundagi 8-ilova bilan toʻldirilsin:
“Tashabbusli budjet jarayonlarini oʻtkazish hamda moliyalashtirish tartibi toʻgʻrisidagi Nizomga 8-ILOVA
Tashabbusli budjet jarayoni doirasida xarid qilingan transport vositalari holati toʻgʻrisida maʼlumot
Oʻzbekiston Respublikasi Oliy Majlisi Senati Kengashining 2025-yil 17-dekabrdagi KQ-280-V-sonli qaroriga 2-ILOVA
Tashabbusli budjet jarayoni doirasida loyihalarni sheriklik asosida birgalikda moliyalashtirish tartibi toʻgʻrisida
NIZOM
1-bob. Umumiy qoidalar
1. Ushbu Nizom tashabbusli budjet jarayoni doirasida aholi va davlat budjeti mablagʻlari hisobidan loyihalarni sherikchilik asosida birgalikda moliyalashtirish tartibini belgilaydi.
2. Aholi va davlat oʻrtasida sherikchilik asosida birgalikda moliyalashtirish (keyingi oʻrinlarda birgalikda moliyalashtirish) — fuqarolar tomonidan ijtimoiy ahamiyatga ega masalalarni hal etish maqsadida loyihalarni aholi va budjet mablagʻlari hisobidan amalga oshirish shakli hisoblanadi.
3. Ushbu tartib Tashabbusli budjet jarayoni doirasida amalga oshiriladi.
4. Birgalikda moliyalashtirish amaliyoti doirasida aholi tomonidan loyihaning 50 foizi hamda budjet mablagʻlari hisobidan qolgan 50 foiz qismi moliyalashtiriladi.
Bunda istisno tariqasida “Eng yaxshi soliq toʻlovchi mahalla” roʻyxatiga kirgan mahallalar (keyingi oʻrinlarda alohida mahallalar) tomonidan loyiha qiymatining 25 foiz qoplab berilsa, qolgan 75 foiz budjet mablagʻlari hisobidan ajratiladi.
Birgalikda moliyalashtirish uchun har yili Davlat budjetida tegishli mablagʻlar rejalashtiriladi.
5. Aholi va davlat oʻrtasida sherikchilik asosida birgalikda moliyalashtiriladigan loyihalar (keyingi oʻrinlarda sherikchilik loyihalari) jamoaviy foydalanishdagi infratuzilma obyektlariga (ichki yoʻllar, ichimlik suvi taʼminoti, kanalizatsiya, elektr taʼminoti, koʻcha yoritgichlari yoʻnalishlari va shu kabilarga) oid boʻlishi lozim.
Barcha budjet tashkilotlariga sherikchilik loyihalarini amalga oshirilishiga yoʻl qoʻyilmaydi.
6. Bir mavsumda har bir mahallaga faqat bitta loyihani sherikchilik asosida amalga oshirishga ruxsat beriladi.
7. Birgalikda moliyalashtirish doirasida loyihalarni sherikchilik asosida amalga oshirish mutlaqo ixtiyoriy hisoblanadi. Majburiy ravishda fuqarolardan pul mablagʻlarini undirish yoki pul toʻplashga undash taqiqlanadi va bunday harakatlar qonunchilikda belgilangan tartibda javobgarlikka tortish uchun asos boʻladi.
2-bob. Sherikchilik loyihalarini shakllantirish va saralash
8. Sherikchilik loyihalari fuqarolar tomonidan Tashabbusli budjet jarayonining tegishli mavsumi uchun loyiha kiritish bosqichi doirasida anʼanaviy ravishda “Ochiq budjet” axborot portali (keyingi oʻrinlarda Portal) orqali ilgari suriladi.
Bunda, fuqaro loyihani shakllantirishda Portalda “sherikchilik asosida moliyalashtirish” bandini tanlaydi.
9. “Sherikchilik asosida moliyalashtirish” bandi tanlangan loyihalar boʻyicha loyiha tashabbuskorlariga ommaviy oferta taqdim etiladi hamda fuqaro rozilik bildirgandan soʻng, loyiha “birgalikda moliyalashtirish”da ishtirok etish boʻyicha talabgor sifatida qayd etiladi.
10. “Birgalikda moliyalashtirish”da ishtirok etish boʻyicha ommaviy oferta ilovaga muvofiq taqdim etiladi.
