Toshkent shahrida koʻchalarni yoritish obyektlaridan samarali foydalanish va ularni boshqarish tizimini takomillashtirish chora-tadbirlari toʻgʻrisida (695-son)

04.11.2025

Oʻzbekiston Respublikasi Vazirlar Mahkamasining

qarori

Toshkent shahrida koʻchalarni yoritish obyektlarini saqlash va ularni tasarruf etish, belgilangan vazifalarni oʻz vaqtida va sifatli bajarish, sohada zamonaviy tizimni joriy etish va raqamlashtirish hamda budjet mablagʻlaridan foydalanish samaradorligini oshirish maqsadida Vazirlar Mahkamasi qaror qiladi:

1. Vazirlar Mahkamasining “Davlat muassasalari va davlat ishtirokidagi korxonalarni qayta tashkil etish va tugatishning qoʻshimcha chora-tadbirlari toʻgʻrisida” 2023-yil 3-apreldagi 139-son qaroriga muvofiq Davlat muassasasi va masʼuliyati cheklangan jamiyat sifatida qayta tashkil etiladigan davlat ishtirokidagi korxonalar roʻyxati tasdiqlangani maʼlumot uchun qabul qilinsin.

2. “Toshshaharnur” davlat unitar korxonasi negizida Toshkent shahri hokimligi huzuridagi “Toshshaharnur” davlat muassasasi (keyingi oʻrinlarda — “Toshshaharnur” DM) tashkil etilsin.

3. Kuyidagilar “Toshshaharnur” DMning asosiy vazifalari etib belgilansin:

Toshkent shahridagi koʻchalarni yoritish obyektlarini saqlash, tashqi yoritishni masofadan boshqarishning va elektr energiyasini hisobga olishni nazorat qilishning avtomatlashtirilgan tizimini joriy etish, ishga tushirish va tasarruf etish;

zamonaviy va energiya tejamkor yoritish-texnika uskunalarini oʻrnatish orqali elektr tarmoqlarini, illyuminatsiya moslamalarini, meʼmoriy va dekorativ yoritishni yanada takomillashtirish;

Toshkent shahri koʻchalarining yoritilishi, bino va inshootlar, arxitektura yodgorliklarini chiroq va illyuminatsiya bilan bezatish, davlat ahamiyatidagi bayram tadbirlarini tashqi yoritish choralarini koʻrish;

tashqi meʼmoriy bezatish yoritkichlari va rangli yorugʻlik berish qurilmalarining yoritish talablariga mosligi hamda doimiyligini taʼminlash;

tashqi yoritish elektr tarmoqlarini saqlash, tasarrufidagi maʼmuriy va ishlab chiqarish binolarini taʼmirlash hamda loyiha hujjatlarini ishlab chiqish, bino va inshootlar fasadini meʼmoriy bezatishda rangli yorugʻlik berishni dizayn jihatidan ishlab chiqish.

4. Quyidagilar:

Toshkent shahri hokimligi huzuridagi “Toshshaharnur” davlat muassasasining tashkiliy tuzilmasi 1-ilovaga muvofiq;

Toshkent shahri hokimligi huzuridagi “Toshshaharnur” davlat muassasasi xodimlari mehnatiga haq toʻlash boʻyicha tarmoq tarif setkasi 2-ilovaga muvofiq;

Toshkent shahri hokimligi huzuridagi “Toshshaharnur” davlat muassasasi xodimlarini moddiy ragʻbatlantirish tartibi toʻgʻrisidagi nizom 3-ilovaga muvofiq;

Toshkent shahri hokimligi huzuridagi “Toshshaharnur” davlat muassasasi xodimlarining meʼyorlangan sonini belgilash tartibi 4-ilovaga muvofiq tasdiqlansin.

