Raqamli kriminalistika tadqiqotlari sohasida mutaxassislar malakasini oshirish va sertifikatlangan mutaxassislarning yagona elektron reyestrini yuritish tartibini joriy etish chora-tadbirlari toʻgʻrisida (479-son)
31.07.2025
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Raqamli texnologiyalar vositasida sodir etiladigan jinoyatlarga qarshi kurashish sohasi uchun professional kadrlar tayyorlash tizimini joriy etish chora-tadbirlari toʻgʻrisida” 2025-yil 22-yanvardagi PQ-17-son qarori ijrosini taʼminlash, shuningdek, raqamli texnologiyalar vositasida sodir etiladigan jinoyatlarga qarshi kurashish borasida mutaxassislarning malakasini oshirishni samarali tashkil etish maqsadida Vazirlar Mahkamasi qaror qiladi:
1. Quyidagilarni nazarda tutuvchi:
a) Raqamli kriminalistika sohasida mutaxassislar malakasini oshirish tartibi toʻgʻrisidagi nizom 1-ilovaga muvofiq:
mutaxassislar malakasini oshirishning maqsad va vazifalari;
malaka oshirish muassasalarida mutaxassislar malakasini oshirishni tashkil etish tartibi;
mutaxassislarning bilimini baholash tartibi;
b) Raqamli kriminalistika sohasida sertifikatlangan mutaxassislarning yagona elektron reyestrini yuritish tartibi toʻgʻrisidagi nizom 2-ilovaga muvofiq tasdiqlansin:
raqamli kriminalistika sohasida sertifikatlangan mutaxassislarning yagona reyestrni shakllantirish tartibi;
raqamli kriminalistika sohasida sertifikatlangan mutaxassislarning yagona reyestrni yuritish tartibi.
2. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda ikki oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
3. Ushbu qarorning bajarilishini nazorat qilish Oʻzbekiston Respublikasi ichki ishlar vaziri A.A. Tashpulatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 31-iyul,
479-son
Vazirlar Mahkamasining 2025-yil 31-iyuldagi 479-son qaroriga 1-ILOVA
Raqamli kriminalistika sohasida mutaxassislar malakasini oshirish tartibi toʻgʻrisida
NIZOM
1-bob. Umumiy qoidalar
1. Ushbu Nizom raqamli kriminalistika sohasida mutaxassislar malakasini oshirish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
davlat sud-ekspertiza muassasalari — sud-ekspertlik faoliyatini amalga oshirish uchun tashkil etilgan ixtisoslashtirilgan muassasa, shuningdek, tegishli davlat organlari, vazirliklar va idoralar tizimidagi ixtisoslashtirilgan sud-ekspertiza boʻlinmalari;
malaka oshirish muassasalari — raqamli kriminalistika sohasida ilmiy-tadqiqot va tajriba-konstruktorlik ishlanmalarini amalga oshirish, mutaxassislarni tayyorlash, qayta tayyorlash yoki ularning malakasini oshirishga ixtisoslashgan Oʻzbekiston Respublikasining va xorijiy davlatlarning ilmiy-tadqiqot, oliy taʼlim yoki davlat sud-ekspertiza muassasalari;
mutaxassislarning malakasini oshirish — raqamli kriminalistika sohasida mutaxassislarning raqamli axborot tashuvchi qurilmalar tadqiqoti, kriminalistik ahamiyatga ega boʻlgan raqamli maʼlumotlarni qidirish, aniqlash, toʻplash va qayta ishlash hamda raqamli kriminalistikaning yangi yoʻnalishlari boʻyicha nazariy va amaliy bilimlarini mustahkamlash;
raqamli kriminalistika sohasi — kiberjinoyatlarni, shuningdek, axborot-kommunikatsiya tarmoqlari, axborot texnologiyalari va raqamli axborot tashuvchi vositalardan foydalangan holda jinoyatlarni sodir etish imkonini bergan shart-sharoitlarni oʻrganish, dalillarni toʻplash va kriminalistik tadqiqotlarini oʻtkazish faoliyati;
raqamli kriminalistika sohasi mutaxassisi (mutaxassis) — tezkor-qidiruv tadbirlari va protsessual harakatlarga mutaxassis sifatida jalb etiladigan, raqamli kriminalistika sohasida zarur bilim va koʻnikmaga ega boʻlgan hamda bu borada kriminalistika tadqiqotlarini oʻtkazadigan, davlat sud-ekspertiza muassasasining xodimi (ishchisi, harbiy xizmatchisi).
