Avtomototransport vositalari uchun roʻyxatdan oʻtkazish davlat raqami belgilarini berish tartibini soddalashtirish chora-tadbirlari toʻgʻrisida (562-son)

04.09.2025

Oʻzbekiston Respublikasi Vazirlar Mahkamasining

qarori

Soʻnggi yillarda avtomototransport vositalari uchun roʻyxatdan oʻtkazish davlat raqami belgilarini berish tartibini takomillashtirish borasida qator chora-tadbirlar amalga oshirildi. Xaridorgir davlat raqami belgilarini ochiq auksion orqali sotish tartibi joriy etilib, davlat budjetiga qoʻshimcha mablagʻ jalb qilindi.

Shu bilan birga, roʻyxatdan oʻtkazish davlat raqami belgilarini berishning amaldagi mexanizmida kamchiliklar mavjudligi kuzatilmoqda. Fuqarolar uchun auksion savdolarida ishtirok etish tartibi murakkab va koʻp vaqt talab etishi, ayrim toifadagi davlat raqami belgilari uchun boshlangʻich narxlar yuqoriligi keng aholi qatlami uchun bunday raqamlarni sotib olish imkoniyatini cheklamoqda.

Avtomototransport vositalari uchun roʻyxatdan oʻtkazish davlat raqami belgilarini (keyingi oʻrinlarda — davlat raqami belgilari) olishda barchaga teng imkoniyat yaratish, maʼmuriy ovoragarchiliklar va aholiga ortiqcha moddiy yuklamaning oldini olish hamda davlat xizmatini raqamli transformatsiya qilish va uning shaffofligini taʼminlash maqsadida Vazirlar Mahkamasi qaror qiladi:

1. 2026-yil 1-yanvardan boshlab quyidagilar bekor qilinsin:

avtotransport vositalari uchun roʻyxatdan oʻtkazish davlat raqami belgilarini oshirilgan toʻlov stavkalari boʻyicha berishda “Oʻzbekiston respublika tovar-xomashyo birjasi” aksiyadorlik jamiyati axborot tizimida auksion oʻtkazish tartibi;

avtotransport vositalari uchun xaridorgir harf va raqamlar kombinatsiyasiga ega boʻlgan davlat raqami belgilarini oshirilgan toʻlov stavkalari boʻyicha berish tartibi.

Bunda avtomototransport vositalari uchun xaridorgir harf va raqamlar kombinatsiyasiga ega boʻlmagan davlat raqami belgilarini berishning amaldagi tartibi saqlanib qolinishi belgilansin.

2. Shunday tartib oʻrnatilsinki, unga muvofiq:

a) 2026-yil 1-yanvardan boshlab avtomototransport vositalari uchun istalgan harf va raqamlar kombinatsiyasiga ega boʻlgan davlat raqami belgilari yagona oshirilgan toʻlov evaziga jismoniy va yuridik shaxslarning toʻgʻridan-toʻgʻri elektron murojaatiga asosan beriladi;

b) jismoniy va yuridik shaxslar onlayn rejimda uzluksiz ravishda yangilanib turadigan yagona ochiq maʼlumotlar bazasida boʻsh turgan istalgan harf va raqamlar kombinatsiyasiga ega boʻlgan davlat raqami belgilarini quyidagi axborot tizimlari orqali tanlab oladi:

Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari jamoat xavfsizligi xizmati yoʻl harakati xavfsizligi boshqarmalarining roʻyxatdan oʻtkazish va imtihon olish boʻlinmalarida (keyingi oʻrinlarda — roʻyxatdan oʻtkazish boʻlinmalari) joylashgan infokiosklar;

Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining (keyingi oʻrinlarda — YHXX) mobil ilovasi;

YHXXning rasmiy veb-sayti;

Oʻzbekiston Respublikasi Yagona interaktiv davlat xizmatlari portali;

v) barcha davlat raqami belgilarini berish uchun undiriladigan toʻlovlar miqdorlari Ichki ishlar vazirligi Jamoat xavfsizligi departamenti Yoʻl harakati xavfsizligi xizmati huzuridagi “Uzavtomotoservis” davlat unitar korxonasi tomonidan belgilanadi. Bunda skuter, elektromototsikl va elektromobillar uchun davlat raqami belgilarining toʻlovlari qolganlarga nisbatan kamaytirilgan holda belgilanadi;

g) avtomototransport vositasi qayta davlat roʻyxatidan oʻtkazilganda barcha toifalardagi davlat raqami belgilari yagona oshirilgan toʻlovning 50 foizi miqdoridagi toʻlov evaziga uning egasining nomida qoldirilishi yoki qonunchilik hujjatlarida belgilangan tartibda boshqa shaxs nomiga oʻtkazilishi mumkin.

