Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda pullik xizmat koʻrsatish tartibi toʻgʻrisidagi nizomning 19-bandiga oʻzgartirish kiritish haqida (3360-2-son)

08.10.2025

Oʻzbekiston Respublikasi Prezidenti huzuridagi ijtimoiy himoya milliy agentligi direktorining

buyrugʻi

[Oʻzbekiston Respublikasi Adliya vazirligi tomonidan 2025-yil 8-oktabrda roʻyxatdan oʻtkazildi, roʻyxat raqami 3360-2]

Oʻzbekiston Respublikasi Prezidentining 2025-yil 30-yanvardagi PF-17-son “Aholini ijtimoiy himoya qilish tizimini moliyalashtirish tartib-taomillarini takomillashtirish toʻgʻrisida”gi hamda 2025-yil 8-maydagi PF-84-son “Kambagʻal oilalarni davlat tomonidan ijtimoiy qoʻllab-quvvatlash tizimini yanada takomillashtirish toʻgʻrisida”gi farmonlariga muvofiq buyuraman:

1. Oʻzbekiston Respublikasi Tibbiy-ijtimoiy xizmatlarni rivojlantirish agentligi direktorining 2022-yil 31-martdagi 52-ICH-son buyrugʻi (roʻyxat raqami 3360, 2022-yil 1-aprel) (Qonunchilik maʼlumotlari milliy bazasi, 01.04.2022-y., 10/22/3360/0260-son) bilan tasdiqlangan Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda pullik xizmat koʻrsatish tartibi toʻgʻrisidagi nizomning 19-bandi quyidagi tahrirda bayon etilsin:

“19. Oʻzbekiston Respublikasi Prezidentining 2021-yil 25-martdagi PF-6195-son “Keksalar va nogironligi boʻlgan shaxslarni ijtimoiy qoʻllab-quvvatlash, Ijtimoiy qoʻllab-quvvatlash markazlari va “Muruvvat” internat uylari tizimini yanada rivojlantirish toʻgʻrisida”gi Farmonining 121-bandiga muvofiq, pullik xizmatlar uchun toʻlangan mablagʻlarning 2 foizi Agentlikning budjetdan tashqari hisobvaragʻiga yoʻnaltiriladi hamda Agentlik direktori ushbu mablagʻlarni Agentlik tizimidagi tashkilotlar oʻrtasida taqsimlash huquqiga ega.

Pullik xizmatlar uchun toʻlangan mablagʻlarning 2 foizini Agentlikka yoʻnaltiruvchi tibbiy-ijtimoiy muassasalar roʻyxati Agentlik direktori tomonidan tasdiqlanadi.

Pullik xizmatlar uchun toʻlangan mablagʻlarning 2 foizi Agentlikning budjetdan tashqari hisobvaragʻiga yoʻnaltirilishi har oy uchun keyingi oyning 5-sanasiga qadar amalga oshiriladi.”.

2. Mazkur buyruq Oʻzbekiston Respublikasi Iqtisodiyot va moliya vazirligi hamda Sogʻliqni saqlash vazirligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

Direktor M. OLLOYOROV

Toshkent sh.,

2025-yil 4-oktabr,

2025/1-son

Kelishildi:

Iqtisodiyot va moliya vaziri J. KUCHKAROV

2025-yil 8-sentabr

Sogʻliqni saqlash vaziri A. XUDAYAROV

2025-yil 4-sentabr