Davlat boshqaruvi tizimida samaradorlik, proaktivlik va natijadorlikni oshirish chora-tadbirlari toʻgʻrisida (PF-111-son)

14.07.2025

OʻZBEKISTON RESPUBLIKASI PREZIDENTINING

FARMONI

Islohotlar ijrosini ekspert jihatidan taʼminlash samaradorligini oshirish, hududlar va tarmoqlarni ijtimoiy-iqtisodiy rivojlantirish, biznes muhitini yanada yaxshilash, davlat organlarining masʼuliyati va tashabbuskorligini oshirish, boshqaruvning barcha boʻgʻinlari oʻrtasida hamohanglikni mustahkamlash maqsadida qaror qilaman:

1. Quyidagilar:

(a) Oʻzbekiston Respublikasi Prezidenti Administratsiyasining yangilangan tuzilmasi 1-ilovaga* muvofiq;

(b) Oʻzbekiston Respublikasi Prezidenti Administratsiyasi reglamenti 2-ilovaga* muvofiq;

(v) Oʻzbekiston Respublikasi Prezidenti va uning Administratsiyasi huzuridagi tashkilotlar xodimlarining cheklangan soni 3-ilovaga* muvofiq;

(g) Oʻzbekiston Respublikasi Prezidenti Administratsiyasi rahbar va masʼul xodimlari mehnatiga Yagona tarif setkasi boʻyicha haq toʻlash razryadlari 4-ilovaga* muvofiq tasdiqlansin.

* 1 — 4-ilovalar berilmaydi.

2. Oʻzbekiston Respublikasi Prezidenti Administratsiyasining (keyingi oʻrinlarda — Administratsiya) yangilangan tuzilmasiga muvofiq:

(a) Axborot va ommaviy kommunikatsiyalar agentligi tugatilsin hamda uning axborot sohasida nazorat va monitoring boʻyicha vazifa va funksiyalari Axborotlashtirish va telekommunikatsiyalar sohasida nazorat inspeksiyasiga oʻtkazilsin;

(b) Ommaviy kommunikatsiyalar masalalari boʻyicha markaz Administratsiya boʻysunuviga oʻtkazilsin;

(v) Narkotiklarni nazorat qilish milliy markazi negizida Narkotiklar va oʻqotar qurollarni nazorat qilish agentligi tashkil etilsin;

(g) Administratsiya Matbuot xizmati media-markazi negizida Ommaviy axborot vositalari uchun kontent tayyorlash markazi tashkil etilsin;

(d) Davlat xizmatini rivojlantirish agentligi negizida Boshqaruv samaradorligi agentligi tashkil etilsin;

(j) Vazirlar Mahkamasi huzuridagi Madaniyat va sanʼatni rivojlantirish jamgʻarmasi Administratsiya boʻysunuviga oʻtkazilsin.

3. Respublika ijro etuvchi hokimiyat organlarining proaktiv siyosat yuritishini taʼminlash uchun 2025-yil 1-avgustdan quyidagilar amalga kiritilsin:

(a) vazirlik va idoralarning oʻzlariga tegishli sohani tartibga solish vakolati doirasida idoraviy normativ-huquqiy hujjatlar qabul qilish imkoniyatlarini kengaytirish, ularning ustidan jamoatchilik nazoratini kuchaytirish;

(b) idoraviy hujjatlarni Adliya vazirligida davlat roʻyxatidan oʻtkazishda qayta ishlash (tahrirlash) imkoniyatini yaratish, davlat roʻyxatidan oʻtkazish rad etilgan idoraviy hujjatlarni avtomatik ravishda oʻz kuchini yoʻqotgan deb topish amaliyotini joriy etish;

(v) idoraviy hujjatlarni, shu jumladan, sanitariya qoidalari, normalari va gigiyena normativlari, fitosanitariya talablari, ekologik normalar va qoidalar, veterinariya hamda veterinariya-sanitariya qoidalari va normalarini (texnik hujjatlar) xalqaro standartlarga moslashtirish jarayonida ularga huquqiy normalarni kiritishga ruxsat etish.