Bunda ushbu kichik bandda nazarda tutilgan talab 2025-yil 1-noyabrga qadar berilgan yoki foydalanishda boʻlgan barcha toifalardagi davlat raqami belgilariga ham tatbiq etiladi.

3. Belgilansinki:

a) 2026-yil 1-yanvardan boshlab yagona ochiq maʼlumotlar bazasida hududlarning kod raqami doirasida barcha toifadagi davlat raqami belgilari (oldin berilgan yoki foydalanishda boʻlganlardan tashqari) joylashtiriladi. Bunda hududning keyingi kod raqamiga faqat oldingi kod raqami doirasidagi xaridorgir harf va raqamlar kombinatsiyasiga ega boʻlgan davlat raqami belgilarining 90 foizi band boʻlgan taqdirda oʻtiladi;

b) “Oʻzbekiston respublika tovar-xomashyo birjasi” AJ 2025-yil 1-oktabrdan boshlab davlat raqami belgilarining auksion savdolarini toʻxtatadi;

v) “Oʻzbekiston respublika tovar-xomashyo birjasi” AJ axborot tizimiga auksionga qoʻyilib, sotilmagan, shuningdek, ishlab chiqarilib, sotilmagan xaridorgir harf va raqamlar kombinatsiyasiga ega boʻlgan davlat raqami belgilari:

1 — 3-toifadagi davlat raqami belgilari — “Uzavtomotobelgi” davlat unitar korxonasi tomonidan belgilangan yagona oshirilgan toʻlov evaziga beriladi;

4 — 6-toifadagi davlat raqami belgilari — xaridorgir harf va raqamlar kombinatsiyasiga ega boʻlmagan davlat raqami belgilarini berishning amaldagi tartibida beriladi.

4. “Uzavtomotobelgi” davlat unitar korxonasiga aholining talab va taklifidan kelib chiqqan holda avtomototransport vositalari uchun oltitagacha harf va (yoki) raqamlar kombinatsiyasidan iborat boʻlgan “noyob” davlat raqami belgilarini ochiq kim oshdi elektron savdolarini oʻtkazish orqali berish huquqi berilsin.

Bunda “noyob” davlat raqami belgilari amaldagi davlat raqami belgilarini takrorlamasligi, qonunchilikka va ahloqiy normalarga xilof maʼnoga ega boʻlmasligi kerak.

5. Oʻzbekiston Respublikasi Ichki ishlar vazirligi:

a) 2026-yil 1-yanvarga qadar:

roʻyxatdan oʻtkazish boʻlinmalarida I, IE, III, IIIE tipdagi davlat raqami belgilari ishlab chiqarilishini, shu jumladan, ular uchun zarur uskuna va jihozlar oʻrnatilishini, hom ashyo bilan taʼminlanishini hamda ishga tushirilishini tashkil etish choralarini koʻrsin;

roʻyxatdan oʻtkazish boʻlinmalarida davlat raqami belgilari ishlab chiqarish maqsadida “Uzavtomotobelgi” davlat unitar korxonasining xodimlar shtat birliklarini koʻpaytirsin, ularni kasbga oʻqitish choralarini koʻrsin;

istalgan harf va raqamlar kombinatsiyasiga ega boʻlgan davlat raqami belgilarini inson omilini istisno etadigan tanlab olish axborot tizimini yaratsin;

“noyob” davlat raqami belgilarini ochiq kim oshdi elektron savdolariga qoʻyish va oʻtkazish tartibini tasdiqlasin;

b) Raqamli texnologiyalar vazirligi bilan birgalikda:

YHXXning davlat raqam belgilariga doir ochiq maʼlumotlar bazasini yaratish, ishga tushirish hamda uni zarur texnik va dasturiy taʼminot bilan taʼminlash choralarini koʻrsin;

davlat raqami belgilari ishlab chiqariladigan roʻyxatdan oʻtkazish boʻlinmalarining oʻzaro hamda yagona ochiq maʼlumotlar bazasi bilan integratsiya qilinishini taʼminlasin.

v) Texnik jihatdan tartibga solish agentligi bilan birgalikda uch oy muddatda “OʻzMSt 274:2024 “Avtomototransport vositalari va ularning tirkamalari uchun yorugʻlik qaytaruvchi qoplamali va himoya elementlari bilan davlat roʻyxatiga olish raqamlari. Texnik shartlar” milliy standartiga ushbu qarorga muvofiq joriy etilayotgan “noyob” davlat raqami belgilarining texnik koʻrsatkichlarini nazarda tutuvchi oʻzgartirish va qoʻshimchalar kiritsin.

