Davlat xizmatlarini koʻrsatish tizimini takomillashtirish hamda sohada byurokratik tartibotlarni tubdan qisqartirishga doir qoʻshimcha chora-tadbirlar toʻgʻrisida (PF-157-son)
08.09.2025
Oʻzbekiston Respublikasi Prezidentining
Farmoni
“Oʻzbekiston — 2030” strategiyasi ijrosini taʼminlash, shuningdek, davlat boshqaruvida ortiqcha byurokratik toʻsiqlar, murakkablashgan tartibotlar va eskirgan yondashuvlarni bartaraf etish hamda davlat xizmatlarini koʻrsatishni yangi bosqichga olib chiqishga qaratilgan islohotlarni izchil davom ettirish maqsadida qaror qilaman:
I. Maqsadlar
1. Ushbu Farmonni qabul qilishdan koʻzlangan asosiy maqsadlar etib quyidagilar belgilansin:
(a) 2028-yilga qadar Yagona interaktiv davlat xizmatlari portali va davlat xizmatlari markazlari orqali taqdim etiladigan xizmatlar sonini 900 taga yetkazish;
(b) proaktiv davlat xizmatlari sonini 53 taga hamda kompozit davlat xizmatlarini 74 taga yetkazish;
(v) byurokratik tartib-taomillarni qisqartirish, davlat xizmatlarini raqamlashtirish, sohaga sunʼiy intellekt texnologiyalarini joriy qilish orqali yiliga aholining 47 milliard soʻm mablagʻlarini tejash hamda maʼmuriy xarajatlarni 80 milliard soʻmga qisqartirish;
(g) fuqarolarning oʻzini oʻzi boshqarish organlari hamda aholi gavjum joylarni bosqichma-bosqich 1100 ta interaktiv kiosklar bilan taʼminlash orqali 49 milliard soʻm maʼmuriy xarajatlarni tejash.
II. Davlat xizmatlarini koʻrsatishda talab qilinadigan hujjatlar sonini qisqartirish, jarayonlarni soddalashtirish va tezlashtirish
2. 2025-yil 1-dekabrdan boshlab idoralararo axborot almashinuvini yoʻlga qoʻyish orqali quyidagilar bekor qilinsin:
(a) nikohni rasmiylashtirishda FHDY organlari tomonidan nikohlanuvchi shaxslardan tibbiy koʻrik natijalarini taqdim qilish talabi;
(b) nikohdan sud qarori asosida ajratilganda nikohdan ajralganlik haqidagi dalolatnoma yozuvini shakllantirish uchun FHDY organlari tomonidan nikohdan ajratilgan shaxslardan sud qarorining talab qilinishi. Bunda:
(i) nikohdan ajralganlik haqidagi dalolatnoma yozuvi sud joylashgan joydagi tuman (shahar) FHDY organi tomonidan “FHDYning yagona elektron arxivi” axborot tizimida avtomatik ravishda shakllantiriladi hamda sud qarori nusxasi nikohdan ajralganlik toʻgʻrisidagi guvohnomaga tenglashtiriladi;
(ii) nikoh bekor qilinganligini qayd etganlik uchun undiriladigan davlat boji sudning qaroriga asosan er-xotinning har ikkalasidan yoki ularning biridan belgilangan tartibda Majburiy ijro byurosining tuman (shahar) boʻlimlari tomonidan undiriladi;
(v) chaqiriluvchilar va harbiy xizmatga majburlarning turar joyi, oʻqish joyi, ish joyi va lavozimidagi oʻzgarishlar toʻgʻrisidagi maʼlumotlarni tegishli mudofaa organlariga taqdim qilish majburiyati;
(g) avtomototransport vositasining roʻyxatdan oʻtganlik guvohnomasida avtomototransport vositasi mulkdorining manzilini koʻrsatish talabi.
3. Quyidagilar:
(a) 2026-yil 1-yanvardan ayrim turdagi maʼlumot va hujjatlarni “Raqamli hukumat” tizimi orqali taqdim etishga masʼul davlat organlari va tashkilotlar roʻyxati 1-ilovaga muvofiq;
(b) Yagona interaktiv davlat xizmatlari portalida jismoniy shaxsning oʻziga tegishli boʻlgan va real vaqt rejimida taqdim etiladigan shaxsga doir maʼlumotlar roʻyxati 2-ilovaga muvofiq;
(v) Davlat xizmatlari markazlari va Yagona interaktiv davlat xizmatlari portali orqali bosqichma-bosqich joriy etiladigan davlat xizmatlari roʻyxati 3-ilovaga muvofiq;
(g) Tezlashtirilgan tartibda koʻrsatiladigan qoʻshimcha davlat xizmatlari roʻyxati 4-ilovaga muvofiq tasdiqlansin.