3. Raqamli kriminalistika sohasida mutaxassislarning malakasi har ikki yilda oshiriladi.
4. Mutaxassislarning malakasi malaka oshirish muassasalarining talablariga mos ravishda oshiriladi.
5. Mutaxassislarning malaka oshirish muassasalarida malakasini oshirish ushbu Nizomga 1-ilovaga muvofiq shakl boʻyicha taqdim qilinadigan buyurtmaga asosan tashkil etiladi.
Xorijiy davlatlarning malaka oshirish muassasalarida mutaxassislarning malakasi Oʻzbekiston Respublikasining xalqaro shartnomalari hamda vazirliklar, idoralar, davlat sud-ekspertiza muassasalari va xorijiy davlatlarning malaka oshirish muassasalari oʻrtasida tuzilgan shartnomalar, shuningdek, xorijiy davlatlar va xalqaro tashkilotlar tomonidan davlat sud-ekspertiza muassasalarini rivojlantirish maqsadida ajratiladigan grantlar asosida oshiriladi.
Mutaxassislarni xorijiy davlatlarning malaka oshirish muassasalarida malakasini oshirish uchun yuborish tegishli vazirlik va idoralar bilan kelishilgan holda tashkil etiladi.
6. Mutaxassislarning malakasini oshirish Oʻzbekiston Respublikasining Davlat budjeti mablagʻlari va qonunchilikda taqiqlanmagan boshqa manbalar hisobidan moliyalashtiriladi.
7. Mutaxassislarning malakasini oshirish oʻz ixtisosligi boʻyicha kamida bir yillik ish stajiga ega boʻlgan mutaxassislar uchun tashkil qilinadi.
8. Davlat sud-ekspertiza muassasalari:
raqamli kriminalistika sohasida malaka oshirishi lozim boʻlgan mutaxassislarning ehtiyojini aniqlaydi va tarkibini shakllantiradi;
mutaxassislarning malakasini oshirish boʻyicha oʻquv mashgʻulotlarini oʻtkazishda malaka oshirish muassasalariga tashkiliy-metodik jihatdan koʻmaklashadi;
mutaxassislarining malakasi oʻz vaqtida, toʻliq va sifatli oshirilishini taʼminlaydi.
2-bob. Mutaxassislarning malakasini oshirish maqsadi va vazifalari
9. Raqamli kriminalistika sohasidagi yangi texnologiyalar, ilmiy usullardan foydalanish, ushbu sohadagi milliy qonunchilikdan va xorijiy davlatlarning qonunchiligidan xabardor qilish hamda kasbiy mahoratni doimiy ravishda rivojlantirishga koʻmaklashish uchun zarur boʻlgan nazariy bilimlar, amaliy koʻnikmalarni muntazam yangilab borish mutaxassislar malakasini oshirishning maqsadi hisoblanadi.
10. Quyidagilar mutaxassislarning malakasini oshirish vazifalari hisoblanadi:
malaka oshirish jarayonlarini ilmiy-uslubiy jihatdan yuqori darajada taʼminlash;
malaka oshirishning bevosita va bilvosita shakllarini amaliyotga joriy etish;
mutaxassislar tomonidan zamonaviy multimedia va axborot-kommunikatsiya texnologiyalarini samarali oʻzlashtirish uchun zarur shart-sharoitlar yaratish;
mutaxassislarning malakasini oshirish jarayonlarining fan va ishlab chiqarish bilan integratsiyasini taʼminlash tizimini yanada rivojlantirish va modernizatsiya qilish.
3-bob. Malaka oshirish muassasalarida mutaxassislarning malakasini oshirishni tashkil etish tartibi
11. Mutaxassislar malakasini oshirish bevosita va (yoki) bilvosita tashkil etiladi. Bunda:
a) bevosita malaka oshirish:
oʻquv jarayonida ishtirok etish — oʻquv dasturlariga mos holda yangi nazariy va amaliy bilimlar, malaka va koʻnikmalarni oʻzlashtirish;
malaka oshirish muassasalarida malakaviy amaliyot (stajirovka) oʻtash — mutaxassislarning nazariy bilimlarini chuqurlashtirish va mustahkamlash, maxsus kasbiy koʻnikmalarini shakllantirish hamda raqamli kriminalistika tadqiqotlarini mustaqil bajarish koʻnikmalarini rivojlantirish;
b) bilvosita malaka oshirish — malaka oshirish muassasalari tomonidan tashkil etiladigan (onlayn) seminar, davra suhbati va konferensiyalarda hamda boshqa shu kabi tadbirlarda ishtirok etish va maʼruzalar qilish orqali amalga oshiriladi.
