Oziq-ovqat mahsulotlari va ozuqalarda pestitsidlarning qoldiq miqdorlari boʻyicha sanitariya qoidalari, normalari va gigiyena normativlarini (0094-25-son SanQvaN) tasdiqlash toʻgʻrisida (13-son)

05.06.2025

Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasining

qarori

[Oʻzbekiston Respublikasi Adliya vazirligi tomonidan 2025-yil 1-iyulda roʻyxatdan oʻtkazildi, hisob raqami 357]

Oʻzbekiston Respublikasining “Aholining sanitariya-epidemiologik osoyishtaligi toʻgʻrisida”gi Qonuni, 2025-yil 18-apreldagi PF-67-son “Ishlab chiqarish, eksport va tadbirkorlik faoliyatini ragʻbatlantirish, savdo va sanoat siyosati samaradorligini oshirish chora-tadbirlari toʻgʻrisida”gi Farmoni hamda 2025-yil 8-apreldagi PQ-136-son “Qishloq xoʻjaligi mahsulotlarining eksport salohiyatini oshirish hamda qayta ishlash zanjirini rivojlantirish boʻyicha qoʻshimcha chora-tadbirlar toʻgʻrisida”gi qaroriga muvofiq, Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi qaror qiladi:

1. Oziq-ovqat mahsulotlari va ozuqalarda pestitsidlarning qoldiq miqdorlari boʻyicha sanitariya qoidalari, normalari va gigiyena normativlari (0094-25-son SanQvaN) ilovaga muvofiq tasdiqlansin.

2. Mazkur qaror Oʻzbekiston Respublikasi Qishloq xoʻjaligi vazirligi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil va Savdo-sanoat palatasi bilan kelishilgan.

3. Mazkur qaror rasmiy eʼlon qilingan kundan uch oy oʻtgach kuchga kiradi.

Rais B. YUSUPALIYEV

Toshkent sh.,

2025-yil 5-iyun,

13-son

Kelishildi:

Qishloq xoʻjaligi vaziri I. ABDURAXMONOV

2025-yil 28-may

Tadbirkorlik subyektlarining huquqlari va qonuniy manfaatlarini himoya qilish boʻyicha vakil oʻrinbosari J. URUNOV

2025-yil 23-may

Savdo-sanoat palatasi raisi D. VAXABOV

2025-yil 21-may

Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasining 2025-yil 5-iyundagi 13-son qaroriga ILOVA

Oziq-ovqat mahsulotlari va ozuqalarda pestitsidlarning qoldiq miqdorlari boʻyicha sanitariya qoidalari, normalari va gigiyena normativlari (0094-25-son SanQvaN)

Mazkur sanitariya qoidalari, normalari va gigiyena normativlari (bundan buyon matnda sanitariya qoidalari deb yuritiladi) oziq-ovqat mahsulotlari va ozuqalarda pestitsidlarning qoldiq miqdorlariga oid sanitariya-gigiyena talablarini belgilaydi.

1-bob. Umumiy qoidalar

1. Mazkur sanitariya qoidalarida quyidagi tushunchalardan foydalaniladi:

pestitsid — zararli organizmlarga qarshi kurashish uchun qoʻllaniladigan moddalar;

pestitsidlarning qoldiq miqdori (qoldiqlari) — zararli organizmlarga qarshi kurashish uchun qoʻllaniladigan moddalarning qoldiq miqdori;

pestitsid qoldigʻining ruxsat etilgan maksimal darajasi — oziq-ovqat va ozuqalarda boʻladigan muayyan taʼsir etuvchi pestitsidning (mg/kg) yoʻl qoʻyiladigan eng yuqori darajasi.

2. Eksport qilish uchun moʻljallangan va eksport qilishdan oldin pestitsidlar bilan ishlov berilgan yangi, qayta ishlangan va (yoki) koʻp komponentli, oʻsimlik hamda hayvonlardan olinadigan oziq-ovqat mahsuloti va ozuqalarga yoki ularning qismlariga nisbatan pestitsid qoldigʻining ruxsat etilgan maksimal darajasi (bundan buyon matnda REMD deb yuritiladi) qoʻllanilmasligiga yoʻl qoʻyiladi.

