Oʻzbekiston Respublikasida aholi va qishloq xoʻjaligini roʻyxatga olish tadbirini oʻtkazish toʻgʻrisida (PF-173-son)
19.09.2025
Oʻzbekiston Respublikasi Prezidentining
Farmoni
Oʻzbekiston Respublikasining “Aholini roʻyxatga olish toʻgʻrisida”gi va “Rasmiy statistika toʻgʻrisida”gi qonunlariga muvofiq, shuningdek, aholining demografik va ijtimoiy-iqtisodiy xususiyatlari, yashash darajasi va farovonligi, qishloq xoʻjaligi holati, tarkibi hamda aholini ijtimoiy ahamiyatga molik asosiy turdagi qishloq xoʻjaligi mahsulotlari bilan taʼminlash istiqbollarini baholash tizimini yaratish uchun zarur maʼlumotlar bazalarini shakllantirish maqsadida qaror qilaman:
I. Maqsadlar
1. Quyidagilar aholi va qishloq xoʻjaligini roʻyxatga olishning asosiy maqsadlari etib belgilansin:
(a) mamlakatni ijtimoiy-iqtisodiy rivojlantirish boʻyicha davlat siyosatining ustuvor yoʻnalishlarini belgilash uchun 38 million aholining tarkibi va migratsiyasi, oilaviy holati, faoliyat turi, daromad manbalari toʻgʻrisida Yevropa statistiklari konferensiyasining 2020-yildagi tavsiyalari asosida yagona maʼlumotlar bazasini shakllantirish;
(b) 26 million gektar qishloq xoʻjaligi yerlarining foydalanish holatini oʻrganish, chorva mollari va parrandalar sonini aniqlash orqali qishloq xoʻjaligiga yoʻnaltirilayotgan yillik 25,6 trillion soʻm, jumladan, 2,2 trillion soʻm budjet mablagʻlari samarali sarflanishini, sohadagi xizmatlar hajmini aniqlash va oziq-ovqat xavfsizligini taʼminlash uchun zarur maʼlumotlar toʻplamini yaratish;
(v) aholi va qishloq xoʻjaligining oʻsish tendensiyalarini hududlar kesimida aniq hisob-kitob qilgan holda ijtimoiy soha obyektlarini kengaytirishga yoʻnaltirilayotgan yillik 25,2 trillion soʻm mablagʻning manzilli sarflanishini taʼminlash;
(g) respublikaning har bir maʼmuriy-hududiy birligi va mahallalar kesimida aholining turli tavsiflari toʻgʻrisida yagona statistik uslubiyot asosida xalqaro darajada taqqoslash mumkin boʻlgan maʼlumotlarni shakllantirish orqali mamlakatning investitsiyaviy jozibadorligini va xalqaro reytinglardagi oʻrnini yaxshilash.
II. Roʻyxatga olish tadbirini tashkil etish
2. Oʻzbekiston Respublikasida aholi va qishloq xoʻjaligini roʻyxatga olish (keyingi oʻrinlarda — roʻyxatga olish tadbiri) 2026-yil 15-yanvar holatiga koʻra 2026-yil 15-yanvardan 28-fevralga qadar oʻtkazilsin.
3. Oʻzbekiston Respublikasida 2026-yilda aholi va qishloq xoʻjaligini roʻyxatga olish tadbirini oʻtkazishni tashkil etish boʻyicha respublika komissiyasi (keyingi oʻrinlarda — Respublika komissiyasi) tuzilsin va uning tarkibi 1-ilovaga muvofiq tasdiqlansin. Bunda Milliy statistika qoʻmitasi Respublika komissiyasining ishchi organi etib belgilansin.
