Oʻzbekiston Respublikasi Oliy Majlisi Senati Kengashining 2022-yil 27-apreldagi “Yil ayoli” va “Gender tenglik faoli” milliy tanlovlarini oʻtkazish toʻgʻrisida”gi KQ-340-IV-sonli Qaroriga oʻzgartirish va qoʻshimchalar kiritish haqida (KQ-156-V-son)

16.04.2025

Oʻzbekiston Respublikasi Oliy Majlisi Senati Kengashining

qarori

Gender tenglikni taʼminlash borasida olib borilayotgan islohotlarni keng targʻib qilish va jamoatchilikka yetkazish, tashkilotlar faoliyatiga gender yondashuvlarni joriy etish, gender tenglikni taʼminlash sohasida yuqori natijalarga erishgan, jamiyat rivoji yoʻlida tashabbus koʻrsatayotgan, xotin-qizlar huquqlarini himoya qilish, tegishli yoʻnalishlarda dolzarb vazifalarni amalga oshirayotgan tashkilotlar saʼy-harakatlarini eʼtirof etish maqsadida “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 16-moddasiga asosan Oʻzbekiston Respublikasi Oliy Majlisi Senatining Kengashi qaror qiladi:

1. “Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizom 1-ilovaga muvofiq, “Gender tenglik faoli” milliy koʻrik-tanlovini tashkil etish va oʻtkazish boʻyicha Respublika komissiyasi tarkibi 2-ilovaga muvofiq tasdiqlansin.

2. Oʻzbekiston Respublikasi Oliy Majlisi Senati Kengashining 2022-yil 27-apreldagi “Yil ayoli” va “Gender tenglik faoli” milliy tanlovlarini oʻtkazish toʻgʻrisida”gi KQ-340-IV-sonli Qaroriga 3-ilovaga muvofiq oʻzgartirish va qoʻshimchalar kiritilsin.

3. Mazkur Qaror ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

4. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2025-yil 16-aprel,

KQ-156-V-son

Oʻzbekiston Respublikasi Oliy Majlisi Senati Kengashining 2025-yil 16-apreldagi KQ-156-V-sonli qaroriga 1-ILOVA

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi

NIZOM

1-bob. Umumiy qoidalar

1. Ushbu Nizom “Gender tenglik faoli” milliy tanlovini (keyingi oʻrinlarda tanlov deb yuritiladi) tashkil etish va oʻtkazish tartibini belgilaydi.

2. Xotin-qizlarning jamiyatdagi rolini oshirish, gender tenglik va oila masalalari boʻyicha respublika komissiyasi, Oʻzbekiston Respublikasi Oliy Majlisi Senatining Yoshlar, xotin-qizlar, madaniyat va sport masalalari qoʻmitasi, Oʻzbekiston Respublikasi Oila va xotin-qizlar qoʻmitasi tanlov tashkilotchilari hisoblanadi.

3. Tanlov respublika ijro etuvchi hokimiyat organlari hamda ularning hududiy va tuman (shahar) boʻlinmalari, hokimliklar, nodavlat notijorat tashkilotlari, tadbirkorlik subyektlari hamda ommaviy axborot vositalari (keyingi oʻrinlarda tanlov ishtirokchilari deb yuritiladi) oʻrtasida oʻtkaziladi.

4. Tanlovga Xotin-qizlarning jamiyatdagi rolini oshirish, gender tenglik va oila masalalari boʻyicha respublika komissiyasi rahbarlik qiladi. Oʻzbekiston Respublikasi Oila va xotin-qizlar qoʻmitasi tanlovning ishchi organi (keyingi oʻrinlarda Ishchi organ deb yuritiladi) hisoblanadi.

2-bob. Tanlovning maqsadi

5. Tanlovni oʻtkazishdan koʻzlangan maqsad quyidagilardan iborat:

har bir tashkilotda gender tenglikni taʼminlashga qaratilgan siyosatni shakllantirish;

gender tenglikka erishish masalalariga jamoatchilik eʼtiborini keng jalb etish va xabardorlikni oshirish;

xotin-qizlar va erkaklar oʻrtasida teng huquq hamda imkoniyatlarni taʼminlashga hissa qoʻshgan tashkilotlarni aniqlash va ragʻbatlantirish, ularning yutuqlarini eʼtirof etish hamda ilgʻor tajribasini ommalashtirish;

xotin-qizlar va erkaklar uchun davlat hamda jamiyat hayotining turli sohalarida teng huquq hamda imkoniyatlar taʼminlanishiga erishish.

