Kadrlarni davlat grantlari asosida maqsadli tayyorlash tartibi toʻgʻrisida nizomni tasdiqlash haqida (1506-son)

06.08.2005

OʻZBEKISTON RESPUBLIKASI IQTISODIYOT VAZIRLIGI OʻZBEKISTON RESPUBLIKASI OLIY VA OʻRTA MAXSUS TAʼLIM VAZIRLIGI OʻZBEKISTON RESPUBLIKASI XALQ TAʼLIMI VAZIRLIGI OʻZBEKISTON RESPUBLIKASI MEHNAT VA AhOLINI IJTIMOIY MUHOFAZA QILISH VAZIRLIGINING

Qarori

[Oʻzbekiston Respublikasi Adliya vazirligi tomonidan 2005-yil 6-avgustda 1506-son bilan davlat roʻyxatidan oʻtkazildi]

Oʻzbekiston Respublikasi Prezidentining 2005-yil 2-iyundagi “2005/2006 oʻquv yilida Oʻzbekiston Respublikasi oliy taʼlim muassasalariga qabul toʻgʻrisida”gi PQ-92-son qarorining 6-bandini bajarish maqsadida qaror qilamiz:

1. “Kadrlarni davlat grantlari asosida maqsadli tayyorlash tartibi toʻgʻrisida nizom” ilovaga muvofiq tasdiqlansin.

2. Mazkur Nizom Oʻzbekiston Respublikasi Adliya vazirligi tomonidan davlat roʻyxatidan oʻtkazilgandan oʻn kundan soʻng kuchga kiradi.

Iqtisodiyot vaziri R. AZIMOV

Toshkent sh.,

2005-yil 7-iyul,

58-son

Oliy va oʻrta maxsus taʼlim vaziri R. QOSIMOV

Toshkent sh.,

2005-yil 7-iyul,

154-1-son

Xalq taʼlimi vaziri T. JOʻRAYEV

Toshkent sh.,

2005-yil 7-iyul,

19-son

Mehnat va aholini ijtimoiy muhofaza qilish vaziri v.b. A. AKBAROV

Toshkent sh.,

2005-yil 7-iyul,

02/2658-son

Iqtisodiyot vazirligi, Oliy va oʻrta maxsus taʼlim vazirligi, Xalq taʼlimi vazirligi, Mehnat va aholini ijtimoiy muhofaza qilish vazirligining 2005-yil 7-iyuldagi 58, 154-1, 19 va 02/2658-sonli qarori bilan TASDIQLANGAN

Kadrlarni davlat grantlari asosida maqsadli tayyorlash tartibi toʻgʻrisida

NIZOM

Mazkur Nizom Oʻzbekiston Respublikasi Prezidentining 2005-yil 2-iyundagi PQ-92-son “2005/2006 oʻquv yilida Oʻzbekiston Respublikasi oliy taʼlim muassasalariga qabul toʻgʻrisida”gi qarorining 6-bandiga muvofiq, oliy taʼlim muassasalarida davlat grantlari asosida maqsadli tayyorlangan kadrlarni kamida uch yil ishlab berish sharti bilan, taʼlim muassasalari, korxona va tashkilotlarga ishga taqsimlash qoidalari va tartibini belgilaydi.

I. Umumiy qoidalar

1. Barcha taʼlim yoʻnalishlari boʻyicha davlat grantlari asosida tahsil olgan oliy taʼlim muassasalari bakalavr va magistrlari (keyingi oʻrinlarda matnda bitiruvchilar deb yuritiladi) 2005/2006 oʻquv yilidan boshlab majburiy tartibda kamida uch yil ishlab berish sharti bilan taʼlim muassasalariga, korxona va tashkilotlarga (keyingi oʻrinlarda matnda ish beruvchi deb yuritiladi) ishga taqsimlanadi.

2. Oliy taʼlim muassasalarini davlat grantlari asosida bakalavriatni tamomlagan bitiruvchilar magistraturaga toʻlov-kontrakt asosida oʻqishga qabul qilingan taqdirda, kamida uch yil ishlab berish majburiyati magistraturani yakunlagandan soʻng ushbu Nizom talablari asosida amalga oshiriladi.