5. Toshkent shahri hokimligi:

a) bir hafta muddatda “Toshshaharnur” DM ustavini ishlab chiqib, uning tasdiqlanishi hamda belgilangan tartibda davlat roʻyxatidan oʻtkazilishini;

b) bir oy muddatda:

“Toshshaharnur” davlat unitar korxonasining mol-mulki, asosiy vositalari, anjomlari va transport vositalari hamda debitorlik va kreditorlik qarzdorliklari belgilangan tartibda xatlovdan oʻtkazib, “Toshshaharnur” DMga topshirilishini;

“Toshshaharnur” davlat unitar korxonasining ishlab kelayotgan xodimlari bilan tuzilgan mehnat shartnomalari mehnat toʻgʻrisidagi qonunchilikka muvofiq “Toshshaharnur” DM bilan qayta rasmiylashtirilishini;

2025-yil uchun belgilangan tegishli shtat jadvallari hamda xarajatlar smetalariga oʻzgartirishlar kiritilishini;

“Toshshaharnur” DMning tuzilmasiga muvofiq qisqartiriladigan shtat birliklariga asosan mehnat shartnomasi bekor boʻlgan xodimlarga qonunchilik hujjatlarida belgilangan tartibda kompensatsiya berish va ish joyi bilan taʼminlash choralari koʻrilishini;

v) Kambagʻallikni qisqartirish va bandlik vazirligi bilan birgalikda “Toshshaharnur” davlat unitar korxonasining mehnat shartnomasi bekor qilinadigan xodimlari zarur hollarda kasbga oʻqitilishini taʼminlasin.

6. Toshkent shahri hokimligi Iqtisodiyot va moliya vazirligi bilan birgalikda:

2025-yilda Toshkent shahar mahalliy budjetida mazkur yoʻnalish uchun nazarda tutilgan mablagʻlar va qoʻshimcha talab etiladigan mablagʻlarni mahalliy budjetning qoʻshimcha manbalari hisobidan;

2026-yildan boshlab Toshkent shahar mahalliy budjeti parametrlarini shakllantirishda “Toshshaharnur” DM va koʻchalarni yoritish obyektlarini saqlash, ulardan foydalanish hamda ularni taʼmirlash uchun zarur mablagʻlar ajratilishini nazarda tutsin.

7. Belgilansinki, “Toshshaharnur” DM “Toshshaharnur” davlat unitar korxonasining barcha huquqlari, majburiyatlari hamda tuzilgan shartnomalari boʻyicha huquqiy vorisi hisoblanadi.

8. Toshkent shahri hokimligi tegishli vazirlik va idoralar bilan birgalikda joriy yil yakuniga qadar Toshkent shahrida koʻchalarni yoritish obyektlarini saqlash va tasarruf etish faoliyatini xususiy sektorga berish boʻyicha Vazirlar Mahkamasiga taklif kiritsin.

9. “Toshshaharnur” DM faoliyatini samarali tashkil etish va poytaxt koʻchalarini yoritish uchun ajratilgan mablagʻlardan oqilona foydalanish hamda maqsadli yoʻnaltirishga Toshkent shahri hokimi Sh.B. Umurzakov shaxsan masʼul va javobgar etib belgilansin.

10. Oʻzbekiston Respublikasi Hukumatining 5-ilovaga muvofiq ayrim qarorlariga oʻzgartirish va qoʻshimchalar kiritilsin.

11. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov hamda Toshkent shahri hokimi Sh.B. Umurzakov zimmasiga yuklansin.

Oʻzbekiston Respublikasi Bosh vaziri A. ARIPOV

Toshkent sh.,

2025-yil 4-noyabr,

695-son

Vazirlar Mahkamasining 2025-yil 4-noyabrdagi 695-son qaroriga 1-ILOVA

Toshkent shahri hokimligi huzuridagi “Toshshaharnur” davlat muassasasining

TASHKILIY TUZILMASI

Izoh.

1. Xodimlarning umumiy cheklangan soni:

boshqaruv xodimlar (B) — 45 nafar;

Mutaxassis — bajaruvchilar (M) — 66 nafar;

Xizmat koʻrsatuvchi xodimlar (X) — 84 nafar.

2. Ishlab chiqarish (ishchi) xodimlari soni bajariladigan ishlar hajmidan kelib chiqqan holda belgilanadi.

* Moliyalashtirish xoʻjalik faoliyatidan olingan mablagʻlar hisobidan amalga oshiriladi.

Vazirlar Mahkamasining 2025-yil 4-noyabrdagi 695-son qaroriga 2-ILOVA

Toshkent shahri hokimligi huzuridagi “Toshshaharnur” davlat muassasasi xodimlari mehnatiga haq toʻlash boʻyicha tarmoq

TARIF SETKASI

Izoh.