3-bob. Tanlov komissiyalari va ularning vazifalari

6. Tanlov ishtirokchilarining hujjatlarini koʻrib chiqish, baholash va gʻoliblarni aniqlash maqsadida Respublika, hududiy va tuman (shahar) tanlov komissiyalari (keyingi oʻrinlarda tanlov komissiyalari deb yuritiladi) tuziladi.

7. Respublika tanlov komissiyasi tarkibi Senat Kengashi tomonidan, hududiy va tuman (shahar) tanlov komissiyalari tarkibi Ishchi organning hududiy boshqarmalari hamda tuman (shahar) boʻlimlari tomonidan tasdiqlanadi.

Tanlov komissiyalari tarkibi Qoraqalpogʻiston Respublikasi Joʻqorgʻi Kengesi, viloyatlar, tumanlar va shaharlar xalq deputatlari Kengashlari deputatlari, respublika ijro etuvchi hokimiyat organlari, ularning hududiy va tuman (shahar) boʻlinmalari, jamoat va nodavlat notijorat tashkilotlari, ilmiy muassasalar, fuqarolik jamiyati institutlari hamda ommaviy axborot vositalarining vakillaridan shakllantiriladi.

8. Tanlov komissiyalarining vazifalari quyidagilardan iborat:

tanlovning adolatli, xolis va shaffof oʻtkazilishini taʼminlash;

tanlov mezonlariga muvofiq tanlov ishtirokchilarini baholash va gʻoliblarni aniqlash;

zaruratga koʻra tanlov ishtirokchilarining faoliyatini joyiga chiqib oʻrganish;

tanlov natijalarini rasmiylashtirish;

tanlov bilan bogʻliq shikoyat va murojaatlarni koʻrib chiqish;

tanlovga doir targʻibot va tushuntirish ishlarini tashkil etish.

9. Tanlov komissiyalarining qarorlari ularning yigʻilish bayonlari bilan tasdiqlanadi.

4-bob. Tanlovni oʻtkazish tartibi

10. Tanlov har yili avgust — dekabr oylarida quyidagi bosqichlarda oʻtkaziladi:

birinchi bosqich — avgust oyida tuman va shaharlar miqyosida;

ikkinchi bosqich — oktabr oyida birinchi bosqich gʻoliblari hamda hududiy tashkilotlar oʻrtasida Qoraqalpogʻiston Respublikasi, viloyatlar va Toshkent shahri miqyosida;

uchinchi bosqich — dekabr oyida ikkinchi bosqich gʻoliblari hamda respublika tashkilotlari oʻrtasida respublika miqyosida.

11. Tanlov quyidagi nominatsiyalar boʻyicha oʻtkaziladi:

“Gender tenglikni taʼminlashda eng faol hududiy tashkilot”;

“Gender tenglikni taʼminlashda eng faol respublika tashkiloti”;

“Gender tenglikni taʼminlashda eng faol hokimlik”;

“Gender tenglikni taʼminlashda eng faol nodavlat notijorat tashkiloti”;

“Gender tenglikni taʼminlashda eng faol tadbirkorlik subyekti”;

“Gender tenglikni targʻib qilishda eng faol teleradiokanal”;

“Gender tenglikni targʻib qilishda eng faol bosma nashr”;

“Gender tenglikni targʻib qilishda eng faol internet nashri”.

12. Tanlov ishtirokchilari nominatsiyalardan kelib chiqqan holda tanlovda qatnashadi va ular ushbu Nizomning 1 — 7-ilovalaridagi baholash mezonlariga muvofiq baholanadi.

5-bob. Tanlov komissiyalariga hujjatlarni taqdim etish tartibi

13. Tanlov tashkilotchilari tanlov oʻtkazilishi haqida ommaviy axborot vositalarida va ijtimoiy tarmoqlarda eʼlon beradi.

14. Tanlov ishtirokchilari tanlovda qatnashish uchun tegishli tanlov komissiyalari nomiga ushbu Nizomning 1 — 7-ilovalaridagi baholash mezonlari boʻyicha materiallarni ilova qilgan holda maxsus elektron manzil orqali ariza taqdim etadi. Belgilangan muddatdan keyin topshirilgan arizalar qabul qilinmaydi.