3. Agar bitiruvchi oliy taʼlim muassasalarining bakalavriati va magistraturasida davlat grantlari asosida oʻqigan taqdirda, uning ishlab berish majburiyati kamida uch yil deb hisoblanadi.

4. Oliy taʼlim muassasalarini toʻlov-kontrakt asosida bakalavriatni tamomlagan bitiruvchilar magistraturaga davlat grantlari asosida oʻqishga qabul qilingan taqdirda kamida uch yil ishlab berish majburiyati magistraturani yakunlagandan soʻng ushbu Nizom talablari asosida amalga oshiriladi.

5. Bitiruvchilarni egallagan taʼlim yoʻnalishi va kasbiy tayyorgarligiga koʻra taqsimlashni muvofiqlashtirish uchun tasarrufida oliy taʼlim muassasalari boʻlgan vazirlik, idoralar qoshida maxsus komissiyalar tuziladi.

II. Bitiruvchilarga boʻlgan ehtiyojni aniqlash va buyurtmalarni shakllantirish

6. Ish beruvchi kadrlarga boʻlgan ehtiyojni, mavjud boʻsh ish joylari haqidagi maʼlumotlarni har yili 1-aprelga qadar aniqlaydilar hamda maxsus komissiyaga ish joyi koʻrsatilgan holda, kafolatlangan talabnoma (buyurtma)ni taqdim etadilar.

7. Oʻz tasarrufida oliy taʼlim muassasalari boʻlgan vazirlik va idoralar oliy maʼlumotli kadrlarga boʻlgan ehtiyoj hamda ularga boʻlgan buyurtmalarni yoʻnalishlar boʻyicha umumlashtirib, oliy taʼlim muassasalari bitiruvchilari taqsimoti koʻrsatkichlarini shakllantiradi.

8. Maxsus komissiya tomonidan buyurtmalar asosida shakllantirilgan taqsimot koʻrsatkichlari tegishli oliy taʼlim muacsasalariga yuboriladi.

III. Bitiruvchilarni ishga taqsimlash tartibi

9. Oliy taʼlim muassasalarida bitiruvchilarni ishga taqsimlash ular oliy taʼlim muassasasini bitirishidan kamida 1 oy oldin oʻtkaziladi.

10. Bitiruvchilarning taqsimoti oliy taʼlim muassasasi rektori tasdiqlagan oliy taʼlim muassasasining taqsimot komissiyasi (keyingi oʻrinlarda matnda taqsimot komissiya deb yuritiladi) tomonidan oʻtkaziladi. Taqsimot komissiya tarkibiga: oliy taʼlim muassasasi rektori - komissiya raisi, fakultet dekani, kafedra mudirlari hamda manfaatdor vazirlik va idoralar, ish beruvchilar vakillari aʼzo qilib kiritiladi.

11. Oliy taʼlim muassasasi bitiruvchilarni ishga taqsimlanish jarayonidan oldin bitiruvchilardan qayerda ishlashni xohlashi toʻgʻrisida soʻrov-anketalari toʻldirib olinadi.

12. Oliy taʼlim muassasasi taqsimot komissiyasi:

a) bitiruvchilarni oliy taʼlim muassasasida egallagan taʼlim yoʻnalishlari va malakasiga, kadrlarga boʻlgan buyurtmaga asosan hamda ularning reytingi, oilaviy sharoiti, yashash joyi va taklif etilayotgan ish joylarida ishlash istagini hisobga olgan holda ishga taqsimlaydi;

b) har bir bitiruvchini taklif qilinayotgan ish joyi, mehnat va maishiy sharoitlar, lavozimi, ish haqi miqdori toʻgʻrisidagi va boshqa zarur maʼlumotlar bilan tanishtiradi;

v) majlis bayonnomasi va bitiruvchilar shaxsiy taqsimoti qaydnomasini yuritadi (1-ilova).

13. Yuqori reyting toʻplagan bitiruvchilar birinchilar qatorida mavjud boʻlgan ish joylariga oʻzlarining ixtiyori bilan joylashish huquqiga ega boʻladilar.

14. Oliy taʼlim muassasalarida oʻz hisobidan toʻlov-kontrakt boʻyicha taʼlim olgan bitiruvchilar oʻz ixtiyori bilan taqsimot komissiyasida ishtirok etishi va uning roziligi asosida komissiya qarori bilan taklif etilayotgan ish joylariga ishga yuborilishi mumkin.