2-bob. Oziq-ovqat mahsuloti va ozuqalaridagi pestitsid qoldigʻining REMDga qoʻyiladigan sanitariya-gigiyena talablari

3. Oziq-ovqat mahsulotlari va ozuqalarda ozuqa sifatida muomalaga kiritilganda yoki hayvonlarga qoʻllanilganda pestitsid qoldigʻining REMD ushbu sanitariya qoidalarining 1-ilovasiga muvofiq boʻlishi kerak.

Mazkur sanitariya qoidalarining 1-ilovasida pestitsid qoldigʻining REMD belgilanmagan mahsulotlar uchun standart darajasi 0,01 mg/kg miqdordan oshmasligi kerak.

4. Mazkur sanitariya qoidalarining 1-ilovasiga keltirilgan oziq-ovqat mahsulotlari va ozuqalarni REMD mavjud boʻlmagan mahsulotlar bilan aralashtirib, qayta ishlab ozuqa sifatida muomalaga kiritishga va hayvonlarga berishga yoʻl qoʻyilmaydi.

Qayta ishlangan, koʻp tarkibli oziq-ovqat mahsulotlari va ozuqalar uchun pestitsid qoldigʻining REMDlari belgilanmagan boʻlsa, qayta ishlash yoki aralashtirish natijasida pestitsidlar qoldigʻi mazkur sanitariya qoidalarining 1-ilovasida keltirilgan koʻp tarkibli mahsulotning tarkibiy qismi boʻlgan mahsulot uchun pestitsid qoldigʻining REMD qoʻllanilishi zarur.

5. Tarkibidagi faol modda aluminiy fosfid boʻlgan fumigantlar bilan ishlov berilishi lozim boʻlgan oziq-ovqat mahsulotlari mazkur sanitariya qoidalarining 2-ilovasida keltirilgan.

6. Oziq-ovqat mahsulotining birlamchi xomashyosi qayta ishlash uchun ishlab chiqarishga yetkazib berilganda unda qoʻllanilgan pestitsid qoldigʻining REMD mahsulot qaydnomasida keltirilishi lozim.

7. Oziq-ovqat mahsulotlari va ozuqalardagi pestitsid qoldigʻining REMDni aniqlashda, namunalar olishda va tahliliy sinovlar oʻtkazishda mahsulotlarni, sinovlar sonini, pestitsid miqdorini va avvalgi sinov natijalarini inobatga olinishi lozim.

3-bob. Oziq-ovqat mahsulotlari va ozuqalardagi pestitsid qoldigʻining REMD yoʻl qoʻyiladigan eng yuqori darajalarini belgilashga qoʻyiladigan sanitariya-gigiyena talablari

8. Oziq-ovqat mahsulotlari va ozuqalardagi pestitsid qoldigʻining REMDning yoʻl qoʻyiladigan eng yuqori darajalarini belgilashda quyidagilar inobatga olinishi lozim:

pestitsidlarning xavfsizligini dala tadqiqotlari va toksik-gigiyenik baholash orqali amalga oshirish;

oziq-ovqat mahsulotining xavfsizligi boʻyicha normativlarni belgilovchi xalqaro tashkilotlarning (Kodeks Alimentarius Komissiyasi) va xalqaro tan olingan ilmiy muassasalarning tavsiyaviy maʼlumotlari tahlil qilish;

yangi oziq-ovqat mahsulotlari va ozuqalardagi pestitsid qoldigʻining REMDni kiritish;

pestitsidlarning taʼsir etuvchi moddalari uchun ruxsat etilgan pestitsid qoldigʻining REMDlar toʻgʻrisida tegishli ilmiy maʼlumotlarni eʼlon qilish.

9. Pestitsid qoldigʻining REMDni tasdiqlash, oʻzgartirishlar kiritish, bekor qilish, vaqtinchalik REMDni belgilash laboratoriya namunalari olish va tahliliy sinovlar oʻtkazish orqali amalga oshirilishi lozim.

10. Taʼsir etuvchi pestitsid moddasi uchun pestitsid qoldigʻining REMD har bir oziq-ovqat mahsulotiga alohida-alohida belgilanishi kerak.

11. Har bir pestitsid uchun pestitsid qoldigʻining REMDni eng past darajasini belgilashda quyidagilar inobatga olinishi kerak:

pestitsidning zararkunandalarga qarshi samaradorligi saqlanishi;

pestitsidlarning kumulyativ va sinergetik taʼsirlari;

yuzaga kelishi mumkin boʻlgan xavflarni baholash natijalari;

oʻsimliklarni himoya qilish vositalaridan foydalanish texnologiyasini oʻzgartirish boʻyicha baholash.

