Mahalliy ijro etuvchi hokimiyat organlari xodimlari faoliyatining samaradorligini eng muhim samaradorlik koʻrsatkichlari (KPI) asosida baholashning namunaviy tartibini tasdiqlash toʻgʻrisida (3696-son)

28.10.2025

Oʻzbekiston Respublikasi Prezidenti huzuridagi Boshqaruv samaradorligi agentligi direktorining

buyrugʻi

[Oʻzbekiston Respublikasi Adliya vazirligi tomonidan 2025-yil 28-oktabrda roʻyxatdan oʻtkazildi, roʻyxat raqami 3696]

Oʻzbekiston Respublikasi Prezidentining 2025-yil 7-avgustdagi PF-129-son “Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari xodimlarining mehnatiga haq toʻlash va ularni moddiy ragʻbatlantirish tizimini takomillashtirish chora-tadbirlari toʻgʻrisida”gi Farmoniga muvofiq buyuraman:

1. Mahalliy ijro etuvchi hokimiyat organlari xodimlari faoliyatining samaradorligini eng muhim samaradorlik koʻrsatkichlari (KPI) asosida baholashning namunaviy tartibi ilovaga muvofiq tasdiqlansin.

2. Mazkur buyruq Oʻzbekiston Respublikasi Iqtisodiyot va moliya vazirligi, Kambagʻallikni qisqartirish va bandlik vazirligi, Raqamli texnologiyalar vazirligi hamda Oʻzbekiston Kasaba uyushmalari Federatsiyasi bilan kelishilgan.

3. Ushbu buyruq 2025-yil 21-noyabrdan boshlab kuchga kiradi.

Direktor v.b. U. XUSAINOV

Toshkent sh.,

2025-yil 16-oktabr,

2-2025-son

Kelishildi:

Oʻzbekiston Kasaba uyushmalari Federatsiyasi raisi K. RAFIKOV

2025-yil 10-oktabr

Raqamli texnologiyalar vaziri Sh. SHERMATOV

2025-yil 4-oktabr

Kambagʻallikni qisqartirish va bandlik vaziri B. ZAXIDOV

2025-yil 23-sentabr

Iqtisodiyot va moliya vaziri D. KUCHKAROV

2025-yil 12-sentabr

Oʻzbekiston Respublikasi Prezidenti huzuridagi Boshqaruv samaradorligi agentligi direktorining 2025-yil 16-oktabrdagi 2-2025-son buyrugʻiga ILOVA

Mahalliy ijro etuvchi hokimiyat organlari xodimlari faoliyatining samaradorligini eng muhim samaradorlik koʻrsatkichlari (KPI) asosida baholashning

NAMUNAVIY TARTIBI

Ushbu Namunaviy tartib Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari boshqaruv xodimlari (bundan buyon matnda hokimlik xodimlari deb yuritiladi) faoliyatining samaradorligini eng muhim samaradorlik koʻrsatkichlari (KPI) (bundan buyon matnda samaradorlik koʻrsatkichlari deb yuritiladi) asosida baholash tartibini belgilaydi.

Mazkur Namunaviy tartibning amal qilishi Davlat fuqarolik xizmati lavozimlarining davlat reyestriga kiritilgan lavozimlardagi hokimlik xodimlari faoliyatini samaradorlik koʻrsatkichlari asosida baholash boʻyicha Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklarining oʻz ichki tartibini belgilashga nisbatan tatbiq etiladi.

1-bob. Umumiy qoidalar

1. Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklari tarkibiy boʻlinmalari rahbarlari faoliyati samaradorlik koʻrsatkichlarining namunaviy shakllari ushbu Namunaviy tartibning 1-ilovasida hamda hokimlik xodimlari faoliyati samaradorlik koʻrsatkichlarining namunaviy shakllari ushbu Namunaviy tartibning 2-ilovasida belgilangan.

