Uch davlatning davlat chegaralari tutashgan nuqta toʻgʻrisida

31.03.2025

Oʻzbekiston Respublikasi, Qirgʻiziston Respublikasi va Tojikiston Respublikasi oʻrtasida

SHARTNOMA

[Oʻzbekiston Respublikasi xalqaro shartnomalari davlat reyestrida 2025-yil 14-mayda roʻyxatga olindi, roʻyxat raqami 4589-KG-TJ-2025-D]

Oʻzbekiston Respublikasi, Qirgʻiziston Respublikasi va Tojikiston Respublikasi, keyingi oʻrinlarda Oliy Ahdlashuvchi Tomonlar deb ataluvchilar,

oʻzaro hurmat, suveren tenglik va hududiy yaxlitlik prinsiplariga amal qilgan holda,

uch davlatning davlat chegaralari tutashgan nuqtaning joylashuvi hamda tutashgan nuqta hududida davlat chegaralari chiziqlarining oʻtishini aniqlash maqsadida,

quyidagilar toʻgʻrisida kelishib oldilar:

1-modda

Oliy Ahdlashuvchi Tomonlar Oʻzbekiston Respublikasi, Qirgʻiziston Respublikasi va Tojikiston Respublikasi davlat chegaralarining tutashgan nuqtasi joylashuvini aniqlab oldilar (keyingi oʻrinlarda — tutashgan nuqta).

Oʻzbekiston Respublikasi va Tojikiston Respublikasi 2002-yil 5-oktabrda imzolangan Oʻzbekiston Respublikasi bilan Tojikiston Respublikasi oʻrtasida oʻzbek-tojik Davlat chegarasi toʻgʻrisidagi Shartnomada koʻrsatilgan 200-sonli chegara nuqtasidan tutashgan nuqtaga qadar oʻzbek-tojik Davlat chegarasining oʻtish chizigʻini aniqlab oldilar.

Oʻzbekiston Respublikasi va Qirgʻiziston Respublikasi 2017-yil 5-sentabrda imzolangan Oʻzbekiston Respublikasi bilan Qirgʻiziston Respublikasi oʻrtasida oʻzbek-qirgʻiz Davlat chegarasi toʻgʻrisidagi Shartnomada koʻrsatilgan 459-sonli chegara nuqtasidan tutashgan nuqtaga qadar oʻzbek-qirgʻiz Davlat chegarasining oʻtish chizigʻini aniqlab oldilar.

Qirgʻiziston Respublikasi va Tojikiston Respublikasi 2025-yil 13-martda imzolangan Qirgʻiziston Respublikasi bilan Tojikiston Respublikasi oʻrtasida qirgʻiz-tojik Davlat chegarasi toʻgʻrisidagi Shartnomada koʻrsatilgan 161-sonli chegara nuqtasidan tutashgan nuqtaga qadar qirgʻiz-tojik Davlat chegarasining oʻtish chizigʻini aniqlab oldilar.

Tutashgan nuqta joylashuvi va unga yondosh boʻlgan davlat chegaralari chiziqlari mazkur Shartnomaning ajralmas qismi hisoblangan, har bir Oliy Ahdlashuvchi Tomon uchun 1:10 000 masshtabda rus tilida tayyorlangan topografik xaritaga tushirilgan (1-ilova)*.

Koordinatalar va balandlik belgilari 1942-yil koordinatalar tizimi hamda Boltiq balandliklar tizimiga muvofiq keltirilgan.

2-modda

Oliy Ahdlashuvchi Tomonlar mazkur Shartnomaning ajralmas qismi hisoblanuvchi Oʻzbekiston Respublikasi, Qirgʻiziston Respublikasi va Tojikiston Respublikasi davlat chegaralari tutashgan nuqtaning joylashuvi va tutashgan nuqta hududida davlat chegaralari chiziqlarining oʻtish Tavsifini rus tilida tayyorladilar (2-ilova)*.

*1 va 2-ilovalar berilmaydi.

3-modda

Tutashgan nuqtada uch davlat xalqlari doʻstligini ifodalovchi stela barpo etilgan boʻlib, uning markazi oʻz joylashuviga koʻra, tutashgan nuqtaning geodezik va toʻgʻri burchakli koordinatalariga mos keladi.

Stela va uning konstruktiv elementlari davlat chegaralari chiziqlarining oʻtishini belgilamaydi.

4-modda

Mazkur Shartnoma ratifikatsiya qilinadi va ratifikatsiya yorliqlari almashinilgan kundan eʼtiboran kuchga kiradi.

Mazkur Shartnoma muddatsiz hisoblanadi va denonsatsiya qilinmaydi.

Xoʻjand shahrida 2025-yil 31-martda uch nusxada, har biri oʻzbek, qirgʻiz, tojik va rus tillarida tuzildi.

Mazkur Shartnoma qoidalarini talqin qilishda kelishmovchiliklar yuzaga kelgan taqdirda, Oliy Ahdlashuvchi Tomonlar rus tilidagi matnga murojaat qiladilar.

(imzolar)