12. Oʻzbekiston Respublikasidagi malaka oshirish muassasalari:
oʻqitishning zamonaviy pedagogika uslublari, multimedia va axborot-kommunikatsiya texnologiyalarini qoʻllagan holda, raqamli kriminalistika sohasining turlari boʻyicha tahliliy qobiliyatni va ijodiy fikrlashni rivojlantirishga qaratilgan alohida oʻquv rejalari va dasturlarni ishlab chiqadi va tasdiqlaydi;
fanlarning raqamli kriminalistika sohasida amaliyot bilan bogʻliqligini taʼminlaydi, oʻquv jarayonining amaliy yoʻnaltirilgani, mustaqil taʼlim va oʻquv jarayonini raqamli kriminalistika sohasidagi vazifalarni samarali va puxta bajarishga yoʻnaltirilganini kuchaytiradi, oʻquv jarayoniga raqamli kriminalistika sohasidagi ilgʻor ilmiy-tadqiqotlar natijalari, pedagogika texnologiyalari, mashgʻulotlar oʻtkazishning samarali shakl va uslublarini joriy etadi;
interfaol oʻqitish shakli va usullarini keng qoʻllashni, ilgʻor amaliy tajribalar asosida axborot texnologiyalaridan foydalanish koʻnikmalarini rivojlantirishni taʼminlaydi;
mamlakatimizda va xorijda ishlab chiqilgan raqamli kriminalistika sohasi fanlariga taalluqli ilmiy, uslubiy va texnik yangiliklar, ilgʻor tajribalarni oʻrganadi hamda oʻquv jarayoniga tatbiq qiladi;
mutaxassislar malakasini oshirish boʻyicha xalqaro tajribani oʻrganadi va soha boʻyicha tajriba almashishni tashkil qiladi;
oʻquv jarayoniga oid maxsus fanlar boʻyicha adabiyotlarni tayyorlaydi;
raqamli kriminalistika sohasida tadqiqotlar metodikalarini yanada takomillashtirish, yangi turdagi tadqiqotlarni joriy qilish, oʻquv jarayonini rivojlantirishga oid mavzularda konferensiya, simpozium, seminar va boshqa tadbirlarni tashkil qiladi.
13. Malaka oshirish muassasalari muntazam ravishda (bir yilda kamida bir marotaba) xorijiy davlatlarning raqamli kriminalistika sohasida yuqori malakaga ega mutaxassislari va yetakchi xalqaro ekspertlarni jalb etgan holda malaka oshirish kurslarini tashkil qiladi.
Bunda xorijiy mutaxassislar Oʻzbekiston Respublikasining xalqaro shartnomalari, malaka oshirish muassasalari oʻrtasida tuzilgan shartnomalar, shuningdek, xorijiy davlatlar va xalqaro tashkilotlar tomonidan davlat sud-ekspertiza muassasalari faoliyatini rivojlantirish maqsadida ajratiladigan grantlar asosida jalb qilinadi.
14. Mutaxassislar malakasini oshirish jarayonida malakaviy amaliyot oʻtkazilishi nazarda tutilishi mumkin.
15. Mutaxassislar malaka oshirish muassasalariga ushbu muassasalar rahbarlarining tegishli buyrugʻi asosida qabul qilinadi.
16. Malaka oshirayotgan mutaxassislarning oʻqish davri mobaynida asosiy ish joyi boʻyicha egallab turgan lavozimi va oʻrtacha oylik ish haqi saqlab qolinadi.
17. Malaka oshirish muassasalariga jalb qilingan mutaxassislar oʻquv jarayonidan quyidagi holatlarda chetlashtiriladi:
oʻquv intizomi va malaka oshirish muassasalarining ichki tartib-qoidalarini buzganlik uchun;
uzrli sabablarsiz 8 akademik soatdan koʻp oʻquv mashgʻulotlarini qoldirganlik uchun;
salomatligi tufayli (tibbiy komissiya maʼlumotnomasi asosida);
sud tomonidan qamoqqa olingan yoki ozodlikdan mahrum etilganda;
vafot etganligi sababli.
Uzrli sabablarga koʻra oʻqishni davom ettira olmagan mutaxassis oʻz arizasiga koʻra oʻquv jarayonidan chetlashtirilishi mumkin.