11. Sherikchilik loyihalarini amalga oshirish boʻyicha bir mahalladan bir nechta talabgorlar (loyihalar) kelib tushsa, ishchi komissiya tomonidan tegishli mahalla raisining tavsiyasi asosida bitta loyiha sherikchilik loyihasi sifatida roʻyxatga olinadi.
Mahalla raisining tavsiyasi asosida tanlab olinmagan loyihalar anʼanaviy loyihalar sifatida ishtirok etadi.
12. Sherikchilik loyihalari “Tashabbusli budjet jarayonlarini oʻtkazish hamda moliyalashtirish tartibi toʻgʻrisida”gi Nizomda belgilangan mezonlarga muvofiq saralab olinadi.
13. Ishchi komissiya Portalda roʻyxatga olingan barcha sherikchilik loyihalarini ular kelib tushgan kundan boshlab tegishli buyurtmachilarga loyihani amalga oshirish texnik imkoniyatlari mavjudligi hamda qiymatiga aniqlik kiritish boʻyicha xulosa olish uchun yuboradi.
Buyurtmachilar tomonidan taqdim etilgan xulosalar asosida sherikchilik loyihalari keyingi bosqichga oʻtkaziladi yoki rad etiladi.
14. Loyihalarni saralash bosqichida sherikchilik loyihalariga ustuvorlik beriladi hamda saralash bosqichida mazkur tartibning 13-bandiga muvofiq xulosalar mavjud boʻlgan hollarda ushbu loyihalarni muddatidan avval keyingi bosqichga oʻtkazilishiga ruxsat beriladi.
15. Ishchi organ saralash bosqichidan oʻtgan sherikchilik loyihalari boʻyicha bir kun muddatda:
tegishli mahalla uchun hokimlik qoshida budjetdan tashqari maxsus tranzit hisobraqam (keyingi oʻrinlarda tranzit hisobraqam) ochadi hamda ushbu maʼlumotlarni Portalda loyihaning sahifasida aks ettiradi;
sherikchilik loyihalari keyingi bosqichga oʻtganligi yuzasidan loyiha tashabbuskorlarini xabardor qiladi. Bunda, loyiha tashabbuskorlariga mablagʻlarni toʻplash uchun ochilgan tranzit hisobraqam SMS xizmati orqali taqdim etiladi.
3-bob. Aholi tomonidan mablagʻlarni yoʻnaltirish
16. Tranzit hisobraqamga aholi tomonidan pul mablagʻlarini kirim qilish tegishli mavsum uchun ovoz berish bosqichi boshlangunga qadar davom etadi.
Agar ovoz berish bosqichi boshlangunga qadar tranzit hisobraqamda loyiha qiymatining 50 foiz (alohida mahallalar uchun 25 foiz) miqdorida mablagʻlar toʻplanmasa ushbu loyihalar ovoz berish bosqichiga oʻtkaziladi hamda keyinchalik kelib tushadigan mablagʻlar loyihani sherikchilik asosida moliyalashtirish uchun inobatga olinmaydi.
17. Aholi tomonidan mablagʻlar tegishli mahalla uchun ochilgan tranzit hisobraqamlarga toʻlovchining ism-sharifi va JSHSHIR raqami koʻrsatilgan holda kirim qilinadi.
18. Tranzit hisobraqamga mablagʻlar milliy valyuta — soʻmda, naqd yoki naqdsiz koʻrinishda qabul qilinishi mumkin.
19. Kirim qilingan mablagʻlarni Portalda loyiha sahifasida real vaqt rejimida kuzatib borish imkoniyati yaratiladi. Tranzit hisobraqamga oʻtkazilgan mablagʻlar jismoniy yoki yuridik shaxs kesimida shaffof tarzda aks ettirib boriladi.
20. Sherikchilik loyihalari tegishli tranzit hisobraqamlarga loyiha qiymatining 50 foiz (alohida mahallalar uchun 25 foiz) qismini toʻliq oʻtkazilganligi vaqti boʻyicha ketma-ketlikda Portal tomonidan saralab boriladi.
21. Loyiha qiymatining tegishli qismini tranzit hisobraqamga toʻliq oʻtkazgan dastlabki loyihalar birgalikda moliyalashtirish uchun tegishli moliya yilida Davlat budjetida rejalashtirilgan mablagʻ doirasida Portal tomonidan avtomatik ravishda “gʻoliblar” roʻyxatiga oʻtkaziladi.