2. Samaradorlik koʻrsatkichlari quyidagi talablarga javob berishi kerak:

aniq boʻlishi — erishish koʻzlanayotgan samaradorlik koʻrsatkichlarining aniq belgilanishi;

vaqt chegarasining mavjudligi — koʻzlanayotgan natijalarga erishishning aniq muddatlari belgilanishi;

kompetentligi — samaradorlik koʻrsatkichlari hokimlik xodimlarining vazifa va javobgarligi doirasida boʻlishi;

maqsadliligi — samaradorlik koʻrsatkichlari mahalliy ijro etuvchi hokimiyat organining asosiy vazifalarini amalga oshirishdan kutilayotgan natijalarga erishishga yoʻnaltirilganligi;

erishish mumkinligi — samaradorlik koʻrsatkichlarining mavjud resurs va vakolatlarga muvofiqligi;

oʻlchanadigan boʻlishi — samaradorlik koʻrsatkichlariga erishish darajasini baholash uchun muayyan shartli birliklarda oʻlchash mumkin boʻlgan koʻrsatkichlardan foydalanish.

2-bob. Hokimlik xodimlari faoliyatining samaradorlik koʻrsatkichlarini ishlab chiqish va tasdiqlash

3. Hokimlik xodimlari faoliyatining samaradorlik koʻrsatkichlarini ishlab chiqish, tasdiqlash va ularni baholash ushbu Namunaviy tartibning 3-ilovasidagi sxemaga asosan “samaradorlik.uz” elektron platformasi (bundan buyon matnda platforma deb yuritiladi) orqali amalga oshiriladi.

4. Samaradorlik koʻrsatkichlari har yil uchun ishlab chiqilib, tasdiqlanadi hamda uning ijrosi har chorak va yil yakuni boʻyicha baholanadi.

5. Samaradorlik koʻrsatkichlarining har biri uchun bitta oʻlchov birligidan foydalaniladi.

6. Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklarining tarkibiy boʻlinmalariga yuklatilgan vazifa va funksiyalardan kelib chiqib belgilanadigan samaradorlik koʻrsatkichlarining hamda maxsus baholash shaklidagi samaradorlik koʻrsatkichlarining vazni ularning muhimligi, murakkabligi va ularni bajarish uchun sarflanadigan vaqtdan kelib chiqib belgilanadi.

Har bir hokimlik xodimi faoliyati samaradorlik koʻrsatkichlarining chorak yakuni uchun umumiy vazni 100 ga teng boʻladi, bundan hokimlik xodimlarining tashabbuskorligi uchun belgilangan vaznlar mustasno.

7. Samaradorlik koʻrsatkichlarining prognozi kelgusi yil uchun progressiv koʻrsatkichlar uchun oʻsib boruvchi hamda regressiv koʻrsatkichlar uchun pasayib boruvchi yakun bilan belgilanadi.

8. Samaradorlik koʻrsatkichlari bajarilishi toʻgʻrisidagi maʼlumot avtomatik tarzda yoki tasdiqlash orqali shakllantiriladi.

9. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri, tuman (shahar) hokimlari qarori bilan hokimlik xodimlari faoliyati samaradorligini baholash jarayonini tashkil qilish va monitoring qilish boʻyicha masʼul tarkibiy tuzilma (qoida tariqasida, Axborot-tahlil guruhlari) (bundan buyon matnda masʼul tarkibiy tuzilma deb yuritiladi) belgilanadi.

10. Masʼul tarkibiy tuzilmaning baholash jarayonini tashkil qilish va monitoring qilish doirasidagi vazifalari quyidagilardan iborat hisoblanadi:

hokimlik xodimlari faoliyatining samaradorlik koʻrsatkichlari toʻgʻri va sifatli ishlab chiqilishini muvofiqlashtirish;

hokimlik xodimlari orasida baholash tizimining mohiyati, ahamiyati va amaliyotda toʻgʻri qoʻllanishi boʻyicha tushuntirishlar olib borish;

platformaning moderatori sifatida undagi sozlamalarni toʻgʻrilash, samaradorlik koʻrsatkichlarining maqsadli koʻrsatkichlari va amaldagi natijalarning oʻz vaqtida platformaga kiritilishini monitoring qilish.

11. Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklarining tarkibiy boʻlinmalariga yuklatilgan vazifa va funksiyalardan kelib chiqib belgilanadigan samaradorlik koʻrsatkichlari ushbu Namunaviy tartibning 4-ilovasiga muvofiq shaklda hamda maxsus baholash shaklidagi samaradorlik koʻrsatkichlari ushbu Namunaviy tartibning 5-ilovasiga muvofiq shaklda quyidagilar tomonidan tasdiqlanadi:

Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari xodimlarining samaradorlik koʻrsatkichlari har yili 15-yanvarga qadar tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari tomonidan, bundan ushbu hokimliklarning faoliyat samaradorligi natijasi avtomatik tarzda shakllanadigan xodimlari mustasno;

tuman (shahar) hokimliklari xodimlarining samaradorlik koʻrsatkichlari har yili 25-yanvarga qadar tuman (shahar) hokimlari tomonidan, bundan ushbu hokimliklarning faoliyat samaradorligi natijasi avtomatik tarzda shakllanadigan xodimlari mustasno.

Bunda, ushbu samaradorlik koʻrsatkichlari masʼul tarkibiy tuzilma tomonidan har yili 1-fevralga qadar platformaga kiritiladi.

12. Platformadagi va qogʻozda tasdiqlangan samaradorlik koʻrsatkichlari oʻrtasida tafovut boʻlgan taqdirda, platformadagi samaradorlik koʻrsatkichlari qoʻllaniladi.

13. Samaradorlik koʻrsatkichlariga oʻzgartirish va qoʻshimchalar kiritish tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahri, tuman (shahar) hokimlari qarori asosida masʼul tarkibiy tuzilma tomonidan amalga oshiriladi.

3-bob. Hokimlik xodimlari faoliyatining samaradorlik koʻrsatkichlari bajarilishi darajasini baholash

14. Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklarining tarkibiy boʻlinmalariga yuklatilgan vazifa va funksiyalardan kelib chiqib belgilanadigan samaradorlik koʻrsatkichlarining bajarilishi darajasi toʻgʻrisidagi maʼlumotlar hokimlik xodimlari tomonidan hisobot davridan keyingi oyning 20-sanasiga qadar platformaga kiritiladi, bundan avtomatik tarzda shakllanadigan samaradorlik koʻrsatkichlari mustasno.

15. Platformaga kiritilgan samaradorlik koʻrsatkichlarining bajarilishi darajasi toʻgʻrisidagi maʼlumotlar samaradorlik koʻrsatkichlarini baholashga masʼul shaxslar (bundan buyon matnda baholovchi masʼullar deb yuritiladi) tomonidan hisobot davridan keyingi oyning 25-sanasiga qadar tasdiqlanadi yoki rad etiladi.

Bunda, samaradorlik koʻrsatkichlarining bajarilishi darajasi toʻgʻrisidagi maʼlumotlar baholovchi masʼullar tomonidan rad etilgan taqdirda, hokimlik xodimi ushbu maʼlumotlarni ular rad etilgan kundan boshlab 3 kun muddat ichida qayta tahrirlab kiritishi mumkin.

16. Maxsus baholash shaklidagi samaradorlik koʻrsatkichlarining bajarilishi darajasi toʻgʻrisidagi maʼlumotlar ushbu Namunaviy tartibning 5-ilovasiga muvofiq shaklda baholovchi masʼullar tomonidan hisobot davridan keyingi oyning 20-sanasiga qadar platformaga kiritiladi, bunda ushbu maʼlumotlarni tasdiqlash talab etilmaydi.