4. Belgilansinki:
(a) davlat organlari va tashkilotlari tomonidan:
(i) 2026-yil 1-yanvardan boshlab ushbu Farmonga 1-ilovaga muvofiq maʼlumot va hujjatlarni aholidan, shu jumladan, tadbirkorlik subyektlaridan talab qilish taqiqlanadi;
(ii) davlat xizmatlarini koʻrsatishda, ishga qabul qilish jarayonida va boshqa maʼmuriy tartib-taomillarni amalga oshirishda mazkur maʼlumot va hujjatlar “Raqamli hukumat” tizimi orqali ushbu Farmonga 1-ilovada belgilangan davlat organlari va tashkilotlardan mustaqil ravishda olinadi;
(iii) ushbu Farmonga 1- va 2-ilovalarda nazarda tutilgan maʼlumot va hujjatlarni aholidan talab qilish davlat xizmatlarini koʻrsatish sohasidagi qonunchilik hujjatlari talablarini buzish deb hisoblanadi;
(b) qonunchilik hujjatlariga asosan tashkiliy-huquqiy shaklidan qatʼi nazar davlat xizmatlarini koʻrsatish funksiyalari yuklatilgan tashkilotlar “Raqamli hukumat” tizimi doirasida maʼlumotlardan bepul foydalanadi.
5. Shunday tartib oʻrnatilsinki, unga muvofiq 2025-yil 1-noyabrdan boshlab:
(a) Yagona interaktiv davlat xizmatlari portalida (keyingi oʻrinlarda — Yagona portal) jismoniy shaxslarning ushbu Farmonga 2-ilovaga muvofiq shaxsga doir maʼlumotlari ularning shaxsiy kabineti orqali real vaqt rejimida taqdim etiladi. Bunda:
(i) jismoniy shaxsning Yagona portaldagi shaxsga doir maʼlumotlari ularning qogʻoz shakliga tenglashtiriladi;
(ii) ushbu maʼlumotlar Yagona portalning mobil ilovasidan foydalangan holda koʻrsatilganda davlat organlari va tashkilotlari tomonidan mazkur maʼlumotlarning qogʻoz shaklini talab qilish taqiqlanadi;
(b) davlat xizmatlari markazlariga kelib murojaat qilinganda pensionerlarga, homilador ayollarga va uch yoshga toʻlmagan bolasi bilan kelgan fuqaroga davlat xizmatlaridan navbatsiz foydalanish boʻyicha imtiyoz beriladi;
(v) jismoniy shaxslarni yagona identifikatsiya tizimidan (OneID) roʻyxatdan oʻtkazishda muqobil tarzda shaxsni biometrik identifikatsiya qilish (Face ID) tartibi yoʻlga qoʻyiladi;
(g) avtomototransport vositasi mulkdorining maʼlumotlari oʻzgarganda mulkdorning xohishiga koʻra avtomototransport vositasini davlat roʻyxatidan oʻtkazish boʻyicha ariza kompozit tarzda FHDY organi yoki davlat xizmatlari markazi tomonidan ichki ishlar organlariga yuboriladi;
(d) davlat xizmatlari markazlariga Yagona portal orqali joriy etilgan barcha davlat xizmatlari boʻyicha aholi va tadbirkorlik subyektlariga xizmat koʻrsatish huquqi beriladi;
(j) Yagona portal, davlat xizmatlari markazlari va “Litsenziya” axborot tizimi orqali berilgan arizalar asossiz rad etilganda fuqarolarning murojaatlari va adliya organlarining tegishli xulosasiga asosan davlat xizmati uchun undirilgan davlat bojlari, yigʻimlar va boshqa har qanday toʻlovlarning vakolatli organlarga yoʻnaltirilgan qismi ular tomonidan fuqarolarga qaytarib beriladi.