15. Agar taqsimot komissiyasi bitiruvchini ish bilan taʼminlay olmasa, unga mustaqil ishga joylashish imkoniyati berilganligi toʻgʻrisida maʼlumotnoma (2-ilova) taqdim etadi.

16. Taqsimot komissiyasi ishini tugatgandan soʻng bitiruvchilarni ularning salomatligi, oilaviy sharoiti oʻzgarishi asosida qayta taqsimlash masalasi oliy taʼlim muassasalarining taqsimot komissiyalari tomonidan koʻrib chiqilishi mumkin.

17. Oliy taʼlim muassasasi taqsimot komissiyasi ishi tugagandan soʻng bir haftadan, biroq bitiruvchi oʻqishni tugatgan kundan soʻng uch kundan kechiktirmay, ishga yuborilayotgan har bir bitiruvchiga quyidagi hujjatlarni beradi:

oliy maʼlumot toʻgʻrisidagi diplomdan koʻchirma;

ishga yuborilganlik toʻgʻrisidagi yoʻllanma (3-ilova);

taqsimot komissiyasi qaroridan va taqsimot roʻyxatidan koʻchirma.

Mustaqil ishga joylashish imkoniyati berilgan bitiruvchilarga mazkur bandda nazarda tutilgan muddatlarda mustaqil ishga joylashish imkoniyati berilganligi toʻgʻrisida maʼlumotnoma va oliy maʼlumot toʻgʻrisidagi diplomning asl nusxasi beriladi.

Oliy taʼlim muassasasi rektori mazkur bandda koʻrsatilgan hujjatlarni bitiruvchiga oʻz vaqtida berilishiga shaxsan javobgardir. Bitiruvchiga belgilangan nusxadagi yoʻllanma oʻrniga boshqa hujjatlar berilishiga ruxsat etilmaydi.

18. Bitiruvchi mazkur Nizom talablari asosida taqsimot boʻyicha uch yil ishlab bergandan keyin unga oliy taʼlim muassasasi tomonidan bir hafta muddatda mehnat daftarchasiga muvofiq diplomning asl nusxasi beriladi.

IV. Taqsimot asosida yuborilgan bitiruvchilarni ishga qabul qilish va ularning mehnati

19. Bitiruvchilar oʻqishni tamomlagandan soʻng koʻpi bilan uch oygacha boʻlgan muddatda ish joyiga yetib kelishlari va ish boshlashlari lozim.

20. Ish beruvchi ish joyiga yetib kelgan bitiruvchi tomonidan taqdim etilgan yoʻllanmani tasdiqlaydi va oʻn kun muddat ichida yoʻllanmani tegishli oliy taʼlim muassasasiga yuboradi.

21. Ish beruvchi oliy taʼlim muassasasi bitiruvchilari bilan oʻrnatilgan tartibda ishga yuborilganlik toʻgʻrisidagi yoʻllanmaga muvofiq mehnat shartnomasi tuzadi.

Tanlov asosida ishga qabul qilinadigan lavozimlarga bitiruvchilar yoʻllanma asosida tanlovsiz qabul qilinadi.

22. Bitiruvchi tomonidan majburiy ishlab berilishi lozim boʻlgan uch yillik muddatga quyidagi muddatlar ham kiradi:

taʼlim muassasasi, korxona yoki tashkilotda turli lavozimlarda ishlagan muddat;

taʼlim muassasasi, korxonasi yoki tashkilot mansub boʻlgan tizimdagi (vazirlik, idora yoki boshqa xoʻjalik boshqaruvi organi) boshqa taʼlim muassasalarida, korxona va tashkilotlarda ish beruvchining roziligiga koʻra ishlagan muddat;

mehnat taʼtilida, shu jumladan ijtimoiy taʼtillarda boʻlgan muddat;

muddatli harbiy xizmat yoki safarbarlik chaqiruvi rezervidagi harbiy xizmat oʻtalgan muddat.

23. Bitiruvchi uch yil majburiy ishlagandan soʻng shu ish beruvchida ishni davom ettirish masalasi ish beruvchi va xodimning oʻzaro kelishuviga muvofiq mehnat qonunchiligi asosida hal etiladi.

