Atrof-muhitni muhofaza qilish sohasida hamkorlik toʻgʻrisida

02.07.2025

Oʻzbekiston Respublikasi Hukumati bilan Ozarbayjon Respublikasi Hukumati oʻrtasida

Bitim

[Oʻzbekiston Respublikasi xalqaro shartnomalarining davlat reyestrida 2025-yil 7-iyulda roʻyxatga olindi, roʻyxat raqami 4596-AZ-2025-H]

Oʻzbekiston Respublikasi Hukumati va Ozarbayjon Respublikasi Hukumati, keyingi oʻrinlarda “Tomonlar” deb ataluvchilar,

har ikkala davlat oʻrtasidagi doʻstona munosabatlarni mustahkamlash va atrof-muhitni muhofaza qilish boʻyicha hamkorlikni rivojlantirish istagini bildirib,

atrof-muhitning hozirgi va kelajak avlodlar salomatligi va farovonligi uchun muhofaza qilinishi lozimligiga ishonch hosil qilgan holda,

iqtisodiyotning barqaror rivojlanishi tabiiy resurslarni ekologik jihatdan asoslangan holda boshqarishni talab etishini tan olib,

Tomonlar oʻrtasidagi hamkorlik har bir davlatning global atrof-muhitni saqlash masʼuliyati jihatidan oʻzaro manfaatli va muhim ekanligini toʻliq anglagan holda,

atrof-muhitning global muammolari boʻyicha oqilona qarorlar qabul qilish nuqtai nazaridan ekologik siyosat va amaliyotning muhimligini tan olib,

quyidagilar toʻgʻrisida kelishib oldilar:

1-modda

Tomonlar atrof-muhitni muhofaza qilish sohasida teng huquqlilik, manfaatlarni oʻzaro hisobga olish va oʻzaro manfaatdorlik asosida hamkorlik qiladilar.

2-modda

Tomonlar hamkorligi quyidagi asosiy yoʻnalishlar boʻyicha amalga oshiriladi:

1) atmosfera havosi ifloslanishidan ogohlantirish va nazorat qilish;

2) suv ifloslanishidan ogohlantirish va nazorat qilish;

3) qattiq maishiy chiqindilarni boshqarish;

4) xavfli chiqindilarni boshqarish, shu jumladan, ularning noqonuniy transchegaraviy koʻchishidan ogohlantirish;

5) transchegaraviy ifloslanishning oldini olish va ekologik xavfsizlikni taʼminlash;

6) biologik xilmaxillikni saqlash;

7) ekotizimlarni degradatsiyadan asrash va qum boʻronlaridan ogohlantirish;

8) yer resurslaridan foydalanishda atrof-muhitni muhofaza qilish;

9) iqlim oʻzgarishlariga moslashish;

10) atrof-muhit monitoringi sohasida qoʻshma ilmiy-tadqiqot faoliyati masalalari boʻyicha birgalikdagi konferensiyalarni oʻtkazish;

11) ishlab chiqarishning ekologik toza texnologiyalarini joriy etish va tarqatishga koʻmaklashish;

12) qoʻshma taʼlim dasturlarini, ilmiy tadqiqotlarni joriy etish, shuningdek, atrof-muhit sohasida kadrlarni tayyorlash va birgalikdagi faoliyat natijalarini ommalashtirish;

13) Tomonlar oʻzaro kelishgan hamkorlikning boshqa sohalari.

3-modda

Tomonlarning hamkorligi quyidagi asosiy shakllarda amalga oshiriladi:

1) ekspertlar oʻrtasida axborot almashish va maslahatlashuvlar, delegatsiyalarning oʻzaro tashriflari va treninglarni oʻtkazish;

2) qoʻshma yigʻilishlar, konferensiyalar va ilmiy seminarlarni oʻtkazish;

3) dasturlar va hamkorlik loyihalarini birgalikda ishlab chiqish va amalga oshirish;

4) atrof-muhit holati toʻgʻrisidagi hisobotlar, shuningdek, fan, texnika, siyosat, qonunchilik, normativ hujjatlar va atrof-muhitni muhofaza qilish sohasidagi boshqa masalalar boʻyicha maʼlumotlar va materiallar bilan almashish;

5) birgalikda ilmiy tadqiqotlar olib borish;

6) Tomonlar kelishuviga koʻra hamkorlikning boshqa shakllari.

4-modda

Mazkur Bitimni amalga oshirish boʻyicha faoliyatni muvofiqlashtirishni Tomonlarning quyidagi vakolatli idoralari amalga oshiradi:

Ozarbayjon tomoni tarafidan — Ozarbayjon Respublikasi Ekologiya va tabiiy resurslar vazirligi;

Oʻzbek tomoni tarafidan — Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi.

Tomonlar oʻz vakolatli organlari oʻzgargan taqdirda, bir-birlarini diplomatik kanallar orqali darhol xabardor qiladilar.

5-modda

Mazkur Bitimning qoidalari Tomonlarning davlatlari ishtirokchi hisoblangan boshqa xalqaro shartnomalardan kelib chiqadigan Tomonlarning huquq va majburiyatlariga daxl qilmaydi.

6-modda

Tomonlar mazkur Bitimni amalga oshirish bilan bogʻliq moliyaviy xarajatlarni oʻz davlatlarining milliy qonunchiliklarida nazarda tutilgan manbalar doirasida mustaqil ravishda qoplaydilar.

7-modda

Tomonlarning oʻzaro kelishuviga koʻra, mazkur Bitimga uning ajralmas qismi boʻlgan va mazkur Bitimning 9-moddasida nazarda tutilgan tartibda kuchga kiradigan alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

8-modda

Mazkur Bitim qoidalarini talqin qilish yoki qoʻllashda nizo va kelishmovchiliklar yuzaga kelgan hollarda, Tomonlar ularni maslahatlashuv va muzokaralar orqali hal etadilar.

9-modda

1. Mazkur Bitim uning kuchga kirishi zarur boʻlgan davlat ichki protseduralari Tomonlar tarafidan bajarilganligi toʻgʻrisidagi soʻnggi yozma xabarnoma diplomatik kanallar orqali olingan kundan boshlab kuchga kiradi.

2. Mazkur Bitim nomaʼlum muddatga tuziladi.

3. Har qanday Tomon mazkur Bitimning amal qilishini boshqa Tomonga mazkur Bitimning amal qilishini tugatish niyati toʻgʻrisidagi yozma xabarnomani diplomatik kanallar orqali yuborish bilan tugatishi mumkin. Bitimning amal qilishi boshqa Tomon bunday xabarnoma olgan sanadan boshlab 6 (olti) oy oʻtgunga qadar amal qiladi.

Boku shahrida, 2025-yil 2-iyulda, ikki asl nusxada, oʻzbek, ozarbayjon va rus tillarida tuzildi, bunda barcha matnlar teng autentikdir.

Mazkur Bitimni talqin qilishda kelishmovchiliklar yuzaga kelgan hollarda, Tomonlar rus tilidagi matnga murojaat qiladilar.

(imzolar)