15. Ariza taqdim etgan barcha tanlov ishtirokchilari haqidagi materiallar Ishchi organ va uning hududiy, tuman (shahar) boʻlinmalari tomonidan umumlashtirilib, tanlov komissiyalariga yuboriladi.

16. Tanlov tashkilotchilari taqdim etilgan materiallarni ommaviy axborot vositalari va ijtimoiy tarmoqlarda joylashtirishi mumkin.

17. Tanlovda ishtirok uchun taqdim etilgan materiallar qaytarib berilmaydi.

6-bob. Tanlov gʻoliblarini taqdirlash

18. Har bir nominatsiya boʻyicha bittadan gʻolib aniqlanadi. Agar tanlov ishtirokchilarining natijalari teng boʻlgan taqdirda bir nechta tanlov ishtirokchilari nominatsiya gʻolibi deb eʼtirof etilishi mumkin.

19. Baholash mezonlariga muvofiq nomzodlar aniqlanmagan taqdirda tegishli nominatsiya boʻyicha gʻoliblar belgilanmaydi.

20. Tanlov gʻoliblari tegishli nominatsiya boʻyicha diplom, statuetka hamda sovgʻalar bilan taqdirlanadi.

21. Tanlov gʻoliblariga taqdim etiladigan sovgʻalarning miqdori Xotin-qizlarning jamiyatdagi rolini oshirish, gender tenglik va oila masalalari boʻyicha respublika komissiyasi raisi bilan kelishiladi.

7-bob. Tanlovni moliyalashtirish manbalari

22. Qoraqalpogʻiston Respublikasi Vazirlar Kengashi hamda viloyatlar va Toshkent shahar hokimliklari tanlovning tuman (shahar) va hududiy bosqichlari gʻoliblarini mahalliy budjetning qoʻshimcha manbasi mablagʻlari va homiylik mablagʻlari hisobidan moliyalashtirilishini taʼminlaydi.

Respublika bosqichi uchun talab etiladigan zarur mablagʻlar Oʻzbekiston Respublikasi respublika budjeti (shu jumladan respublika budjeti qoʻshimcha manbalari) hisobidan ajratiladi.

23. Respublika ijro etuvchi hokimiyat organlari, korxona, muassasa va tashkilotlar, jismoniy shaxslar, shuningdek, xalqaro tashkilotlar qonunchilikda belgilangan tartibda tanlovni tashkil etish va oʻtkazishda homiylik qilishi mumkin.

8-bob. Yakunlovchi qoidalar

24. Tanlov natijalaridan norozi boʻlgan tanlov ishtirokchilari tanlov natijalari eʼlon qilingan kundan boshlab uch ish kuni davomida tegishli komissiyalarga apellyatsiya arizasini berish huquqiga ega.

25. Apellyatsiya arizasi besh ish kunida koʻrib chiqilib, natijasi boʻyicha arizani qanoatlantirish yoki rad etish toʻgʻrisida qaror qabul qilinadi va qaror tanlov ishtirokchisiga yuboriladi.

26. Mazkur Nizom talablarining buzilishida aybdor shaxslar qonunchilikda belgilangan tartibda javobgarlikka tortiladi.

27. Ushbu Nizomga oʻzgartirish va qoʻshimchalar Oʻzbekiston Respublikasi Oliy Majlisi Senati Kengashining tegishli qarori bilan kiritiladi.

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga 1-ILOVA

“Gender tenglikni taʼminlashda eng faol hududiy tashkilot” va “Gender tenglikni taʼminlashda eng faol respublika tashkiloti” nominatsiyalari boʻyicha ishtirokchilarni baholashga doir mezonlar

1. Tashkilotda xotin-qizlar va erkaklar uchun teng huquq hamda imkoniyatlarni taʼminlash masalalari boʻyicha maslahat-kengash faoliyatining yoʻlga qoʻyilganligi va faoliyatining natijadorligi.

2. Tashkilotda gender tenglik boʻyicha amalga oshirilgan ishlar va loyihalarning ijtimoiy ahamiyati hamda oʻziga xosligi.