1. Elektr montyorlari hamda muhandis-texnik xodimlarga mazkur tarif koeffitsiyentlari Boshqarma boshligʻi tomonidan xodimning ish malakasidan kelib chiqib belgilanadi.

2. Tarif koeffitsiyenti bir yarim baravar oshirilgan holda qoʻllaniladi.

Vazirlar Mahkamasining 2025-yil 4-noyabrdagi 695-son qaroriga 3-ILOVA

Toshkent shahri hokimligi huzuridagi “Toshshaharnur” davlat muassasasi xodimlarini moddiy ragʻbatlantirish tartibi toʻgʻrisida

NIZOM

1-bob. Umumiy qoidalar

1. Ushbu Nizom koʻcha yoritish elektr tarmoqlarini tasarruf etuvchi Toshkent shahri hokimligi huzuridagi “Toshshaharnur” davlat muassasasi (keyingi oʻrinlarda — “Toshshaharnur” DM) xodimlari mehnatiga haq toʻlash va ularni moddiy ragʻbatlantirish tartibini belgilaydi.

2. “Toshshaharnur” DM xodimlari mehnatiga haq toʻlash tizimi:

tarif stavkalari (lavozim maoshlari)ni;

lavozim maoshiga qonunchilikka muvofiq belgilangan qoʻshimcha toʻlovlar va ustamalarni;

xodimlarni moddiy ragʻbatlantirish jamgʻarmasidan toʻlanadigan mukofotlarni oʻz ichiga oladi.

3. Xodimlarga ish haqi belgilangan tarif stavkalari (lavozim maoshi) boʻyicha “Toshshaharnur” DM boshligʻi tomonidan tasdiqlangan hamda iqtisodiyot va moliya organlarida roʻyxatdan oʻtgan shtat jadvaliga muvofiq toʻlanadi.

2-bob. Tarif stavkalari (lavozim maoshlari)

4. “Toshshaharnur” DM xodimlarining tarif stavkalari (lavozim maoshlari) “Toshshaharnur” DM xodimlari mehnatiga haq toʻlashning tarmoq tarif setkasi (keyingi oʻrinlarda — tarmoq tarif setkasi) asosida belgilanadi.

5. Tarmoq tarif setkasining tarif koeffitsiyentlari xodimning lavozimi va malakasiga qarab tabaqalanadi.

Shtat jadvalini shakllantirishda ishchi kasblar (mutaxassisliklar) boʻyicha malaka razryadlari va tarif koeffitsiyentlari ishlarni sifatli bajarish uchun talab qilinadigan malakadan (kasblar boʻyicha ishlarning oʻrtacha razryadidan) kelib chiqib belgilanadi.

6. Xodimning tarif stavkasi (lavozim maoshi) tegishli lavozim, kasb uchun belgilangan tarif koeffitsiyenti Oʻzbekiston Respublikasida belgilangan mehnatga haq toʻlashning eng kam miqdoriga koʻpaytirish orqali aniqlanadi.

7. Xodimlarning tarif stavkalari (lavozim maoshlari):

Oʻzbekiston Respublikasi Prezidentining qarorlariga muvofiq budjet tashkilotlari xodimlarining ish haqi oshirilganda;

xodim “Toshshaharnur” DMda boshqa lavozimga oʻtkazilganda yoki ishchiga yuqori malaka toifasi berilganda oʻzgartiriladi.

3-bob. Qoʻshimcha toʻlov va ustamalar

8. “Toshshaharnur” DM xodimlariga tarif stavkasiga xizmat vaqtidan tashqari, dam olish va bayram kunlari hamda tungi vaqtda ishlaganlik uchun soatbay tarif stavkasidan kelib chiqib, qoʻshimcha mukofot toʻlovlari Oʻzbekiston Respublikasining Mehnat kodeksiga muvofiq toʻlanadi.

Soatbay tarif stavkasi miqdori xodimning tarif stavkasini ish vaqti normal davom etgan taqdirda, ish soatlarining oʻrtacha oylik soniga boʻlish orqali aniqlanadi.

