Respublikada sogʻliqni saqlash tizimini va aholiga tibbiy xizmat koʻrsatish tamoyillarini takomillashtirish orqali sohani isloh qilishni izchil davom ettirish chora-tadbirlari toʻgʻrisida (PF-88-son)

19.05.2025

Oʻzbekiston Respublikasi Prezidentining

Farmoni

Sogʻliqni saqlash tizimini eng ilgʻor xorijiy tajriba asosida isloh qilish, aholiga koʻrsatilayotgan tibbiy xizmatlar sifatini oshirish, birlamchi tibbiy-sanitariya yordami koʻrsatishning zamonaviy tizimini shakllantirish, sohaga yangi boshqaruv tamoyillarini joriy qilish maqsadida qaror qilaman:

I. Maqsadlar

1. Ilgʻor xorijiy tajriba asosida aholiga birlamchi tibbiy-sanitariya yordami koʻrsatishning yangi tizimini joriy etishning asosiy maqsadlari etib quyidagilar belgilansin:

(a) xalqaro tajribaga asoslangan aholiga birlamchi tibbiy-sanitariya yordami koʻrsatishning yangi modelini joriy qilish;

(b) birlamchi tibbiy-sanitariya yordami muassasalari, xususan, tuman (shahar) koʻp tarmoqli markaziy poliklinikalari, oilaviy shifokor punktlari va oilaviy poliklinikalar, mahalla tibbiyot punktlari faoliyatini yagona yondashuv asosida tashkil qilish orqali aholiga tibbiyotni yanada yaqinlashtirish;

(v) aholiga tibbiy yordam koʻrsatishda oilaviy shifokor ulushini 70 foizga yetkazish;

(g) sogʻliqni saqlash tizimini raqamlashtirish hamda tibbiyotda qogʻozbozlikni kamaytirish orqali tibbiyot xodimlari ish yuklamasini 30 foizgacha kamaytirish;

(d) aholining birlamchi tibbiy-sanitariya yordamidan roziligi darajasini 85 foizdan oshirish;

(e) tibbiyot xodimlarini samaradorlikning eng muhim koʻrsatkichlari asosida moddiy ragʻbatlantirish tizimini joriy qilish;

(j) tibbiyot brigadalari xodimlarining bilim va koʻnikmalarini oshirish.

II. Tajriba-sinov loyihasi

2. 2025-yil 1-iyuldan boshlab 1-ilovaga muvofiq belgilangan tuman (shahar)larda, 2026-yil 1-yanvardan boshlab Samarqand viloyatining barcha tuman (shahar)larida tajriba-sinov tariqasida sogʻliqni saqlash tizimini tashkil etishning yangi modeli (keyingi oʻrinlarda — tajriba-sinov loyihasi) joriy qilinsin.

3. Belgilansinki, tajriba-sinov loyihasi doirasida:

(a) tuman (shahar) tibbiyot birlashmalari negizida tuman (shahar) sogʻliqni saqlash boʻlimlari tashkil etiladi;

(b) birlamchi tibbiy-sanitariya yordami tizimida:

(I) oilaviy poliklinikalar, oilaviy shifokor punktlari, shu jumladan, ularga filial sifatida biriktirilgan muassasalar hamda mahalla tibbiyot punktlari biriktirilgan aholi sonidan kelib chiqib, yuridik maqomga ega oilaviy poliklinikalarga hamda ularning filiallariga aylantiriladi;

(II) oilaviy poliklinikalarda aholiga tibbiy yordam koʻrsatuvchi oilaviy shifokor, pediatr, akusher-ginekolog va tashxislash xizmatlarini koʻrsatuvchi mutaxassislar, shuningdek, autsorsing asosida stomatologiya xizmati yoʻlga qoʻyiladi hamda oilaviy poliklinikalar zarur tibbiy uskunalar bilan taʼminlanadi;

(III) aholiga oilaviy shifokorni erkin tanlash huquqi beriladi;

(IV) tibbiyot brigadasi hamda unga biriktirilgan aholi oʻrtasida tomonlarning huquq va majburiyatlarini belgilovchi bitim tuziladi;

(V) xususiy oilaviy shifokorlik faoliyati bilan shugʻullanishga, shuningdek, birlamchi tibbiy-sanitariya yordami koʻrsatish boʻyicha aholi va xususiy oilaviy shifokorlar oʻrtasida bitim tuzishga ruxsat etiladi;

(VI) aholiga tibbiy xizmatlar Davlat budjeti mablagʻlari hisobidan qoplanadigan tibbiy yordamning kafolatlangan hajmlari (keyingi oʻrinlarda — kafolatlangan paket) doirasida oilaviy shifokor yoki tibbiyot brigadasining yoʻllanmasi asosida bepul koʻrsatiladi (shoshilinch va tez tibbiy yordam koʻrsatish bundan mustasno). Kafolatlangan paketga kiritilmagan qoʻshimcha tibbiy yordam hamda oilaviy shifokor yoki tibbiyot brigadasi yoʻllanmasi mavjud boʻlmasdan toʻgʻridan-toʻgʻri murojaat qilgan fuqarolarga tibbiy yordam pullik asosda koʻrsatiladi;