17. Hokimlik xodimlarining ijro intizomiga rioya qilishi ushbu Namunaviy tartibning 6-ilovasiga muvofiq shaklda Ijro intizomi nazorati boʻlimi/ijro intizomi boʻlinmasi tomonidan hisobot davridan keyingi oyning 20-sanasiga qadar platformada baholanadi.

Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklarining tarkibiy boʻlinma rahbarlarining ijro intizomiga rioya qilishi natijasi ushbu tarkibiy boʻlinmadagi xodimlarning oʻrtacha natijasidan kelib chiqib avtomatik tarzda shakllanadi, tarkibiy boʻlinmada faqat rahbar faoliyat yuritgan hollar bundan mustasno.

18. Hokimlik xodimlarining mehnat intizomiga rioya qilishi ushbu Namunaviy tartibning 7-ilovasiga muvofiq shaklda Tashkiliy-kadrlar guruhi tomonidan hisobot davridan keyingi oyning 20-sanasiga qadar platformada baholanadi.

Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklaridagi tarkibiy boʻlinma rahbarlarining mehnat intizomiga rioya qilishi natijasi tarkibiy boʻlinmadagi xodimlarning oʻrtacha natijasidan kelib chiqib avtomatik tarzda shakllanadi, tarkibiy boʻlinmada faqat rahbar faoliyat yuritgan hollar bundan mustasno.

19. Hokimlik xodimlari tomonidan oʻzlarining tashabbuskorligi toʻgʻrisidagi tasdiqlovchi maʼlumotlarning elektron (pdf) shakli hisobot davridan keyingi oyning 10-sanasiga qadar platformaga kiritiladi.

20. Hokimlik xodimlari tashabbuskorligi platformaga kiritilgan maʼlumotlar asosida hisobot davridan keyingi oyning 20-sanasiga qadar bevosita rahbar tomonidan 10 ballik tizimda baholanadi.

21. Hokimlik xodimlari faoliyati samaradorligini baholash natijalari reytingi platformada barcha samaradorlik koʻrsatkichlari bajarilishi darajasi toʻgʻrisidagi maʼlumotlar ushbu Namunaviy tartibning 1 va 2-ilovalariga muvofiq baholangandan keyin avtomatik tarzda shakllanadi.

22. Hokimlik xodimlari hisobot davri davomida toʻliq ish faoliyatini amalga oshirmaganda (yangi ishga qabul qilinganda, mehnatga layoqatsizlik vaqtida, taʼtil, malaka oshirish, xizmat safarida boʻlganda, ishchi guruhlarga jalb qilinganda va boshqalar) uning faoliyati samaradorligi intervyu asosida baholanishi mumkin.

Bunda, hokimlik xodimlari faoliyati samaradorligini intervyu asosida baholash bevosita rahbar tomonidan hisobot davri yakuni bilan individual tartibda suhbat oʻtkazish va uning natijasi boʻyicha ushbu Namunaviy tartibning 8-ilovasidagi baholash shaklini toʻldirish orqali amalga oshiriladi.

Shuningdek, hokimlik xodimi lavozimga yangi tayinlanganda intervyu asosida baholanib, ushbu baho natijasi keyingi hisobot davri uchun amalda boʻladi. Bunda, hokimlik xodimi hisobot davrining uchdan bir qismidan kam faoliyat yuritgan taqdirda ushbu mexanizm qoʻllaniladi.

23. Hokimlik xodimlari faoliyati samaradorligining reyting natijalari:

70 balldan kam boʻlganda — “qoniqarsiz” (D);

70 balldan 85 ballgacha — “qoniqarli” (S);

85 balldan 100 ballgacha — “yaxshi” (B);

100 ball va undan yuqori boʻlganda — “aʼlo” (A) deb baholanadi.

