Toshkent shahrida oʻtkazilgan Parlamentlararo ittifoqning 150-yubiley assambleyasi doirasida ilgari surilgan taklif va tashabbuslarni hamda erishilgan kelishuvlarni amalga oshirish toʻgʻrisida (922-V-son)
29.05.2025
Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining
qoʻshma qarori
Oʻzbekiston Respublikasi Prezidentining tashabbusi bilan 2025-yil 5 — 9-aprel kunlari Toshkent shahrida “Ijtimoiy taraqqiyot va adolat uchun parlament harakati” mavzusida Parlamentlararo ittifoqning 150-yubiley assambleyasi (keyingi oʻrinlarda — Assambleya) oʻtkazildi.
Assambleyada qatnashish uchun 140 ga yaqin davlatlar, 40 dan ortiq xalqaro va mintaqaviy tashkilotlar, ilmiy-tadqiqot muassasalaridan jami 2 mingdan ortiq ishtirokchi tashrif buyurdi.
Assambleya doirasida jami 80 ga yaqin tadbirlar boʻlib oʻtdi. Jumladan, ijtimoiy rivojlanish, adolat, inson huquqlari, iqtisodiy taraqqiyot va barqarorlikni taʼminlash, tinchlik va xavfsizlik, iqlim oʻzgarishi, yoshlar va ayollarning siyosiy jarayonlarda ishtirok etishi, parlament diplomatiyasini rivojlantirish kabi dolzarb masalalar muhokama qilindi. Ushbu jarayonlarda Oʻzbekiston parlamenti aʼzolari ham faol ishtirok etdi.
Shuningdek, Assambleya maydonlarida ayollar va yoshlar forumlari, Bolalarni zoʻravonlikning barcha shakllaridan himoya qilish boʻyicha oʻzaro tajriba almashishga oid maxsus tadbir ham tashkil etildi.
Oʻzbekiston Respublikasi Prezidenti Sh.M. Mirziyoyevning 7-aprel kuni Parlamentlararo ittifoqning 150-Assambleyasida nutq bilan chiqishi Assambleyaning eng asosiy tadbirlaridan biriga aylandi.
Oʻzbekiston Respublikasi Prezidenti tomonidan ilgari surilgan barcha takliflar dunyo mamlakatlari parlamentlari rahbarlari tomonidan yuksak eʼtibor va taassurotlar bilan qabul qilindi.
Assambleya yakuni boʻyicha Parlamentlararo ittifoqning 3 ta hujjati, jumladan, Toshkent deklaratsiyasi, Falastinda ikki davlat boʻyicha yechimni ilgari surishda parlamentlarning roli toʻgʻrisidagi rezolyutsiya hamda Barqaror rivojlanishga qarshi qurolli mojarolar, shu jumladan harbiy mojarolarning uzoq muddatli taʼsirini yumshatish boʻyicha parlament strategiyalari toʻgʻrisidagi rezolyutsiya qabul qilindi.
Yuqoridagilardan kelib chiqib, Oʻzbekiston Respublikasi Prezidentining Assambleya doirasidagi murojaatida ilgari surilgan tashabbuslarni amalga oshirish, shuningdek, parlament diplomatiyasini rivojlantirish, xalqaro parlament tuzilmalari bilan hamkorlikni yanada mustahkamlash maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:
1. 2025-yil 5 — 9-aprel kunlari Toshkent shahrida “Ijtimoiy taraqqiyot va adolat uchun parlament harakati” mavzusida Parlamentlararo ittifoqning 150-yubiley assambleyasi samarali yakunlanganligi qayd etilsin.
2. Toshkent shahrida oʻtkazilgan Parlamentlararo ittifoqning 150-yubiley assambleyasi doirasida ilgari surilgan taklif va tashabbuslarni hamda erishilgan kelishuvlarni 2025-2026-yillarda amalga oshirish boʻyicha kompleks chora-tadbirlar rejasi (“yoʻl xaritasi”) ilovaga muvofiq tasdiqlansin.