V. Bitiruvchilarga beriladigan imtiyozlar

24. Ishga taqsimlangan bitiruvchi taʼlim muassasalari, korxona va tashkilotlarga ishga joylashgach, ish beruvchi unga mehnat qilishi uchun shart-sharoitlarni yaratadi, uy-joy bilan taʼminlash choralarini koʻradi.

25. Ish beruvchi yosh mutaxassislarning mehnatini ragʻbatlantirish va ularning lavozimlarini oshirish choralarini koʻradi, ularga ilmiy ish bilan shugʻullanish uchun imkoniyat yaratadi.

26. Oliy taʼlim muassasalarini tugatgan va ishga yuborilgan bitiruvchi taqsimot komissiyasi qaroridan norozi boʻlgan taqdirda oliy taʼlim muassasasi boʻysunadigan tegishli vazirlik yoki idoraga yoxud sudga murojaat etish huquqiga ega.

VI. Yakuniy qoidalar

27. 2005/2006 oʻquv yilidan boshlab, har oʻquv yilining boshida, yaʼni sentabr oyida, oliy taʼlim muassasalariga bakalavriat va magistratura boʻyicha davlat grantlari asosida qabul qilingan talabalar bilan oliy taʼlim muassasasi oʻrtasida oʻqishni tamomlagandan soʻng taʼlim muassasalari, korxona va tashkilotlarda kamida uch yil ishlab berish toʻgʻrisida shartnoma tuzilishi lozim.

Bitiruvchi uzrsiz sabablarga koʻra taqsimlangan joyda ishlashni xohlamasa, unga nisbatan amaldagi qonunchilik asosida choralar koʻriladi.

28. Ushbu Nizom Oʻzbekiston Respublikasi Sogʻliqni saqlash vazirligi, Madaniyat va sport ishlari vazirligi, Qishloq va suv xoʻjaligi vazirligi, Oʻzbekiston Respublikasi Badiiy akademiyasi, “Oʻzbekiston temir yoʻllari” DAK, Oʻzbekiston aloqa va axborotlashtirish agentligi va Oʻzbekiston kasaba uyushmalari Federatsiyasi bilan kelishilgan.

Sogʻliqni saqlash vaziri F. NAZIROV

Toshkent sh.,

2005-yil 4-iyul

Madaniyat va sport ishlari vaziri A. AZIZXOʻJAYEV

Toshkent sh.,

2005-yil 4-iyul

Qishloq va suv xoʻjaligi vaziri S. ISMOILOV

Toshkent sh.,

2005-yil 4-iyul

Badiiy akademiya raisi T. QOʻZIYEV

Toshkent sh.,

2005-yil 4-iyul

“Oʻzbekiston temir yoʻllari” DAK raisi O. RAMATOV

Toshkent sh.,

2005-yil 4-iyul

Oʻzbekiston aloqa va axborotlashtirish agentligi Bosh direktori A. ARIPOV

Toshkent sh.,

2005-yil 4-iyul

Oʻzbekiston kasaba uyushmalari Federatsiyasi Kengashining raisi D. JAHONGIROVA

Toshkent sh.,

2005-yil 4-iyul

Kadrlarni davlat grantlari asosida maqsadli tayyorlash tartibi toʻgʻrisidagi nizomga 1-ILOVA

(1-ilova Oʻzbekiston Respublikasi adliya vazirining 2026-yil 14-avgustdagi 28-mh-sonli buyrugʻi (roʻyxat raqami 3926, 14.08.2026-y.) tahririda — Qonunchilik maʼlumotlari milliy bazasi, 17.08.2026-y., 10/26/3926/0850-son)

Kadrlarni davlat grantlari asosida maqsadli tayyorlash tartibi toʻgʻrisidagi nizomga 2-ILOVA

Kadrlarni davlat grantlari asosida maqsadli tayyorlash tartibi toʻgʻrisidagi nizomga 3-ILOVA

(Oʻzbekiston Respublikasi Qonun hujjatlari toʻplami, 2005-y., 32-33-son, 258-modda; Qonunchilik maʼlumotlari milliy bazasi, 17.08.2026-y., 10/26/3926/0850-son)