6. Oʻzbekiston Respublikasi Hukumatning ayrim qarorlariga ilovaga muvofiq 2026-yil 1-yanvardan oʻzgartirish va qoʻshimchalar kiritilsin.

7. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

8. Ushbu qarorning bajarilishini nazorat qilish Oʻzbekiston Respublikasi ichki ishlar vaziri A.A. Tashpulatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 4-sentabr,

562-son

Vazirlar Mahkamasining 2025-yil 4-sentabrdagi 562-son qaroriga ILOVA

Oʻzbekiston Respublikasi Hukumatining ayrim qarorlariga 2026-yil 1-yanvardan kiritilayotgan oʻzgartirish va qoʻshimchalar

1. Vazirlar Mahkamasining “Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida” 2017-yil 31-avgustdagi 683-son qarorida:

a) 1-band oʻz kuchini yoʻqotgan deb hisoblansin;

b) 2-bandda:

uchinchi xatboshi chiqarib tashlansin;

toʻrtinchi xatboshi uchinchi xatboshi deb hisoblansin va quyidagi tahrirda bayon etilsin:

“Jismoniy va yuridik shaxslarga avtomototransport vositalari uchun istalgan harf va raqamlar kombinatsiyasiga ega boʻlgan roʻyxatdan oʻtkazish davlat raqami belgilarini yagona oshirilgan toʻlov evaziga berish tartibi toʻgʻrisidagi nizom 3-ilovaga muvofiq tasdiqlansin”;

v) 3-bandda:

ikkinchi — beshinchi xatboshilar chiqarib tashlansin;

oltinchi va yettinchi xatboshilar tegishlicha ikkinchi va uchinchi xatboshilar deb hisoblansin;

g) 6 va 7-bandlar oʻz kuchini yoʻqotgan deb hisoblansin;

d) 1-ilovada:

2-bandda:

beshinchi xatboshi chiqarib tashlansin;

oltinchi — oʻn sakkizinchi xatboshilar tegishlicha beshinchi — oʻn yettinchi xatboshilar deb hisoblansin;

beshinchi xatboshi quyidagi tahrirda bayon etilsin:

“yagona oshirilgan toʻlov evaziga avtomototransport vositalari uchun ROʻDRB — istalgan harf va raqamlar kombinatsiyasidan iborat boʻlgan, ixtiyoriy tanlovga koʻra yagona oshirilgan toʻlov evaziga beriladigan ROʻDRB”;

26-bandda:

toʻrtinchi va beshinchi xatboshilar quyidagi tahrirda bayon etilsin:

“ROʻDRB Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining Yagona avtomatlashtirilgan axborot tizimi “Davlat raqami belgilari” modulida avtomatik tarzda tasodifiy tanlash orqali beriladi, yagona oshirilgan toʻlov evaziga beriladigan ROʻDRB bundan mustasno;

yagona oshirilgan toʻlov evaziga beriladigan avtomototransport vositalari uchun ROʻDRB jismoniy va yuridik shaxslarning toʻgʻridan-toʻgʻri elektron murojaatiga asosan taqdim etiladi”;

sakkizinchi xatboshi quyidagi tahrirda bayon etilsin:

“Ilgari foydalanishda boʻlgan barcha toifalardagi roʻyxatdan oʻtkazish davlat raqami belgilari avtomototransport vositasi qayta davlat roʻyxatidan oʻtkazilganda, ushbu transport vositasi egasining xohishiga koʻra hamda yagona oshirilgan toʻlovning 50 foizi miqdorida toʻlov amalga oshirilgan taqdirda uning egasining nomida qoldirilishi yoki qonunchilik hujjatlarida belgilangan tartibda boshqa shaxs nomiga oʻtkazilishi mumkin”;

27 va 28-bandlar quyidagi tahrirda bayon etilsin:

“27. Berilgan ROʻDRB, shu jumladan, yagona oshirilgan toʻlov evaziga beriladigan avtomototransport vositalari uchun ROʻDRB transport vositasi egasining mulki hisoblanmasdan, ulardan qatʼiyan maqsadli foydalanilishi uchun unga taqdim etiladi.