III. Davlat xizmatlarini koʻrsatish infratuzilmasini yaxshilash
6. Belgilab qoʻyilsinki:
(a) aholi gavjum joylar hamda mahallalar bosqichma-bosqich 1100 ta interaktiv kiosklar bilan taʼminlanadi. Bunda:
(i) Adliya vazirligi olti oy muddatda 600 ta interaktiv kiosklarni Adliya vazirligining budjetdan tashqari Adliya organlari va muassasalarini rivojlantirish jamgʻarmasi mablagʻlari hisobidan xarid qilish choralarini koʻradi;
(ii) Tiklanish va taraqqiyot jamgʻarmasi Oʻzbekiston Respublikasi Prezidentining 2017-yil 19-maydagi PQ-2979-son qarori asosida Tiklanish va taraqqiyot jamgʻarmasining kredit mablagʻlarini maqbullashtirish evaziga 2025-yilda 2 mln AQSH dollari miqdoridagi kredit mablagʻlarini Adliya vazirligiga 500 ta interaktiv kiosklarni sotib olish uchun 5 yil muddatga, shundan 2 yillik imtiyozli davr bilan yillik 2 foiz stavkada ajratadi;
(iii) Tiklanish va taraqqiyot jamgʻarmasidan ajratilgan kredit mablagʻlari adliya organlari va muassasalarining budjetdan tashqari mablagʻlari hisobidan qoplanadi;
(b) interaktiv kiosklar, ularga texnik xizmat koʻrsatish hamda toʻgʻri ishlashini taʼminlash uchun belgilangan tartibda shakllantiriladigan roʻyxatlar boʻyicha Adliya vazirligi tomonidan import qilinadigan, Oʻzbekiston Respublikasida ishlab chiqarilmaydigan asbob-uskunalar, moddiy-texnika resurslari va maxsus texnikalar, shu jumladan, serverlar, tarmoq qurilmalari, axborot xavfsizligi boʻyicha apparat va apparat-dasturiy qurilmalar, litsenziyali dasturiy taʼminotlar 2028-yil 1-sentabrga qadar bojxona bojidan ozod etiladi;
(v) Adliya vazirligiga barcha zarur talab va shartlarga javob beruvchi zamonaviy interaktiv kiosklar boʻyicha amaldagi qonunchilik hujjatlari talablari doirasida yetkazib beruvchi bilan interaktiv kiosklarni sotib olish boʻyicha xarid qilish tartib-taomili natijalariga muvofiq eng yaxshi takliflarni tanlash orqali shartnoma tuzish huquqi beriladi;
(g) interaktiv kiosklar orqali davlat xizmatlaridan mustaqil foydalanganda tegishli davlat boji, yigʻimlar va boshqa toʻlovlar davlat xizmatlari markazlari orqali yoki xizmat koʻrsatuvchi organlarga bevosita murojaat etilgan taqdirda toʻlanadigan summaning 90 foizi miqdorida undiriladi.
7. Adliya vazirligi va Raqamli texnologiyalar vazirligining 2026-yil 1-yanvardan boshlab quyidagilarni nazarda tutuvchi “Vakolat.uz” platformasini ishga tushirish haqidagi taklifi maʼqullansin:
(a) davlat xizmatlaridan foydalanish va davlat xizmati natijalarini olish boʻyicha boshqa shaxslarga ishonchnomalarni rasmiylashtirish;
(b) yuridik shaxslar tomonidan rasmiylashtirilgan ishonchnomalarni ixtiyoriy roʻyxatdan oʻtkazish;
(v) barcha turdagi ishonchnomalarning haqiqiyligini onlayn rejimda tekshirish;
(g) “Vakolat.uz” platformasidan bepul asosda foydalanish.
8. Shunday tartib oʻrnatilsinki, unga muvofiq 2026-yil 1-yanvardan boshlab Davlat xizmatlari yagona reyestri Adliya vazirligi tomonidan ishlab chiqiladigan “Davlat xizmatlari” avtomatlashtirilgan onlayn axborot tizimida yuritiladi. Bunda:
(a) har bir davlat xizmati boʻyicha uning raqamli pasporti shakllantiriladi;
(b) har bir davlat xizmatini Davlat xizmatlari yagona reyestriga kiritish normativ-huquqiy hujjat asosida amalga oshiriladi;
(v) davlat xizmatlarini koʻrsatish, ularning tartibotlarini joriy qilish, oʻzgartirish yoki bekor qilish faqatgina normativ-huquqiy hujjat bilan tartibga solinadi, bundan yangi davlat xizmatlarini eksperiment tariqasida maʼlum bir hududda aprobatsiya qilish holatlari mustasno.
