Davlat va xoʻjalik boshqaruvi respublika organlarining boshqaruv xodimlari sonini maqbullashtirish va qisqartirish toʻgʻrisida (1-son)

05.01.2004

Oʻzbekiston Respublikasi Vazirlar Mahkamasining

QarorI

Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF–3358-son va “Xoʻjalik boshqaruv organlari tizimini takomillashtirish toʻgʻrisida” 2003-yil 22-dekabrdagi PF–3366-son Farmonlariga muvofiq hamda boshqaruv organlari tuzilmasini takomillashtirish va ular faoliyati samaradorligini oshirish, boshqaruv xodimlari sonini maqbullashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2003-yil 20-iyundagi F-1791-son farmoyishi bilan tashkil etilgan Maʼmuriy islohotlarni chuqurlashtirish va iqtisodiyotni boshqarish tuzilmasini takomillashtirish yuzasidan takliflar tayyorlash boʻyicha Respublika komissiyasining:

1-ilovaga* muvofiq vazirliklar, davlat qoʻmitalari, idoralar va xoʻjalik boshqaruvi organlari rahbarlari oʻrinbosarlari lavozimlarini qisqartirish;

2004-yil 1-yanvardan boshlab vazirliklar, davlat qoʻmitalari, idoralar, xoʻjalik boshqaruvi organlari apparatlari hamda ularga qarashli muassasalar va tashkilotlar boshqaruv xodimlarining cheklangan sonini 2 va 3-ilovalarga* muvofiq belgilash toʻgʻrisidagi takliflari qabul qilinsin.

* 1—3 ilovalar rus tiladgi matnda berilgan.

2. Boshqaruv samaradorligini oshirish manfaatlari yoʻlida aʼzolik badallari va xayriya faoliyati hisobiga mablagʻ bilan taʼminlanadigan jamgʻarmalar, ijodiy va kasaba uyushmalari, jamoat tashkilotlariga Maʼmuriy islohotlarni chuqurlashtirish va iqtisodiyotni boshqarish tuzilmasini takomillashtirish yuzasidan takliflar tayyorlash boʻyicha Respublika komissiyasining takliflari asosida oʻz apparatlari boshqaruv xodimlarining cheklangan sonini qayta koʻrib chiqish tavsiya etilsin.

3. Vazirliklar, davlat qoʻmitalari, idoralar, xoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

uch kun muddatda boshqaruv apparatining boshqaruv, xizmat koʻrsatuvchi va texnik xodimlari sonini qisqartirish boʻyicha tegishli komissiyalar tashkil etsinlar;

oʻn kun muddatda markaziy ijro etuvchi apparatlarda va tegishli tarkibiy boʻlinmalarda qisqartiriladigan lavozimlar roʻyxatini aniqlasinlar hamda qisqartiriladigan shaxslarni qonun hujjatlarida belgilangan tartibda xabardor qilsinlar;

2004-yil 15-yanvargacha boʻlgan muddatda Oʻzbekiston Respublikasi Moliya vazirligiga 2004-yil 1-yanvardagi holatiga koʻra boshqaruv apparati xodimlari sonini qisqartirish yuzasidan amalga oshirilgan ishlar toʻgʻrisida axborot, shuningdek xodimlarning belgilangan cheklangan soniga rioya etilishi ustidan monitoring olib borish uchun yilning har choragi asosida boshqaruv xodimlari, xizmat koʻrsatuvchi va texnik xodimlar soni toʻgʻrisida axborot taqdim etilishini taʼminlasinlar;

qonun hujjatlarida belgilangan tartibda Oʻzbekiston Respublikasi Mehnat va aholini ijtimoiy muhofaza qilish vazirligi va uning joylardagi organlari bilan birgalikda ishdan boʻshab qoladigan xodimlarni ishga joylashtirish chora-tadbirlarini koʻrsinlar va bu borada koʻmaklashsinlar.

4. Oʻzbekiston Respublikasi Moliya vazirligi 2004-yildan boshlab:

budjet muassasalari va tashkilotlarining shtat jadvallari va xarajatlari smetalarini mazkur qaror bilan belgilangan boshqaruv apparati boshqaruv xodimlarining cheklangan soniga hamda xizmat koʻrsatadigan va texnik xodimlar soni nisbatining belgilangan hisoblab chiqilgan normativlariga qatʼiy muvofiq holda roʻyxatdan oʻtkazsin;

davlat va xoʻjalik boshqaruvi organlari tomonidan boshqaruv xodimlarining belgilangan cheklangan soniga hamda xizmat koʻrsatuvchi va texnik xodimlar soni nisbatining hisoblab chiqilgan normativlariga rioya etilishi ustidan doimiy monitoring olib borsin. Monitoring natijalari toʻgʻrisida har yili 25-yanvargacha va har chorakda hisobot davridan keyingi oyning 20-kunigacha Maʼmuriy islohotlarni chuqurlashtirish va iqtisodiyotni boshqarish tuzilmasini takomillashtirish yuzasidan takliflar tayyorlash boʻyicha Respublika komissiyasiga axborot berilsin.

5. Oʻzbekiston Respublikasi Moliya vazirligi Mehnat va aholini ijtimoiy muhofaza qilish vazirligi bilan birgalikda boshqaruv apparati xodimlari soni qisqarishi munosabati bilan boʻshab qoladigan mablagʻlardan yuqori malakali xodimlarni moddiy ragʻbatlantirish uchun foydalanish toʻgʻrisidagi nizomni bir oy muddatda ishlab chiqsin va belgilangan tartibda tasdiqlasin.

6. Maʼmuriy islohotlarni chuqurlashtirish va iqtisodiyotni boshqarish tuzilmasini takomillashtirish yuzasidan takliflar tayyorlash boʻyicha Respublika komissiyasi (R.S. Azimov) vazirliklar, davlat qoʻmitalari, idoralar va xoʻjalik boshqaruvi organlari boshqaruv apparati xodimlari sonining mazkur qarorga muvofiq qisqartirilishi ustidan nazorat oʻrnatsin hamda natijalar toʻgʻrisida Oʻzbekiston Respublikasi Vazirlar Mahkamasiga 2004-yil 1-fevralgacha axborot bersin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 5-yanvar,

1-son