Oʻzbekiston Respublikasi Oliy Majlisining Qonunchilik palatasi tomonidan mamlakatimizda ekologik barqarorlikni taʼminlash hamda atrof-muhitni muhofaza qilish borasida amalga oshiriladigan chora-tadbirlar toʻgʻrisida (1484-V-son)

25.11.2025

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasi Prezidentining 2025-yil 18-noyabrdagi “Ekologiya va turizm sohalarida aholi talablariga tezkor javob bera oladigan boshqaruv tizimini yaratish chora-tadbirlari toʻgʻrisida”gi PF-217-sonli hamda 2025-yil 24-noyabrdagi “Toshkent shahrida ekologik vaziyatni yaxshilash boʻyicha kechiktirib boʻlmaydigan chora-tadbirlar toʻgʻrisida”gi PF-229-sonli farmonlarida mamlakatimizda ekologik vaziyatni yaxshilash va barqarorlashtirish, atrof-muhitni muhofaza qilish, atmosfera havosiga salbiy omillar taʼsirlarini kamaytirish yuzasidan bir qator muhim vazifalar belgilab berildi. Xususan, poytaxtimizda atmosfera havosi ifloslanishining oldini olish maqsadida nazoratni kuchaytirish va iqlim oʻzgarishi oqibatlarini yumshatish boʻyicha kechiktirib boʻlmaydigan chora-tadbirlar koʻrish zarurligi nazarda tutildi.

Bu, oʻz navbatida, Oʻzbekiston Respublikasi Oliy Majlisining Qonunchilik palatasi va uning organlaridan ushbu sohalardagi qonunchilikni bugungi kun talablari asosida yanada takomillashtirishni hamda belgilangan vazifalarning ijrosi ustidan taʼsirchan parlament va deputat nazorati amalga oshirilishini taqozo etadi.

Yuqoridagilardan kelib chiqib, mamlakatimizda ekologik barqarorlikni taʼminlash hamda atrof-muhitni muhofaza qilish borasida amalga oshirilayotgan keng koʻlamli islohotlar jarayonida deputatlar korpusining faol ishtirokini taʼminlash maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisining Qonunchilik palatasi tomonidan mamlakatimizda ekologik barqarorlikni taʼminlash hamda atrof-muhitni muhofaza qilish borasida amalga oshiriladigan chora-tadbirlar boʻyicha “yoʻl xaritasi” (bundan buyon matnda “Yoʻl xaritasi” deb yuritiladi) ilovaga muvofiq tasdiqlansin.

2. Oʻzbekiston Respublikasi Oliy Majlisining Qonunchilik palatasidagi siyosiy partiyalar fraksiyalariga “Yoʻl xaritasi”da belgilangan tadbirlarni oʻz vaqtida va sifatli amalga oshirish choralarini koʻrish tavsiya etilsin.

3. Oʻzbekiston Respublikasi Oliy Majlisi Qonunchilik palatasining qoʻmitalari “Yoʻl xaritasi”da nazarda tutilgan nazorat-tahlil tadbirlarini oʻz vaqtida amalga oshirish choralarini koʻrsin.

4. Oʻzbekiston Respublikasi Oliy Majlisi Qonunchilik palatasi Devonining Nazorat-tahlil boʻlimi “Yoʻl xaritasi”ning ijrosi yuzasidan doimiy monitoring oʻrnatib, har oyda Oʻzbekiston Respublikasi Oliy Majlisi Qonunchilik palatasining rahbariyatiga umumlashtirilgan maʼlumot kiritib borsin.

5. Oʻzbekiston Respublikasi Oliy Majlisi Qonunchilik palatasi Devonining Matbuot xizmati “Yoʻl xaritasi” doirasida amalga oshirilayotgan ishlarning ommaviy axborot vositalarida keng yoritilishini taʼminlasin.

6. “Yoʻl xaritasi”da nazarda tutilgan tadbirlarning bajarilishini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklatilsin.

7. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2025-yil 25-noyabr,

1484-V-son

Oʻzbekiston Respublikasi Oliy Majlisi Qonunchilik palatasi Kengashining 2025-yil 25-noyabrdagi 1484-V-sonli qaroriga ILOVA

Oʻzbekiston Respublikasi Oliy Majlisining Qonunchilik palatasi tomonidan mamlakatimizda ekologik barqarorlikni taʼminlash hamda atrof-muhitni muhofaza qilish borasida amalga oshiriladigan chora-tadbirlar boʻyicha

“YOʻL XARITASI”