9. Belgilansinki:
(a) 2026-yil 1-maydan boshlab barcha turdagi litsenziya, ruxsat berish va xabardor qilish tartib-taomillari “Litsenziyalash, ruxsat berish va xabardor qilish tartib-taomillari toʻgʻrisida”gi Qonun bilan tartibga solinadi hamda faqat “Litsenziya” axborot tizimi yoki Yagona portal orqali amalga oshiriladi, bundan Oʻzbekiston Respublikasi Markaziy banki hamda Istiqbolli loyihalar milliy agentligining vakolatlariga taalluqli boʻlgan hamda “Raqamli qishloq xoʻjaligi” yagona integratsion platformasi orqali koʻrsatiladigan litsenziyalash, ruxsat berish va xabardor qilish tartib-taomillari mustasno;
(b) “Litsenziya” axborot tizimi orqali tegishli litsenziya, ruxsat etish xususiyatiga ega hujjat berilganda hamda faoliyatni boshlaganlik haqida vakolatli organ xabardor qilinganda undiriladigan davlat bojlari, yigʻimlar va boshqa har qanday toʻlovlarning 10 foizi Davlat xizmatlarini rivojlantirish jamgʻarmasiga oʻtkaziladi.
IV. Farmon ijrosini tashkil etish, taʼminlash va nazorat
10. Davlat xizmatlarini koʻrsatishda ortiqcha tartib-taomillar hamda byurokratik talablarni yanada qisqartirish boʻyicha “yoʻl xaritasi” 5-ilovaga muvofiq tasdiqlansin.
11. Vazirlik va idoralar rahbarlari 2025-yil yakuniga qadar oʻzlari vakolatli boʻlgan har bir litsenziya, ruxsat berish hamda xabardor qilish tartib-taomillarini ularning amal qilishi natijasida erishilgan maqsadlarni, ijtimoiy-iqtisodiy, innovatsion va texnologik rivojlanishning joriy holatini, shuningdek, tadbirkorlik subyektlarining xarajatlarini baholagan holda qayta koʻrib chiqsin hamda takliflar ishlab chiqib Adliya vazirligiga kiritsin.
12. Oʻzbekiston Respublikasi Prezidentining ayrim hujjatlariga 6-ilovaga muvofiq oʻzgartirishlar va qoʻshimcha kiritilsin.
13. Adliya vazirligi:
(a) ikki oy muddatda qonunchilik hujjatlariga mazkur Farmondan kelib chiqadigan oʻzgartirish va qoʻshimchalar toʻgʻrisidagi takliflarni;
(b) 2026-yil 1-martga qadar vazirlik va idoralar tomonidan taqdim etilgan litsenziya, ruxsat berish hamda xabardor qilish tartib-taomillarini takomillashtirish yuzasidan umumlashtirilgan takliflarni Vazirlar Mahkamasiga kiritsin.
14. Adliya vazirligi Oʻzbekiston Milliy teleradiokompaniyasi hamda Oʻzbekiston Milliy axborot agentligi bilan birgalikda ushbu Farmonning mazmun-mohiyati ommaviy axborot vositalarida keng yoritilishini taʼminlasin.
15. Mazkur Farmonning ijrosini samarali tashkil qilishga masʼul va shaxsiy javobgar etib adliya vaziri A.D. Tashkulov hamda raqamli texnologiyalar vaziri Sh.X. Shermatov belgilansin.
