Oʻzbekiston Respublikasi Oliy Majlisi Qonunchilik palatasining Tashabbusli budjet jarayonlarida parlament nazoratini amalga oshirish boʻyicha komissiyasini tuzish toʻgʻrisida (1330-V-son)

23.09.2025

Oʻzbekiston Respublikasi Oliy Majlisi Qonunchilik palatasining

qarori

Oʻzbekiston Respublikasi Oliy Majlisi Qonunchilik palatasi deputatlarining saylov okruglaridagi ijtimoiy masalalarni hal etishdagi tashabbuskorligini kuchaytirishga qaratilgan chora-tadbirlarni qoʻllab-quvvatlash, tashabbusli budjetda gʻolib boʻlmagan loyihani deputat tashabbusiga koʻra gʻolib deb eʼlon qilish jarayonlarini muvofiqlashtirish, loyihalarning moliyalashtirilishi va amalga oshirilishi ustidan taʼsirchan parlament nazoratini olib borish maqsadida Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Oliy Majlisi Qonunchilik palatasining vakolatlari muddatiga Oʻzbekiston Respublikasi Oliy Majlisi Qonunchilik palatasining Tashabbusli budjet jarayonlarida parlament nazoratini amalga oshirish boʻyicha komissiyasi 1-ilovaga muvofiq tarkibda tuzilsin.

2. Oʻzbekiston Respublikasi Oliy Majlisi Qonunchilik palatasining Tashabbusli budjet jarayonlarida parlament nazoratini amalga oshirish boʻyicha komissiyasi toʻgʻrisidagi nizom 2-ilovaga muvofiq tasdiqlansin.

3. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2025-yil 23-sentabr,

1330-V-son

Oʻzbekiston Respublikasi Oliy Majlisi Qonunchilik palatasining 2025-yil 23 senyabrdagi 1330-V-sonli Qaroriga 1-ILOVA

Oʻzbekiston Respublikasi Oliy Majlisi Qonunchilik palatasining Tashabbusli budjet jarayonlarida parlament nazoratini amalga oshirish boʻyicha komissiyasi

TARKIBI

InoyatovUlugʻbek Ilyasovich —Oʻzbekiston Respublikasi Oliy Majlisi Qonunchilik palatasidagi Oʻzbekiston Xalq demokratik partiyasi fraksiyasining rahbari, komissiya raisiKurbonboyev Maqsud Komulovich—Oʻzbekiston Respublikasi Oliy Majlisi Qonunchilik palatasi Budjet va iqtisodiy masalalar qoʻmitasi raisining oʻrinbosari, komissiya raisining oʻrinbosariAbdullayev Javlonbek Murodjonovich—Oʻzbekiston Respublikasi Oliy Majlisi Qonunchilik palatasi Innovatsion rivojlanish va axborot texnologiyalari masalalari qoʻmitasi raisining oʻrinbosariAgzamovaGulrux Anvarovna—Oʻzbekiston Respublikasi Oliy Majlisi Qonunchilik palatasi Demokratik institutlar va fuqarolik jamiyatini rivojlantirish masalalari qoʻmitasining raisiAripov Davron Raximovich—Oʻzbekiston Respublikasi Oliy Majlisi Qonunchilik palatasi Korrupsiyaga qarshi kurashish va sud-huquq masalalari qoʻmitasining aʼzosiAslonovAbdullo Ubaydulloyevich—Oʻzbekiston Respublikasi Oliy Majlisi Qonunchilik palatasi Demokratik institutlar va fuqarolik jamiyatini rivojlantirish masalalari qoʻmitasi raisining oʻrinbosariAslonova Emma Sergeyevna—Oʻzbekiston Respublikasi Oliy Majlisi Qonunchilik palatasi Tadbirkorlik, raqobatni rivojlantirish va sanoat masalalari qoʻmitasining aʼzosiAchilovJamol Alisherovich—Oʻzbekiston Respublikasi Oliy Majlisi Qonunchilik palatasi Budjet va iqtisodiy masalalar qoʻmitasi raisining oʻrinbosariMamadjanova Dilbarxon Raxmatovna—Oʻzbekiston Respublikasi Oliy Majlisi Qonunchilik palatasi Xalqaro ishlar, mudofaa va xavfsizlik masalalari qoʻmitasining aʼzosiOtamuratov Oybek Baxtiyorovich—Oʻzbekiston Respublikasi Oliy Majlisi Qonunchilik palatasi Agrar va suv xoʻjaligi masalalari qoʻmitasining aʼzosiSalimova Manzura Alimovna—Oʻzbekiston Respublikasi Oliy Majlisi Qonunchilik palatasi Budjet va iqtisodiy masalalar qoʻmitasining aʼzosiTilavoldiyev Nodir Xokimovich—Oʻzbekiston Respublikasi Oliy Majlisi Qonunchilik palatasi Demokratik institutlar va fuqarolik jamiyatini rivojlantirish masalalari qoʻmitasi raisining oʻrinbosariXusanov Diyor Sheraliyevich—Oʻzbekiston Respublikasi Oliy Majlisi Qonunchilik palatasi Innovatsion rivojlanish va axborot texnologiyalari masalalari qoʻmitasining aʼzosi”.

