Oʻzbekiston Respublikasi ichki ishlar idoralarining jangovar bayrogʻi toʻgʻrisida (PF-1663-son)

26.12.1996

Oʻzbekiston Respublikasi Prezidentining

Farmoni

1. Oʻzbekiston Respublikasi Ichki ishlar organlari shon-shuhrat, jasorat va eʼtiqod ramzi — Jangovar Bayrogʻining yagona nusxasi belgilansin.

2. Oʻzbekiston Respublikasi Ichki ishlar organlarining Jangovar Bayrogʻi toʻgʻrisidagi Nizom, uning tavsifi va Yorliq ilovaga muvofiq tasdiqlansin.

Oʻzbekiston Respublikasining Prezidenti I. KARIMOV

Toshkent sh.,

1996-yil 26-dekabr,

PF-1663-son

Oʻzbekiston Respublikasi Prezidentining 1996-yil 26-dekabrdagi PF-1663-sonli Farmoniga ILOVA

Oʻzbekiston Respublikasi Ichki ishlar organlarining Jangovar Bayrogʻi toʻgʻrisida

NIZOM

1. Oʻzbekiston Respublikasi ichki ishlar organlarining Jangovar Bayrogʻi shon-shuhrat, jasorat va eʼtiqod ramzidir. U Oʻzbekiston Respublikasi ichki ishlar organlarining har bir xodimini xalqiga va jonajon Vataniga sadoqat bilan xizmat qilish, halol va pok vijdonli boʻlish, xalq manfaatlariga xizmat qilish, Oʻzbekiston Respublikasining manfaatlarini, fuqarolarning huquqlari va erkinliklari, qonuniy manfaatlarini jinoiy tajovuzlardan muhofaza qilishdek oʻz zimmasiga yuklatilgan xizmat burchlarini bor kuchi va bilimini, zarur boʻlsa hayotini ham ayamasdan mardlik va matonat bilan ado etishga daʼvat etadi.

2. Oʻzbekiston Respublikasi Ichki ishlar vazirligiga Jangovar Bayroq Oʻzbekiston Respublikasi Prezidenti vakili tomonidan, ichki ishlar organiga va oliy taʼlim muassasasiga esa Oʻzbekiston Respublikasi Prezidenti nomidan Oʻzbekiston Respublikasi Ichki ishlar vaziri yoki uning vakili tomonidan yorliq bilan birgalikda tantanali raviщda topshiriladi.

3. Jangovar Bayroq doimiy ravishda ichki ishlar organida belgilangan maxsus joyda saqlanadi.

4. Jangovar Bayroq ichki ishlar organlarining nomi oʻzgarishidan qatʼiy nazar, doimiy saqlanadi. Basharti ichki ishlar organi nomi oʻzgarsa, bu haqda Oʻzbekiston Respublikasi Prezidenti tomonidan Bayroq topshirilayotganda beriladigan Yorliqqa shu haqda tegishli oʻzgartirishlar yozib qoʻyiladi.

5. Bayroqni tantanali marosimlarga olib chiqish, joyiga oʻrnatish va uni asrash tartibi Ichki ishlar vazirligining normativ-huquqiy hujjatlari asosida amalga oshiriladi.

6. Ichki ishlar idoralarining shaxsiy tarkibi Jangovar Bayroqni doimo koʻz qorachigʻidek asrashi zarur. Jangovar Bayroq yoʻqolgan taqdirda, ichki ishlar organi xodimlari va rahbari qonun hujjatlariga muvofiq jazolanadilar.

Oʻzbekiston Respublikasi Prezidentining 1996-yil 26-dekabrdagi PF-1663-sonli Farmoniga ILOVA

Oʻzbekiston Respublikasi Ichki ishlar organlari Jangovar Bayrogʻining

TAVSIFI

Oʻzbekiston Respublikasi ichki ishlar organi Jangovar Bayrogʻi ikki tomonlama mato, dasta va shokilali popugdan iborat boʻlib, uning uch tomoni 9 santimetrli gajm bilan tikib chiqiladi.

