Oʻzbekiston Respublikasi Hukumatining ayrim qarorlariga “mahalla yettiligi” imkoniyatlaridan foydalangan holda aholi oʻrtasida sogʻlom turmush tarzini targʻib qilishni jadallashtirishga qaratilgan qoʻshimchalar kiritish toʻgʻrisida (714-son)

11.11.2025

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Jamoaviy sport turlarini rivojlantirish va iqtidorli yoshlarni saralab olish tizimini takomillashtirish chora-tadbirlari toʻgʻrisida” 2024-yil 4-dekabrdagi PQ-421-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ayrim qarorlariga ilovaga muvofiq quyidagilarni nazarda tutuvchi qoʻshimchalar kiritilsin:

“mahalla yettiligi” imkoniyatlaridan foydalangan holda aholini jamoaviy sport turlariga jalb qilish orqali sogʻlom turmush tarzini targʻib qilish;

eng muhim samaradorlik koʻrsatkichlari (KPI)ga erishish boʻyicha ish rejalarini ishlab chiqishda aholini jamoaviy sport turlariga jalb qilish mezonlariga alohida eʼtibor qaratish;

aholiga sogʻlom turmush tarzini targʻib qilishda faollik koʻrsatgan shaxslarni har tomonlama ragʻbatlantirish.

2. Oʻzbekiston mahallalari uyushmasiga Ichki ishlar vazirligi, Kambagʻallikni qisqartirish va bandlik vazirligi, Soliq qoʻmitasi, Oila va xotin-qizlar qoʻmitasi, Yoshlar ishlari agentligi, Ijtimoiy himoya milliy agentligi, Boshqaruv samaradorligi agentligi bilan birgalikda ikki oy muddatda “mahalla yettiligi” aʼzolari faoliyatini eng muhim samaradorlik koʻrsatkichlari (KPI) boʻyicha baholash metodikasiga tegishli oʻzgartirish va qoʻshimchalar kiritish tavsiya etilsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oila va xotin-qizlar qoʻmitasi raisi Z.B. Maxkamova zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 11-noyabr,

714-son

Vazirlar Mahkamasining 2025-yil 11-noyabrdagi 714-son qaroriga ILOVA

Oʻzbekiston Respublikasi Hukumatining ayrim qarorlariga kiritilayotgan qoʻshimchalar

1. Vazirlar Mahkamasining “Viloyatlar, shaharlar va tumanlar hokimliklari boshqaruv apparatlari toʻgʻrisidagi namunaviy nizomlarni tasdiqlash haqida” 2016-yil 27-apreldagi 123-son qarorida:

a) 1-ilovaning 6-bandi quyidagi mazmundagi oʻn oltinchi xatboshi bilan toʻldirilsin:

“hududda aholini jamoaviy sport turlariga jalb qilish, ushbu sohada faollik koʻrsatgan shaxslarni har tomonlama ragʻbatlantirish boʻyicha amaliy chora-tadbirlarni ishlab chiqish va ularni amalga oshirishni tashkil etish”;

b) 2-ilovaning 6-bandi quyidagi mazmundagi oʻn toʻrtinchi xatboshi bilan toʻldirilsin:

“hududda aholini jamoaviy sport turlariga jalb qilish, ushbu sohada faollik koʻrsatgan shaxslarni har tomonlama ragʻbatlantirish boʻyicha amaliy chora-tadbirlarni ishlab chiqish va ularni amalga oshirishni tashkil etish”;

v) 3-ilovaning 6-bandi quyidagi mazmundagi oʻn toʻrtinchi xatboshi bilan toʻldirilsin:

“hududda aholini jamoaviy sport turlariga jalb qilish, ushbu sohada faollik koʻrsatgan shaxslarni har tomonlama ragʻbatlantirish boʻyicha amaliy chora-tadbirlarni ishlab chiqish va ularni amalga oshirishni tashkil etish”.

2. Vazirlar Mahkamasining 2024-yil 31-iyuldagi 463-son qarori bilan tasdiqlangan Mahalliy ijro etuvchi hokimiyat organlari rahbarlari oʻrinbosarlarining faoliyatini eng muhim samaradorlik koʻrsatkichlari asosida baholash tartibi toʻgʻrisidagi nizomning 5-bandi quyidagi mazmundagi ikkinchi xatboshi bilan toʻldirilsin:

“Bunda hududning jamoaviy sport turlari boʻyicha sport musobaqalaridagi natijalari va aholini jamoaviy sport turlariga jalb qilish mezonlariga alohida eʼtibor qaratiladi”.