16. Farmon ijrosini nazorat qilish Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidenti Administratsiyasi Huquqiy ekspertiza va kompleks tahlil qilish departamenti boshligʻi A.B. Samadov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 8-sentabr,
PF-157-son
Oʻzbekiston Respublikasi Prezidentining 2025-yil 8-sentabrdagi PF-157-son Farmoniga 1-ILOVA
2026-yil 1-yanvardan ayrim turdagi maʼlumot va hujjatlarni “Raqamli hukumat” tizimi orqali taqdim etishga masʼul davlat organlari va tashkilotlar
ROʻYXATI
T/rMaʼlumot va hujjatlar nomiMasʼul davlat organlari va tashkilotlar1.Yoʻqolgan ashyoning topilmaganligi toʻgʻrisida maʼlumotnomaAdliya vazirligi2.Tadbirkorlik subyektlari yagona davlat reyestridan soʻralayotgan axborot va (yoki) hujjat mavjud yoki mavjud emasligi toʻgʻrisida maʼlumotnoma3.Manzil boʻyicha yashash joyi va turgan joyi boʻyicha roʻyxatdan oʻtkazilganlar toʻgʻrisida maʼlumotnomaIchki ishlar vazirligi4.Fuqaro yashash joyi boʻyicha roʻyxatdan oʻtkazilganligi toʻgʻrisida qayd varagʻi5.Avtotransport vositasiga nisbatan taqiq mavjud yoki mavjud emasligi toʻgʻrisida maʼlumotnoma6.Vaqtincha mehnatga layoqatsizlik varaqasiSogʻliqni saqlash vazirligi7.Tibbiyot muassasalarida davolanish uchun berilgan imtiyozli yoʻllanmalar va ularning nusxalari8.Tuberkulyoz kasalligi boʻyicha hisobda turish yoki turmasligi boʻyicha maʼlumotnoma9.083 shakldagi tibbiy maʼlumotnoma10.063 shakldagi tibbiy maʼlumotnoma11.Davlat ekologik ekspertiza xulosasiEkologiya, atrof-muhitni muhofaza qilish va iqlim oʻzgarishi vazirligi12.Ekologik auditorning malaka sertifikati va uning nusxasi13.Elektron onlayn auksion bayonnomasiDavlat aktivlarini boshqarish agentligi14.Xoʻjalik jamiyatining toʻlovga qobiliyatsizligi (bankrotligi) toʻgʻrisida maʼlumot15.Baholovchining malaka sertifikati va nusxasi16.Rieltorlarning malaka sertifikati va nusxasi17. Alohida uy-joyni (kvartira, uy, kvartiraning yoki uyning bir qismini) xususiylashtirishga rozilik bergan shaxslar toʻgʻrisida maʼlumotnomaTuman (shahar) hokimliklari(Toshkent shahrida — Toshkent shahar uy-joylarga davlat orderlari va maʼlumotnomalar berish markazi) 18.Davlat ulushi mavjud korxona tomonidan ishlab chiqarilgan avtomototransport vositasiga beriladigan elektron hisob-maʼlumot“Oʻzavtosanoat” AJ19.Soliq organlarida hisobga qoʻyilgan koʻchmas mulk ijara shartnomalari toʻgʻrisida maʼlumotSoliq qoʻmitasi20.Qishloq xoʻjaligi, melioratsiya va yoʻl-qurilish texnikalari roʻyxatda turganligi toʻgʻrisida maʼlumotnomaAgrosanoat majmui ustidan nazorat qilish inspeksiyasi21.Sportchining sportchi pasporti nusxasiSport vazirligi22.Sportchilar uchun sportchining razryadi va unvonlari maʼlumotnomasi23.Talabalar turar joyiga joylashish uchun berilgan yoʻllanmalar va ularning nusxalariOliy taʼlim, fan va innovatsiyalar vazirligi24.Chet tilini bilish darajasini aniqlash boʻyicha milliy sertifikat va uning nusxasi25.Ilmiy daraja yoki ilmiy unvon olganlik toʻgʻrisidagi maʼlumotnomalar26.Tasdiqlangan baholar (oʻzlashtirish) tabeli yoki maktabning 9-sinfini tamomlamaganligi toʻgʻrisida tasdiqlangan maʼlumotnoma (9-sinf doirasida eksternat tartibida imtihonda qatnashish uchun)Maktabgacha va maktab taʼlimi vazirligi27.9-sinfdan keyin majburiy oʻrta taʼlimni yakunlamaganligi toʻgʻrisida tasdiqlangan maʼlumotnoma28.Davlat maktabgacha taʼlim tashkilotlariga qabul qilish uchun yoʻllanma va uning nusxasi29.Maktabgacha taʼlim tashkilotlaridagi tarbiyalanuvchilar toʻgʻrisidagi maʼlumot30.Barcha fanlardan (tegishli umumtaʼlim va maxsus fanlardan) bilish darajasini aniqlash boʻyicha milliy sertifikat va uning nusxasi
