Ozodlikdan mahrum etilgan shaxslarni jazoni oʻtashni davom ettirish uchun topshirish toʻgʻrisida

18.07.2024

Oʻzbekiston Respublikasi bilan Qirgʻiziston Respublikasi oʻrtasida

Shartnoma

[Oʻzbekiston Respublikasi xalqaro shartnomalar davlat reyestrida 2025-yil 13-iyunda roʻyxatga olindi, roʻyxat raqami 4595-KG-2025-H]

Oʻzbekiston Respublikasi va Qirgʻiziston Respublikasi, keyingi oʻrinlarda “Tomonlar” deb ataluvchilar,

davlat suvereniteti, teng huquqlilik va oʻzaro hurmat prinsiplaridan kelib chiqib,

jinoiy-huquqiy sohada xalqaro hamkorlikni yanada rivojlantirishga koʻmaklashish niyatida,

mahkumlarning jazoni oʻzlari fuqarosi boʻlgan davlatda oʻtashlari jazoni ijro etish maqsadiga yanada samarali erishishga, huquqbuzarlarni jamiyatda normal hayotga qaytarishga koʻmaklashishini inobatga olib,

insonparvarlik va inson huquqlarini hurmat qilish prinsiplariga amal qilgan holda,

quyidagilar toʻgʻrisida kelishuvga erishdilar:

1-modda Taʼriflar

Mazkur Shartnomaning maqsadlariga erishish uchun atamalar quyidagi maʼnolarni bildiradi:

a) “hukm chiqarish Tomoni” —jazoni oʻtashni davom ettirish uchun topshirilishi mumkin boʻlgan yoki topshirilgan shaxsga nisbatan sud hukmini chiqargan Tomon;

b) “hukmni ijro etish Tomoni” — mahkum jazoni oʻtashni davom ettirishi uchun topshirilishi mumkin boʻlgan yoki topshirilgan Tomon;

c) “mahkum” — jinoyat sodir etganligi uchun Tomonlardan birining sudi tomonidan ozodlikdan mahrum qilish jazosiga hukm qilingan shaxs;

d) “qonuniy vakil” — Tomonlar har birining milliy qonunchiligida belgilangan tartibda shunday deb tan olingan shaxs;

e) “yaqin qarindoshlar” — Tomonlar har birining milliy qonunchiligiga muvofiq yaqin qarindoshlar hisoblanuvchi shaxslar;

f) “vakolatli organlar” — Tomonlarning mahkumlarni topshirish toʻgʻrisidagi qarorlarini ijro etuvchi organlari.

2-modda Hamkorlikning umumiy prinsiplari

1. Mazkur Shartnomaning qoidalariga muvofiq, Tomonlar mahkumlarni topshirish masalalarida maksimal darajada hamkorlik qilish majburiyatini oladilar.

2. Tomonlar, mazkur Shartnoma talablariga muvofiq, bir-birlarining soʻrovlari boʻyicha hukm chiqarish Tomoni hududida jinoyatlar sodir etganlik uchun ozodlikdan mahrum etish joylarida jazoni oʻtayotgan va boshqa Tomonning fuqarosi boʻlgan mahkumlarni hukmni ijro etish Tomoniga jazoni oʻtash uchun topshirish mumkin.

3-modda Markaziy organlar

1. Mazkur Shartnoma maqsadlarida, Tomonlar tarafidan belgilangan markaziy organlar bevosita, shu jumladan elektron aloqa vositalari yoki faks yordamida aloqa qiladilar.

2. Quyidagilar markaziy organlar hisoblanadilar:

Oʻzbekiston Respublikasi uchun — Oʻzbekiston Respublikasi Bosh prokuraturasi;

Qirgʻiziston Respublikasi uchun — Qirgʻiziston Respublikasi Bosh prokuraturasi.

3. Har bir Tomon markaziy organi bilan bogʻliq har qanday oʻzgarishlar yoki uning vakolatlari boshqa organlarga oʻtkazilganligi toʻgʻrisida boshqa Tomonni diplomatik kanallar orqali xabardor qiladi.

