Davlat korxonalari negizida tashkil etilgan aksiyadorlik jamiyatlarida aksiyalarni joylashtirishning belgilangan tartibiga rioya qilinishini tekshirish natijalari toʻgʻrisida (96-son)

05.03.1998

Oʻzbekiston Respublikasi Vazirlar Mahkamasining

qarori

Xususiylashtirilgan korxonalarning aksiyalari paketlari amalda joylashtirilishini va ularning Oʻzbekiston Respublikasi Prezidentining “Qimmatli qogʻozlar bozorini rivojlantirish va respublikaning fond bozorida xorijiy investorlar ishtirokini kengaytirish borasidagi qoʻshimcha chora-tadbirlar toʻgʻrisida” 1997-yil 31-martdagi PF-1740-son Farmoni qoidalariga muvofiqligini tekshirish boʻyicha Oʻzbekiston Respublikasi Vazirlar Mahkamasining 1997-yil 8-sentabrdagi 375-f-son farmoyishi bilan tashkil etilgan Respublika komissiyasining ish yakunlarini koʻrib chiqib Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasiga, “Oʻzavtotrans”, “Oʻzdonmahsulot”, “Oʻzbaliq” korporatsiyalariga, “Oʻzbekyengilsanoat”, “Oʻzdavpaxtasanoatsotish”, “Oʻzgoʻshtsutsanoat”, “Oʻzeltexsanoat”, “Oʻzmashsanoat”, “Yogʻmoytamakisanoat”, “Oʻzulgurjibirjasavdo”, “Oziqovqatsanoat”, “Oʻzbektransqurilish” uyushmalariga, “Oʻzagrokimyotaʼminot” birlashmasi, “Oʻzbekmebel” davlat aksiyadorlik birlashmasiga, “Dori-darmon” respublika birlashmasiga va mehnat jamoasiga tegishli aksiyalar ulushi 26 foizdan ortiq boʻlgan koʻpgina aksiyadorlik jamiyatlariga ega boʻlgan boshqa xoʻjalik birlashmalariga aksiyalashtiriladigan korxonalar muassislari oʻrtasida taqsimlanadigan aksiyalar paketlari boʻyicha ulushlarni muvofiqlashtirish boʻyicha Oʻzbekiston Respublikasi Prezidentining 1997-yil 31-martdagi PF-1740-son Farmoni qoidalari bajarilishini taʼminlash yuzasidan ular tomonidan zarur chora-tadbirlar koʻrilmaganligi koʻrsatib oʻtilsin.

Davlat mulkini xususiylashtirishning ahvolini tekshirish boʻyicha Respublika komissiyasi tomonidan tayyorlangan maʼlumotnoma Oʻzbekiston Respublikasi Davlat mulki qoʻmitasiga, Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga, boshqa manfaatdor idoralarga aniq chora-tadbirlar koʻrish uchun yuborilsin.

Oʻzbekiston Respublikasi Davlat mulki qoʻmitasi, uyushmalar, korporatsiyalar, konsernlar, kompaniyalar va aksiyalashtiriladigan korxonalar rahbarlari, agar ular aksiyalashtiriladigan korxonalar aksiyalari paketlarini Farmon talablariga muvofiqlashtirish boʻyicha ishlarni 1998-yil 1-maygacha tugallamasalar, ularga nisbatan qattiq maʼmuriy javobgarlik choralari qoʻllanilishi haqida ogohlantirilsinlar.

2. Aksiyalashtiriladigan korxonalarning oʻz aylanma mablagʻlari hisobiga mehnat jamoasining aksiyalari paketlarini sotib olish va ularni korxona xodimlari oʻrtasida tekin joylashtirish, shuningdek korxonalarni aksiyalashtirishda aksiyalarning koʻpgina qismini mehnat jamoasiga biriktirib qoʻyish, natijada davlat korxonalarini davlatning ijozatisiz jamoa mulkiga aylantirish amaliyoti qoralansin.

Oʻzbekiston Respublikasi Prokuraturasi va Davlat soliq qoʻmitasi bunday hodisalarni tekshirib chiqsin hamda ushbu hollarga moliyaviy intizom buzilishi sifatida qaragan holda aybdor shaxslarni javobgarlikka tortsin.

3. Oʻzbekiston Respublikasi Davlat mulki qoʻmitasi, qimmatli qogʻozlar bozori faoliyatini muvofiqlashtirish va nazorat qilish markazi Markaziy bank va Moliya vazirligi bilan birgalikda davlat korxonalari negizida tashkil etilgan aksiyadorlik jamiyatlari tomonidan emitatsiya qilingan aksiyalarni xorijiy investorlar oʻrtasida erkin almashtiriladigan valyutaga dastlabki joylashtirish tartibini ikki hafta muddatda ishlab chiqsin va tasdiqlash uchun Vazirlar Mahkamasiga taqdim etsin.

4. Oʻzbekiston Respublikasi Vazirlar Mahkamasining quyidagi qarorlariga oʻzgartirish va qoʻshimchalar kiritilsin:

a) Oʻzbekiston Respublikasi Vazirlar Mahkamasining “Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini oshirish chora-tadbirlari toʻgʻrisida” 1997-yil 8-avgustdagi 404-son qaroriga;

4-band (oltinchi xatboshidan keyin) quyidagi mazmundagi xatboshilar bilan toʻldirilsin:

“davlat mulki” negizida tashkil etilgan aksiyadorlik jamiyati ustav jamgʻarmasiga ilgari kiritilmagan, Vazirlar Mahkamasining “Idoraga qarashli ijtimoiy soha obyektlarini joylardagi davlat hokimiyati organlari balansiga bosqichma-bosqich oʻtkazish toʻgʻrisida” 1997-yil 26-sentabrdagi 453-son qaroriga muvofiq Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga berilmaydigan uning balansidagi ijtimoiy infratuzilma obyektlari qiymati”;

korxona tomonidan aylanma mablagʻlar hisobiga xarid qilingan va haqi toʻlangan, lekin qonun hujjatlarida belgilangan muddatda joylashtirilmagan uning aksiyalari (shu jumladan mehnat jamoasi aksiyalari)ni qayta taqsimlash”;

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari V.A. Chjen va Vazirlar Mahkamasi tegishli komplekslari rahbarlari zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 5-mart,

96-son