Xodimlarning dam olish kunlari ichki mehnat tartib-qoidalari bilan belgilanadi.

Soat 22:00 dan soat 6:00 gacha ishlangan vaqt tungi vaqt hisoblanadi.

9. “Toshshaharnur” DM xodimlariga kuyidagi toʻlovlar toʻlanadi:

tarif stavkasining (lavozim maoshining) 30 foizi miqdorida har oylik ustama;

ovqatlanish uchun qonunchilik hujjatlarida belgilangan bazaviy hisoblash miqdorining bir baravari miqdorida kompensatsiya.

10. Haydovchilarning mehnatiga haq toʻlash boʻyicha amaldagi tarmoq tarif setkasiga 1,228 miqdorida tarmoq koeffitsiyenti qoʻllanadi.

11. “Toshshaharnur” DM xodimlariga koʻcha yoritish sohasidagi uzluksiz umumiy ish staji (uzoq muddat xizmat qilgan) uchun quyidagi miqdorlarda har choraklik mukofot toʻlanadi:

Yuqorida koʻrsatib oʻtilgan qoʻshimcha toʻlovlarga xarajatlar “Toshshaharnur” DM xarajatlarining yillik smetasida aks ettiriladi.

12. Uzluksiz ish staji:

tashkilotlar tugatilgani (qayta tashkil etilgani) yoki shtat qisqargani yoxud doimiy yashash joyi oʻzgargani sababli tashkilotlardan ishdan boʻshagan kundan boshlab uch oydan kechikmay ishga kirganda;

oʻz xohishiga koʻra (uzrli sabab bilan), shu jumladan, eri yoki xotini boshqa yashash joyiga oʻtganda (oʻtish vaqti bir oylik muddatga kiritilmaydi) tashkilotlardan ishdan boʻshagan kundan boshlab bir oydan kechikmay ishga kirganda tatbiq etiladi.

4-bob. Mukofotlash va moddiy yordam

13. “Toshshaharnur” DM xodimlarini moddiy ragʻbatlantirish jamgʻarmasi mukofotlash, qoʻshimcha toʻlovlar hamda moddiy yordam manbai hisoblanadi.

“Toshshaharnur” DM xodimlarini moddiy ragʻbatlantirish jamgʻarmasi “Toshshaharnur” DM tomonidan har yili nazarda tutiladigan mehnatga haq toʻlash jamgʻarmasining 15 foizi miqdorida budjet mablagʻlari hisobidan shakllantiriladi.

14. Xodimlar “Toshshaharnur” DM boʻyicha belgilangan koʻrsatkichlar bajarilishi sharti bilan yil choragidagi ish yakunlariga koʻra mukofotlanadi.

Oʻzining funksional vazifalarini oʻz vaqtida va sifatli bajarish hamda “Toshshaharnur” DM faoliyati natijalariga shaxsiy hissa qoʻshish xodimlarga mukofot yozishning asosiy koʻrsatkichi hisoblanadi.

Xodimlarning har bir toifasi boʻyicha mukofotlashning aniq koʻrsatkichlari “Toshshaharnur” DMning kasaba uyushmasi qoʻmitasi bilan kelishilgan holda “Toshshaharnur” DM boshligʻi tomonidan belgilanadi.

Bir xodim hisobiga choraklik mukofot miqdori tarmoq tarif setkasi boʻyicha uning tarif stavkasi (lavozim maoshi) hamda uzluksiz ish stajining bir oylik qismining 50 foizidan ortiq boʻlishi mumkin emas.

15. Mukofotlash toʻgʻrisidagi qaror “Toshshaharnur” DM boshligʻining buyrugʻi bilan kamida 5 kishidan (toq son boʻlishi shart), shu jumladan, komissiya raisi — “Toshshaharnur” DM boshligʻi, oʻrinbosari, bosh buxgalter, kasaba uyushmasi qoʻmitasi raisi va boʻlinma boshliqlaridan iborat tarkibda tashkil etilgan komissiya tomonidan qabul qilinadi.

16. Komissiyaning ish tartibi kasaba uyushmasi qoʻmitasi bilan kelishilgan holda “Toshshaharnur” DM boshligʻi tomonidan belgilanadi.