4-modda Mahkumni topshirish uchun asos

Mahkumni oʻzi fuqarosi boʻlgan Tomonga topshirish tartib-taomilini boshlash uchun asos ushbu shaxsning, uning yaqin qarindoshi yoki qonuniy vakilining Tomonlardan istalgan birining markaziy organiga yoʻllagan arizasi hisoblanadi.

5-modda Mahkumni topshirish toʻgʻrisidagi soʻrovlar va javoblar hamda zarur hujjatlar

1. Mahkumni topshirish toʻgʻrisidagi soʻrovlar va ularga javoblar Tomonlarning markaziy organlari tomonidan yozma shaklda tuziladi va yuboriladi.

Soʻrov mahkumning shaxsi toʻgʻrisida maʼlumotlar (familiyasi, ismi, otasining ismi (agar mavjud boʻlsa), tugʻilgan sanasi va joyi), shaxs hukm qilingan jinoyat qonuni moddasining nomi va mahkumning fuqaroligini tasdiqlovchi hujjat nusxasini oʻz ichiga oladi.

2. Mahkumni topshirish toʻgʻrisidagi soʻrovlar va ularga javoblar, shuningdek ularga ilova qilingan hujjatlar imzo bilan tasdiqlanishi va gerbli muhr bilan muhrlanishi lozim.

3. Tomonlardan istalgan biri tarafidan mahkumni topshirish toʻgʻrisidagi soʻrov berilishi mumkin. Soʻralayotgan Tomon oʻzining qarori toʻgʻrisida soʻrayotgan Tomonni darhol xabardor qilishi lozim.

4. Tomonlarning biridan mahkumni topshirish toʻgʻrisidagi soʻrov kelib tushsa va boshqa Tomon buni rad etmasa, hukm chiqarish Tomoni hukmni ijro etish Tomoniga quyidagi hujjatlar va maʼlumotlarni taqdim etadi:

a) qonuniy kuchga kirgan sud qarorining nusxasi, shu jumladan qarorga asos boʻlib xizmat qilgan qonunning tegishli qoidalari;

b) jazoning turi va muddatini koʻrsatuvchi maʼlumotlar, shuningdek uning hisoblash sanasi;

c) jazoning oʻtalgan muddatlari va oʻtalishi lozim boʻlgan qismlari toʻgʻrisida, shu jumladan sudga qadar hibsda ushlab turish muddatlari toʻgʻrisida maʼlumotlar, sud hukmining oʻzgartirilganligi toʻgʻrisida maʼlumotlar va sud hukmini ijroga qaratish uchun ahamiyatli boshqa maʼlumotlar;

d) mahkumning, mazkur Shartnomaning 7-moddasi 1-bandi c) kichik bandiga muvofiq, uning yaqin qarindoshi yoki qonuniy vakilining topshirishga yozma roziligi;

e) mahkumning sogʻligʻi holati toʻgʻrisida tibbiy xulosa, shu jumladan uning davolanganligi toʻgʻrisida maʼlumotlar va kelgusida hukmni ijro etish Tomonida davolanishi boʻyicha tavsiyalar;

f) mahkumning xulq-atvorining oʻziga xos xususiyatlari toʻgʻrisida maʼlumotlar;

g) yetkazilgan moddiy zarar hamda sud hukmi va boshqa ijro hujjatlariga muvofiq uni qoplash boʻyicha maʼlumotlar;

h) basharti tayinlangan boʻlsa, qoʻshimcha jazo ijrosi toʻgʻrisida hujjat.

5. Hukmni ijro etish Tomoni hukm chiqarish Tomoniga quyidagi hujjatlarni taqdim etadi:

a) mahkumning shaxsi toʻgʻrisidagi maʼlumotlar (familiyasi, ismi, otasining ismi (agar mavjud boʻlsa), tugʻilgan sanasi va joyi);

b) mahkumning fuqaroligini tasdiqlovchi hujjat;

c) hukm chiqarish Tomonida sud hukmi chiqarilishi bilan bogʻliq qilmish hukmni ijro etish Tomonining milliy qonunchiligiga muvofiq jinoyat hisoblanishi belgilangan hukmni ijro etish Tomonining tegishli milliy qonunchiligidan koʻchirma;

d) hukm chiqarish Tomoni tarafidan chiqarilgan sud hukmini hukmni ijro etish Tomonining milliy qonunchiligi boʻyicha ijro etish tartibi toʻgʻrisida maʼlumotlar.

