Oʻzbekiston Respublikasi fuqaro va eksperimental aviatsiyasi aerodromlarini sertifikatlash qoidalari (OʻzR AQ-160) oʻzgartirishlar kiritish toʻgʻrisida (1734-9-son)
07.07.2025
Oʻzbekiston Respublikasi Transport vazirligi huzuridagi Fuqaro aviatsiyasi agentligi direktorining
buyrugʻi
[Oʻzbekiston Respublikasi Adliya vazirligi tomonidan 2025-yil 7-iyulda roʻyxatdan oʻtkazildi, roʻyxat raqami 1734-9]
Oʻzbekiston Respublikasining Havo kodeksiga muvofiq buyuraman:
1. Oʻzbekiston Respublikasi Parvozlar xavfsizligini nazorat qilish davlat inspeksiyasi boshligʻining 2007-yil 10-sentabrdagi 138-son buyrugʻi (roʻyxat raqami 1734, 2007-yil 29-oktabr) (Oʻzbekiston Respublikasi qonun hujjatlari toʻplami, 2007-y., 44-son, 448-modda) bilan tasdiqlangan “Oʻzbekiston Respublikasi fuqaro va eksperimental aviatsiyasi aerodromlarini sertifikatlash qoidalari”ga (OʻzR AQ-160) ilovaga muvofiq oʻzgartirishlar kiritilsin.
2. Mazkur buyruq Oʻzbekiston Respublikasi Transport vazirligi va Savdo-sanoat palatasi bilan kelishilgan.
3. Mazkur buyruq rasmiy eʼlon qilingan kundan eʼtiboran kuchga kiradi.
Direktor T. NAZAROV
Toshkent sh.,
2025-yil 4-iyun,
2H-son
Kelishildi:
Transport vaziri I. MAXKAMOV
2025-yil 30-may
Savdo-sanoat palatasi raisi D. VAXABOV
2025-yil 29-may
Oʻzbekiston Respublikasi Transport vazirligi huzuridagi Fuqaro aviatsiyasi agentligi direktorining 2025-yil 4-iyundagi 2H-son buyrugʻiga ILOVA
“Oʻzbekiston Respublikasi fuqaro va eksperimental aviatsiyasi aerodromlarini sertifikatlash qoidalari” (OʻzR AQ-160)ga kiritilayotgan oʻzgartirishlar
1. 1-bandning oʻn birinchi xatboshisi quyidagi tahrirda bayon etilsin:
“Aerodrom — quruqlikdagi yoki suv sathidagi maxsus jihozlangan, havo kemalarining kelib qoʻnishi, joʻnashi va shu sath boʻylab harakatlanishi uchun toʻliq yoki qisman moʻljallangan uchastka unda joylashgan binolar, inshootlar hamda anjomlar.”.
2. 7-band quyidagi tahrirda bayon etilsin:
“7. Yoʻlovchi, bagaj va yuklarni tashish uchun moʻljallangan aerodrom “Havo transportida yoʻlovchi va bagaj tashish qoidalari” (roʻyxat raqami 2238, 2011-yil 29-iyun) va Oʻzbekiston Respublikasining “Xavfli yuklarni havo transportida tashish qoidalari”da (OʻzR AQ-198) (roʻyxat raqami 1721, 2007-yil 25-sentabr) belgilangan talablarga javob berishi kerak.”.