3. Ishga qabul qilishda xotin-qizlar va erkaklar uchun teng imkoniyatlar yaratilganligi.

4. Xotin-qizlar va erkaklarning sogʻligʻini saqlashni taʼminlaydigan, xavfsiz mehnat sharoitlari yaratilganligi.

5. Tashkilot rasmiy veb-saytida gender tenglik sahifasining mavjudligi va materiallar bilan yangilab borilganligi.

6. Tashkilot tomonidan gender tenglik boʻyicha oʻtkazilgan mahalliy va xalqaro tadbirlar.

7. Tashkilotda gender tenglik bilan bogʻliq statistik maʼlumotlar va infografikalarning mavjudligi.

8. Xodimlar kasbiy mahoratlarini oshirib borishlari uchun yaratilgan shart-sharoitlar.

9. Tashkilotning oʻz yoʻnalishidan kelib chiqib, xotin-qizlar va erkaklarning huquqlarini himoya qilish borasida amalga oshirgan ishlar.

10. Ijtimoiy himoyaga muhtoj va ogʻir turmush sharoitida yashayotgan xotin-qizlar va erkaklarni qoʻllab-quvvatlash borasida amalga oshirilgan ishlar.

Izoh: yuqoridagi mezonlar respublika darajasidagi tashkilotlar uchun qoʻllanilganda tizim tashkilotlaridagi faoliyat ham inobatga olinadi.

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga 2-ILOVA

“Gender tenglikni taʼminlashda eng faol hokimlik” nominatsiyasi boʻyicha ishtirokchilarni baholashga doir mezonlar

1. Hokimlik tizimidagi rahbar va xodimlar soniga nisbatan gender tenglik taʼminlanganligi.

2. Viloyat, tuman va shahar miqyosida rahbarlik lavozimida ishlayotgan xotin-qizlar koʻrsatkichi (foizi).

3. Xotin-qizlarning ijtimoiy qoʻllab-quvvatlanganligi va ularga moddiy yordam koʻrsatilganligi.

4. Xotin-qizlar va erkaklar uchun kasbiy qayta tayyorlash va malakasini oshirishda teng imkoniyatlar yaratilganligi.

5. Barcha tashkilot va idoralarda ishga kirish va ishdan boʻshatishda gender tenglik bilan bogʻliq qonun buzilishi holatlarining mavjud emasligi.

6. Jamoa shartnomalari va kelishuvlarida xotin-qizlar va erkaklar teng huquqlarini taʼminlash va ijtimoiy himoya qilish qoidalarining aks ettirilganligi.

7. Gender tenglik boʻyicha aholi xabardorligini oshirishga qaratilgan targʻibot-tashviqot ishlari olib borilganligi.

8. Hokimlik tizimlarida xotin-qizlar va erkaklar uchun teng huquq hamda imkoniyatlarni taʼminlash masalalari boʻyicha maslahat-kengashlar tashkil etilganligi va faoliyatining natijadorligi.

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga 3-ILOVA

“Gender tenglikni taʼminlashda eng faol nodavlat notijorat tashkiloti” nominatsiyasi boʻyicha ishtirokchilarni baholashga doir mezonlar

1. Xotin-qizlarni ijtimoiy-huquqiy jihatdan qoʻllab-quvvatlash, onalik, otalik va bolalikni himoya qilish tizimini takomillashtirishga, erkaklar bilan teng ravishda xotin-qizlarning ijtimoiy hamda ijtimoiy-siyosiy faolligini oshirishga doir loyiha va chora-tadbirlarni amalga oshirishda ishtirok etganligi.

2. Xotin-qizlar va erkaklar uchun bandlik sohasida teng huquq hamda imkoniyatlarni taʼminlashga, oilalar uchun ijtimoiy xizmatlar tarmogʻini yaratishga koʻmaklashilgani.

3. Xotin-qizlar va erkaklar uchun teng huquq hamda imkoniyatlarni taʼminlash sohasidagi davlat organlarining qarorlarini, davlat dasturlarini, milliy harakatlar rejalarini hamda strategiyalarni ishlab chiqish va amalga oshirishda ishtiroki.

4. Xotin-qizlar va erkaklar uchun teng huquq hamda imkoniyatlarni taʼminlash masalalari boʻyicha davlat organlari, ommaviy axborot vositalari, ilmiy muassasalar va taʼlim muassasalari hamda boshqa tashkilotlar bilan hamkorligi.

5. Xotin-qizlar va erkaklar uchun teng huquq hamda imkoniyatlar madaniyatini shakllantirishga qaratilgan oʻquv, axborot-maʼrifiy tadbirlarining amalga oshirganligi.