4. Vazirlar Mahkamasi Strategik islohotlar agentligi va Boshqaruv samaradorligi agentligi bilan birgalikda:

(a) 2025-yil 1-avgustga qadar Hukumat qarorlari, idoraviy hujjatlar va mahalliy davlat hokimiyati organlari hujjatlari bilan tartibga solinadigan masalalar roʻyxatini belgilasin;

(b) 2025-yil 1-sentabrga qadar:

(i) byurokratik toʻsiqlarni bartaraf etish, takrorlanuvchi nazorat funksiyalarini bekor qilish, qaror qabul qilishda shaffoflik va ochiqlikni taʼminlashga qaratilgan respublika va mahalliy ijro etuvchi hokimiyat organlari faoliyati samaradorligini oshirish;

(ii) hududlarni kompleks rivojlantirish, aholi bandligini taʼminlash va daromadlarini oshirish borasida mahalliy hokimliklar iqtisodiy, maʼmuriy va moliyaviy vakolatlarini yanada kengaytirishga qaratilgan normativ-huquqiy hujjatlar loyihalari paketini Administratsiyaga kiritsin;

(v) 2025-yil 1-avgustga qadar mazkur Farmon talablarini inobatga olgan holda Hukumat ijro apparati va ijro etuvchi organlarning shtat tuzilmalarini qayta koʻrib chiqsin va maqbullashtirish yuzasidan taklif kiritsin.

5. Oliy sud Konstitutsiyaviy sud, Bosh prokuratura va Adliya vazirligi bilan birgalikda ikki oy muddatda normativ-huquqiy hujjatlar va normativ xususiyatga ega maʼmuriy hujjatlar yuzasidan kelib tushayotgan murojaatlarni tahlil qilgan holda ularni bekor qilish, oʻzgartirish va haqiqiy emas deb topish boʻyicha sud amaliyotini takomillashtirish yuzasidan takliflarni Administratsiyaga kiritsin.

6. Prezident maslahatchilari va Administratsiya tarkibiy boʻlinmalari boshliqlari:

(a) biriktirilgan yoʻnalishlarda ishlarning ahvoli va rivojlanish istiqbollarini muntazam (haftada kamida bir marta) muhokama qilib borsin, bu borada davlat tashkilotlari, ishbilarmon doiralar, biznes hamjamiyati, hudud faollari va xususiy sektor vakillari bilan taʼsirchan muloqot va hamkorlikni kuchaytirsin;

(b) ijtimoiy-iqtisodiy rivojlanish jarayonlarini doimiy monitoring qilsin, hududlar va tarmoqlarni rivojlantirish ishlari holati hamda istiqbollari toʻgʻrisida axborot toʻplab, oʻz yechimini kutayotgan muammolarni hal qilish yoʻllarini aniqlagan holda Oʻzbekiston Respublikasi Prezidentiga koʻrib chiqish uchun kiritib borsin;

(v) ijtimoiy-iqtisodiy rivojlantirish boʻyicha davlat dasturlarining oʻz vaqtida shakllantirilishini va toʻliq bajarilishini, shu jumladan, tarmoqlar va hududlarda investitsiyaviy, davlat-xususiy sheriklik va boshqa yirik loyihalarning amalga oshirilishini nazoratga olsin;

(g) biznes muhitini yanada yaxshilash, oʻsishning yangi imkoniyatlarini ishga solish, aholi daromadlarini oshirish borasida ijro etuvchi organlarning tashkiliy tuzilmalarini va ish uslublarini takomillashtirish, ularning faoliyatini raqamlashtirish, mansabdor shaxslarning masʼuliyati va hisobdorligini oshirish choralarini koʻrib borsin;

(d) boʻlinma tarkibidagi boshqarma va shoʻbalar faoliyatini zamonaviy talablar asosida shakllantirish va vazifalar taqsimotini mustaqil belgilash, xodimlarni dolzarb masalalar yechimiga tezkor mobilizatsiya qilish orqali ularning ish samaradorligini oshirsin;

(j) xodimlar faoliyatida zamonaviy maʼlumotlarni tahlil qilish va vizuallashtirish, loyihalarni boshqarish, vaqt va natijadorlik vositalarini, shu jumladan, sunʼiy intellekt texnologiyalari va boshqa raqamli vositalarni joriy etsin.

