Togʻ-kon sanoati va geologiya sohasidagi ayrim geografik obyektlarning nomlarini davlat tili qoida va meʼyorlariga muvofiqlashtirish hamda yangi nom berish toʻgʻrisida (379-son)

18.06.2025

Oʻzbekiston Respublikasi Vazirlar Mahkamasining

qarori

Oʻzbekiston Respublikasining “Davlat tili haqida”gi va “Geografik obyektlarning nomlari toʻgʻrisida”gi qonunlariga muvofiq hamda Geografik obyektlarni nomlash va qayta nomlash masalalari boʻyicha respublika komissiyasining xulosasiga koʻra Vazirlar Mahkamasi qaror qiladi:

1. Oʻzbekiston Respublikasining “Davlat tili haqida”gi va “Geografik obyektlarning nomlari toʻgʻrisida”gi qonunlari talablari asosida davlat tili qoida va meʼyorlariga muvofiqlashtirilgan hamda yangi nom berilgan quyidagi 367 ta geografik obyekt nomlarini oʻz ichiga olgan:

Davlat tili qoida va meʼyorlariga muvofiqlashtirilgan togʻ-kon sanoati va geologiya sohasidagi noruda foydali qazilma konlari nomlari roʻyxati 1-ilovaga muvofiq;

Davlat tili qoida va meʼyorlariga muvofiqlashtirilgan togʻ-kon sanoati va geologiya sohasidagi rudali foydali qazilma konlari nomlari roʻyxati 2-ilovaga muvofiq;

Davlat tili qoida va meʼyorlariga muvofiqlashtirilgan togʻ-kon sanoati va geologiya sohasidagi uglevodorod konlari nomlari roʻyxati 3-ilovaga muvofiq;

Yangi nom berilayotgan togʻ-kon sanoati va geologiya sohasidagi foydali qazilma konlari nomlari roʻyxati 4-ilovaga muvofiq tasdiqlansin.

2. Belgilab qoʻyilsinki, normativ-huquqiy hujjatlarda mazkur tasdiqlangan nomlardan foydalaniladi.

3. Togʻ-kon sanoati va geologiya vazirligi ikki oy muddatda:

togʻ-kon sanoati va geologiya sohasidagi geografik obyektlar nomlari davlat tili qoida va meʼyorlariga muvofiqlashtirilishi munosabati bilan tegishli hujjatlar hamda maʼlumotlar bazasiga oʻzgartirish kiritish boʻyicha zarur choralarni koʻrsin;

yer qaʼri davlat fondi kadastriga kiritilgan foydali qazilma konlarining nomlarini xatlovdan oʻtkazib, ularni Vazirlar Mahkamasining tegishli qarorlari bilan tasdiqlangan foydali qazilma konlari nomlari bilan taqqoslasin va belgilangan tartibda tasdiqlanmagan kon nomlarini davlat tili qoida va meʼyorlariga muvofiqlashtirish hamda yangi nom berish toʻgʻrisida taklif kiritsin;

foydali qazilmalar zaxiralarining geologik hisobotlarini koʻrib chiqish uchun Foydali qazilmalar zaxiralari boʻyicha davlat komissiyasiga taqdim etishdan oldin geologiya, geografiya, filologiya, tarix sohasining yetuk olimlari va mutaxassislari hamda tegishli boshqa mutaxassislarni jalb etgan holda Oʻzbekiston Respublikasining “Davlat tili haqida”gi va “Geografik obyektlarning nomlari toʻgʻrisida”gi qonunlarida belgilangan talablar asosida foydali qazilmalar konlarini nomlash choralarini koʻrsin;

foydali qazilma konlarini nomlash va qayta nomlash masalalarini tizimli yoʻlga qoʻyish maqsadida Vazirlar Mahkamasining 2018-yil 23-maydagi 388-son qaroriga Oʻzbekiston Respublikasining “Davlat tili haqida”gi va “Geografik obyektlarning nomlari toʻgʻrisida”gi qonunlarida belgilangan talablardan kelib chiqib oʻzgartirish va qoʻshimchalar kiritish boʻyicha Hukumat qarori loyihasini ishlab chiqib, oʻrnatilgan tartibda kiritsin.

4. Togʻ-kon sanoati va geologiya vazirligi Oʻzbekiston Milliy axborot agentligi, Oʻzbekiston Milliy teleradiokompaniyasi, Axborot va ommaviy kommunikatsiyalar agentligi bilan birgalikda ommaviy axborot vositalarida ushbu qarorning mazmun-mohiyati keng yoritilishini tashkil etsin.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov va togʻ-kon sanoati va geologiya vaziri B.F. Islamov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 18-iyun,

379-son

Vazirlar Mahkamasining 2025-yil 18-iyundagi 379-son qaroriga 1-ILOVA

Davlat tili qoida va meʼyorlariga muvofiqlashtirilgan togʻ-kon sanoati va geologiya sohasidagi noruda foydali qazilma konlari nomlari

ROʻYXATI

Vazirlar Mahkamasining 2025-yil 18-iyundagi 379-son qaroriga 2-ILOVA

Davlat tili qoida va meʼyorlariga muvofiqlashtirilgan togʻ-kon sanoati va geologiya sohasidagi rudali foydali qazilma konlari nomlari

ROʻYXATI

Vazirlar Mahkamasining 2025-yil 18-iyundagi 379-son qaroriga 3-ILOVA

Davlat tili qoida va meʼyorlariga muvofiqlashtirilgan togʻ-kon sanoati va geologiya sohasidagi uglevodorod konlari nomlari

ROʻYXATI

Vazirlar Mahkamasining 2025-yil 18-iyundagi 379-son qaroriga 4-ILOVA

Yangi nom berilayotgan togʻ-kon sanoati va geologiya sohasidagi foydali qazilma konlari nomlari

ROʻYXATI