4. Respublika komissiyasi zimmasiga quyidagi vazifalar yuklatilsin:
(a) roʻyxatga olish tadbiriga tayyorgarlik koʻrish va uni oʻtkazish bilan bogʻliq chora-tadbirlarning oʻz vaqtida hamda sifatli amalga oshirilishini taʼminlash;
(b) roʻyxatga olish tadbiriga tayyorgarlik koʻrish va uni oʻtkazishni moliyalashtirish, roʻyxatga olish materiallariga ishlov berishni tashkil etish hamda uning yakuniy natijalarini eʼlon qilish masalalariga doir takliflarni koʻrib chiqish;
(v) roʻyxatga olish tadbirida ishtirok etish uchun jismoniy va yuridik shaxslarni ularning mehnatiga haq toʻlash masalalarini hal qilgan holda jalb etish ishlarini tashkil etish;
(g) roʻyxatga olish tadbiri doirasida xalqaro tashkilotlar bilan hamkorlik qilish.
5. Oʻzbekiston Respublikasida 2026-yilda aholi va qishloq xoʻjaligini roʻyxatga olish tadbirini oʻtkazishni tashkil etish boʻyicha hududiy komissiyalarning (keyingi oʻrinlarda — hududiy komissiyalar) namunaviy tarkibi 1a- va 1b-ilovalarga muvofiq tasdiqlansin.
6. Belgilansinki:
(a) roʻyxatga olish tadbiri “mahalla yettiligi” tizimida ishlovchi xodimlarni 2025-yil 15-dekabrdan 2026-yil 1-martgacha boʻlgan davrda jalb etish orqali oʻtkaziladi. Bunda Oʻzbekiston mahallalari uyushmasi Milliy statistika qoʻmitasi hamda masʼul vazirlik va idoralar bilan birgalikda “mahalla yettiligi” tizimida ishlovchi xodimlar planshet qurilmalaridan foydalangan holda roʻyxatga olish tadbiri oʻtkazilishini taʼminlaydi;
(b) roʻyxatga olish tadbirida roʻyxatga oluvchi sifatida ishtirok etadigan “mahalla yettiligi” tizimida ishlovchi xodimlar va boshqa jalb etiladigan xodimlar Jahon banki ishtirokida amalga oshirilayotgan “Oʻzbekistonda statistika tizimi salohiyatini mustahkamlash” loyihasi doirasida mehnatga haq toʻlashning eng kam miqdorining bir yarim baravari miqdorida (soliqlar va boshqa majburiy toʻlovlarni inobatga olgan holda) bir martalik ragʻbatlantiriladi. Ragʻbatlantirish toʻlovlari tegishli vazirlik, idora va fuqarolar oʻzini oʻzi boshqarish organlarining soʻrovnomasiga asosan Milliy statistika qoʻmitasi tomonidan moliyalashtiriladi;
(v) roʻyxatga olish tadbiriga jalb etiladigan xodimlar uchun ularning asosiy ish joyi, lavozimi va oʻrtacha oylik ish haqi saqlanadi.
7. Quyidagi tashkilotlar 2025-yil 10-oktabrga qadar Milliy statistika qoʻmitasiga:
(a) Oʻzbekiston mahallalari uyushmasi har bir mahalla kesimida koʻchalar boʻyicha xonadonlar va aholi soni toʻgʻrisidagi elektron maʼlumotlarni;
(b) Kadastr agentligi qishloq xoʻjaligi yerlaridan foydalanayotgan tashkilotlar roʻyxatini elektron shaklda taqdim etsin.