Uzrli sabablarga koʻra oʻqishni davom ettira olmagan mutaxassisga kelgusida tashkil etiladigan oʻquv guruhlarida oʻqish imkoni beriladi.
18. Malaka oshirish muassasalariga jalb qilingan mutaxassislarni oʻquv jarayonidan chetlashtirish malaka oshirish muassasalari rahbarlarining tegishli buyrugʻi asosida rasmiylashtiriladi va bu haqida tegishli davlat sud-ekspertiza muassasasiga xabar beriladi.
19. Malaka oshirish muassasalari tomonidan mutaxassislarning malakasini oshirish kamida 36 akademik soat hajmda tashkil etiladi.
20. Bilvosita malaka oshirish muddati oʻquv jarayoni muddatiga mos holda akademik soatlar bilan aniqlanadi.
4-bob. Mutaxassislarning bilimini baholash tartibi
21. Oʻquv jarayoniga jalb qilingan mutaxassislarning bilimi yakuniy nazorat natijasiga koʻra baholanadi.
Malaka oshirish boʻyicha yakuniy nazorat oʻqish davrida olingan nazariy bilimlar va amaliy koʻnikmalarni aniqlashga qaratilgan ogʻzaki yoki yozma imtihon yoxud suhbat shaklida oʻtkaziladi.
22. Malaka oshirish muassasalarida oʻquv dasturini muvaffaqiyatli oʻzlashtirgan mutaxassislarga ushbu Nizomga 2-ilovaga muvofiq shakldagi sertifikat beriladi.
Mutaxassislar xorijiy davlatlarning malaka oshirish muassasalarida malaka oshirganda, ular ushbu muassasaning tegishli hujjatlariga muvofiq malaka oshirgan hisoblanadi.
23. Yakuniy nazoratlardan oʻta olmagan yoki uzrli sabablarga koʻra ularda ishtirok eta olmagan mutaxassisga uning arizasiga binoan uch kun muddatda tegishli yakuniy nazoratni qayta topshirish imkoni beriladi.
24. Ushbu Nizomda belgilangan muddatlarda malakasini oshirmagan yoki yakuniy nazoratlardan takroran oʻta olmagan mutaxassislar malaka oshirishdan oʻtmagan deb hisoblanadi.
25. Yakuniy nazoratlardan takroran oʻta olmagan mutaxassislar uch kun ichida malaka oshirish muassasasi rahbari nomiga apellyatsiya tartibida shikoyat bilan murojaat qilishga haqli.
Apellyatsiya shikoyatini koʻrib chiqish tartibi malaka oshirish muassasasi tomonidan belgilanadi.
26. Malaka oshirishdan oʻtmagan mutaxassislar haqidagi maʼlumotnoma malaka oshirish muassasalari tomonidan zarur choralar koʻrish uchun tegishli davlat sud-ekspertiza muassasalariga yuboriladi.
5-bob. Yakunlovchi qoida
27. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Raqamli kriminalistika sohasida mutaxassislar malakasini oshirish tartibi toʻgʻrisidagi nizomga 1-ILOVA
Raqamli kriminalistika sohasi mutaxassis(lar)ini malaka oshirish kurslariga yuborish boʻyicha buyurtma shakliMalaka oshirish muassasasi rahbari________________________ga(Davlat sud-ekspertiza muassasasi nomi)ning raqamli kriminalistika sohasi mutaxassis(lar)ini malakasi oshirish kurslariga yuborish boʻyichaBUYURTMASIQuyidagi mutaxassis(lar)ni raqamli kriminalistika sohasining ____________________________________________________ yoʻnalishi boʻyicha malakasini oshirishga amaliy yordam koʻrsatishingizni soʻrayman:T/rMutaxassis(lar) F.I.O.Oliy (yoki oʻrta maxsus) maʼlumoti va ixtisosligiRaqamli kriminalistika sohasida ish staji1.2.3.4._______________________________________________________________(rahbar lavozimi)(imzo)(F.I.O.)
Raqamli kriminalistika sohasida mutaxassislar malakasini oshirish tartibi toʻgʻrisidagi nizomga 2-ILOVA
_________________________________________________________________________________________(ilmiy-tadqiqot, oliy taʼlim yoki davlat sud-ekspertiza muassasasi nomi)Raqamli kriminalistika sohasida malaka oshirganligi toʻgʻrisidaSERTIFIKAT№ ___________20____ yil “____” ______________________________(berilgan joyi)_______________________________________________________________________________________________________________________________________________________________________________________________________________(mutaxassisning familiyasi, ismi, otasining ismi)20____ yil “_____” ___________dan 20____ yil “_____” ___________gacha soatli_______________________________________________________________________________________________________________________________________________________________________________________________________________ni(malaka oshirish kursining nomi)muvaffaqiyatli tamomladi.Komissiya raisi____________________(imzo)(F.I.O.)(M.Oʻ.)
