Vazirlar Mahkamasining “Avtomototransport vositalari va shahar elektr transporti vositalari haydovchilarini tayyorlash hamda qayta tayyorlash boʻyicha nodavlat taʼlim xizmatlarini koʻrsatish faoliyatini litsenziyalash tartibini yanada takomillashtirish chora-tadbirlari toʻgʻrisida” 2018-yil 31-maydagi 408-son qaroriga oʻzgartirish va qoʻshimchalar kiritish haqida (642-son)

15.10.2025

Oʻzbekiston Respublikasi Vazirlar Mahkamasining

qarori

Soʻnggi yillarda mamlakatimizda yoʻl harakati xavfsizligini taʼminlash sohasini raqamlashtirish borasida qator choralar koʻrilmoqda.

Shu bilan birga, oʻquv tashkilotida avtomototransport vositalari va shahar elektr transporti vositalari haydovchilarini tayyorlash va qayta tayyorlash boʻyicha taʼlimni bitirganlik haqidagi yagona namunadagi guvohnomani inson omilini cheklagan holda avtomatlashtirish tizimlarni orqali shakllantirish tartibini joriy etish zarurati mavjud.

Avtomototransport vositalari va shahar elektr transporti vositalari haydovchilarini tayyorlash va qayta tayyorlash boʻyicha oʻquv tashkilotlarini (keyingi oʻrinlarda — oʻquv tashkilotlari) tamomlab, imtihonlardan muvaffaqiyatli oʻtgan nomzodlarga mazkur taʼlimni bitirganlik haqidagi yagona namunadagi guvohnomaning elektron shaklda berilishini taʼminlash maqsadida Vazirlar Mahkamasi qaror qiladi:

1. Vazirlar Mahkamasining 2022-yil 20-iyuldagi 393-son qarorida oʻquv tashkilotlarida haydovchilikka nomzodlar, ularga haydovchilarni tayyorlash (qayta tayyorlash) oʻquv dasturi boʻyicha oʻqishni tamomlagani haqidagi beriladigan yagona namunadagi guvohnomalar toʻgʻrisida elektron maʼlumotlar bazasini yuritishni taʼminlovchi moddiy-texnik bazasi mavjud boʻlishi hamda Davlat yoʻl harakati xavfsizligi xizmati avtomatlashtirilgan Yagona axborot tizimiga (keyingi oʻrinlarda — YAAAT) ushbu maʼlumotlarni real vaqt rejimida kiritib borish imkoniyati yaratilgan boʻlishi shartligi belgilangani maʼlumot uchun qabul qilinsin.

2. Shunday tartib oʻrnatilsinki, unga muvofiq:

oʻquv tashkilotlarini tamomlab, imtihonlardan muvaffaqiyatli oʻtgan nomzodlarga taʼlimni bitirganlik haqidagi yagona namunadagi guvohnoma YAAATning “e-avtotaʼlim.uz” moduli orqali elektron shakllantiriladi (keyingi oʻrinlarda — elektron guvohnoma);

elektron guvohnoma avtomototransport vositalarini boshqarish huquqini beruvchi milliy haydovchilik guvohnomasini olish uchun nazariy va amaliy imtihonlar oʻtkazish bilan bogʻliq davlat xizmatlarini koʻrsatuvchi tadbirkorlik subyektlariga (keyingi oʻrinlarda — tadbirkorlik subyektlari) YAAATning “e-avtotaʼlim.uz” moduli orqali real vaqt rejimida avtomatik tarzda taqdim etiladi;

avtomototransport vositalarini boshqarish huquqini olish istagida boʻlgan shaxs imtihonlarni topshirishda tadbirkorlik subyektlariga elektron guvohnomaning nusxasini taqdim etish talab etilmaydi.

3. Oʻzbekiston Respublikasi Ichki ishlar vazirligi uch oy muddatda yagona namunadagi elektron guvohnoma berilganligini onlayn vaqt rejimida tekshirish maqsadida YAAATning “e-avtotaʼlim.uz” modulini tadbirkorlik subyektlarining axborot tizimlariga integratsiya qilishni taʼminlasin.

4. Vazirlar Mahkamasining “Avtomototransport vositalari va shahar elektr transporti vositalari haydovchilarini tayyorlash hamda qayta tayyorlash boʻyicha nodavlat taʼlim xizmatlarini koʻrsatish faoliyatini litsenziyalash tartibini yanada takomillashtirish chora-tadbirlari toʻgʻrisida” 2018-yil 31-maydagi 408-son qaroriga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:

oʻquv tashkilotlarini tamomlab, imtihonlardan muvaffaqiyatli oʻtgan nomzodlarga taʼlimni bitirganlik haqidagi elektron guvohnomalarni berish tartibi;

elektron guvohnomalarning shakli va ularga qoʻyiladigan talablar;

elektron guvohnomalarning hisobini yuritish tartibi.

5. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

6. Ushbu qarorning bajarilishini nazorat qilish Oʻzbekiston Respublikasi ichki ishlar vaziri A.A. Tashpulatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 15-oktabr,

642-son

Vazirlar Mahkamasining 2025-yil 15-oktabrdagi 642-son qaroriga ILOVA

Vazirlar Mahkamasining “Avtomototransport vositalari va shahar elektr transporti vositalari haydovchilarini tayyorlash hamda qayta tayyorlash boʻyicha nodavlat taʼlim xizmatlarini koʻrsatish faoliyatini litsenziyalash tartibini yanada takomillashtirish chora-tadbirlari toʻgʻrisida” 2018-yil 31-maydagi 408-son qaroriga kiritilayotgan oʻzgartirish va qoʻshimchalar

1. 2-ilovada:

a) 43-banddagi “yagona namunadagi guvohnoma” soʻzlari “yagona namunadagi elektron guvohnoma” soʻzlari bilan almashtirilsin;

b) 44-bandning “a” kichik bandi chiqarib tashlansin;

v) 50-bandning ikkinchi xatboshisidagi “yagona namunadagi guvohnomasiga kiritiladi, imzo va muhr” soʻzlari “yagona namunadagi elektron guvohnomasiga kiritiladi, QR-kod” soʻzlari bilan almashtirilsin;

2. 21-ilovaning 6-band “g” kichik bandi chiqarib tashlansin.

3. 3-ilovada:

a) 231-banddagi “yagona namunadagi guvohnomalar” soʻzlari “yagona namunadagi elektron guvohnoma” soʻzlari bilan almashtirilsin;

b) 29-bandda:

birinchi xatboshi quyidagi tahrirda bayon etilsin:

“29. Oʻquv tashkilotida avtomototransport vositalari va shahar elektr transporti vositalari haydovchilarini tayyorlash va qayta tayyorlash boʻyicha taʼlimni tugatib, imtihonlardan muvaffaqiyatli oʻtgan nomzodlarga oʻquv tashkiloti tomonidan imtihon komissiyasi bayonnomasiga asosan taʼlimni bitirganlik haqidagi ushbu Nizomga ilovaga muvofiq yagona namunadagi elektron guvohnoma shakllantiriladi”;

ikkinchi xatboshi chiqarib tashlansin;

uchinchi xatboshi ikkinchi xatboshi deb hisoblansin;

v) quyidagi mazmundagi 291-band bilan toʻldirilsin:

“291. Yagona namunadagi elektron guvohnomalar oʻquv tashkilotlari tomonidan avtomototransport vositalari va shahar elektr transporti vositalari haydovchilarini tayyorlash va qayta tayyorlash boʻyicha taʼlimni tugatib, imtihonlardan muvaffaqiyatli oʻtgan nomzodlarning maʼlumotlari asosida DYHXX Yagona axborot tizimining “e-avtotaʼlim.uz” moduli (keyingi oʻrinlarda — “e-avtotaʼlim.uz” moduli) orqali avtomatik ravishda shakllantiriladi.

Yagona namunadagi elektron guvohnoma avtomototransport vositalarini boshqarish huquqini beruvchi milliy haydovchilik guvohnomasini olish uchun nazariy va amaliy imtihonlar oʻtkazish bilan bogʻliq davlat xizmatlarini koʻrsatuvchi tadbirkorlik subyektlariga “e-avtotaʼlim.uz” moduli orqali real vaqt rejimida avtomatik tarzda taqdim etiladi.

Yagona namunadagi elektron guvohnomalar uchun yigʻim undirilmaydi.

Yagona namunadagi elektron guvohnomalarning hisobi “e-avtotaʼlim.uz” moduli orqali DYHXX tomonidan amalga oshiriladi”;

g) 31-band quyidagi tahrirda bayon etilsin:

“31. Oʻquv guruhlarining hujjatlari va imtihon komissiyasi bayonnomasi belgilangan muddatgacha oʻquv tashkilotida saqlanadi. Guvohnoma yoki sertifikat yoʻqolib qolgan hollarda oʻquv tashkiloti shaxsning arizasi va imtihon komissiyasining bayonnomasiga asosan sertifikatning dublikatini belgilangan tartib asosida beradi va yagona namunadagi elektron guvohnomani shakllantiradi”;

d) quyidagi mazmundagi ilova bilan toʻldirilsin:

“Avtomototransport vositalari va shahar elektr transporti vositalari haydovchilarini tayyorlash, qayta tayyorlash va ularning malakasini oshirish tartibi toʻgʻrisidagi nizomga ILOVA

Yagona namunadagi elektron guvohnomaning

NAMUNASI

”.