12. Pestitsid qoldigʻining vaqtinchalik REMDlari quyidagilar orqali belgilanishi lozim:

pestitsidning taʼsir etuvchi moddasi yoki preparat shakli toʻgʻrisida toʻliq maʼlumot mavjud boʻlmasa;

oziq-ovqat mahsulotlari va ozuqalarida mavjud boʻlgan pestitsid qoldigʻining REMDning eng yuqori darajasi aniqlanmagan boʻlsa yoki ularning inson salomatligiga taʼsiri toʻgʻrisida aniq ilmiy maʼlumot olingunga yoki taqiqlangunga qadar vaqtinchalik deb belgilanishi;

pestitsid Oʻzbekiston Respublikasi Vazirlar Mahkamasining “Kimyolashtirish va oʻsimliklarni himoya qilish vositalarini sinovdan oʻtkazish hamda roʻyxatga olish tartibi toʻgʻrisidagi nizomni tasdiqlash haqida” 2024-yil 6-martdagi 115-son qaroriga asosan roʻyxatdan oʻtkazilgan agrokimyoviy moddalar davlat reyestriga kiritilmagan, biroq uning oziq-ovqat mahsulotlari va ozuqalarda mavjudligiga nisbatan asosli shubha mavjud boʻlsa;

Oʻzbekiston Respublikasida qoʻllanilishi mumkin boʻlgan pestitsidning amal qilish muddati tugagan boʻlsa.

13. REMDni belgilash talab etilmaydigan oʻsimliklarni himoya qiluvchi pestitsidlar guruhining (antifidantlar) faol moddalari va mahsulotlari ushbu sanitariya qoidalarining 3-ilovasiga muvofiq boʻlishi kerak.

14. Mazkur sanitariya qoidalarini ishlab chiquvchilar roʻyxati 4-ilovada keltirilgan.

Oziq-ovqat mahsulotlari va ozuqalarda pestitsidlarning qoldiq miqdorlari boʻyicha sanitariya qoidalari, normalari va gigiyena normativlariga (0094-25-son SanQvaN) 1-ILOVA

Oziq-ovqat mahsulotlari va ozuqalardagi pestitsidlar

ROʻYXATI

izoh:

(*) :aniqlanish chegarasida yoki uning atrofida (+-0,01 mg);

q/m — quruq massa;

F: (sut uchun) yogʻda eriydigan qoldiq. Sut mahsulotlari uchun REMD hisoblash: kodeksning qoldiq moddalarning yoʻl qoʻyiladigan eng yuqori darajalari/sut va sut mahsulotlarida begona moddalarning yoʻl qoʻyiladigan eng yuqori qoldiq miqdorlari;

E: begona qoldiq;

T: REMD mavjudligidan qatʼi nazar, zarur maʼlumotlar taqdim etilmaguncha va baholanmaguncha vaqtinchalik hisoblanadi;

P/U: yigʻim-terimdan keyingi ishlov berishni hisobga olish zarur;

P/UP: qayta ishlangan oziq-ovqat mahsulotlari uchun, bunda yigʻim-terimdan keyin qayta ishlash hisobga olinishi zarur sv — quruq massa asosida oʻrnatilgan REMD.

Oziq-ovqat mahsulotlari va ozuqalarda pestitsidlarning qoldiq miqdorlari boʻyicha sanitariya qoidalari, normalari va gigiyena normativlariga (0094-25-son SanQvaN) 2-ILOVA

Tarkibidagi faol modda aluminiy fosfid boʻlgan fumigantlar bilan ishlov berilishi lozim boʻlgan oziq-ovqat mahsulotlar

Oziq-ovqat mahsulotlari va ozuqalarda pestitsidlarning qoldiq miqdorlari boʻyicha sanitariya qoidalari, normalari va gigiyena normativlariga (0094-25-son SanQvaN) 3-ILOVA

REMDni belgilash talab etilmaydigan oʻsimliklarni himoya qiluvchi pestitsidlar guruhining (antifidantlar) faol moddalari va mahsulotlari

Oziq-ovqat mahsulotlari va ozuqalarda pestitsidlarning qoldiq miqdorlari boʻyicha sanitariya qoidalari, normalari va gigiyena normativlariga (0094-25-son SanQvaN) 4-ILOVA