24. Hokimlik xodimlariga har oylik ustamalar miqdori hisobot davri yakuni boʻyicha baholash natijalari reytingi asosida Oʻzbekiston Respublikasi Prezidentining 2025-yil 7-avgustdagi PF-129-son “Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari xodimlarining mehnatiga haq toʻlash va ularni moddiy ragʻbatlantirish tizimini takomillashtirish chora-tadbirlari toʻgʻrisida”gi Farmoniga muvofiq belgilanadi hamda keyingi chorak davomida toʻlab boriladi.

4-bob. Hokimlik xodimlari faoliyatining samaradorligini baholash jarayoni ishtirokchilarining javobgarligi

25. Quyidagilar:

masʼul tarkibiy tuzilma — hokimlik xodimlari faoliyatining samaradorlik koʻrsatkichlari oʻz vaqtida platformaga kiritilishiga;

baholovchi masʼullar — samaradorlik koʻrsatkichlarining bajarilishi toʻgʻrisidagi maʼlumotlarni oʻz vaqtida kiritishga va maʼlumotlarning haqqoniyligini taʼminlashga;

hokimlik xodimlari — oʻzlariga belgilab berilgan samaradorlik koʻrsatkichlariga erishilishiga shaxsan masʼul va javobgar hisoblanadi.

5-bob. Shikoyat qilish tartibi

26. Hokimlik xodimining samaradorlik koʻrsatkichlari va baholash natijasidan noroziligi boʻyicha shikoyatini koʻrib chiqish uchun Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hamda tuman (shahar) hokimlarining qarori bilan toq sonli va kamida besh nafar mutaxassislardan iborat tarkibda komissiya (bundan buyon matnda komissiya deb yuritiladi) tuziladi.

Hokimlik xodimi samaradorlik koʻrsatkichlarini ishlab chiqish va ularni baholashga masʼul boʻlgan shaxslarning komissiya tarkibiga kiritilishiga yoʻl qoʻyilmaydi.

27. Hokimlik xodimi samaradorlik koʻrsatkichlari va baholash natijasi bilan tegishli tartibda xabardor qilingan kundan eʼtiboran bir oy ichida shikoyat qilishi mumkin.

Bunda, komissiya hokimlik xodimi shikoyat koʻrib chiqilishidan besh kun oldin uni koʻrib chiqish vaqti va joyi haqida ogohlantiradi.

28. Komissiya shikoyat kelib tushgan kundan boshlab, oʻn ish kuni ichida mazkur shikoyatni koʻrib chiqib, qaror qabul qilishi shart.

Bunda, hokimlik xodimi mazkur shikoyatni koʻrib chiqishda ishtirok etish huquqiga ega.

29. Hokimlik xodimi shikoyat boʻyicha qaror qabul qilinguniga qadar uni chaqirib olishga haqli. Shikoyatni chaqirib olish yozma yoki elektron shaklda rasmiylashtiriladi.

30. Komissiya shikoyatni koʻrib chiqish natijalari boʻyicha quyidagi qarorlardan birini qabul qilishga haqli:

tasdiqlangan samaradorlik koʻrsatkichlari va baholash natijasini oʻzgarishsiz qoldirish;

tasdiqlangan samaradorlik koʻrsatkichlari va baholash natijasiga oʻzgartirishlar kiritish.

31. Shikoyat roʻyxatdan oʻtkazilgan paytdan eʼtiboran belgilangan tartibda koʻrib chiqilgunga qadar, samaradorlik koʻrsatkichlari hamda baholash natijasining amal qilishi va ijro etilishi toʻxtatib turiladi.

6-bob. Yakunlovchi qoida

32. Ushbu Namunaviy tartib talablarining buzilishida aybdor boʻlgan shaxslar qonunchilik hujjatlariga muvofiq javob beradi.