Oʻzbekiston Respublikasi Oliy Majlisi Qonunchilik palatasining 2025-yil 23-sentabrdagi 1330-V-sonli qaroriga 2-ILOVA

Oʻzbekiston Respublikasi Oliy Majlisi Qonunchilik palatasining Tashabbusli budjet jarayonlarida parlament nazoratini amalga oshirish boʻyicha komissiyasi toʻgʻrisidagi

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Oliy Majlisi Qonunchilik palatasining Tashabbusli budjet jarayonlarida parlament nazoratini amalga oshirish boʻyicha komissiyasining (bundan buyon matnda Komissiya deb yuritiladi) maqomini, asosiy vazifalarini, vakolatlarini hamda faoliyatini tashkil etish tartibini belgilaydi.

2. Komissiyaning maqsadi tashabbusli budjet jarayonlari doirasida, shuningdek “Mening bogʻim” loyihalari tanlovida gʻolib boʻlmagan loyihalarni Oʻzbekiston Respublikasi Oliy Majlisi Qonunchilik palatasi deputatlarining (bundan buyon matnda Deputatlar deb yuritiladi) tashabbusiga koʻra gʻolib deb eʼlon qilish jarayonlarini muvofiqlashtirish, loyihalarning moliyalashtirilishi va amalga oshirilishi ustidan parlament nazoratini olib borishdan iborat.

3. Komissiya oʻz faoliyatini Oʻzbekiston Respublikasining Konstitutsiyasiga, tegishli qonunlariga va ushbu Nizomga muvofiq amalga oshiradi.

4. Komissiya Oʻzbekiston Respublikasi Oliy Majlisi Qonunchilik palatasining (bundan buyon matnda Qonunchilik palatasi deb yuritiladi) vakolatlari muddatiga tuziladi.

2-bob. Komissiyaning asosiy vazifalari va vakolatlari

5. Komissiyaning asosiy vazifalari quyidagilardan iborat:

tashabbusli budjet jarayonlari doirasida, shuningdek “Mening bogʻim” loyihalari tanlovida gʻolib boʻlmagan loyihalar orasidan Deputatlar tashabbusiga koʻra gʻolib deb eʼlon qilish jarayonlarini muvofiqlashtirish hamda mazkur loyihalarning moliyalashtirilishi va amalga oshirilishi ustidan parlament nazoratini olib borish;

tashabbusli budjet jarayonlari doirasida, shuningdek “Mening bogʻim” loyihalari tanlovida Deputatlar tashabbusiga koʻra gʻolib deb eʼlon qilingan loyihalarga ajratilgan mablagʻlardan oʻz vaqtida va maqsadli foydalanilishi hamda moliyalashtirilgan loyihalarning ijrosi ustidan nazoratni amalga oshirish;

tashabbusli budjet jarayonlari doirasida, shuningdek “Mening bogʻim” loyihalari tanlovida gʻolib boʻlmagan loyihalar orasidan Deputatlar tashabbusiga koʻra gʻolib deb eʼlon qilish jarayonlarini takomillashtirish, hamda ushbu sohaga samarali mexanizmlarni joriy etish boʻyicha takliflar yoki tavsiyalar ishlab chiqish.

6. Komissiyaning vakolatlari quyidagilardan iborat:

Yagona saylov okrugidan partiya roʻyxati asosida saylangan deputatlarning tashabbusli budjet jarayonlari doirasida, shuningdek “Mening bogʻim” loyihalari tanlovida loyihalarni tanlashda ishtirokini taʼminlash maqsadida ularni saylov okruglariga biriktirish boʻyicha Qonunchilik palatasidagi siyosiy partiyalar fraksiyalariga takliflar kiritish;