28. YHXXning onlayn rejimida uzluksiz ravishda yangilanib turadigan yagona ochiq maʼlumotlar bazasida boʻsh turgan yagona oshirilgan toʻlov evaziga beriladigan avtomototransport vositalari uchun ROʻDRB haqida toʻliq maʼlumot boʻlishi lozim”;

29-bandning birinchi xatboshisi quyidagi tahrirda bayon etilsin:

“29. Avtomototransport vositasini boshqa shaxsga oʻtkazishda oldin berilgan (ilgari foydalanishda boʻlgan) barcha toifalardagi roʻyxatdan oʻtkazish davlat raqami belgilari transport vositasining avvalgi egasining arizasiga koʻra hududiy boshqarmalarga oʻn ikki oy muddatga saqlash uchun topshirilishi mumkin. ROʻDRBni oʻn ikki oy muddatga saqlaganlik uchun toʻlov undirilmaydi”;

30-bandning birinchi xatboshisi quyidagi tahrirda bayon etilsin:

“30. Avtomototransport vositasini davlat roʻyxatidan oʻtkazishda oldin berilgan (ilgari foydalanishda boʻlgan) barcha toifalardagi ROʻDRB almashtirishiga olib kelsa, transport vositasining avvalgi egasining xohishiga koʻra ushbu ROʻDRB saqlab qolinadi va yagona oshirilgan toʻlovning 50 foizi miqdorida toʻlov amalga oshirilgan taqdirda takroran beriladi:”;

quyidagi mazmundagi 301-band bilan toʻldirilsin:

“301. Avtomototransport vositasi qayta davlat roʻyxatidan oʻtkazilganda, egasining xohishiga koʻra uning nomida qoldiriladigan yoki qonunchilik hujjatlarida belgilangan tartibda boshqa shaxs nomiga oʻtkaziladigan davlat raqami belgilarini DYHXXda qayta rasmiylashtirib berishdan kelib tushadigan mablagʻlarning:

35 foizi — Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining “Xavfsiz yoʻl va xavfsiz piyoda” respublika jamgʻarmasiga;

15 foizi — Oʻzbekiston Respublikasi Ichki ishlar vazirligining moddiy-texnika bazasini rivojlantirish, xodimlarini moddiy ragʻbatlantirish va boshqa xarajatlar maxsus jamgʻarmasiga;

50 foizi — Davlat budjetiga yoʻnaltiriladi”;

31-band quyidagi tahrirda bayon etilsin:

“31. Oldin berilgan (ilgari foydalanishda boʻlgan) barcha toifadagi ROʻDRB transport vositalarining egalari tomonidan saqlanmaganda, belgilangan tartibda hududiy DYHXX organlari tomonidan olib qoʻyiladi va yoʻq qilinadi. Ushbu ROʻDRBning raqam va harflari kombinatsiyalari YHXXning onlayn rejimida uzluksiz ravishda yangilanib turadigan yagona ochiq maʼlumotlar bazasida boʻsh turgan yagona oshirilgan toʻlov evaziga beriladigan avtomototransport vositalari uchun ROʻDRB sifatida qayd etiladi.

Bunday ROʻDRB keyinchalik yagona oshirilgan toʻlov evaziga beriladigan avtomototransport vositalari uchun ROʻDRBni berish tartibi asosida takroran ishlab chiqarilishi va berilishi mumkin”;

32-band oʻz kuchini yoʻqotgan deb hisoblansin;

56-banddagi “oshirilgan toʻlov stavkali avtotransport vositalari uchun ROʻDRB, avtotransport vositalari uchun xaridorgir harf va raqamlar kombinatsiyasiga ega boʻlgan ROʻDRB” soʻzlari “yagona oshirilgan toʻlov evaziga beriladigan avtomototransport vositalari uchun ROʻDRB” soʻzlari bilan almashtirilsin;

e) 2-ilova oʻz kuchini yoʻqotgan deb hisoblansin;

j) 3-ilova matni quyidagi tahrirda bayon etilsin:

“Jismoniy va yuridik shaxslarga avtomototransport vositalari uchun istalgan harf va raqamlar kombinatsiyasiga ega boʻlgan roʻyxatdan oʻtkazish davlat raqami belgilarini yagona oshirilgan toʻlov evaziga berish tartibi toʻgʻrisida

NIZOM

1-bob. Umumiy qoidalar

1. Ushbu Nizom jismoniy va yuridik shaxslarga avtomototransport vositalari uchun istalgan harf va raqamlar kombinatsiyasiga ega boʻlgan roʻyxatdan oʻtkazish davlat raqami belgilarini (keyingi oʻrinlarda — ROʻDRB) yagona oshirilgan toʻlov evaziga berish tartibini belgilaydi.

Istalgan harf va raqamlar kombinatsiyasiga ega boʻlgan ROʻDRB beriladigan transport vositalari Oʻzbekiston Respublikasi Vazirlar Mahkamasi tomonidan belgilangan tartibda davlat roʻyxatidan oʻtkaziladi.

2. Istalgan harf va raqamlar kombinatsiyasiga ega boʻlgan ROʻDRB jismoniy va yuridik shaxslar tomonidan ixtiyoriy ravishda faqat elektron tarzda tanlanadi. Bunda:

Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari jamoat xavfsizligi xizmati yoʻl harakati xavfsizligi boshqarmalarining roʻyxatdan oʻtkazish va imtihon olish boʻlinmalarida (keyingi oʻrinlarda — roʻyxatdan oʻtkazish boʻlinmalari) joylashgan infokiosklar;

Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining (keyingi oʻrinlarda — YHXX) mobil ilovasi;

YHXXning rasmiy veb-sayti;

Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali murojaat qilinishi mumkin.

3. Istalgan harf va raqamlar kombinatsiyasiga ega boʻlgan ROʻDRB avtomatlashtirilgan axborot tizimi orqali tanlanadi va band qilinadi.

Ushbu avtomatlashtirilgan axborot tizimi inson omilini toʻliq istisno etgan holda faoliyat koʻrsatadi hamda ROʻDRBni tanlashda subyektiv aralashuv yoki imtiyoz berish holatlari yuzaga kelishiga yoʻl qoʻyilmaydi.

Har qanday davlat xizmatchisi yoki boshqa shaxs tomonidan ROʻDRBni taqsimlash jarayoniga aralashuv qatʼiyan taqiqlanadi.

4. Istalgan harf va raqamlar kombinatsiyasiga ega boʻlgan ROʻDRBni tanlash uchun YHXX tomonidan avtomatlashtirilgan axborot tizimida ROʻDRBlarning yagona ochiq maʼlumotlar bazasi yuritiladi.

Ochiq maʼlumotlar bazasi orqali fuqarolar uchun ROʻDRBni tanlash jarayonining shaffofligi va xolisligi taʼminlanadi.

5. Istalgan harf va raqamlar kombinatsiyasiga ega boʻlgan ROʻDRB uchun yagona oshirilgan toʻlov miqdori “Uzavtomotobelgi” davlat unitar korxonasi tomonidan belgilanadi.

6. “Uzavtomotobelgi” davlat unitar korxonasi aholining talab va taklifidan kelib chiqqan holda avtomototransport vositalari uchun oltitagacha harf va (yoki) raqamlar kombinatsiyasidan iborat boʻlgan “noyob” ROʻDRBni ochiq kimoshdi elektron savdolarini oʻtkazish orqali berish huquqiga ega.

Bunda “noyob” ROʻDRB amaldagi ROʻDRBni takrorlamasligi, qonunchilikka va axloqiy normalarga xilof maʼnoga ega boʻlmasligi kerak.

“Noyob” ROʻDRBni berish boʻyicha ochiq kimoshdi elektron savdolari oʻtkazish tartibi Oʻzbekiston Respublikasi Ichki ishlar vazirligi tomonidan tasdiqlanadi.

2-bob. Istalgan harf va raqamlar kombinatsiyasiga ega boʻlgan ROʻDRBni tanlash va berish tartibi

7. Ushbu tartib I, IE, III, IIIE, X, XI, XIE, XI1, XIE1, XI2, XI3 tipidagi ROʻDRBga nisbatan qoʻllanadi.

8. Avtomatlashtirilgan axborot tizimida tanlangan raqam kombinatsiyasi dastur tomonidan band qilinmagani tekshirilib, buyurtma beruvchi nomiga dastlabki band qilinadi va bu kombinatsiya boshqa shaxslar tomonidan tanlanmasligi uchun tizimda vaqtincha zaxiraga olinadi.