Vazirlar Mahkamasining 2025-yil 31-iyuldagi 479-son qaroriga 2-ILOVA
Raqamli kriminalistika sohasida sertifikatlangan mutaxassislarning yagona elektron reyestrini yuritish tartibi toʻgʻrisida
NIZOM
1-bob. Umumiy qoidalar
1. Ushbu Nizom raqamli kriminalistika sohasida sertifikatlangan mutaxassislarning yagona elektron reyestrini yuritish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
raqamli kriminalistika sohasi mutaxassisi (mutaxassis) — tezkor-qidiruv tadbirlari va protsessual harakatlarga mutaxassis sifatida jalb etiladigan, raqamli kriminalistika sohasida zarur bilim va koʻnikmaga ega boʻlgan hamda bu borada kriminalistik tadqiqotlarini oʻtkazadigan, davlat sud-ekspertiza muassasasining xodimi (ishchisi, harbiy xizmatchisi);
sertifikat — Oʻzbekiston Respublikasining va xorijiy davlatlarning ilmiy-tadqiqot, oliy taʼlim yoki davlat sud-ekspertiza muassasalarida raqamli kriminalistika sohasi boʻyicha malaka oshirganlik yoxud raqamli ekspertizalarni oʻtkazish boʻyicha kasbiy layoqatni tasdiqlovchi hujjat;
yagona reyestr — raqamli kriminalistika sohasi boʻyicha sertifikat olgan mutaxassis toʻgʻrisidagi maʼlumotlar aks ettirilgan va doimiy yangilanib boriladigan yagona elektron roʻyxat.
3. Yagona reyestr Oʻzbekiston Respublikasi Ichki ishlar vazirligi tomonidan yuritiladi.
4. Yagona reyestr huquqni muhofaza qiluvchi va sud organlarining faoliyatida tezkor-qidiruv tadbirlari va protsessual harakatlarga mutaxassis sifatida jalb etilishi mumkin boʻlgan, raqamli kriminalistika sohasida zarur bilim va koʻnikmaga ega boʻlgan hamda ushbu sohada malaka oshirgan mutaxassislarning yagona roʻyxatini shakllantirish maqsadida yuritiladi.
5. Yagona reyestrga davlat sud-ekspertiza muassasalarining mutaxassislari toʻgʻrisidagi maʼlumotlar kiritiladi.
6. Yagona reyestrga kiritilgan maʼlumotlar davlat sud-ekspertiza muassasalarining raqamli kriminalistika sohasidagi mutaxassislarining kasbiy layoqatliligining rasmiy tasdigʻi hisoblanadi.
7. Yagona reyestrga mutaxassislar toʻgʻrisidagi maʼlumotlarni kiritish uchun toʻlov undirilmaydi.
2-bob. Yagona reyestrni shakllantirish tartibi
8. Raqamli kriminalistika sohasidagi mutaxassislar toʻgʻrisidagi maʼlumotlarni yagona reyestrga kiritish uchun davlat sud-ekspertiza muassasalari tomonidan quyidagi hujjatlar taqdim qilinadi:
belgilangan shakldagi yagona reyestrga kiritish toʻgʻrisidagi xat;
davlat sud-ekspertiza muassasasining boʻlinmasi, mutaxassisning ixtisosligi, F.I.O.;
taʼlim yoʻnalishi va darajasi toʻgʻrisidagi maʼlumot;
mutaxassisligi boʻyicha ish staji toʻgʻrisidagi maʼlumot;
sertifikatning nusxasi;
ilmiy daraja va unvoni toʻgʻrisida maʼlumotlar (mavjud boʻlsa maʼlumotlar vakolatli organ tomonidan mustaqil ravishda “Raqamli hukumat” tizimining idoralararo integratsiyalashuv platformasi orqali avtomatik olinadi);
mutaxassisning raqamli kriminalistika sohasida erishgan yutuqlari haqida qoʻshimcha maʼlumotlar;
davlat sud-ekspertiza muassasasining toʻliq nomi, manzili va bogʻlanish uchun maʼlumotlari.
9. Yagona reyestrga kiritish uchun taqdim etilgan maʼlumotlarning haqqoniyligi va toʻliqligiga davlat sud-ekspertiza muassasasi javobgar hisoblanadi.
