16-modda. Turistik faoliyat subyektining huquqlari
Turizm toʻgʻrisida (830-I-son) · Sana: 20.08.1999 · Amalda
Turistik faoliyat subyekti Oʻzbekiston Respublikasi hududida turistlarga xizmatlar koʻrsatish paytida:
turning muddati va yoʻnalishini, xizmat koʻrsatish darajasini, transport xizmati koʻrsatish turini, turistning xavfsizligini taʼminlash va uning mol-mulkini qoʻriqlash usulini turistning roziligi va xohishi bilangina oʻzgartirish;
turistning roziligi bilan hamda bu xususda tur boshlanishidan kamida yigirma kun oldin turistni xabardor qilish sharti bilan turning shartlashilgan qiymatini oshirish;
xizmatlar koʻrsatish mumkin boʻlmagan fors-major holatlari roʻy berganda, shuningdek guruhni tuzish uchun zarur miqdorda turistlar yigʻilmagan taqdirda turistlarni bu haqda tur boshlanishidan kamida yigirma kun oldin xabardor qilgan holda turistik xizmatlar koʻrsatish shartnomasini bekor qilish;
turistlar yoki turistlarga xizmat koʻrsatishni tashkil etish boʻyicha sheriklar tomonidan yetkazilgan zararning oʻrni qoplanishini qonun hujjatlarida belgilangan tartibda talab qilish huquqiga ega.
Turistik faoliyat subyekti qonun hujjatlariga muvofiq boshqa huquqlarga ham ega boʻladi.