3-modda. Davlat roʻyxatidan oʻtkazish va yigʻim toʻlash

Oʻzbekiston Respublikasi qonun hujjatlarida ruxsat etilgan tadbirkorlik faoliyati bilan shugʻullanish istagini bildirgan jismoniy shaxsni davlat roʻyxatidan oʻtkazish ana shu shaxsning doimiy istiqomat joyidagi tegishli tuman, shahar, shahardagi tuman hokimligi tomonidan amalga oshiriladi.

Roʻyxatga olish jismoniy shaxs ariza bergan vaqtdan eʼtiboran uch kunlik muddatda amalga oshirilishi lozim. Jismoniy shaxs roʻyxatga olganlik uchun undiriladigan yigʻimni toʻlaganligi toʻgʻrisidagi hujjatni taqdim etganidan keyin unga arizada koʻrsatilgan muddatga guvohnoma beriladi.

Jismoniy shaxslarni roʻyxatdan oʻtkazish tartibi va ularga guvohnoma berishning belgilangan muddatini buzishda aybdor boʻlgan mansabdor shaxslar qonun hujjatlariga muvofiq javobgar boʻladilar.

Roʻyxatga olganlik uchun undiriladigan yigʻim bank muassasasi yoki aholidan soliq va yigʻim toʻlovlari qabul qilib oluvchi boshqa muassasalar orqali toʻlanadi. Roʻyxatga olganlik uchun toʻlangan yigʻim summasi qaytarilmaydi.

Jismoniy shaxs tadbirkor sifatida roʻyxatga olinganligi toʻgʻrisidagi guvohnoma uch nusxada rasmiylashtiriladi. Uning bir nusxasi tadbirkor roʻyxatga olingan joydagi soliq organiga yuboriladi.

Jismoniy shaxsga davlat roʻyxatiga olinganlik toʻgʻrisida berilgan guvohnoma:

guvohnoma berilgan muddat oʻtganidan keyin;

tadbirkor guvohnoma bergan hokimlikka tadbirkorlik faoliyatini toʻxtatganligi toʻgʻrisida ariza bergan vaqtdan boshlab;

toʻliq shirkat qatnashchilari tarkibidan chiqqani taqdirda;

qonun hujjatlarida nazarda tutilgan boshqa hollarda 15 kunlik muddat ichida qaytarilishi lozim.

Toʻliq xoʻjalik shirkati roʻyxatga olingan vaqtda yoki bunday shirkatga kirgan chogʻda jismoniy shaxsga — ana shunday shirkatning aʼzosiga ushbu moddaning beshinchi qismida nazarda tutilgan tartibda davlat roʻyxatiga olinganlik toʻgʻrisida guvohnoma beriladi. Bunda roʻyxatga olinganlik uchun yigʻim undirilmaydi.