8. Roʻyxatga olish tadbiri doirasida quyidagilar:
(a) davlat organlari va tashkilotlari 2026-yil 15-yanvardan 31-yanvarga qadar oʻz tizimida faoliyat yuritayotgan barcha xodimlarning census.stat.uz portalida roʻyxatdan oʻtishini;
(b) Oliy taʼlim, fan va innovatsiyalar vazirligi respublikadagi barcha oʻrta maxsus va kasbiy taʼlim tashkilotlari, shuningdek, davlat, nodavlat va xorijiy oliy taʼlim tashkilotlari va ularning filiallarida tahsil olayotgan talabalarning census.stat.uz portalida roʻyxatdan oʻtishini;
(v) Qishloq xoʻjaligi vazirligi Oʻzbekiston fermerlari kengashi, Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar)lar hokimliklari bilan birgalikda fermer xoʻjaliklari, yuridik shaxs tashkil etgan dehqon xoʻjaliklari, qishloq xoʻjaligi faoliyatini amalga oshiruvchi tashkilotlar va asosiy faoliyati qishloq xoʻjaligi boʻlmagan qishloq xoʻjaligi yerlaridan foydalanayotgan korxona va tashkilotlarning Internet tarmogʻi orqali roʻyxatdan oʻtishini;
(g) Ijtimoiy himoya milliy agentligi, Mudofaa vazirligi, Favqulodda vaziyatlar vazirligi, Milliy gvardiya, Ichki ishlar vazirligi, Davlat xavfsizlik xizmati, Tashqi ishlar vazirligi, Sogʻliqni saqlash vazirligi va Din ishlari boʻyicha qoʻmita 2025-yil 1-noyabrdan boshlab aholining ayrim toifalarini roʻyxatga olish ishlari 2-ilovaga muvofiq tashkil etilishini taʼminlasin.
9. Vazirlik, idora va tashkilotlar tomonidan taqdim etiladigan shaxsga va qishloq xoʻjaligi faoliyatiga doir maʼlumotlar roʻyxati 3-ilovaga muvofiq tasdiqlansin. Bunda tegishli maʼlumotlar 2026-yil 15-fevralga qadar “Elektron hukumat” tizimining idoralararo integratsiyalashuv platformasi orqali Milliy statistika qoʻmitasiga taqdim etiladi.
10. Roʻyxatga olish tadbiri doirasida vazirlik, idora va tijorat banklari rahbarlari va ularning oʻrinbosarlari hudud, tuman va shaharlarga 4-ilovaga muvofiq biriktirilsin, ular zimmasiga tuman (shahar) hokimliklari bilan birgalikda quyidagi vazifalar yuklatilsin:
(a) tuman (shahar)larda roʻyxatga olish shtablarini tashkil etish va ularning faoliyatini nazorat qilish;
(b) har bir mahallada “mahalla yettiligi” tizimida ishlovchi xodimlar tomonidan roʻyxatga olish tadbiriga tayyorgarlik koʻrish va uni oʻtkazish ishlarini tashkil etish;
(v) tuman (shahar)larni roʻyxatga olish va hisob uchastkalariga boʻlish boʻyicha ishlab chiqilgan tashkiliy reja asosida roʻyxatga olish tadbirini tashkil etish va nazorat qilish;
(g) roʻyxatga olish tadbirini oʻtkazish uchun zarur boʻladigan binolar yoki xonalar ajratish, shuningdek, ularni tegishli moddiy-texnika bazasi va transport vositalari bilan taʼminlash;
(d) aholining ayrim toifalarini roʻyxatga olish ishlarini tegishli vazirlik, idora va tashkilotlar bilan hamkorlikda amalga oshirish.
11. Roʻyxatga olish tadbiriga tayyorgarlik koʻrish va uni oʻtkazish boʻyicha uslubiy, tashkiliy hamda maʼlumotlarni qayta ishlash va eʼlon qilish ishlarini amalga oshirish maqsadida:
(a) vazirlik va idoralarda maqbullashtirilgan shtat birliklari hisobidan Milliy statistika qoʻmitasi markaziy apparati boshqaruv xodimlarining umumiy cheklangan soni 14 ta shtat birligiga oshirilsin;
(b) 2025-yil 1-oktabrdan 2026-yil 1-mayga qadar hududiy statistika boshqarmalarining har birida fuqarolik-huquqiy tusdagi shartnoma asosida Milliy statistika qoʻmitasiga 2026-yilda roʻyxatga olish tadbiriga tayyorgarlik koʻrish va uni oʻtkazish uchun ajratiladigan Oʻzbekiston Respublikasi respublika budjeti mablagʻlari hisobidan 5 nafardan mutaxassis jalb etilsin.