Oʻzbekiston Respublikasi Prezidentining 2025-yil 8-sentabrdagi PF-157-son Farmoniga 2-ILOVA
Yagona interaktiv davlat xizmatlari portalida jismoniy shaxsning oʻziga tegishli boʻlgan va real vaqt rejimida taqdim etiladigan shaxsga doir maʼlumotlar
ROʻYXATI
T/rShaxsga doir maʼlumot nomiMaʼlumotlarni taqdim etishga masʼul vakolatli organ1.Narkologiya dispanseri hisobida turishi yoki turmasligi toʻgʻrisida maʼlumotSogʻliqni saqlash vazirligi2.Ruhiy kasalliklar boʻyicha dispanser hisobida turishi yoki turmasligi toʻgʻrisida maʼlumot3.Davlat tibbiyot muassasasida hisobda turganligi toʻgʻrisida maʼlumot4.Sudlanmaganlik (yoki sudlanganlik) toʻgʻrisida maʼlumotIchki ishlar vazirligi5.Biometrik pasport (ID karta) maʼlumotlari6.Haydovchilik guvohnomasi maʼlumotlari7.Yashash joyi va turgan joyi toʻgʻrisida maʼlumot8.Oʻzbekiston Respublikasi fuqaroligiga mansubligi toʻgʻrisida maʼlumot9.Nomida mavjud boʻlgan avtotransport vositalari toʻgʻrisida maʼlumot10.Jismoniy shaxsning shaxsiy identifikatsiya raqami haqida maʼlumot11.Xorijga chiqish biometrik pasporti toʻgʻrisida maʼlumot12.Talaba oʻqish joyidan maʼlumot (oliy taʼlim muassasasidan)Oliy taʼlim, fan va innovatsiyalar vazirligi13.Shaxsning taʼlim olganligi toʻgʻrisida maʼlumotlar (oʻrta maxsus, kasb-hunar, professional va oliy taʼlim)14.Shaxsning umumiy oʻrta taʼlim olganligi toʻgʻrisida maʼlumot (shahodatnoma maʼlumotlari)Maktabgacha va maktab taʼlimi vazirligi15.Nomiga rasmiylashtirilgan litsenziya, ruxsatnoma va xabarnomalar toʻgʻrisida maʼlumotAdliya vazirligi16.Yakka tartibdagi tadbirkorligi toʻgʻrisida maʼlumot17.Ish staji va ish joyi toʻgʻrisida maʼlumotKambagʻallikni qisqartirish va bandlik vazirligi18.Turar joyning maydoni toʻgʻrisida maʼlumotKadastr agentligi19.Nomidagi koʻchmas mulk obyektlari toʻgʻrisida maʼlumot20.Ijtimoiy reyestrga kiritilganligi toʻgʻrisida maʼlumotIjtimoiy himoya milliy agentligi21.Fuqaroning “Temir daftar”ga kiritilgani haqida maʼlumot22.Fuqaroning “Yoshlar daftari”ga kiritilgani haqida maʼlumotYoshlar ishlari agentligi23.Soliq va yigʻimlardan soliq qarzi mavjud yoki mavjud emasligi toʻgʻrisida maʼlumotSoliq qoʻmitasi24.Ish haqi toʻgʻrisida maʼlumot25.Oʻzini oʻzi band qilganligi toʻgʻrisida maʼlumot26.Fuqaroning “Ayollar daftari”ga kiritilgani haqida maʼlumotOila va xotin-qizlar qoʻmitasi27.Toʻlangan pensiyalar (nafaqalar) miqdori toʻgʻrisida maʼlumotIqtisodiyot va moliya vazirligi huzuridagi budjetdan tashqari Pensiya jamgʻarmasi, Ijtimoiy himoya milliy agentligi28.Pensiya va nafaqa oluvchilar roʻyxatida mavjudligi haqida maʼlumot29.Ijro hujjati boʻyicha qarzdorlik mavjud yoki mavjud emasligi haqida maʼlumotMajburiy ijro byurosi30.Oʻzbekiston Respublikasidan chiqishga vaqtincha cheklov qoʻyilganligi haqida maʼlumot
Izoh: ushbu roʻyxatga kiritilgan maʼlumotlarning toʻgʻriligi va real vaqt rejimida yangilanib borilishiga roʻyxatdagi tegishli vakolatli organlar hamda Raqamli texnologiyalar vazirligi masʼul hisoblanadi.