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 1-ILOVA

Qoraqalpogʻiston Respublikasi Vazirlar Kengashi, viloyatlar, Toshkent shahri hamda tuman (shahar) hokimliklarining tarkibiy boʻlinmalari rahbarlari faoliyatini eng muhim samaradorlik koʻrsatkichlari asosida

BAHOLASHNING NAMUNAVIY SHAKLI

Izoh:

* Qoraqalpogʻiston Respublikasi Vazirlar Kengashi Raisining, viloyatlar va Toshkent shahri, tuman (shahar) hokimlarining baholanuvchi oʻrinbosarlariga boʻysunadigan tarkibiy boʻlinmalari rahbarlari faoliyati samaradorligining 60 foizi tegishli baholanuvchi oʻrinbosarning hisobot davri yakuni boʻyicha faoliyati samaradorligi natijasidan kelib chiqib baholanadi;

Bunda, ushbu baholanuvchi hokim oʻrinbosarlari boʻysunuvidagi tarkibiy tuzilmada ikki va undan ortiq tarkibiy boʻlinmalar mavjud boʻlsa, hokim oʻrinbosarining samaradorlik koʻrsatkichlari tegishliligiga koʻra taqsimlangan holatda ushbu shaklning 1.1-bandi boʻyicha baholanadi;

** Qoraqalpogʻiston Respublikasi Vazirlar Kengashi Raisining, viloyatlar va Toshkent shahri, tuman (shahar) hokimlarining baholanuvchi oʻrinbosarlari boʻysunuvida boʻlmagan tarkibiy boʻlinmalar rahbarlari faoliyat samaradorligining 60 foizi tarkibiy boʻlinmaga yuklatilgan vazifa va funksiyalardan kelib chiqib belgilanadigan eng muhim samaradorlik koʻrsatkichlari yoki maxsus baholash shakli asosida baholanadigan koʻrsatkichlar natijasidan kelib chiqib baholanadi;

Bunda, mazkur tarkibiy boʻlinma ushbu shaklning 1.2-bandi boʻyicha baholansa, tarkibiy boʻlinmaga boʻysunuvchi kichik tarkibiy tuzilmalar uchun ham ushbu shaklning 1.2-bandi yoki 1.3-bandi qoʻllaniladi.

*** tarkibiy boʻlinmada bir nafar rahbar faoliyat yuritganda, ijro va mehnat intizomiga rioya etish boʻyicha koʻrsatkichlari ushbu Namunaviy tartibning 6 va 7-ilovalariga muvofiq hisoblanadi;

**** baholovchi masʼullar:

tarkibiy boʻlinmalar rahbarlarining vazifa va funksiyalaridan kelib chiqib belgilanadigan eng muhim samaradorlik koʻrsatkichlari bajarilishi darajasi bevosita rahbar (Rais, hokim);

tarkibiy boʻlinmalar rahbarlarining maxsus baholash shakli asosida baholanadigan koʻrsatkichlari bajarilishi darajasi ushbu Namunaviy tartibning 5-ilovasida belgilangan masʼullar tomonidan baholanadi;

***** tarkibiy boʻlinmalar rahbarlarining tashabbuskorligi majburiy koʻrsatkich hisoblanmaydi, shu sababli umumiy 100 vaznga kiritilmasdan qoʻshimcha tarzda hisoblanadi. Shuningdek, tashabbuslar uchun beriladigan vazn 10 dan oshmaydi.

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 2-ILOVA

Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklarining tarkibiy boʻlinmalari xodimlari faoliyatini eng muhim samaradorlik koʻrsatkichlari asosida

BAHOLASHNING NAMUNAVIY SHAKLI

Izoh:

* baholanuvchi hokim oʻrinbosarlari boʻysunuvidagi tarkibiy boʻlinmada ikki va undan ortiq tarkibiy tuzilmalar mavjud boʻlsa, hokim oʻrinbosarining samaradorlik koʻrsatkichlari tegishliligiga koʻra taqsimlangan holatda ushbu shaklning 1.1-bandi boʻyicha baholanadi;