12. Qoraqalpogʻiston Respublikasi Vazirlar Kengashi, viloyatlar va Toshkent shahri hamda tuman (shahar)lar hokimliklari:
(a) 2025-yil 10-oktabrga qadar hududiy komissiyalar tarkibini tasdiqlasin;
(b) 2025-yil 20-oktabrga qadar hududiy komissiyalarning chora-tadbirlar rejasini tasdiqlasin;
(v) 2025-yil 1-noyabrga qadar:
(i) tuman (shahar)larda roʻyxatga olish shtabi faoliyatini tashkil etsin hamda roʻyxatga olish tadbirida ishtirok etadigan asosiy va zaxira xodimlar roʻyxatini shakllantirsin va tasdiqlasin;
(ii) roʻyxatga olish tadbirini oʻtkazishga jalb etiladigan xodimlarni oʻqitish uchun mebellar va aloqa vositalari bilan jihozlangan vaqtincha bino yoki xonalarni ajratsin;
(g) 2025-yil 15-noyabrga qadar hudud, tuman (shahar)larni roʻyxatga olish va hisob uchastkalariga boʻlgan holda tashkiliy rejalarni tasdiqlasin;
(d) doimiy ravishda roʻyxatga olish tadbirining aholi oʻrtasida keng yoritilishini tashkil etsin;
(j) roʻyxatga olish tadbirining oʻz vaqtida va sifatli oʻtkazilishini taʼminlasin hamda buning uchun amalga oshirilayotgan ishlar boʻyicha kunlik nazoratni oʻrnatsin.
III. Roʻyxatga olish tadbiri davomida targʻibot-tashviqot ishlarini tashkil etish
13. Oʻzbekiston Milliy axborot agentligi, Oʻzbekiston Milliy teleradiokompaniya, Raqamli texnologiyalar vazirligi roʻyxatga olish tadbirining maqsad va vazifalari ommaviy axborot vositalari, Internet va ijtimoiy tarmoqlarda quyidagilarni inobatga olgan holda keng yoritilishini taʼminlasin:
(a) respublika va mahalliy ommaviy axborot vositalarida maxsus koʻrsatuv va eshittirishlar tashkil etish;
(b) videoroliklar va ijtimoiy reklamalarni televideniyeda namoyish etish va ijtimoiy tarmoqlarga joylashtirish;
(v) SMS-xabarnoma yuborishni tashkil etish.
IV. Farmon ijrosini tashkil etish, taʼminlash va nazorat
14. Vazirlar Mahkamasi bir oy muddatda Oʻzbekiston Respublikasida 2026-yilda aholi va qishloq xoʻjaligini roʻyxatga olishni oʻtkazish boʻyicha tashkiliy chora-tadbirlar rejasini tasdiqlasin.
15. Oʻzbekiston Respublikasi Prezidentining 2024-yil 25-dekabrdagi PQ-455-son qarori bilan tasdiqlangan Birinchi darajali budjet mablagʻlarini taqsimlovchilarning 2025 — 2027-yillar uchun budjet mablagʻlaridan foydalanish bilan bogʻliq maqsadli indikatorlariga 5-ilovaga muvofiq oʻzgartirish kiritilsin.
16. Oʻzbekiston Respublikasi Prezidentining ayrim farmonlari 6-ilovaga muvofiq oʻz kuchini yoʻqotgan deb hisoblansin.
17. Roʻyxatga olish tadbirining toʻgʻri tashkil etilishi va samarali oʻtkazilishiga masʼul va shaxsiy javobgar etib Milliy statistika qoʻmitasi raisi B.S. Hamrayev va qishloq xoʻjaligi vaziri I.Yu. Abduraxmonov belgilansin.
18. Ushbu Farmonning ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 19-sentabr,
PF-173-son
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 1-ILOVA
Oʻzbekiston Respublikasida 2026-yilda aholi va qishloq xoʻjaligini roʻyxatga olish tadbirini oʻtkazishni tashkil etish boʻyicha respublika komissiyasi
TARKIBI
Izoh: Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangidan tayinlangan shaxslar yoki zimmasiga tegishli funksiyalarni bajarish yuklangan shaxslar kiritiladi.