22. Tranzit hisobraqamda loyiha qiymatining 50 foizi (alohida mahallalar uchun 25 foizi)ga teng miqdorda mablagʻ toʻplay olmagan hamda joriy yil uchun birgalikda moliyalashtirishga ajratilgan mablagʻ yetarli boʻlmaganligi sababli gʻoliblar roʻyxatiga kirmagan sherikchilik loyihalari anʼanaviy Tashabbusli budjet jarayoni doirasida ovoz berish bosqichiga oʻtkaziladi.
23. Tranzit hisobraqamlardagi toʻplangan mablagʻlar toʻlov amalga oshirilgan shaxslarga quyidagi hollarda qaytariladi:
gʻolib loyihalar roʻyxatiga kiritilgan sheriklik loyihalari boʻyicha loyiha qiymatining 50 foizidan (alohida mahallalar uchun 25 foiz) ortiq boʻlgan qismi;
joriy yil uchun birgalikda moliyalashtirishga ajratilgan mablagʻ yetarli boʻlmagani sababli gʻoliblar roʻyxatiga kirmagan sherikchilik loyihalari uchun toʻplangan mablagʻlarning toʻliq qismi;
sheriklik loyihalarini moliyalashtirish uchun loyiha qiymatini tegishli qismini toʻplay olmagan loyihalar boʻyicha toʻplangan mablagʻlarning toʻliq qismini.
24. Har mavsum yakunlariga koʻra, tranzit hisobraqamlardagi qoldiq mablagʻlarni qaytarib olish yuzasidan tegishli tashabbuskor fuqarolarga SMS xabarnomalar yuboriladi.
25. Loyiha qiymatining 50 foizi (alohida mahallalar uchun 25 foizi)dan ortiqcha toʻplangan qismini fuqarolarga qaytarishda agar tranzit hisobraqamga mablagʻ oʻtkazgan shaxslar soni ikki va undan ortiqni tashkil etsa, tranzit hisobraqamga mablagʻlarni kirim qilish vaqti boʻyicha soʻnggi mablagʻ kirim qilgan shaxs(lar)ga qaytariladi.
Bunda, 23-bandga muvofiq mablagʻlarni qaytarib olish fuqarolarning tegishli tuman (shahar) hokimligiga yoʻllagan arizasiga muvofiq, naqd va naqdsiz koʻrinishda qaytariladi.
26. Mahallalar uchun ochilgan tranzit hisobraqam tegishli mahalla aholisi tomonidan kelgusi mavsumlarda mablagʻ toʻplash uchun foydalaniladi.
Bunda, ushbu hisobraqamlarda avvalgi mavsumlar uchun aholi tomonidan toʻplangan mablagʻlarning qoldiq qismi yoki fuqarolar tomonidan qaytarib olinmagan mablagʻlar kelgusi mavsumdagi loyihalarni moliyalashtirish uchun qayta yoʻnaltirilishi mumkin.
4-bob. Sherikchilik loyihalarini moliyalashtirish
27. Gʻolib loyihalar roʻyxatiga kiritilgan har bir sheriklik loyihalari mablagʻlari uchun “4017...” turdagi shaxsiy gʻazna hisobraqami ochiladi.
28. “Gʻoliblar” roʻyxatiga kiritilgan sherikchilik loyihalari uchun tranzit hisobraqamda toʻplangan mablagʻlar loyiha roʻyxatga kirgan kundan boshlab bir kun muddatda tranzit hisobraqamlardan gʻolib loyihalarni amalga oshirish uchun ochilgan shaxsiy gʻazna hisobraqamga oʻtkaziladi.
29. Sherikchilik loyihalarini amalga oshirish uchun loyiha qiymatining qolgan 50 (alohida mahallalar uchun 75) foiz qismiga teng mablagʻlar Davlat budjetida rejalashtirilgan mablagʻlar hisobidan qoplab beriladi.
Bunda, ushbu mablagʻlar sherikchilik loyihasini amalga oshirish uchun ochilgan hisobraqamga mavsum yakunlariga koʻra tegishli hokimlik tomonidan oʻtkazib beriladi.
