“Surxon” davlat qoʻriqxonasining qoʻriqlanma zonasi chegarasiga oʻzgartirish kiritish toʻgʻrisida (677-son)

27.10.2025

Oʻzbekiston Respublikasi Vazirlar Mahkamasining

qarori

Surxondaryo viloyatida chinni sanoatini rivojlantirish va chinni sanoati uchun zarur boʻlgan xomashyo zaxiralaridan oqilona foydalanish hamda yangi ish oʻrinlarini yaratish maqsadida Vazirlar Mahkamasi qaror qiladi:

1. Surxondaryo viloyati hokimligi hamda Ekologiya, atrof-muhitni muhofaza qilish va iqlim oʻzgarishi vazirligining “Surxon” davlat qoʻriqxonasining qoʻriqlanma zonasi chegarasiga oʻzgartirish kiritish toʻgʻrisidagi taklifi maʼqullansin.

2. Vazirlar Mahkamasining “Muhofaza etiladigan tabiiy hududlarning qoʻriqlanma zonalarini belgilash boʻyicha qoʻshimcha chora-tadbirlar toʻgʻrisida” 2021-yil 5-maydagi 282-son qaroriga ilovaga muvofiq oʻzgartirishlar kiritilsin.

3. Surxondaryo viloyati hokimligi Ekologiya, atrof-muhitni muhofaza qilish va iqlim oʻzgarishi vazirligi, Togʻ-kon sanoati va geologiya vazirligi, Iqtisodiyot va moliya vazirligi huzuridagi Kadastr agentligi bilan birgalikda ikki oy muddatda:

ushbu qarorga ilovaga muvofiq “Surxon” davlat qoʻriqxonasining qoʻriqlanma zonacidagi tabiatni muhofaza qilish, sogʻlomlashtirish va rekreatsiya maqsadlariga moʻljallangan yer uchastkalari (keyingi oʻrinlarda — yer uchastkalari) belgilangan tartibda tuman hokimligi zaxirasiga qaytarilishini;

yer uchastkalari tabiatni muhofaza qilish, sogʻlomlashtirish va rekreatsiya maqsadlariga moʻljallangan yerlar toifasidan sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazilishini;

yer uchastkalaridan belgilangan maqsadlarda foydalanilishini taʼminlasin.

4. Iqtisodiyot va moliya vazirligi huzuridagi Kadastr agentligi ikki oy muddatda Yer resurslarining holati toʻgʻrisidagi milliy hisobotga ushbu qarorga muvofiq tegishli oʻzgartirishlar kiritsin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov hamda Surxondaryo viloyati hokimi U.B. Qosimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 27-oktabr,

677-son

Vazirlar Mahkamasining 2025-yil 27 oktabrdagi 677-son qaroriga ILOVA

Vazirlar Mahkamasining “Muhofaza etiladigan tabiiy hududlarning qoʻriqlanma zonalarini belgilash boʻyicha qoʻshimcha chora-tadbirlar toʻgʻrisida” 2021-yil 5-maydagi 282-son qaroriga kiritilayotgan oʻzgartirishlar

1. 1-banddagi “16 695” raqami “16 691” raqami bilan almashtirilsin.

2. 4-ilovaning 3-pozitsiyasi “Oʻtloq va yaylovlar” ustunidagi “9 425” raqami “9 421” raqami bilan hamda “Jami yer maydoni” ustundagi “10 423,40” raqami “10 419,40” raqami bilan almashtirilsin.