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 1a-ILOVA
Oʻzbekiston Respublikasida 2026-yilda aholi va qishloq xoʻjaligini roʻyxatga olish tadbirini oʻtkazishni tashkil etish boʻyicha Qoraqalpogʻiston Respublikasi Vazirlar Kengashi, viloyatlar va Toshkent shahri hududiy komissiyalarining
NAMUNAVIY TARKIBI
Izoh: Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 1b-ILOVA
Oʻzbekiston Respublikasida 2026-yilda aholi va qishloq xoʻjaligini roʻyxatga olish tadbirini oʻtkazishni tashkil etish boʻyicha tuman (shahar) hududiy komissiyalarining
NAMUNAVIY TARKIBI
Izoh: Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 2-ILOVA
Ayrim vazirlik va davlat idoralari tomonidan roʻyxatga olish ishlari tashkil etiladigan aholining ayrim toifalari
ROʻYXATI
Izoh: maʼlumotlar jismoniy va yuridik shaxslar yoki obyektlar kesimida ularning identifikator kodlari bilan taqdim etiladi.
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 3-ILOVA
Vazirlik, idora va tashkilotlar tomonidan taqdim etiladigan shaxsga va qishloq xoʻjaligi faoliyatiga doir maʼlumotlar
ROʻYXATI
Izoh: maʼlumotlar jismoniy va yuridik shaxslar yoki obyektlar kesimida ularning identifikator kodlari bilan taqdim etiladi.
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 4-ILOVA
Roʻyxatga olish tadbiri doirasida vazirlik, idora va tijorat banklari rahbarlari va ularning oʻrinbosarlarini hudud, tuman va shaharlarga biriktirish
JADVALI
Izoh: hudud, tuman va shaharlarga biriktirilgan vakillar boshqa ishga oʻtgan taqdirda, roʻyxatga olish tadbiri doirasida amalga oshiriladigan ishlar ushbu lavozimlarga yangidan tayinlangan shaxslar yoki zimmasiga tegishli funksiyalarni bajarish yuklangan shaxslar tomonidan bajariladi.
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 5-ILOVA
Oʻzbekiston Respublikasi Prezidentining 2024-yil 25-dekabrdagi PQ-455-son qarori bilan tasdiqlangan Birinchi darajali budjet mablagʻlarini taqsimlovchilarning 2025 — 2027-yillar uchun budjet mablagʻlaridan foydalanish bilan bogʻliq maqsadli indikatorlariga kiritilayotgan oʻzgartirish
Oʻzbekiston Respublikasi Prezidentining 2024-yil 25-dekabrdagi PQ-455-son qarori bilan tasdiqlangan Birinchi darajali budjet mablagʻlarini taqsimlovchilarning 2025 — 2027-yillar uchun budjet mablagʻlaridan foydalanish bilan bogʻliq maqsadli indikatorlarining 15.2-pozitsiyasi quyidagi tahrirda bayon etilsin:
Oʻzbekiston Respublikasi Prezidentining 2025-yil 19-sentabrdagi PF-173-son Farmoniga 6-ILOVA
Oʻzbekiston Respublikasi Prezidentining oʻz kuchini yoʻqotgan deb hisoblanayotgan ayrim farmonlari
ROʻYXATI
1. Oʻzbekiston Respublikasi Prezidentining 2019-yil 5-fevraldagi “Oʻzbekiston Respublikasida 2022-yilda aholini roʻyxatga olishni oʻtkazish konsepsiyasini tasdiqlash toʻgʻrisida”gi PF-5655-son Farmoni.
2. Oʻzbekiston Respublikasi Prezidentining 2019-yil 23-oktabrdagi PF-5853-son Farmoni bilan tasdiqlangan Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasida belgilangan vazifalarni amalga oshirish boʻyicha “Yoʻl xaritasi”ning 58-pozitsiyasi.