7. Administratsiya rahbari va uning oʻrinbosarlari, Prezident yordamchilari, maslahatchilari, vakillari va Administratsiya tarkibiy boʻlinmalari boshliqlari Oʻzbekiston Respublikasi Prezidenti tomonidan lavozimiga tayinlanishi va lavozimidan ozod etilishi belgilab qoʻyilsin.

8. Administratsiya rahbariga quyidagi vakolatlar taqdim etilsin:

(a) Prezident maslahatchilari oʻrinbosarlari va Administratsiya tarkibiy boʻlinmalari boshliqlari oʻrinbosarlari, Komplayens xizmati boshligʻi, Kanselyariya mudiri hamda Administratsiya boshqaruv xodimlari, shu jumladan, mazkur lavozimlarga ilgari Oʻzbekiston Respublikasi Prezidenti tomonidan tayinlangan xodimlarni lavozimga tayinlash va lavozimidan ozod etish. Bunda qonunchilikka tegishli oʻzgartirishlar kiritilguniga qadar ham mazkur xodimlarga tegishli qonun va qonunosti hujjatlarida Oʻzbekiston Respublikasining Prezidenti tomonidan lavozimga tayinlanadigan xodimlar uchun nazarda tutilgan barcha huquqlar, imtiyozlar, kafolatlar, vakolatlar va boshqa qoidalar, shu jumladan, davlat sirlaridan foydalanishga doir ruxsatnoma berishning alohida tartibi tatbiq etiladi;

(b) Administratsiya xodimlarining shtatlar jadvalini tasdiqlash;

(v) loyihaviy boshqaruv tamoyili asosida rivojlantirish loyihalarini amalga oshirish uchun mahalliy va xorijiy mutaxassis va ekspertlarni, shu jumladan, olimlar, ilmiy izlanuvchilar va tadqiqotchilarni toʻgʻridan-toʻgʻri shartnomalar asosida jalb qilish (ishga olish), ularning natijalarini moliyalashtirish, shu jumladan, Administratsiya faoliyatiga koʻmaklashish jamgʻarmasi hisobidan;

(g) mahalliy va xorijiy mutaxassislar va ekspertlarga xizmatlari uchun haqni (ish haqini) milliy yoki chet el valyutasida toʻlash, mehnatga haq toʻlash miqdorini mustaqil belgilash.

9. Prezident maslahatchilari va Administratsiya tarkibiy boʻlinmalari boshliqlari oʻn kun muddatda oʻziga tegishli yoʻnalishda rivojlantirish loyihalari roʻyxatlarini shakllantirsin va Administratsiya rahbariga tasdiqlash uchun taqdim etsin.

10. Kommunikatsiyalar departamenti bir oy muddatda Davlat kommunikatsiya strategiyasini ishlab chiqsin va tasdiqlash uchun kiritsin.

11. Administratsiya rahbari ikki hafta muddatda Administratsiya boshqaruv xodimlari faoliyatiga baho berib, ularning attestatsiyadan oʻtkazilishini hamda Administratsiyaga salohiyati va qobiliyati yuqori boʻlgan eng munosib kadrlar tanlanishini taʼminlasin.

12. Administratsiya Kanselyariyasi boshqa tarkibiy boʻlinmalar bilan birgalikda bir oy muddatda ish jarayoniga zamonaviy raqamli vositalarni (sunʼiy intellekt, xodimlar faoliyati samaradorligini monitoring qilish, videokonferensiyalar, yigʻilish va tadbirlar kalendari va boshqalar) joriy qilsin.

13. Adliya vazirligi bir oy muddatda qonunchilikka mazkur Farmondan kelib chiqadigan oʻzgartirish va qoʻshimchalar haqida takliflarni Administratsiyaga kiritsin.

14. Mazkur Farmonning ijrosini nazorat qilish Oʻzbekiston Respublikasi Prezidenti Administratsiyasi rahbari S.Sh. Mirziyoyeva zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2025-yil 14-iyul,

PF-111-son