9. Ariza beruvchi tanlangan ROʻDRB kombinatsiyasini olish uchun belgilangan tartibda yagona oshirilgan toʻlovni elektron shaklda toʻlaydi. Toʻlov YIDXP yoki YHXXning mobil ilovasi yoxud rasmiy veb-saytining integratsiyalashgan toʻlov tizimi orqali onlayn amalga oshirilishi lozim.

Toʻlov qabul qilingach, avtomatlashtirilgan tizim tomonidan mazkur raqam kombinatsiyasi uchun ariza beruvchi nomiga rasmiy band qilinganligi tasdiqlanadi va ROʻDRB berish jarayonini yakunlash uchun maxsus tasdiqnoma (elektron shaklda) ariza beruvchiga taqdim etiladi.

10. Zaxiraga olingan vaqt tanlangan xaridorgir ROʻDRB uchun belgilangan miqdordagi yagona oshirilgan toʻlov amalga oshirilgunga qadar amal qilib, jismoniy shaxslar uchun 24 soatdan va yuridik shaxslar uchun 72 soatdan iborat. Ushbu vaqt mobaynida yagona oshirilgan toʻlov amalga oshirilmagan tanlangan ROʻDRB kombinatsiyalari ochiq maʼlumotlar bazasiga qaytariladi.

11. ROʻDRB belgilangan tartibda transport vositasiga biriktirish uchun beriladi. Bunda transport vositasini davlat roʻyxatidan oʻtkazish yoki qayta roʻyxatdan oʻtkazish jarayonida tanlangan va yagona oshirilgan toʻlovi toʻlangan ROʻDRB mazkur transport vositasiga biriktiriladi. YHXX hududiy boʻlinmalari ariza beruvchi tomonidan taqdim etilgan tasdiqnoma asosida belgilangan tartibda ROʻDRBni tayyorlab beradi.

12. Tanlangan va yagona oshirilgan toʻlov amalga oshirilgan ROʻDRB quyidagi muddatlarda ishlab chiqariladi va ariza beruvchining transport vositasi rasmiylashtiriladigan YHXX hududiy boʻlinmalariga yetkazib beriladi:

I, IE, III, IIIE tipidagi davlat raqami belgilari — 30 daqiqada;

X, XI, XIE, XI1, XIE1, XI2, XI3 tipidagi davlat raqami belgilari — 14 ish kuni mobaynida.

Bu haqda ariza beruvchiga elektron xabar yuboriladi.

13. Yagona oshirilgan toʻlov evaziga olingan ROʻDRBni ariza beruvchining transport vositasiga biriktirish va rasmiylashtirish qonunchilikda belgilangan umumiy tartibda YHXX hududiy boʻlinmalari tomonidan amalga oshiriladi.

3-bob. Istalgan harf va raqamlar kombinatsiyasiga ega boʻlgan ROʻDRBga egalik qilish va saqlab qolish huquqi

14. Istalgan harf va raqamlar kombinatsiyasiga ega boʻlgan ROʻDRB transport vositasi egasiga muayyan transport vositasiga biriktirish uchun beriladi, lekin mazkur ROʻDRB transport vositasi egasining mulki hisoblanmaydi. ROʻDRB belgilangan tartibda faqat belgilangan transport vositasiga tegishli huquqiy maqsadlarda foydalanish uchun taqdim etiladi.

15. Transport vositasi boshqa shaxsga oʻtkazilganda (sotilganda) yoki belgilangan tartibda qayta roʻyxatdan oʻtkazilganda, transport vositasining avvalgi egasi istalgan harf va raqamlar kombinatsiyasiga ega boʻlgan ROʻDRBni oʻzida saqlab qolish huquqiga ega boʻladi.

Bunda avvalgi egasi transport vositasini begonalashtirish (roʻyxatdan chiqarish) sanasidan eʼtiboran uch oy mobaynida YHXX hududiy boʻlinmasiga murojaat etib, ROʻDRBni saqlab qolish boʻyicha ariza taqdim etadi va yagona oshirilgan toʻlovning 50 foizi miqdorida toʻlovni amalga oshiradi.