Oʻzbekiston Respublikasi Prezidentining 2025-yil 8-sentabrdagi PF-157-son Farmoniga 3-ILOVA
Davlat xizmatlari markazlari va Yagona interaktiv davlat xizmatlari portali orqali bosqichma-bosqich joriy etiladigan davlat xizmatlari
ROʻYXATI
Oʻzbekiston Respublikasi Prezidentining 2025-yil 8-sentabrdagi PF-157-son Farmoniga 4-ILOVA
Tezlashtirilgan tartibda koʻrsatiladigan qoʻshimcha davlat xizmatlari
ROʻYXATI
Izoh: mazkur davlat xizmatlari ariza beruvchilarning xohishlariga asosan qoʻshimcha haq evaziga koʻrsatiladi.
Oʻzbekiston Respublikasi Prezidentining 2025-yil 8-sentabrdagi PF-157-son Farmoniga 5-ILOVA
Davlat xizmatlarini koʻrsatishda ortiqcha tartib-taomillar hamda byurokratik talablarni yanada qisqartirish boʻyicha
“YOʻL XARITASI”
Oʻzbekiston Respublikasi Prezidentining 2025-yil 8-sentabrdagi PF-157-son Farmoniga 6-ILOVA
Oʻzbekiston Respublikasi Prezidentining ayrim hujjatlariga kiritilayotgan oʻzgartirishlar va qoʻshimcha
1. Oʻzbekiston Respublikasi Prezidentining 2025-yil 14-avgustdagi “Oʻzbekistondagi bir guruh falastinlik fuqarolarga davlat gʻamxoʻrligi, mehr-shafqat tamoyillari asosida koʻmak berish tizimini yoʻlga qoʻyish chora-tadbirlari toʻgʻrisida”gi PF-133-son Farmonining 3-bandi quyidagi mazmundagi “d” kichik band bilan toʻldirilsin:
“(d) mehmonlar uchun belgilangan uy-joy ijara toʻlovlari miqdoriga oʻzgartirish kiritish boʻyicha qarorlar qabul qilish. Bunda uy-joy ijara toʻlovlarining belgilangan miqdordan oshgan qismi Ijtimoiy himoya davlat jamgʻarmasi mablagʻlari hisobidan qoplanadi”.
2. Oʻzbekiston Respublikasi Prezidentining 2020-yil 7-dekabrdagi “Davlat tomonidan tartibga solinadigan sohalarga xususiy sektorni jalb etish boʻyicha qoʻshimcha chora-tadbirlar toʻgʻrisida”gi PQ-4913-son qarorining 6-bandida:
(a) ikkinchi xatboshi quyidagi tahrirda bayon etilsin:
“agent sifatida xizmatlarni koʻrsatuvchi tadbirkorlik subyektlarining xodimlari nodavlat taʼlim sohasidagi kadrlar malakasini oshirish va ularni qayta tayyorlash faoliyatini boshlaganlik haqida xabarnoma yuborgan hamda Adliya vazirligining “Agent” platformasida roʻyxatdan oʻtgan oʻquv markazlarining oʻquv kurslarida yoki Adliya vazirligi huzuridagi Yuridik kadrlarni qayta tayyorlash va malakasini oshirish institutida oʻqigan hamda Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari tomonidan oʻtkaziladigan malaka imtihonini muvaffaqiyatli topshirganlarga beriladigan agent sertifikatiga ega boʻlishi shart”;
(b) toʻrtinchi xatboshidagi “yagona platformasi” soʻzlari “Agent” platformasi” soʻzlari bilan almashtirilsin;
(v) beshinchi xatboshidagi “mazkur xizmatlarni koʻrsatuvchi davlat organlari va tashkilotlari” soʻzlari “Adliya vazirligi” soʻzlari bilan almashtirilsin;
(g) yettinchi xatboshi chiqarib tashlansin;
(d) sakkizinchi va toʻqqizinchi xatboshilar tegishincha yettinchi va sakkizinchi xatboshilar deb hisoblansin;
(j) sakkizinchi xatboshi quyidagi tahrirda bayon qilinsin:
“tadbirkorlik subyektlari tomonidan agent sifatida koʻrsatilishi mumkin boʻlgan davlat xizmatlari roʻyxati Vazirlar Mahkamasi tomonidan tasdiqlanadi. Bunda Oʻzbekiston Respublikasi adliya vaziriga mazkur roʻyxatga oʻzgartirish kiritish huquqi beriladi”.