Oʻzbekiston Respublikasining Davlat bayrogʻi Oʻzbekiston Respublikasi Ichki ishlar vazirligi organlari Jangovar Bayrogʻining asosi hisoblanadi.

Jangovar Bayroq butun uzunligi boʻylab oʻtgan toʻq moviy rang, oq rang va toʻq yashil rangli uchta endan tarkib topgan toʻgʻri toʻrtburchak shakldagi matodir.

Jangovar Bayroqning uzunligi 160 santimetrga, kengligi 103 santimetrga teng. Moviy, oq va yashil rangli enlar kengligi bir xil. Har bir enning kengligi 33 santimetr. Bayroqning oʻrtasida joylashtirilgan oq rangli enning chetlaridan kengligi 2 santimetrga teng qizil hoshiyalar oʻtkazilgan.

Jangovar Bayroqning yuqori qismidagi moviy rangli enning oldi va orqa tomonida, dastaga yaqin joyida oq rangli yarim oy va uning yonida oʻn ikkita oq rangli besh qirrali yulduz tasvirlangan.

Yarim oy va yulduzlarning tasviri moviy rangli yuqori enning oʻrtasidan 45 x 20 santimetrga teng toʻgʻri toʻrtburchakka sigʻadigan qilib joylashtirilgan.

Yarim oy vertikal holatda doʻng tomoni dastaga qaratilgan, dastadan 10 santimetr masofada joylashtirilgan boʻlib, diametri 20 santimetrli doiraga sigʻadi.

Yulduzlar diametri 4 santimetrli doiraga sigʻadi. Doiralar orasidagi masofa 2 santimetr. Yulduzlar uzunasiga va tikkasiga quyidagi tartibda joylashadi: yuqori qatorda uchta, oʻrta qatorda toʻrtta va quyi qatorda beshta yulduz. Quyi qatordagi yulduzlar yarim oyning pastki uchidan 2 santimetr masofada joylashadi.

Jangovar Bayroqning yuz tomonidagi oq rangli yoʻliga lotin yozuvi asosidagi oʻzbek alifbosida “VATAN VA XALQ MANFAATINI HIMOYA QILISH MUQADDAS BURCHDIR” shiori hamda bayroqning orqa tomoniga “OʻZBEKISTON RESPUBLIKASI ICHKI ISHLAR VAZIRLIGI” degan yozuvlar oltin hoshiyali ipak bilan tikiladi.

Jangovar Bayroqning orqa tomonidagi oq rangli yoʻliga topshirilayotgan ichki ishlar organining nomi tikib yoziladi. Harflar kattaligi 9 santimetr, ichki ishlar organi nomidagi soʻzlarga qarab 5 santimetrgacha qisqartirilishi mumkin.

Jangovar Bayroqning dastasi yogʻochdan yasalgan boʻlib diametri 4 santimetr, uzunligi 2,2 metr, yogʻoch dasta laklangan va pastki qismi 10 santimetrli temir gardishga mahkamlanadi, yuqori uchli qismiga nikellangan uchburchak oysimon shakldagi tugʻ kiydiriladi. Bayroqni tepa qismidan eshilgan ipakli popug pastga qarab osilib turadi, uning uzunligi 246 santimetrdan iborat boʻladi.

Oʻzbekiston Respublikasi Prezidentining 1996-yil 26-dekabrdagi PF-1663-sonli Farmoniga ILOVA

Oʻzbekiston Respublikasi Ichki ishlar idoralari Jangovar Bayrogʻining

YORLIGʻI

“Oʻzbekiston Respublikasi Ichki ishlar organlari Jangovar Bayrogʻining YORLIGʻI ____________________________________ (ichki ishlar organi nomi) _____________________________________ _____________________________________ TOPShIRILSIN Oʻzbekiston Respublikasining Prezidenti Oʻzbekiston Respublikasi ichki ishlar organlari Bayrogʻining TASVIRI TASVIRNING orqa tomoni”

Oʻzbekiston Respublikasi Ichki ishlar idoralari Bayrogʻining

TASVIRI

TASVIRNING orqa tomoni