10. Raqamli kriminalistika sohasi mutaxassisi toʻgʻrisidagi maʼlumot taqdim etilgandan soʻng bir ish kunida yagona reyestrga kiritiladi.
11. Yagona reyestrga kiritilgan mutaxassisning ish joyi va anketa maʼlumotlari oʻzgargan hollarda, bu haqida bir ish kunida Oʻzbekiston Respublikasi Ichki ishlar vazirligi tomonidan yagona reyestrga oʻzgartirish kiritiladi.
12. Yagona reyestrga kiritilgan mutaxassis davlat sud-ekspertiza muassasasidan boʻshatilgan taqdirda, maʼlumot taqdim etilgandan soʻng bir ish kunida Oʻzbekiston Respublikasi Ichki ishlar vazirligi tomonidan yagona reyestrdan chiqariladi.
Bunda yagona reyestrga kiritilgan mutaxassislar toʻgʻrisidagi maʼlumotlarni yangilash uchun ular ishlaydigan davlat sud-ekspertiza muassasalariga tegishli soʻrov yuboriladi.
13. Yagona reyestr axborot tizimi davlat sud-ekspertiza muassasalarining axborot tizimlariga integratsiya qilingan taqdirda, har bir davlat sud-ekspertiza muassasalariga yagona reyestrga maʼlumotlarni masofaviy kiritish va ularni oʻzgartirish imkoniyati berilishi mumkin.
Bunda ushbu Nizomning 10 — 12 bandlarida koʻrsatilgan maʼlumotlar yagona reyestrga avtomatik tarzda kiritiladi.
3-bob. Yagona reyestrni yuritish tartibi
14. Yagona reyestr ushbu Nizomga ilovaga muvofiq shaklda yuritiladi.
15. Yagona reyestrda raqamli kriminalistika sohasidagi mutaxassislar toʻgʻrisida quyidagi maʼlumotlar koʻrsatiladi:
qayd raqami;
kiritilgan sana;
davlat sud-ekspertiza muassasasining, boʻlinmasining, mutaxassisning ixtisosligi, F.I.O.;
sertifikatlar rekvizitlari (berilgan joyi va sanasi, yoʻnalishi);
ilmiy daraja va unvoni toʻgʻrisida maʼlumotlar (mavjud boʻlsa);
davlat sud-ekspertiza muassasasining toʻliq nomi, manzili va bogʻlanish uchun maʼlumotlari;
mutaxassisning raqamli kriminalistika sohasida erishgan yutuqlari haqida qoʻshimcha maʼlumotlar;
yagona reyestrdan chiqarilgan sana (chiqarilgan taqdirda).
16. Davlat sud-ekspertiza muassasasining raqamli kriminalistika sohasi mutaxassisi yagona reyestrdan davlat sud-ekspertiza muassasasining xati asosida chiqariladi.
17. Oʻzbekiston Respublikasi Ichki ishlar vazirligi yagona reyestrning toʻgʻri yuritilishini va axborot xavfsizligini taʼminlaydi.
4-bob. Yakunlovchi qoidalar
18. Yagona reyestrga kiritilgan mutaxassislar toʻgʻrisidagi maʼlumotlar zaruratga koʻra tezkor-qidiruv tadbirlarini, tergovga qadar tekshiruv, surishtiruv, tergov va sud harakatlarini amalga oshiruvchi organ (shaxs)larning soʻroviga asosan Oʻzbekiston Respublikasi Ichki ishlar vazirligi tomonidan taqdim qilinadi.
19. Yagona reyestr tezkor-qidiruv tadbirlari va protsessual harakatlarni amalga oshirish yoki raqamli kriminalistika sohasidagi mutaxassislarni jalb etishni nazarda tutuvchi axborot tizimlariga integratsiya qilinishi mumkin.
20. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Raqamli kriminalistika sohasida sertifikatlangan mutaxassislarning yagona reyestrini yuritish tartibi toʻgʻrisidagi nizomga ILOVA
Raqamli kriminalistika sohasidagi sertifikatlangan mutaxassislarning yagona reyestri
Mutaxassisga berilgan qayd raqamiYagona reyestrga kiritilgan sanaMutaxassisning F.I.O.Mutaxassisning sertifikati rekvizitlariDavlat sud-ekspertiza muassasasiga doir maʼlumotQoʻshimcha maʼlumotlarYagona reyestrdan chiqarilgan sana1234567