30. Moliya yili davomida “birgalikda moliyalashtirish”da ishtirok etish istagini bildirgan mahallalar soni oshib ketgan hollarda sherikchilik loyihalarini moliyalashtirish uchun Davlat budjetida rejalashtirilgan mablagʻlarga aniqlik kiritilishi mumkin.
31. Agar mavsum (yil) yakunlariga koʻra birgalikda moliyalashtirish uchun ajratilgan mablagʻ doirasida yetarlicha sherikchilik loyihalari aniqlanmasa, foydalanilmagan mablagʻlar anʼanaviy tartibdagi loyihalarni moliyalashtirish uchun tuman va shaharlarga qayta taqsimlanishi mumkin.
32. Sherikchilik loyihalarini amalga oshirishda buyurtmachi tashkilotni belgilash, Davlat xaridlarini amalga oshirish, nazorat tadbirlari hamda hisobdorlik amaldagi “Tashabbusli budjet jarayonlarini oʻtkazish hamda moliyalashtirish tartibi toʻgʻrisida”gi Nizom talablariga muvofiq amalga oshiriladi.
33. Loyiha uchun kirim qilingan mablagʻlar va budjet hissasi faqatgina mazkur loyiha doirasida koʻzda tutilgan tadbirlarga sarflanadi.
34. Sherikchilik loyihalari doirasida amalga oshiriladigan ishlar boʻyicha loyiha-smeta hujjatlarini ishlab chiqilishida tegishli mahalla raisi hamda tashabbuskor fuqarolarning ishtiroki majburiy hisoblanadi.
35. Loyiha-smeta hujjatlari yoki ekspertiza xulosalariga muvofiq loyihaning yakuniy qiymati dastlabki qiymatiga nisbatan kamaysa, yakuniy qiymat hamda dastlabki qiymati oʻrtasidagi ijobiy farq iqtisod qilingan mablagʻ hisoblanadi.
36. Iqtisod qilingan mablagʻlar aholi va davlat budjeti hissasiga mutanosib ravishda teng miqdorlarda taqsimlanadi va buyurtmachi tomonidan:
50 (alohida mahallalar uchun 75) foiz qismi tegishli tuman (shahar) “Fuqarolar tashabbusi jamgʻarmasi”ga;
50 (alohida mahallalar uchun 25) foiz qismi tegishli loyiha uchun ochilgan tranzit hisobraqamga qaytariladi. Bunda, ushbu mablagʻlarni toʻlovni amalga oshirgan shaxslarga qaytarilishi mazkur Nizomning 25-bandiga muvofiq amalga oshiriladi.
37. Agar loyihaning dastlabki qiymati va yakuniy qiymati oʻrtasida manfiy tafovut yuzaga kelsa, ushbu tafovut loyihani amalga oshirish uchun qoʻshimcha talab sifatida baholanadi.
38. Loyihani amalga oshirish uchun qoʻshimcha talab quyidagi manbalar hisobidan qoplanadi:
50 (alohida mahallalar uchun 25) foiz qismi aholi mablagʻlarini tegishli tranzit hisobraqamga yoʻnaltirish orqali;
50 (alohida mahallalar uchun 75) foiz qismi tegishli tuman (shahar) “Fuqarolar tashabbusi jamgʻarmasi” hisobidan (aholi tomonidan qoʻshimcha talabning tegishli qismi tranzit hisobraqamda toʻplangandan soʻng).
39. Agar qoʻshimcha talabning tegishli qismi aholi tomonidan bir oy muddatda qoplanmasa, loyihani amalga oshirish uchun mablagʻ yetarli emas deb hisoblanadi hamda mazkur loyiha sherikchilik loyihalari roʻyxatidan chiqarilishiga sabab boʻladi.
40. Loyihalarni amalga oshirish buyurtmachi hamda pudratchi korxona oʻrtasida tuzilgan shartnomaga muvofiq, qoida tariqasida shartnoma tuzilgan muddatdan boshlab koʻpi bilan besh oyda amalga oshiriladi.
5-bob. Loyihalarni qabul qilib olish hamda obyektlardan foydalanish
41. Sherikchilik loyihalari buyurtmachi tashkilotlar tomonidan tegishli loyiha tashabbuskorlari hamda mahalla raislari ishtirokida qabul qilib olinadi.