16. Avvalgi egasi tomonidan uch oy ichida tegishli tartibda ariza berilmaganda yoki yagona oshirilgan toʻlovning 50 foizi miqdorida toʻlov toʻlanmaganda, ROʻDRBni saqlab qolish huquqi bekor qilinadi. Bunda mazkur raqam kombinatsiyasi qaytadan umumiy ochiq bazaga qaytariladi va boshqa shaxslar tomonidan tanlash uchun mavjud boʻladi.

4-bob. Yakunlovchi qoidalar

17. YHXX oshirilgan toʻlov evaziga beriladigan ROʻDRBni avtomatlashtirilgan axborot tizimi orqali elektron tartibda tanlanishini hamda tizimning uzluksiz va shaffof ishlashini taʼminlaydi, ochiq maʼlumotlar bazasining doimiy yangilanib borishini nazorat qiladi.

18. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar”.

2. Vazirlar Mahkamasining “Atmosfera havosiga transport vositalarining salbiy taʼsirini kamaytirish boʻyicha chora-tadbirlar toʻgʻrisida” 2024-yil 29-martdagi 166-son qarorida:

a) 1-bandda:

“a” kichik bandda:

birinchi xatboshidagi “2025-yil 1-martdan” soʻzlari “2026-yil 1-yanvardan” soʻzlari bilan almashtirilsin;

ikkinchi va uchinchi xatboshilar quyidagi tahrirda bayon etilsin:

“hududlarni ulardagi atmosfera havosi bilan bogʻliq real ekologik holatdan kelib chiqib, ilgʻor xorijiy tajriba va innovatsion texnologiyalar asosida ekologik zonalarga (keyingi oʻrinlarda — ekologik zonalar) ajratib borish;

transport vositalarining normativlarga mosligi darajasini ularning ishlab chiqaruvchi tomonidan belgilangan ekologik sinfiga mansubligiga (“Yevro”) koʻra avtomatik baholash tizimi yordamida qalbakilashtirishdan himoyalangan hamda elektron belgiga ega boʻlgan ekologik stikerlar berish orqali transport vositalarini “yashil”, “sariq” va “qizil” ranglar bilan belgilanadigan “toza”, “oʻrta” va “zararli” ekologik toifalarga ajratib borish”;

“b” kichik band quyidagi tahrirda bayon etilsin:

“b) “Ekologik transport” tizimini quyidagi bosqichlarda joriy etish:

birinchi bosqichda (2025 — 2027-yillarda) — Toshkent shahrida;

ikkinchi bosqichda (2028 — 2030-yillarda) — Nukus shahri va viloyatlar markazlarida hamda, zaruratga koʻra, alohida ekologik zonalarda (sayyohlik markazi, tabiat qoʻriqxonasi, sogʻlomlashtirish hamda dam olish maskanlari va boshqalar);

uchinchi bosqichda (2031 — 2034-yillarda) — boshqa barcha hududlarda”;

b) 2-bandda:

“a” kichik banddagi “2025-yil 1-martdan” soʻzlari “2026-yil 1-yanvardan” soʻzlari bilan almashtirilsin;

“b” kichik bandda:

ikkinchi xatboshidagi “2027” raqami “2028” raqami bilan almashtirilsin;

uchinchi xatboshidagi “2029” raqami “2031” raqami bilan almashtirilsin;

toʻrtinchi xatboshidagi “2031” raqami “2035” raqami bilan almashtirilsin;

“g” kichik band quyidagi tahrirda bayon etilsin:

“g) ishlab chiqarilganiga uch yildan oshmagan transport vositalariga ularning egalari tomonidan onlayn axborot tizimlari orqali yuborilgan murojaatlar asosida real vaqt rejimida “yashil” ekologik toifasiga mansub ekologik stikerlar mazkur xizmatlar uchun alohida toʻlov undirilmasdan diagnostika tekshiruvisiz beriladi va pochta orqali yuboriladi”;

v) 3-bandning uchinchi xatboshisi quyidagi tahrirda bayon etilsin:

“ekologik sinfga mansubligini (“Yevro”) aniqlash imkoni boʻlmagan transport vositalarining normativlarga mosligi Oʻzbekiston Respublikasi Ichki ishlar vazirligining “Innovatsiya loyihalari va aholiga servis xizmatlari koʻrsatish markazi” davlat unitar korxonasi tomonidan diagnostika tekshiruvidan oʻtkaziladi va aniqlanadi”.