** tarkibiy boʻlinma ushbu shaklning 1.2-bandi boʻyicha baholansa, tarkibiy boʻlinmaga boʻysunuvchi kichik tarkibiy tuzilmalar uchun ham ushbu shaklning 1.2-bandi yoki 1.3-bandi qoʻllaniladi;

*** xodimlarning vazifa va funksiyalaridan kelib chiqib belgilanadigan eng muhim samaradorlik koʻrsatkichlari bajarilishi darajasi tarkibiy boʻlinma rahbari tomonidan baholanadi;

xodimlarning maxsus baholash shakli asosida baholanadigan koʻrsatkichlari bajarilishi darajasi ushbu Namunaviy tartibning 5-ilovasida belgilangan baholovchi masʼullar tomonidan baholanadi;

**** tarkibiy boʻlinmalar xodimlarining tashabbuskorligi majburiy koʻrsatkich hisoblanmaydi, shu sababli umumiy 100 vaznga kiritilmasdan qoʻshimcha tarzda hisoblanadi. Shuningdek, tashabbuslar uchun beriladigan vazn 10 dan oshmaydi.

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 3-ILOVA

Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari xodimlari faoliyatining eng muhim samaradorlik koʻrsatkichlarini ishlab chiqish, tasdiqlash va baholash

SXEMASI

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 4-ILOVA

Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari tarkibiy boʻlinmalariga yuklatilgan vazifa va funksiyalardan kelib chiqib belgilanadigan

ENG MUHIM SAMARADORLIK KOʻRSATKICHLARINING NAMUNAVIY SHAKLI

Izoh:

* progressiv — bajarilishi toʻgʻrisidagi maʼlumotlarning rejaga nisbatan oʻsish dinamikasi ijobiy natija boʻlganda, regressiv — bajarilishi toʻgʻrisidagi maʼlumotlarning rejaga nisbatan pasayish dinamikasi ijobiy natija boʻlganda.

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 5-ILOVA

Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklari tarkibiy boʻlinmalari rahbarlari va xodimlari faoliyati samaradorligini

MAXSUS BAHOLASHNING NAMUNAVIY SHAKLI

* Tuman(shahar) hokimliklaridagi lavozimlarga nisbatan.

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 6-ILOVA

Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari xodimlari tomonidan ijro intizomiga rioya qilinganligini

BAHOLASH SHAKLI*

Izoh:

* koʻrsatkichlar nomlari, turlari va soni hamda kech qolish muddati qiymati, shuningdek, ayirib tashlanadigan foiz miqdori mahalliy ijro etuvchi hokimiyat organi faoliyati xususiyatidan kelib chiqib Boshqaruv samaradorligi agentligining filiallari bilan kelishilgan holda oʻzgartirilishi mumkin.

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 7-ILOVA

Qoraqalpogʻiston Respublikasi Vazirlar Kengashi, viloyatlar va Toshkent shahri, tuman (shahar) hokimliklari xodimlari tomonidan mehnat intizomiga rioya qilinganligini

BAHOLASH SHAKLI*

Izoh:

* koʻrsatkichlar nomlari, turlari va soni hamda ayirib tashlanadigan foiz miqdori mahalliy ijro etuvchi hokimiyat organi faoliyati xususiyatidan kelib chiqib Boshqaruv samaradorligi agentligining filiallari bilan kelishilgan holda oʻzgartirilishi mumkin.

Mahalliy ijro etuvchi hokimiyat organlari xodimlari faoliyati samaradorligini eng muhim samaradorlik koʻrsatkichlari asosida baholashning namunaviy tartibiga 8-ILOVA

Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklari xodimlari faoliyatining samaradorligini

INTERVYU ASOSIDA BAHOLASH SHAKLI

Izoh:

ushbu baholash shakli mazkur Namunaviy tartibning 6-bandi ikkinchi xatboshisiga muvofiq umumiy vazni 100 ga teng boʻladi;

ushbu baholash shaklida ijro, mehnat intizomi va tashabbuskorlikni baholash mezonlari kiritilmaydi.