Komissiyaning majlislari qoida tariqasida har chorakda, ayrim hollarda esa — zaruratga koʻra oʻtkaziladi.

Mukofotlash toʻgʻrisidagi qaror ochiq ovoz berish orqali qabul qilinadi.

Komissiya aʼzolarining kamida uchdan biri ovoz bergan taqdirda, qaror qabul qilingan deb hisoblanadi.

17. Mukofot amalda ishlangan vaqt uchun beriladi.

5-bob. Yakunlovchi qoida

18. “Toshshaharnur” DM boshligʻi xodimlar mehnatini normalashtirish va hisobga olishni tashkil etish, xodimlarga tarif stavkalari (lavozim maoshlari) belgilanishining toʻgʻriligi, ustamalar va qoʻshimcha toʻlovlar hisoblab chiqilgani, mukofotlar yozilgani uchun shaxsan javobgar hisoblanadi.

Vazirlar Mahkamasining 2025-yil 4-noyabrdagi 695-son qaroriga 4-ILOVA

Toshkent shahri hokimligi huzuridagi “Toshshaharnur” davlat muassasasi xodimlarining meʼyorlangan sonini belgilash

TARTIBI

1-bob. Umumiy qoidalar

1. Asosiy (ishlab chiqarish) xodimlari — ishlab chiqarish jarayonida bevosita ishtirok etadigan xodimlar (ustalar, brigadirlar va ishchilar) quyidagilar hisoblanadi:

boshqarish meʼyorlari — bitta rahbarga bevosita boʻysunadigan xodimlarning maqbul soni;

boshqaruv xodimlari — farmoyish berish funksiyasi, xodimlarga rahbarlik qilish, tegishli qarorlarni qabul qilish, loyihalashtirish jarayonlarini nazorat qilish va tartibga solish ishlarini bajaruvchi xodimlar;

yordamchi xodimlar — texnik va xizmat koʻrsatuvchi (boshqaruv va asosiy ishlab chiqarish xodimlari faoliyatini taʼminlovchi) xodimlar;

muhandis-texnik xodimlar — boshqaruv xodimlarining bir qismi boʻlib, muhandislik-texnik taʼminot (shu jumladan, loyihalashtirish, muhandislik-texnik va smeta hujjatlarini tayyorlash, texnologik jarayonlarni tashkil etish va boshqalar) ishlarini bajaruvchi xodimlar;

shtatlar — Toshkent shahri hokimligi huzuridagi “Toshshaharnur” davlat muassasasining (keyingi oʻrinlarda — “Toshshaharnur” DM) maqsadlari, vazifalari, funksiyalari va ishlab chiqarish dasturlarini bajarish uchun zarur boʻlgan doimiy xodimlar lavozimlarining roʻyxati. Shtatlar soni shtat jadvaliga koʻra belgilanadi;

texnik xodimlar — boshqaruv xodimlari faoliyatini taʼminlash boʻyicha texnik xizmat koʻrsatuvchi xodimlar;

xizmat koʻrsatish xodimlari — bino va hududlarga texnik va xoʻjalik xizmatini hamda boshqaruv xodimlariga transport xizmatini koʻrsatish, shuningdek “Toshshaharnur” DMning boshqaruv va asosiy (ishlab chiqarish) xodimlariga boshqa xizmatlarni koʻrsatuvchi xodimlar;

xodimlarning meʼyorlangan soni — har bir ish turini bajarish uchun zarur boʻlgan vaqt meʼyorlarini hisobga olgan holda “Toshshaharnur” DMning aniq maqsadlari, vazifa va funksiyalarini amalga oshirish uchun zarur boʻlgan maʼlum xodimlarning belgilangan soni;

shtat jadvali — shtatlar asosida ishlab chiqilgan, “Toshshaharnur” DM boshligʻi tomonidan tasdiqlanadigan, doimiy xodimlarning nomi bir xil lavozimlar soni va maoshlarining miqdori koʻrsatilgan roʻyxat.

2. “Toshshaharnur” DM boʻyicha xodimlarning shtat jadvali qonunchilikda belgilangan tartibda iqtisodiyot va moliya organlarida roʻyxatga olinadi.

