Qizilqum fosforit rudasidan foydalanish samaradorligini oshirish chora-tadbirlari toʻgʻrisida (551-son)

23.11.2004

Oʻzbekiston Respublikasi Vazirlar Mahkamasining

qarori

[Koʻchirma]

Fosforli mineral oʻgʻitlar ishlab chiqarishni yanada koʻpaytirish, Qizilqum fosforit rudasini boyitish jarayonida fosfor xom ashyosida foydali moddalarni koʻpaytirish maqsadida Vazirlar Mahkamasi qaror qiladi:

1. Navoiy kon-metallurgiya kombinati tomonidan Qizilqum fosforitlarining navlarini yuvish texnologiyasi va kimyoviy tarkibi yuzasidan oʻtkazilgan sinovlar natijalari boʻyicha:

“Injiniring Dobersek GmbX” firmasi (Germaniya) bilan fosforit rudasidan xloridlarni yuvib olish qurilmasini foydalanishga topshirish boʻyicha texnik hujjatlarni ishlab chiqishni, asbob-uskunalar, materiallar va ehtiyot qismlar yetkazib berishni, xodimlarni oʻqitishni, shef-montaj va ishga tushirish-sozlash ishlarini oʻtkazishni nazarda tutuvchi 9991505,0 yevro summasiga kontrakt tuzilganligi;

tarkibida xlor miqdori 0,04 foizdan ortiq boʻlmagan yuvilgan foskonsentrat olish, yuvilgan rudada R205 miqdorini 18-19 foizgacha yetkazish, keyinchalik yuqori haroratda kuydirish va R205 miqdorini 30 foizgacha koʻpaytirish orqali konsentratning texnologiya xossalarini yaxshilash nazarda tutilganligi maʼlumot uchun qabul qilinsin.

2. Navoiy kon-metallurgiya kombinati:

“OʻzGEOTEXLITI” instituti (Toshkent shahri) bilan birgalikda va “Injiniring Dobersek GmbX” firmasi (Germaniya) ishtirokida yuvish qurilmasini qurish boʻyicha texnik-iqtisodiy asoslashni ikki oy muddatda ishlab chiqsin, uning ekspertizadan oʻtkazilishini va belgilangan tartibda tasdiqlanishini taʼminlasin;

2005-yilning III choragidan boshlab fosforli oʻgʻitlar ishlab chiqaruvchi korxonalarga fosforit xom ashyosi yetkazib berishni taʼminlasin, bunda xlor miqdorining yoʻl qoʻyiladigan standartlar doirasida boʻlishini taʼminlab:

ammofos ishlab chiqarish uchun — tarkibida 30 foizgacha R205 mavjud boʻlgan 400 ming tonna yuvilgan kuydirilgan foskonsentrat;

superfosfat ishlab chiqarish uchun — tarkibida 18-19 foiz R205 mavjud boʻlgan 200 ming tonna yuvilgan foskonsentrat, 2006-yildan boshlab esa — tarkibida 16-18 foiz R205 mavjud boʻlgan 200 ming tonna fosfor unini qoʻshimcha ravishda yetkazib bersin.

3. Obyektni loyihalashning normativ muddati davrida qurilish-montaj ishlarini tasdiqlangan texnik-iqtisodiy asoslash asosida loyiha-smeta ish hujjatlarini ishlab chiqish bilan bir vaqtda olib borishga istisno tartibida ruxsat etilsin.

Oʻzbekiston Respublikasi Davlat arxitektura va qurilish qoʻmitasining Loyihalashtirish va qurilish-montaj ishlari sifatiga rioya etilishi ustidan davlat nazorati bosh boshqarmasi bajariladigan qurilish-montaj ishlari sifatining beriladigan loyiha yechimlariga muvofiqligi ustidan qatʼiy nazorat oʻrnatsin.

4. Mahalliy xom ashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish kompleks dasturini amalga oshirish masalalari boʻyicha Maxsus komissiya (Oʻ.T.Sultonov) fosforit rudasidan xloridlarni yuvib olish qurilmasini qurish loyihasini Vazirlar Mahkamasining 2004-yil 14-yanvardagi 18-son qarori bilan tasdiqlangan Xom ashyo, komponentlar va sanoat materiallari ishlab chiqarishni mahalliylashtirish loyihalari roʻyxatiga belgilangan tartibda kiritsin.

6. Oʻzbekiston Respublikasi Ichki ishlar vazirligi Navoiy kon-metallurgiya kombinati buyurtmanomalariga binoan ushbu loyihani amalga oshirishda qatnashuvchi xorijiy mutaxassislarga davlat boji toʻlovisiz koʻp martalik vizalar berilishini va ularning muddati uzaytirilishini, shuningdek ularning yashash joyida vaqtinchalik roʻyxatdan oʻtkazilishini hamda vaqtinchalik roʻyxatdan oʻtkazish muddati uzaytirilishini taʼminlasin.

Yuqorida koʻrsatib oʻtilgan loyihani tayyorlash va amalga oshirish ishlarida qatnashish uchun keladigan xorijiy mutaxassislarga Oʻzbekiston Respublikasi hududida yashash va transportning barcha turlarida yurish haqini Oʻzbekiston Respublikasi fuqarolari uchun nazarda tutilgan tariflar boʻyicha toʻlash huquqi berilsin.

7. Vazirlar Mahkamasining “Qizilqum fosforit kompleksini rivojlantirishni va Samarqand kimyo zavodini rekonstruksiya qilishni jadallashtirish chora-tadbirlari toʻgʻrisida” 2003-yil 13-martdagi 135-son qarorining 2, 3 va 10-bandlari oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.T.Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 23-noyabr,

551-son