6. Xotin-qizlar va erkaklar uchun teng huquq hamda imkoniyatlarni taʼminlashga qaratilgan tadbirlarni oʻtkazishda davlat organlariga koʻmaklashganligi.

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga 4-ILOVA

“Gender tenglikni taʼminlashda eng faol tadbirkorlik subyekti” nominatsiyasi boʻyicha ishtirokchilarni baholashga doir mezonlar

1. Maslahat-kengash faoliyati yoʻlga qoʻyilganligini va uning samaradorligi.

2. Jamoa shartnomalari va kelishuvlarida, xodimlarni ijtimoiy himoya qilish choralarini amalga oshirishda xotin-qizlar va erkaklarning huquqlarini teng darajada taʼminlaydigan qoidalar aks ettirilganligi.

3. Ishga qabul qilishda xotin-qizlar va erkaklar uchun teng imkoniyatlar yaratilganligi.

4. Turli lavozimlarda ishlayotgan xotin-qizlar va erkaklar sonining nisbati.

5. Lavozim koʻtarilishida, rahbarlik lavozimlarini egallash uchun tanlovda xotin-qizlar va erkaklar uchun teng huquq hamda imkoniyatlar yaratilganligi hamda qayta tayyorlash va malaka oshirishda teng imkoniyatlar yaratilganligi.

6. Xotin-qizlar va erkaklar mehnatiga haq toʻlashda tengsizlik mavjud emasligi hamda ular ishining sifatini baholashda teng yondashuv yaratilganligi.

7. Oilani ijtimoiy himoya qilish hamda qoʻllab-quvvatlash boʻyicha bolali ayollar va erkaklar foydalana oladigan amaliyotni joriy etish va rivojlantirish, homilador hamda emizikli onalar uchun qulay mehnat sharoitlari yaratilganlik holati.

8. Xotin-qizlar va erkaklarning hayot faoliyatini hamda sogʻligʻini saqlashni taʼminlaydigan xavfsiz mehnat sharoitlari yaratilganligi.

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga 5-ILOVA

“Gender tenglikni targʻib qilishda eng faol teleradiokanal” nominatsiyasi boʻyicha ishtirokchilarni baholashga doir mezonlar

1. Teleradiokanal tomonidan gender tenglik, xotin-qizlar huquqlari va imkoniyatlari mavzusida tayyorlangan maxsus koʻrsatuv, eshittirish, reportaj va boshqa media mahsulotlar hamda ularning efir vaqtidagi ulushi.

2. Materiallarning dolzarbligi, tahliliy yondashuv mavjudligi, xolislik, jurnalistik standartlarga rioya qilinishi, ekspertlar ishtirokining taʼminlanganligi.

3. Koʻrsatuv va eshittirishlarning tomoshabin va tinglovchilar orasidagi qamrov darajasi, ijtimoiy fikrga taʼsiri, auditoriya faolligi (fikrlar, mulohazalar, muhokamalar).

4. Gender tenglikni targʻib qilishga qaratilgan milliy va xalqaro targʻibot kampaniyalarida (aksiya va loyihalarda) ishtirok etilganligi.

5. Tegishli davlat organlari, nodavlat notijorat tashkilotlar, xalqaro tashkilotlar bilan hamkorlikda loyiha va koʻrsatuvlar tayyorlanganligi.

6. Muayyan materiallar, koʻrsatuv yoki chiqish natijasida ijtimoiy fikrning shakllanishiga yoki muammolarning hal etilishiga taʼsir darajasi.

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga 6-ILOVA

“Gender tenglikni targʻib qilishda eng faol bosma nashr” nominatsiyasi boʻyicha ishtirokchilarni baholashga doir mezonlar

1. Bosma nashrda xotin-qizlar huquqlari, gender tenglik va teng imkoniyatlar mavzusida maqola, intervyu va boshqa tahliliy materiallar chop etilganligi.

2. Maqolalarning dolzarbligi, muammolarning chuqur tahlil qilinganligi, xolislik, dalillarga asoslanganligi va jurnalistik standartlarga muvofiqligi.

3. Materiallarda soha mutaxassislari, huquqshunoslar, olimlar, psixologlar fikrlari va izohlaridan samarali foydalanilganligi.

4. Jamiyatdagi salbiy stereotiplarni yoʻqotish, tenglik gʻoyalarini shakllantirishga xizmat qiluvchi materiallar mavjudligi.