3. Oʻzbekiston Respublikasi Tashqi ishlar vazirligi 2025-yil yakuniga qadar:
Oʻzbekiston Respublikasi Prezidenti Sh.M. Mirziyoyev tomonidan Parlamentlararo ittifoqning 150-Assambleyasidagi nutqida ilgari surilgan oltita muhim yoʻnalish boʻyicha xalqaro miqyosda keng targʻibot ishlarini amalga oshirish choralarini koʻrsin;
Oʻzbekiston Respublikasi Oila va xotin-qizlar qoʻmitasi bilan birgalikda BMT Bosh Assambleyasining xotin-qizlar huquq va manfaatlarini himoya qilish sohasida xalqaro hamkorlikni kengaytirish masalalariga bagʻishlangan “Osiyo xotin-qizlarining ijtimoiy-iqtisodiy, siyosiy-huquqiy va madaniy-gumanitar faolligini oshirish toʻgʻrisida”gi rezolyutsiyasining loyihasi yuzasidan xorijiy davlatlar bilan muzokaralar oʻtkazsin;
Oʻzbekistonning strategik manfaatlaridan kelib chiqib, mamlakatimiz bilan ikki tomonlama va koʻp tomonlama hamkorlikni kengaytirish istiqbollari mavjud boʻlgan davlatlar parlamentlari bilan yangi doʻstlik guruh (komissiya)larini tashkil etish boʻyicha takliflar ishlab chiqib, Oliy Majlis palatalariga taqdim etsin;
Yevropada xavfsizlik va hamkorlik tashkiloti Parlament assambleyasining sessiyalaridan birini Oʻzbekistonda oʻtkazish masalasini oʻrganib, Oliy Majlis palatalariga takliflar kiritsin.
4. Parlamentlararo ittifoqdagi Oliy Majlisning doimiy delegatsiyasi aʼzolari:
Parlamentlararo ittifoq Assambleyasi doirasida oʻtkaziladigan barcha tadbirlarda maʼruzalar bilan ishtirok etib, Oʻzbekistonda olib borilayotgan islohotlar mazmun-mohiyatini dunyo hamjamiyatiga yetkazib borsin;
2025-2026-yillarda qabul qilinishi rejalashtirilgan Parlamentlararo ittifoqning rezolyutsiyalari yuzasidan Oʻzbekiston Respublikasi Prezidenti tashabbuslaridan kelib chiqib, Oliy Majlis pozitsiyasini shakllantirsin va ularni ilgari surish choralarini koʻrsin;
Parlamentlararo ittifoq qoʻmitalari va guruhlaridagi vakant oʻrinlar hamda aʼzo davlatlar uchun mavjud imkoniyatlarni monitoring qilib borsin, Oliy Majlis palatalari aʼzolarini tashkilotning tegishli qoʻmitalari va guruhlariga kiritish yuzasidan takliflar ishlab chiqsin.
5. Oʻzbekiston Respublikasi Adliya vazirligi 2025-yil noyabrga qadar Parlamentlararo ittifoq tomonidan qabul qilingan rezolyutsiyalarni milliy qonunchilikka muvofiqligi nuqtai nazaridan huquqiy ekspertizadan oʻtkazsin hamda ularni implementatsiya qilishga qaratilgan amaliy chora-tadbirlarni amalga oshirsin.
6. Oʻzbekiston Respublikasi Oila va xotin-qizlar qoʻmitasi bir oy muddatda Parlamentlararo ittifoq assambleyasi doirasida Parlament ayol aʼzolari forumida ilgari surilgan “Gender tenglikka erishamiz: harakatlar ketidan harakatlar!” kampaniyasi boʻyicha belgilangan maqsadlarni amalga oshirish yuzasidan “yoʻl xaritasi” ishlab chiqsin.
7. Oʻzbekiston Respublikasi Yoshlar ishlari agentligi 2025-yil sentabrga qadar 2026-yilda Samarqand shahrida Parlamentlararo ittifoqning XII Yoshlar parlamentlari global forumini tashkil etish va oʻtkazish boʻyicha Oʻzbekiston Respublikasi Prezidenti qarori loyihasini ishlab chiqsin.
8. Ushbu Qoʻshma qarorning ijrosini nazorat qilish Oliy Majlis Senati Raisining birinchi oʻrinbosari S. Safoyev va Qonunchilik palatasi Spikerining oʻrinbosari R. Xakimov zimmasiga yuklatilsin.
Oʻzbekiston Respublikasi Oliy Majlisi Qonunchilik palatasining Spikeri N. ISMOILOV
Toshkent sh.,
2025-yil 29-may,
922-V-son
Oʻzbekiston Respublikasi Oliy Majlisi Senatining Raisi T. NARBAYEVA
Toshkent sh.,
2025-yil 29-may,
KQ-192-V-son
Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2025-yil 29-maydagi 922-V/KQ-192-V-sonli Qoʻshma qaroriga ILOVA
2025-yil 5 — 9-aprel kunlari Toshkentda boʻlib oʻtgan Parlamentlararo ittifoqning 150-yubiley assambleyasi doirasida ilgari surilgan taklif va tashabbuslarni hamda erishilgan kelishuvlarni 2025-2026-yillarda amalga oshirish boʻyicha
KOMPLEKS CHORA-TADBIRLAR REJASI (“YOʻL XARITASI”)