Deputatlardan birining vakolati muddatidan ilgari tugatilgan hollarda unga biriktirilgan saylov okrugidagi tashabbusli budjet jarayonlari doirasida, shuningdek “Mening bogʻim” loyihalari tanlovida gʻolib boʻlmagan loyihalar orasidan Deputatlar tashabbusiga koʻra gʻolib deb eʼlon qilish uchun Deputatlardan boshqa birini belgilash;

tashabbusli budjet jarayonlari doirasida, shuningdek “Mening bogʻim” loyihalari tanlovida Deputatlar tashabbusiga koʻra gʻolib deb eʼlon qilingan loyihalarning moliyalashtirilishi va bajarilishi boʻyicha amalga oshirilgan ishlarga doir maʼlumotlarni davlat organlaridan va boshqa tashkilotlardan soʻrab olish;

oʻz zimmasiga yuklatilgan vazifalarni samarali bajarish maqsadida davlat organlari va tashkilotlar bilan kelishuvga koʻra ularning vakillarini jalb etgan holda ishchi guruhlar tuzish;

tashabbusli budjet jarayonlari doirasida, shuningdek “Mening bogʻim” loyihalari tanlovida Deputatlar tashabbusiga koʻra gʻolib deb eʼlon qilingan loyihalarning amalga oshirilishi holatini tegishli davlat organlari bilan birgalikda Komissiya majlisida muhokama qilish;

davlat organlariga hamda boshqa tashkilotlarga taklif va tavsiyalar kiritish;

tashabbusli budjet jarayonlari doirasida, shuningdek “Mening bogʻim” loyihalari tanlovida Deputatlar tashabbusiga koʻra gʻolib deb eʼlon qilingan loyihalar boʻyicha amalga oshirilgan ishlar yuzasidan davlat organlari rahbarlarining axborotini tegishincha Qonunchilik palatasining, Qonunchilik palatasi qoʻmitalarining majlislarida eshitish boʻyicha takliflar kiritish;

Komissiya qarorlarining ijro etilishi ustidan nazoratni amalga oshirish.

Komissiya qonun hujjatlariga muvofiq boshqa vakolatlarni ham amalga oshirishi mumkin.

7. Komissiya oʻz faoliyatini amalga oshirishda davlat organlari va boshqa tashkilotlar bilan hamkorlik qiladi.

3-bob. Komissiyaning ishini tashkil etish

8. Komissiya Qonunchilik palatasining qaroriga asosan Qonunchilik palatasining deputatlaridan iborat tarkibda tuziladi.

9. Komissiya raisi:

Komissiya faoliyatiga rahbarlik qiladi, uning ish rejasi loyihasi tayyorlanishini tashkil etadi va Komissiyaning tasdiqlangan ish rejasi bajarilishi ustidan nazoratni amalga oshiradi;

Komissiyaning majlislarini chaqiradi va ularda raislik qiladi;

Komissiya vakolatiga tegishli boʻlgan masalalarni uning majlisida koʻrib chiqish uchun kiritadi;

Komissiyaning qarorlarini imzolaydi va ularning ijro etilishiga doir ishlarni tashkil etadi.

10. Komissiya raisining oʻrinbosari Komissiya raisi yoʻqligida uning vazifasini bajarib turadi, Komissiya tomonidan belgilanadigan boshqa vazifalarni ham amalga oshiradi.

11. Komissiya majlislari Komissiya raisi tomonidan zaruratga qarab, lekin har yarim yilda kamida bir marta chaqiriladi. Komissiya majlislari Qonunchilik palatasi Spikerining tashabbusiga koʻra ham chaqirilishi mumkin.

12. Komissiyaning majlislari komissiya ishining tashkiliy shaklidir. Komissiyaning majlisi unda Komissiya aʼzolarining koʻpchiligi hozir boʻlganda vakolatlidir.

13. Komissiya qarorlari uning majlisida ishtirok etgan Komissiya aʼzolarining koʻpchilik ovozi bilan qabul qilinadi. Komissiya aʼzolarining ovozlari teng boʻlganda raislik qiluvchining ovozi hal qiluvchi hisoblanadi.

14. Komissiya qarorlari ommaviy axborot vositalarida eʼlon qilinishi mumkin.

15. Komissiya qarorlari bayonnoma bilan rasmiylashtiriladi.

16. Komissiya majlislariga koʻrib chiqilayotgan masalaga aloqador boʻlgan davlat organlarining, fuqarolik jamiyati institutlarining, ilmiy muassasalarning, xoʻjalik yurituvchi subyektlarning vakillari, mutaxassislar, olimlar taklif etilishi mumkin.

Komissiyaning majlislarida Qonunchilik palatasining Spikeri, uning oʻrinbosarlari, shuningdek Komissiya taklifiga koʻra Qonunchilik palatasi Devonining masʼul xodimlari ham ishtirok etishi mumkin.

17. Komissiya bajarilgan ishlar toʻgʻrisida Qonunchilik palatasi tomonidan belgilangan muddatda Qonunchilik palatasiga axborot beradi.

18. Oʻzbekiston Respublikasi Oliy Majlisi Qonunchilik palatasi Devonining Davlat budjeti boshqarmasi Komissiyaning ishchi organi hisoblanadi.

4-bob. Komissiya toʻgʻrisidagi nizomga oʻzgartirish va qoʻshimchalar kiritish tartibi

19. Ushbu Nizomga oʻzgartirish va qoʻshimchalar Qonunchilik palatasining qarori bilan kiritiladi.