5. Xotin-qizlar, yoshlar, ijtimoiy himoyaga muhtoj qatlamlar muammolarining yoritilganligi va ularga yechim taklif etilganligi.

6. Tegishli davlat organlari, nodavlat notijorat tashkilotlar va xalqaro tashkilotlar bilan hamkorlikda materiallar tayyorlanganligi.

7. Materiallar orqali aholi xabardorligining oshirilganligi va jamoatchilikda ijobiy fikr shakllanishiga xizmat qilganligi.

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga 7-ILOVA

“Gender tenglikni targʻib qilishda eng faol internet nashri” nominatsiyasi boʻyicha ishtirokchilarni baholashga doir mezonlar

1. Internet nashrda xotin-qizlar huquqlari, gender tenglik va teng imkoniyatlar masalalariga oid maqola, yangilik, tahliliy materiallar berib borilganligi.

2. Materiallarning chuqur tahlilga asoslanganligi, xolisligi, ishonchli manbalarga tayanilganligi hamda jurnalistik standartlarga muvofiqligi.

3. Gender tenglikka oid voqea va jarayonlarning tezkor hamda doimiy ravishda yoritib borilganligi.

4. Obunachilar va ular tomonidan saytdagi materiallarning koʻrilganligi soni.

5. Kontentning ijtimoiy tarmoqlarda tarqalishi, yoqtirish, munosabat, izoh va repostlar soni.

6. Jamiyatdagi salbiy qarashlarni bartaraf etish, tenglik madaniyatini shakllantirishga xizmat qiluvchi kontentlar mavjudligi.

7. Izohlar, soʻrovnomalar, jonli muhokamalar, munosabatlar orqali oʻquvchilar bilan muloqot mexanizmining yoʻlga qoʻyilganligi.

8. Tegishli tashkilotlar bilan hamkorlikda loyihalar, materiallar va axborot kampaniyalarini amalga oshirganligi.

Oʻzbekiston Respublikasi Oliy Majlisi Senati Kengashining 2025-yil 16-apreldagi KQ-156-V-sonli qaroriga 2-ILOVA

“Gender tenglik faoli” milliy koʻrik-tanlovini tashkil etish va oʻtkazish boʻyicha Respublika komissiyasi

TARKIBI

Izoh: Komissiyaning aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan shaxslar kiritiladi.

Oʻzbekiston Respublikasi Oliy Majlisi Senati Kengashining 2025-yil 16-apreldagi KQ-156-V-sonli qaroriga 3-ILOVA

Oʻzbekiston Respublikasi Oliy Majlisi Senati Kengashining 2022-yil 27-apreldagi “Yil ayoli” va “Gender tenglik faoli” milliy tanlovlarini oʻtkazish toʻgʻrisida”gi KQ-340-IV-sonli Qaroriga kiritilayotgan oʻzgartishlar

Oʻzbekiston Respublikasi Oliy Majlisi Senati Kengashining 2022-yil 27-apreldagi “Yil ayoli” va “Gender tenglik faoli” milliy tanlovlarini oʻtkazish toʻgʻrisida”gi KQ-340-IV-sonli Qarorining:

Qaror nomidagi ““Yil ayoli” va “Gender tenglik faoli” milliy tanlovlarini” degan soʻzlar ““Yil ayoli” milliy tanlovini” degan soʻzlar bilan almashtirilsin;

1-bandidagi “, “Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizom 2-ilovaga muvofiq, “Gender tenglik faoli” milliy koʻrik-tanlovini tashkil etish va oʻtkazish boʻyicha Respublika komissiyasi tarkibi 3-ilovaga muvofiq” degan soʻzlar chiqarib tashlansin;

2-bandidagi “Oʻzbekiston Respublikasi Oila va xotin-qizlar davlat qoʻmitasi bilan birgalikda “Yil ayoli” va “Gender tenglik faoli” milliy tanlovlari” soʻzlari “Oʻzbekiston Respublikasi Oila va xotin-qizlar qoʻmitasi bilan birgalikda ““Yil ayoli” milliy tanlovi” soʻzlari bilan almashtirilsin;

4-bandidagi “tanlovlari” soʻzi “tanlov” soʻzi bilan almashtirilsin.

2- va 3-ilovalar oʻz kuchini yoʻqotgan deb hisoblansin.