6. Zarur hollarda, Tomonlarning markaziy organlari qoʻshimcha hujjatlar yoki maʼlumotlarni soʻrab olishi mumkin.

7. Mazkur Shartnomani ijro etishda Tomonlar rus tilidan foydalanadilar. Tomonlarning davlat tillarida tuzilgan hujjatlarga ularning rus tilidagi tasdiqlangan tarjimalari ilova qilinadi.

6-modda Mahkumning roziligi va uni tasdiqlash

1. Hukm chiqarish Tomoni mahkum yoki uning qonuniy vakili, huquqiy oqibatlarni toʻliq anglagan holda, topshirishga ixtiyoriy roziligini berganligini va buni topshirishga rozilik toʻgʻrisidagi ariza bilan tasdiqlanishini kafolatlaydi.

2. Hukm chiqarish Tomoni hukmni ijro etish Tomonining soʻrovi asosida hukmni ijro etish Tomoniga oʻzining vakolatli shaxsi orqali mahkum mazkur moddaning 1-bandi talablariga muvofiq oʻzini topshirishga rozilik berganligiga ishonch hosil qilishi uchun imkoniyat yaratib berishi lozim.

3. Mahkum oʻzini topshirish toʻgʻrisidagi arizani oʻzi bilgan tilda taqdim qilishi mumkin.

7-modda Mahkumni topshirish shartlari

1. Mahkum mazkur Shartnomaga muvofiq quyidagi hollarda topshirilishi mumkin, basharti:

a) mahkum hukmni ijro etish Tomonining fuqarosi boʻlsa;

b) shaxsni ozodlikdan mahrum qilish toʻgʻrisidagi sud hukmi qonuniy kuchga kirgan boʻlsa;

c) mahkumning yozma roziligi yoki mahkumning yoshi, jismoniy va (yoki) ruhiy holatiga koʻra oʻz irodasini erkin bildira olmasa, uning qonuniy vakili yoki yaqin qarindoshining roziligi boʻlsa;

d) shaxs har ikkala Tomonning milliy qonunchiligiga muvofiq jinoiy jazolanadigan va ozodlikdan mahrum qilishga sabab boʻladigan qilmish uchun hukm qilingan boʻlsa;

e) mahkumni topshirish toʻgʻrisidagi ariza yoki soʻrov qabul qilinganda oʻtalishi lozim boʻlgan ozodlikdan mahrum qilish jazosi muddati kamida olti (6) oyni tashkil qilsa;

f) hukm chiqarish Tomonida mahkumga nisbatan tergov, sud muhokamasi yoki boshqa protsessual harakatlar davom ettirilmayotgan boʻlsa;

g) Tomonlar mahkumni topshirishga rozi boʻlsalar.

2. Istisno holatlarda, Tomonlar, hatto mahkum oʻtashi lozim boʻlgan muddat mazkur moddaning 1-bandi e) kichik bandida koʻrsatilgan muddatdan kam boʻlsa ham, mahkumni topshirishga rozilik bildirishga haqlidirlar.

8-modda Mahkumni topshirishni rad etish uchun asoslar

Mahkumni topshirish amalga oshirilmaydi, basharti:

a) mazkur Shartnomaning 7-moddasi 1-bandida koʻrsatilgan talablarga amal qilinmagan boʻlsa;

b) Tomonlardan biri mahkumni topshirish uning suvereniteti, xavfsizligi, jamoat tartibi yoki boshqa muhim milliy manfaatlariga zarar yetkazishi mumkin yoxud uning milliy qonunchiligiga zid deb hisoblasa;

c) mahkum biror-bir moliyaviy majburiyatlarni bajarmagan boʻlsa;

d) soʻrayotgan Tomon tarafidan mazkur Shartnomaning 5-moddasi talablari lozim darajada bajarilmagan boʻlsa.

9-modda Mahkumni topshirish toʻgʻrisidagi soʻrov yuzasidan qaror

1. Tomonlar mazkur Shartnomaga va oʻzlarining milliy qonunchiligiga muvofiq mahkumni topshirish toʻgʻrisida qaror qabul qiladilar.

