“Havo kemalarida pochtani tashish qoidalarini tasdiqlash toʻgʻrisida”gi qarorga oʻzgartirishlar kiritish haqida (2530-2-son)

26.09.2025

Oʻzbekiston Respublikasi raqamli texnologiyalar vazirining

buyrugʻi

[Oʻzbekiston Respublikasi Adliya vazirligi tomonidan 2025-yil 26-sentabrda roʻyxatdan oʻtkazildi, roʻyxat raqami 2530-2]

Oʻzbekiston Respublikasining “Pochta aloqasi toʻgʻrisida”gi Qonuniga muvofiq buyuraman:

1. Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasining 2013-yil 21-oktabrdagi 57-mh-son “Havo kemalarida pochtani tashish qoidalarini tasdiqlash toʻgʻrisida”gi qaroriga (roʻyxat raqami 2530, 2013-yil 26-noyabr) (Oʻzbekiston Respublikasi qonun hujjatlari toʻplami, 2013-y., 48-son, 628-modda) ilovaga muvofiq oʻzgartirishlar kiritilsin.

2. Mazkur buyruq Oʻzbekiston Respublikasi Transport vazirligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

Vazir Sh. SHERMATOV

Toshkent sh.,

2025-yil 8-sentabr,

283-mh-son

Kelishildi:

Transport vaziri I. MAXKAMOV

2025-yil 31-avgust

Oʻzbekiston Respublikasi raqamli texnologiyalar vazirining 2025-yil 8-sentabrdagi 283-mh-son buyrugʻiga ILOVA

“Havo kemalarida pochtani tashish qoidalarini tasdiqlash toʻgʻrisida”gi qarorga kiritilayotgan oʻzgartirishlar

1. Qarorning muqaddimasidagi “Oʻzbekiston Respublikasining “Pochta aloqasi toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2009-yil, 17-son, 209-modda), Oʻzbekiston Respublikasi Havo kodeksiga (Oʻzbekiston Respublikasi Oliy Kengashining Axborotnomasi, 1993-yil, 6-son, 247-modda)” degan soʻzlar “Oʻzbekiston Respublikasining Havo kodeksi hamda “Pochta aloqasi toʻgʻrisida”gi Qonuniga” degan soʻzlar bilan almashtirilsin.

2. Qoidalarda:

1) muqaddimadan “Umumjahon pochta konvensiyasi, Oʻzbekiston Respublikasining “Pochta aloqasi toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2009-y., 17-son, 209-modda) va Oʻzbekiston Respublikasining Havo kodeksiga (Oʻzbekiston Respublikasi Oliy Kengashining Axborotnomasi, 1993-y., 6-son, 247-modda) muvofiq” degan soʻzlar chiqarib tashlansin;

2) 2-bandda:

toʻrtinchi xatboshi quyidagi tahrirda bayon etilsin:

“havo kemasi — havo bilan oʻzaro taʼsir hisobiga, yer sathidan qaytgan havo bilan oʻzaro taʼsirdan tashqari, atmosferada harakatlanadigan uchish apparati;”;

oltinchi xatboshi quyidagi tahrirda bayon etilsin:

“yozma xat-xabarlar — oddiy va roʻyxatga olinadigan xatlar, pochta varaqchalari, banderollar, mayda paketlar, koʻzi ojizlar uchun joʻnatmalar va “M” qoplari;”;

3) 17-banddan “Oʻz DSt 1099:2005 “Pochta qoplari. Texnik shartlar” talablariga mos keluvchi” degan soʻzlar chiqarib tashlansin;

4) 21-bandning birinchi xatboshisidan “iz tushirish moslamalarining izlari yoki” degan soʻzlar chiqarib tashlansin;

5) 55-bandning “v” kichik bandidagi “sekogrammalar” degan soʻz “koʻzi ojizlar uchun moʻljallangan joʻnatmalar” degan soʻzlar bilan almashtirilsin.