2025-2026-yillarda mamlakatimizda qatagʻon qurbonlari hayoti va faoliyatini targʻib etish ishlarini yanada jadallashtirish boʻyicha chora-tadbirlar dasturini tasdiqlash toʻgʻrisida (691-son)
04.11.2025
Oʻzbekiston Respublikasi Vazirlar Mahkamasining
qarori
Qatagʻon qurboni boʻlgan shaxslarning hayoti va faoliyatini oʻrganish, qatagʻon qilingan yurtdoshlarimiz haqidagi tarixiy haqiqatni tiklash va kelgusi avlodlarga yetkazish, ushbu jarayonlarga taʼlim tashkilotlari va ilmiy muassasalarni keng jalb qilgan holda, maʼnaviy-maʼrifiy va targʻibot ishlarini tizimli yoʻlga qoʻyish maqsadida Vazirlar Mahkamasi qaror qiladi:
1. Quyidagilarni nazarda tutuvchi 2025-2026-yillarda mamlakatimizda qatagʻon qurbonlari hayoti va faoliyatini targʻib etish ishlarini yanada jadallashtirish boʻyicha chora-tadbirlar dasturi (keyingi oʻrinlarda — Dastur) ilovaga muvofiq tasdiqlansin:
qatagʻon qurboni boʻlgan shaxslarning hayoti, faoliyati va ilmiy merosini keng targʻib qilish ishlarini tizimli tashkil etish;
har yili oktabrning birinchi haftasida Siyosiy qatagʻon qurbonlarini yod etish haftaligini oʻtkazib borish;
har yili oktabr oyida qatagʻon qurbonlari xotirasiga bagʻishlangan respublika darajasida ilmiy-amaliy konferensiyalar tashkil etish;
Qatagʻon qurbonlari xotirasi davlat muzeyi faoliyatini yanada takomillashtirish.
2. Maktabgacha va maktab taʼlimi vazirligi, Oliy taʼlim, fan va innovatsiyalar vazirligi Qatagʻon qurbonlari xotirasi muzeyi, “Shahidlar xotirasi” jamoat fondi bilan birgalikda:
Toshkent shahridagi Qatagʻon qurbonlari xotirasi davlat muzeyi va Shahidlar xotirasi maydoniga, shuningdek, hududlarda oliy taʼlim tashkilotlari tizimidagi “Qatagʻon qurbonlari xotirasi” muzeylariga shaxsan taʼlim tashkilotlari rahbarlari boshchiligida oʻquvchi va talabalarning muntazam tashriflarini tashkil etish;
taʼlim tashkilotlarida “Kelajak soati” darslari doirasida qatagʻon qurbonlari hayoti va faoliyatini keng targʻib qilish;
oliy taʼlim tashkilotlarida har yili oktabr oyida qatagʻon qurbonlari xotirasiga bagʻishlangan ilmiy-amaliy konferensiya hamda “Maʼrifat darslari” doirasida qatagʻon qurbonlari faoliyati va merosini targʻib qilishga qaratilgan darslarni tashkil etish;
oʻquvchi yoshlar va talabalar ishtirokida qatagʻon qurbonlari tavallud topgan maskanlarda “Yurt va millat fidoiylari yoddan chiqmaslar” mavzusida uchrashuv va davra suhbatlari tashkil etish choralarini koʻrsin.
3. Yoshlar ishlari agentligi Respublika Maʼnaviyat va maʼrifat markazi hamda manfaatdor vazirlik va idoralar bilan birgalikda:
qatagʻon qurbonlarining ibratli hayoti va faoliyatini yoshlar orasida yanada keng targʻib etish maqsadida audiovizual mahsulotlar tayyorlash, ularni Internet jahon axborot tarmogʻida ommalashtirish;
qatagʻon qurbonlarining hayoti, Vatan ozodligi hamda xalq farovonligi yoʻlidagi ibratli faoliyatini yoritishga qaratilgan podkastlar tayyorlash;
qatagʻon qurbonlarining ibratli hayoti va faoliyatini qiziqarli va ommabop shaklda televideniye va ijtimoiy tarmoqlar orqali yoshlarga yetkazish maqsadida tanlovlar tashkil etish ishlarini amalga oshirsin.
4. Raqamli texnologiyalar vazirligi manfaatdor vazirlik va idoralar bilan birgalikda Qatagʻon qurbonlari xotirasi davlat muzeyi va hududlarda oliy taʼlim tashkilotlari tizimidagi “Qatagʻon qurbonlari xotirasi” muzeylarida qatagʻon qurbonlarining ibratli hayoti va faoliyatini yorituvchi gologrammali koʻrgazmalar tashkil etsin.
5. Oʻzbekiston mahallalari uyushmasiga Respublika Maʼnaviyat va maʼrifat markazi, Qatagʻon qurbonlari xotirasi davlat muzeyi, “Shahidlar xotirasi” jamoat fondi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda qatagʻon qurbonlarining hayoti va faoliyati haqidagi maʼlumotlarni oʻzida aks ettirgan “Xotira lavhasi”ni tayyorlab, ular tugʻilib oʻsgan mahallalarga oʻrnatish ishlarini yakunlash tavsiya etilsin.
6. Oʻzbekiston Milliy teleradiokompaniyasiga Oʻzbekiston Milliy axborot agentligi hamda manfaatdor vazirlik va idoralar bilan birgalikda ushbu qarorning mazmun-mohiyati va ahamiyatini ommaviy axborot vositalarida keng targʻib qilish tavsiya etilsin.
7. Mazkur qarorning bajarilishini nazorat qilish Vazirlar Mahkamasining “Mahalla yettiligi”, yoshlar siyosati va maʼnaviyat masalalari departamentiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 4-noyabr,
691-son
Vazirlar Mahkamasining 2025-yil 4-noyabrdagi 691-son qaroriga ILOVA
2025-2026-yillarda mamlakatimizda qatagʻon qurbonlari hayoti va faoliyatini targʻib etish ishlarini yanada jadallashtirish boʻyicha chora-tadbirlar
DASTURI
(Qonunchilik maʼlumotlari milliy bazasi, 06.11.2025-y., 09/25/691/1021-son)