3. “Toshshaharnur” DM xodimlarini saqlab turish belgilangan tartibda tasdiqlangan xarajatlar smetasi doirasida amalga oshirilib, ularning tarkibiga kuyidagilar kiradi:

ish haqi, mukofotlar, qoʻshimcha toʻlovlar, ustamalar va ragʻbatlantirish tarzidagi toʻlovlar;

aniq koʻrsatilgan va asoslangan boshqa xarajatlar.

2-bob. Boshqaruv va muhandis-texnik xodimlarning meʼyorlangan sonini belgilash

4. Boʻlim boshligʻi lavozimi qonunchilik hujjatlariga muvofiq tasdiqlanadigan “Toshshaharnur” DMning tuzilmasidan kelib chiqqan holda joriy etiladi.

5. Bosh mutaxassislar, yetakchi mutaxassislar va mutaxassislarning lavozimlari “Toshshaharnur” DMning tegishli tuzilmaviy boʻlinmalarida belgilangan tartibda joriy etiladi.

6. Har bir boshqaruv va muhandis-texnik xodimlar lavozimlari uchun “Toshshaharnur” DM boshligʻi tomonidan biriktirilgan xizmat koʻrsatish hududidan kelib chiqqan holda tegishli lavozim majburiyatlari va malaka talablari tasdiqlanadi.

7. “Toshshaharnur” DM boshligʻi tomonidan “Toshshaharnur” DMdagi elektr montyori shtat birliklarini belgilangan meʼyorlardan oshmagan holda ish hajmidan kelib chiqib qayta biriktirilishi mumkin.

3-bob. Asosiy (ishlab chiqarish) xodimlarining meʼyorlangan sonini belgilash

8. Asosiy (ishlab chiqarish) xodimlarining meʼyorlangan soni quyidagilardan kelib chiqqan holda aniqlanadi:

Vazirlar Mahkamasining 2025-yil 4-noyabrdagi 695-son qaroriga 5-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2009-yil 1-apreldagi 91-son qarori bilan tasdiqlangan Shahar va tuman obodonlashtirish boshqarmalari xodimlari mehnatiga haq toʻlash va ularni moddiy ragʻbatlantirish tartibi toʻgʻrisidagi nizomning 9-bandida:

a) sakkizinchi xatboshidagi “(Fuqarolarga xizmat koʻrsatish boshqarmasidan tashqari) hamda” soʻzlari “Fuqarolarga xizmat koʻrsatish boshqarmasi” soʻzlari bilan almashtirilsin;

b) toʻqqizinchi xatboshidagi “Toshkent shahar hokimligi huzuridagi Obodonlashtirish bosh boshqarmasining Fuqarolarga xizmat koʻrsatish boshqarmasi,” soʻzlari chiqarib tashlansin;

v) oʻn ikkinchi xatboshidagi “(Fuqarolarga xizmat koʻrsatish boshqarmasidan tashqari)” soʻzlari “Fuqarolarga xizmat koʻrsatish boshqarmasi” soʻzlari bilan almashtirilsin;

g) oʻn uchinchi xatboshidagi “Toshkent shahar hokimligi huzuridagi Obodonlashtirish bosh boshqarmasining Fuqarolarga xizmat koʻrsatish boshqarmasining” soʻzlari chiqarib tashlansin;

d) quyidagi mazmundagi oʻn toʻrtinchi xatboshi bilan toʻldirilsin:

“haydovchilarning mehnatga haq toʻlash boʻyicha amaldagi tarmoq tarif setkasiga 1,228 miqdorida tarmoq koeffitsiyenti qoʻllanadi;”;

e) oʻn toʻrtinchi xatboshi oʻn beshinchi xatboshi deb hisoblansin.

2. Vazirlar Mahkamasining 2004-yil 24-dekabrdagi 606-son qarori bilan tasdiqlangan Mustaqillik maydonini koʻkalamzorlashtirish, obodonlashtirish va saqlash departamenti tuzilmasidagi “Jami xodimlar soni — 307 kishi” soʻzlari “Ishlab chiqarish (ishchi) xodimlari soni bajariladigan ishlar hajmidan kelib chiqqan holda belgilanadi” soʻzlari bilan almashtirilsin.