2. Qabul qilingan qaror toʻgʻrisida soʻrayotgan Tomonning markaziy organiga yoki mahkumni topshirish toʻgʻrisida ariza bilan murojaat qilgan shaxsga yozma ravishda xabar beriladi.

3. Mahkumni topshirish rad etilsa, bunday qaror asoslantirilgan boʻlishi lozim.

10-modda Shaxsiy maʼlumotlarni himoya qilish

Tomonlarning har biri mazkur Shartnomani amalga oshirish jarayonida olingan shaxsiy maʼlumotlarni himoya qilishni kafolatlaydi va ularni boshqa Tomonning oldindan berilgan yozma roziligisiz uchinchi davlatga berishi mumkin emas.

11-modda Mahkumni topshirish tartiboti

1. Mahkumni topshirish toʻgʻrisidagi soʻrov qanoatlantirilgan taqdirda, Tomonlarning vakolatli organlari mahkumni topshirish vaqti va shartlari toʻgʻrisida kelishib oladilar.

2. Topshirish tartiboti Tomonlarning vakolatli organlari vakillari tomonidan imzolanadigan mahkumni topshirish toʻgʻrisidagi hujjatni ikki nusxada tuzishni oʻz ichiga oladi.

3. Mahkumni topshirish tartiboti Oʻzbekiston — Qirgʻiziston davlat chegarasida, “Doʻstlik” — “Dostuk” oʻtkazish punktlari orqali amalga oshiriladi.

4. Oʻtkazish punktlari oʻzgartirilgan taqdirda, Tomonlar bu toʻgʻrisida diplomatik kanallar orqali bir-birlarini xabardor qiladilar.

12-modda Sud hukmining ijro etilishini davom ettirish

1. Hukmni ijro etish Tomoni, mahkumning holatini yomonlashtirmagan holda, oʻz milliy qonunchiligiga muvofiq hukm chiqarish Tomoni sudining hukmi ijrosini toʻliq davom ettirilishini taʼminlashi shart.

2. Hukmni ijro etish Tomonining sudi oʻz milliy qonunchiligiga muvofiq, xuddi hukm chiqarish Tomonining sudi qarori bilan tayinlangani kabi ozodlikdan mahrum qilish muddatini belgilagan holda, qaror qabul qiladi.

3. Basharti hukmni ijro etish Tomonining milliy qonunchiligi boʻyicha jinoyat sodir etganlik uchun ozodlikdan mahrum qilishning chegaralangan muddati hukm chiqarish Tomonining sudi hukmi bilan tayinlangan muddatdan kam boʻlsa, hukmni ijro etish Tomonining sudi bunday jinoyatni sodir etganlik uchun milliy qonunchilikda nazarda tutilgan ozodlikdan mahrum qilishning eng koʻp muddatini belgilaydi.

4. Hukm chiqarish Tomonining hududida mahkum oʻtab boʻlgan jazo muddati hukmni ijro etish Tomonida jazoni oʻtashning umumiy muddatiga kiritiladi.

5. Basharti hukm chiqarish Tomoni sudining hukmi ikki yoki undan ortiq qilmishga tegishli boʻlsa, ulardan biri yoki bir nechtasi hukmni ijro etish Tomonida jinoyat deb hisoblanmasa, ushbu Tomonning sudi jazoning qaysi qismi jinoyat hisoblanadigan qilmishga qoʻllanilishini aniqlaydi.

6. Basharti sodir etilgan qilmish uchun hukmni ijro etish Tomonida qoʻshimcha jazo nazarda tutilgan boʻlsa, ushbu Tomon sudi tarafidan oʻz milliy qonunchiligiga muvofiq bunday qoʻshimcha jazoni oʻtash toʻgʻrisida qaror qabul qilinadi.

13-modda Afv etish, amnistiya, jazoni yengillashtirish va jazoni oʻtashni davom ettirishdan ozod qilish

Tomonlarning har biri, boshqa Tomonni darhol xabardor qilgan holda, topshirilgan mahkumga nisbatan oʻz milliy qonunchiligiga muvofiq afv etish, amnistiya aktini qoʻllash yoki unga tayinlangan jazoni yengillashtirish yoxud uni jazoni oʻtashni davom ettirishdan ozod qilish toʻgʻrisida qaror qabul qilish huquqiga ega.

