Oʻzbekiston Respublikasi Qurolli kuchlari harbiy qismining jangovar bayrogʻi toʻgʻrisida (PF-690-son)

22.11.1993

Oʻzbekiston Respublikasi Prezidentining

Farmoni

1. Oʻzbekiston Respublikasining Qurolli Kuchlari uchun harbiy sharaf, shon-shavkat va shuhrat ramzi — harbiy qism Jangovar Bayrogʻining yagona nusxasi belgilansin.

2. Oʻzbekiston Respublikasi Qurolli Kuchlari harbiy qismining jangovar Bayrogʻi toʻgʻrisidagi Nizom va uning tasviri ilovaga muvofiq tasdiqlansin.

Oʻzbekiston Respublikasining Prezidenti I. KARIMOV

Toshkent sh.,

1993-yil 22-noyabr,

690-son

Oʻzbekiston Respublikasi Prezidentining 1993-yil 22-noyabrdagi 690-son Farmoniga ILOVA

Oʻzbekiston Respublikasi Qurolli Kuchlari harbiy qismining Jangovar Bayrogʻi toʻgʻrisida

NIZOM

1. Oʻzbekiston Respublikasi Qurolli Kuchlari harbiy qismining Jangovar Bayrogʻi harbiy sharaf, shon-shavkat va shuhrat ramzidir. U Oʻzbekiston Respublikasi Qurolli Kuchlarining har bir harbiy xizmatchisiga oʻzining Vatanga sadoqat bilan xizmat qilish, uni mardlik va mahorat bilan himoya qilish, jonajon tuproqning har bir qarichini oʻz qoni va hayotini ham ayamay matonat bilan mudofaa qilish toʻgʻrisidagi muqaddas burchini eslatib turadi.

2. Jangovar Bayroq harbiy qismga u tuzilgandan keyin Oʻzbekiston Respublikasi Prezidenti nomidan Mudofaa vazirligining vakillari tomonidan topshiriladi.

3. Jangovar Bayroq qismning nomi va raqami oʻzgarishidan qatʼi nazar, hamma vaqt harbiy qismda saqlanadi. Harbiy qismning nomi va raqamidagi oʻzgarishlar Oʻzbekiston Respublikasi Prezidentining Jangovar Bayroqni topshirish chogʻida beriladigan Yorligʻiga yozib qoʻyiladi.

4. Jangovar Bayroq hamisha oʻz harbiy qismida, jang maydonida esa qismning jangovar harakatlari hududida boʻladi.

5. Qismning butun shaxsiy tarkibi jangovar Bayroqni jangda fidokorona va mardonavor himoya qilishi hamda uning dushman qoʻliga tushib qolishiga yoʻl qoʻymasligi shart.

Jangovar Bayroq yoʻqotib qoʻyilgan taqdirda harbiy qism komandiri va bunday sharmandalikda bevosita aybdor boʻlgan harbiy xizmatchilar harbiy sud oldida javobgar boʻladilar, harbiy qism esa tarqatib yuboriladi.

Oʻzbekiston Respublikasi Qurolli Kuchlari harbiy qismi Jangovar Bayrogʻining tasviri

Oʻzbekiston Respublikasi Qurolli Kuchlari harbiy qismining Jangovar Bayrogʻi ikki tomonlama matodan, dastadan va shokilali chiyratma bogʻichdan iborat boʻladi.

Oʻzbekiston Respublikasining Davlat Bayrogʻi Oʻzbekiston Respublikasi Qurolli Kuchlari harbiy qismi Jangovar Bayrogʻining asosi hisoblanadi.

Bayroqning matosi toʻgʻri toʻrtburchakli boʻlib, uzunasiga 145 sm eniga 92 sm. bayroq uzunasi boʻylab toʻq havorang, oq va toʻq yashil rangli ikkiga buklangan uch xil yoʻlli shoyidan tayyorlangan va uchala chetiga tillarang ipak gajim tikilgan. Gajimning uzunligi 5 sm.

Bayroqdagi havorang, oq va yashil yoʻllarning eni bir xil boʻlib har biri 30 sm. matoning oʻrtasidagi oq yoʻlning ikki chekkasi boʻylab eni 1 sm. boʻlgan qizil hoshiya oʻtgan.

Matoning yuqoridagi havorang qismining old va orqa tomonlarida bayroq dastasi yonida yarim oy va besh qirrali oʻn ikkita yulduz oq ipak bilan tikilgan.

Yarim oy va yulduzlar bayroqning havorang yoʻli boʻylab 45 x 20 sm. hajmdagi toʻgʻri toʻrtburchakni tashkil etadi.

Yarim oq bayroq dastasidan 10 sm. beriroqda 20 sm. diametrli doirada tik joylashadi.

Yulduzlar 4 sm. diametrli doirani tashkil etadi. Doiralar oraligʻi 2 sm. yulduzlar quyidagi tartibda: uchta yulduz yuqori qatorda, toʻrttasi oʻrta va beshtasi quyi qatorda tik va uzunasiga joylashadi. Yulduzlarning quyi qatori yarim oyning quyi chekkasidan 2 sm. oraliqda joylashadi.

Mato oʻng tomonining oq yoʻlida “OʻZBEKISTON RESPUBLIKASI QUROLLI KUCHLARI” degan soʻzlar tillarang ipak bilan tikilgan. Yozuv harflarining boʻyi 7,5 sm.

Matoning orqa tomonidagi oq yoʻlda harbiy qismning raqami va nomi tillarang ipak bilan tikilgan. Raqamlarning boʻyi 10 sm; harflarning boʻyi 7,5 sm. harbiy qism nomidagi soʻzlarning soniga qarab raqam boʻyi 6 sm. gacha, harflarning boʻyi 4,5 sm. gacha qisqartirilishi mumkin.

Bayroq dastasi 4 sm. diametrdagi va uzunligi 2,5 m. boʻlgan yogʻochdan ishlangan. Dasta toʻq jigarrangga boʻyalib, yaltiratilgan va quyi qismiga metall halqa, yuqori qismiga esa nikerlangan shakldor poynak qoplangan.

Bayroqning bogʻichi tillarang chiylatma ipakdan tayyorlangan boʻlib, ikki uchida shokilasi bor. Bogʻichning uzunligi 270—285 sm.