Yaponiya Hukumati tomonidan berilayotgan begʻaraz yordamdan samarali foydalanish toʻgʻrisida (86-son)

28.02.1998

Oʻzbekiston Respublikasi Vazirlar Mahkamasining

qarori

Yaponiya Hukumati tomonidan berilayotgan 676 mln yapon iyeni (qariyb 5,8 mln AQSH dollari) miqdoridagi tibbiy asbob-uskunalar Samarqand va Navoiy viloyatlari bolalar kasalxonalariga oʻz vaqtida yetkazib berilishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Bosh vazirning oʻrinbosari A.A. Azizxoʻjayev Almashuv Notalarini Oʻzbekiston Respublikasi Hukumati nomidan imzolashga vakil qilinsin.

Oʻzbekiston Respublikasi Sogʻliqni saqlash vazirligi Tashqi iqtisodiy aloqalar vazirligi bilan birgalikda Almashuv Notalariga tegishli barcha zarur hujjatlarni rasmiylashtirsin.

Rasmiylashtirish va hujjatlarni imzolash 1998-yil 24-fevralgacha tugallansin.

2. Oʻzbekiston Respublikasi va Yaponiya Hukumatlari oʻrtasidagi Almashuv Notalariga muvofiq:

Samarqand va Navoiy viloyatlari yangi tugʻilgan bolalar uchun bolalar kasalxonalarini tibbiy asbob-uskunalar bilan jihozlash uchun begʻaraz yordam uchun berilgan mablagʻlarga xizmat koʻrsatish Oʻzbekiston Respublikasi Sogʻliqni saqlash vazirligiga;

Yaponiya Hukumati tomonidan koʻrsatilgan Yaponiya bankida hisob raqami ochish huquqi berilgan holda yuqorida qayd etilgan yordamga bank xizmati koʻrsatish Oʻzbekiston Respublikasi Tashqi iqtisodiy faoliyat milliy bankiga yuklansin.

3. Oʻzbekiston Respublikasi Sogʻliqni saqlash vazirligi, Tashqi iqtisodiy aloqalar vazirligi va Tashqi iqtisodiy faoliyat milliy banki Yaponiyaning begʻaraz yordamini olish uchun nazarda tutilgan barcha tartibotlarning Yaponiya tomoni bilan kelishilgan muddatlarda bajarilishi taʼminlasinlar.

4. Begʻaraz yordam hisobiga Oʻzbekiston Respublikasiga keltiriladigan asbob-uskunalar, mahsulotlar va xizmatlar boj poshlinalaridan barcha turdagi soliqlar, yigʻimlardan hamda yoʻl jamgʻarmasiga ajratmalardan ozod qilinsin.

5. Ichki ishlar vazirligi, Davlat bojxona qoʻmitasi va Davlat soliq qoʻmitasi koʻrsatib oʻtilgan loyihaning yaponiyalik qatnashchilarni Oʻzbekistondagi yashash joyida roʻyxatdan oʻtkazish uchun yigʻimlar, boj poshlinalari va soliqlar toʻlashdan ozod qilsinlar.

6. Oʻzbekiston Respublikasi Tashqi ishlar vazirligi koʻrsatib oʻtilgan loyihaning yaponiyalik qatnashchilarga, Sogʻliqni saqlash vazirligining buyurtmanomasiga binoan, konsullik va boshqa turdagi yigʻimlar olmasdan koʻp martalik vizalar berilishini taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vazirning oʻrinbosari A.A.Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 28-fevral,

86-son