42. Sherikchilik loyihalari doirasida amalga oshirilgan hamda foydalanishga topshirilgan obyektlardan foydalanishda pul mablagʻlarini toʻplashda ishtirok etmagan fuqarolarga nisbatan cheklovlar oʻrnatilishiga (faqat ayrim guruh fuqaro yoki shaxslar tomonidan foydalanishiga) yoʻl qoʻyilmaydi.
Shuningdek, amalga oshirilgan obyektlar boʻyicha pulli xizmatlar koʻrsatilishi yoki boshqa toʻlovlar undirilishi taqiqlanadi.
6-bob. Nazorat, hisobdorlik, jamoatchilik ishtirokini taʼminlash va ragʻbatlantirish
43. Birgalikda moliyalashtirish doirasida toʻplangan mablagʻlar hamda ularning sarflanishi, amalga oshirilayotgan tadbirlar yuzasidan jamoatchilik nazorati “Ochiq budjet” portali orqali amalga oshiriladi.
44. Ishchi komissiya va ishchi organ mablagʻlarni maqsadli sarflanishi hamda hisobotlarni belgilangan muddatlarda jamoatchilikka taqdim etib borilishi uchun masʼul hisoblanadi.
45. Tuman (shahar) hokimligi tranzit hisobraqamlarda aholi tomonidan toʻplangan mablagʻlarni boshqa maqsadlarga sarflab yuborilmasligi hamda ularni belgilangan tartibda tegishli shaxslarga qaytarish uchun masʼul hisoblanadi.
46. Mazkur Nizom talablari buzilgan holatlarda aybdor shaxslar belgilangan tartibda javobgarlikka tortiladi.
47. Har mavsum yakuni boʻyicha birgalikda moliyalashtirish doirasida amalga oshirilgan loyihalarda faollik koʻrsatgan tashabbuskor fuqarolar, mahalla raislari va homiylar mahalliy hokimliklar tomonidan ragʻbatlantirilishi mumkin.
Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi toʻgʻrisidagi Nizomga ILOVA
OMMAVIY OFERTA Tashabbusli budjet jarayoni doirasida loyihani sherikchilik asosida birgalikda moliyalashtirishda ishtirok etish toʻgʻrisida
Ushbu oferta Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi toʻgʻrisidagi Nizomga muvofiq taqdim etiladi.
1. Oferta mazmuni:
Ushbu ofertani qabul qilish orqali “Ochiq budjet” axborot portali orqali shakllantirilgan loyiha boʻyicha:
loyihani aholi va davlat budjeti mablagʻlari hisobidan sherikchilik asosida birgalikda moliyalashtirish boʻyicha ixtiyoriy ravishda ishtirok etish;
loyiha qiymatining belgilangan 50 foizigacha boʻlgan qismini oʻz hisobidan tegishli tranzit hisob raqamga toʻlash;
loyiha qiymatining belgilangan 50 foizigacha boʻlgan qismini shakllantirish uchun ixtiyoriy ravishda toʻlangan mablagʻlar Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi toʻgʻrisidagi Nizomda belgilangan tartibda qaytarilishiga rozilik bildirish;
Tashabbusli budjet jarayoni doirasida loyihalarni sherikchilik asosida birgalikda moliyalashtirish tartibi toʻgʻrisidagi Nizom talablariga amal qilish majburiyatini oladi.
2. Oferta shartlari:
Ushbu ofertaga rozilik “Ochiq budjet” portalidagi loyiha sahifasidagi “roziman” tugmasini bosish orqali elektron tarzda tasdiqlanadi.
Rozilik bildirilganidan soʻng fuqaro “birgalikda moliyalashtirish”da ishtirok etuvchi sifatida qayd etiladi.
Mablagʻlarni toʻlash tashabbuskor fuqaroning oʻzi yoki uning vakili tomonidan amalga oshirilishi mumkin.
3. Qoʻshimcha maʼlumotlar:
Loyiha amalga oshirilgandan soʻng, undan barcha fuqarolar teng foydalanish huquqiga ega boʻladi.
Pulli xizmatlar joriy etilishi yoki foydalanishda cheklovlar oʻrnatilishiga yoʻl qoʻyilmaydi.
Mablagʻlarning sarflanishi yuzasidan jamoatchilik nazorati “Ochiq budjet” portali orqali amalga oshiriladi.