14-modda Yurisdiksiyani saqlash

1. Faqatgina hukm chiqarish Tomoni oʻz sudi tomonidan chiqarilgan qaromi oʻzgartirish yoki bekor qilish huquqiga ega.

2. Hukmni ijro etish Tomoni hukm chiqarish Tomonidan oʻzgartirilgan yoki bekor qilingan qaromi olgan taqdirda, hukmning ijro etilishini oʻzgartirishi yoki bekor qilishi lozim.

15-modda Mahkumni topshirishning huquqiy oqibatlari

1. Mahkumni topshirish hukm chiqarish Tomonida hukmning ijro etilishi tugatilganligini bildiradi.

2. Jazoni oʻtash uchun hukmni ijro etish Tomoniga topshirilgan mahkumga nisbatan ushbu Tomon hududida shu kabi jinoyatni sodir etgan shaxsga nisbatan boʻlgani kabi shunday hukm qilishning huquqiy oqibatlari boshlanadi.

3. Hukmni ijro etish uchun topshirilgan mahkum xuddi shunday qilmish uchun hukmni ijro etish Tomonining hududida qayta jinoiy javobgarlikka tortilishi mumkin emas.

16-modda Hukmning ijrosi toʻgʻrisida axborot berish

Hukmni ijro etish Tomoni hukm chiqarish Tomoniga sud hukmining ijrosi toʻgʻrisida axborot berishi lozim, basharti:

a) sud hukmining ijrosi yakunlangan boʻlsa;

b) mahkum qamoqdan qochgan yoki jazoni oʻtash muddati tugashidan oldin vafot etgan boʻlsa;

c) hukm chiqarish Tomoni tarafidan bu haqida axborot soʻralsa.

17-modda Axborot taqdim etish boʻyicha majburiyatlar

1. Har bir Tomon mazkur Shartnoma qoʻllanilishi mumkin boʻlgan mahkumlarni uning mavjudligi va mazmuni toʻgʻrisida xabardor qiladi.

2. Mahkum yoki uning qonuniy vakili topshirish toʻgʻrisidagi arizani koʻrib chiqish boʻyicha Tomonlardan har biri tarafidan qabul qilingan yakuniy qaror toʻgʻrisida yozma xabardor qilinadi.

18-modda Tranzit tashish

1. Tomonlarning har biri, uchinchi davlat tarafidan boshqa Tomonga topshirilgan mahkumni tranzit tashish toʻgʻrisida tegishli soʻrov mavjud boʻlgan taqdirda, oʻzining hududi orqali tranzit tashishga ruxsat berish huquqiga ega.

Bunda tranzit Tomoni oʻz hududida mahkumni qabul qilish, uni hibsda saqlashni taʼminlaydi.

2. Tranzit Tomoni quyidagi hollarda tranzit tashishni rad etish huquqiga ega, basharti:

a) mahkum uning fuqarosi boʻlsa;

b) sodir etilganligi uchun jazo tayinlangan jinoyat uning milliy qonunchiligiga muvofiq jinoyat deb hisoblanmasa.

3. Tranzit tashish toʻgʻrisidagi soʻrovga mazkur Shartnomaning 5-moddasi 4-bandi a), b), e) va f) kichik bandlarida nazarda tutilgan maʼlumotlarni oʻz ichiga oladi va unga mazkur Shartnomaning 5-moddasi 5-bandi a), b), c) kichik bandlarida belgilangan hujjatlar ilova qilinadi.

4. Basharti havo transportidan foydalanilsa va tranzit Tomonining hududida qoʻnish nazarda tutilmagan boʻlsa, tranzit tashishga ruxsat talab qilinmaydi.

5. Havo kemasi rejadan tashqari qoʻngan hollarda, tranzit Tomoni boshqa Tomonning mahkumni kuzatib borayotgan vakillarining iltimosiga koʻra, ushbu shaxsni tranzit tashish uchun ruxsat olingunga qadar 72 soat davomida hibsda ushlab turishi mumkin.

6. Basharti mazkur moddaning 5-bandida koʻrsatilgan muddatlarda tranzit tashish uchun soʻrov olinmasa va Tomonlar oʻrtasida boshqacha kelishuvga erishilmagan boʻlsa, ushbu shaxs ozodlikka chiqariladi.

19-modda Xarajatlar

1. Mazkur Shartnomani ijro etish bilan bogʻliq xarajatlarni Tomonlar oʻzlarining milliy qonunchiligiga va mazkur Shartnomaga muvofiq qoplaydilar.

2. Hukmni ijro etish Tomoni quyidagi xarajatlarni qoplaydi:

a) hukm chiqarish Tomonining hududida yuzaga keladigan xarajatlardan tashqari mahkumni tashish bilan bogʻliq xarajatlar;

b) topshirish amalga oshirilgandan keyin hukmni ijro etish bilan bogʻliq xarajatlar.

3. Mahkumni tranzit tashish bilan bogʻliq xarajatlarni tranzit Tomoni qoplaydi.

20-modda Hujjatlarning haqiqiyligi

Mazkur Shartnoma maqsadlarida, bir Tomonning markaziy organi tarafidan imzo va gerbli muhr bilan tasdiqlangan holda yuborilgan har qanday hujjat boshqa Tomonning hududida hech qanday maxsus tasdiqlovsiz foydalanilishi lozim.

21-modda Noqonuniy hukm chiqarganlik uchun javobgarlik

1. Hukm chiqarish Tomoni shaxsga nisbatan noqonuniy hukm chiqarganlik uchun javobgar boʻladi.

2. Hukm chiqarish Tomoni noqonuniy hukm chiqarish oqibatida yetkazilgan zararni qoplaydi.

22-modda Vaqt boʻyicha amal qilishi

Mazkur Shartnoma u kuchga kirgunga qadar va keyingi davrlarda chiqarilgan hukmlarni ijro etish uchun qoʻllaniladi.

23-modda Nizolarni hal qilish

Mazkur Shartnomani talqin qilish yoki qoʻllashda yuzaga keladigan nizolar Tomonlarning markaziy organlari oʻrtasida maslahatlashuvlar va muzokaralar yoʻli bilan hal etiladi.

24-modda Oʻzgartirish va qoʻshimchalar kiritish

Tomonlarning oʻzaro roziligi bilan mazkur Shartnomaga oʻzgartirish va qoʻshimchalar kiritilishi mumkin. Bunday oʻzgartirish va qoʻshimchalar mazkur Shartnomaning ajralmas qismi hisoblanadi va alohida bayonnoma bilan rasmiylashtiriladi.

25-modda Shartnomaning boshqa xalqaro shartnomalar bilan munosabati

Mazkur Shartnomaning qoidalari Tomonlar ishtirokchisi boʻlgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

26-modda Yakuniy qoidalar

1. Mazkur Shartnoma ratifikatsiya qilinadi va Tomonlarning biri diplomatik kanallar orqali uning ratifikatsiya qilinganligi toʻgʻrisida soʻnggi yozma xabarnoma olgan sanadan boshlab uch (3) oy oʻtgach kuchga kiradi.

2. Shartnoma nomuayyan muddatga tuziladi. Har bir Tomon istalgan vaqtda diplomatik kanallar orqali boshqa Tomonga yozma xabarnoma yuborish orqali Shartnomaning amal qilishini tugatish huquqiga ega. Mazkur Shartnomaning amal qilishi Tomonlardan biri boshqa Tomonning uni tugatish istagi toʻgʻrisidagi xabarnomasini olgan sanadan boshlab olti (6) oydan soʻng tugatiladi.

3. Mazkur Shartnomaning tugatilishi uning tugatilishidan oldin olingan mahkumlarni topshirish toʻgʻrisidagi soʻrovlarning ijrosini yakunlashga toʻsqinlik qilmaydi.

USHBUNI TASDIQLAB, tegishli tartibda vakolat berilgan quyidagi imzo chekuvchilar mazkur Shartnomani imzoladilar.

Toshkent shahrida, 2024-yil 18-iyulda, ikki nusxada, har biri oʻzbek, qirgʻiz va rus tillarida tuzildi, bunda barcha matn bir xil kuchga ega.

Mazkur Shartnomaning matnlari oʻrtasida tafovutlar yuzaga kelgan taqdirda, Tomonlar rus tilidagi matnga murojaat qiladilar.

(imzolar)