(VII) tibbiyot brigadasiga 3 ming nafar, zarur hollarda, belgilangan meʼyorlarga qoʻshimcha aholi biriktirilishi mumkin. Bunda 2030-yilga qadar bir tibbiyot brigadasiga koʻpi bilan 1,7 ming nafar aholi biriktirilishi strategik maqsad etib belgilanadi;

(VIII) olis va chekka hududlar tibbiyot xodimlarining shtat meʼyorlarini belgilashda biriktirilgan aholi sonidan qatʼi nazar aholi 3 ming nafardan kam boʻlgan hollarda ham tibbiyot xodimlarining shtatlari bir shtat birligidan kam boʻlmagan miqdorda kiritiladi hamda ular asosiy ish joyiga toʻliq stavkada ishga qabul qilinadi;

(IX) oilaviy poliklinikalarda tibbiyot xodimlari faqat toʻliq stavkada faoliyat yuritadi;

(X) oilaviy poliklinikalar, xususiy oilaviy shifokorlar bilan Davlat tibbiy sugʻurtasi jamgʻarmasi oʻrtasida tibbiy xizmatlar xaridi boʻyicha shartnoma tuziladi va ular oʻzlariga biriktirilgan aholi sonidan kelib chiqib, aholi jon boshiga koʻra moliyalashtiriladi;

(XI) tibbiyot brigadasi xodimlari va oilaviy poliklinikalarning katta hamshiralari ilgʻor tajribaga muvofiq ishlab chiqilgan toʻrt bosqichdan iborat oila salomatligi boʻyicha maxsus oʻquv dasturi asosida oʻqitiladi hamda sinovlardan muvaffaqiyatli oʻtgan tibbiyot xodimlariga sertifikat beriladi;

(XII) oilaviy poliklinikadan 10 kilometrdan uzoq masofada joylashgan mahalla fuqarolar yigʻinlarida yashovchi aholi uchun tibbiyot xodimlarining sayyor tibbiy xizmati yoʻlga qoʻyiladi;

(v) tuman (shahar)larda ixtisoslashtirilgan tibbiy xizmat koʻrsatish yoʻnalishida:

(I) tuman (shahar) koʻp tarmoqli markaziy poliklinikalari tegishli markaziy shifoxonalarning maslahat-diagnostika boʻlinmalariga aylantiriladi, ularga birlamchi tibbiy-sanitariya yordami koʻrsatish uchun aholi biriktirilmaydi;

(II) shifoxonalarda aholiga rejali statsionar tibbiy xizmatlar shifokor yoʻllanmasi asosida Oʻzbekiston Respublikasi Prezidentining 2024-yil 5-sentabrdagi “Davlat tibbiy sugʻurtasi mexanizmlarini joriy etishga oid chora-tadbirlar toʻgʻrisida”gi PQ-311-son qarorida belgilangan tartibda navbat asosida bepul koʻrsatiladi;

(III) Davlat tibbiy sugʻurtasi jamgʻarmasi va shifoxonalar oʻrtasida tibbiy xizmatlar xaridi boʻyicha shartnoma tuziladi hamda har bir davolangan holat va bajarilgan ish hajmidan kelib chiqib moliyalashtiriladi;

(IV) shifoxonalar tarkibidagi boʻlimlar va oilaviy poliklinikalarga xizmat koʻrsatuvchi hududlararo markaziy laboratoriya xizmati tashkil etiladi;

(V) shifoxonalarda tibbiy xizmatlar tasdiqlangan tashxislash va davolash standartlari hamda klinik protokollar asosida koʻrsatilishi ustidan nazorat Sogʻliqni saqlash vazirligi va Davlat tibbiy sugʻurtasi jamgʻarmasi tomonidan amalga oshiriladi. Bunda tibbiy xizmat koʻrsatishda belgilangan tartibga rioya etilmagan hollarda xarajatlar Davlat tibbiy sugʻurtasi jamgʻarmasi tomonidan moliyalashtirilmaydi va xizmat koʻrsatuvchi tibbiyot muassasasining budjetdan tashqari mablagʻlari hisobidan qoplanadi;

(g) birlamchi tibbiy-sanitariya yordami muassasalari tibbiyot xodimlarining malaka toifalari, ish staji va boshqa ustamalar birlashtirilgan holda tibbiyot xodimlari ish haqini 2-ilovaga muvofiq tasdiqlangan miqdorlarda bazaviy tarif stavkalarida hisoblash tartibi joriy etiladi;

(d) birlamchi tibbiy-sanitariya yordami muassasalari tibbiyot xodimlari bazaviy tarif stavkalariga quyidagi miqdorlarda qoʻshimcha ustamalar toʻlanadi:

(I) sayyor tibbiy xizmat koʻrsatuvchi tibbiyot xodimlariga oylik lavozim maoshi yoki bazaviy tarif stavkasining 50 foizi miqdorida;

(II) tibbiyot brigadasiga belgilangan meʼyorlardan 10 foiz ortiqcha qoʻshimcha biriktirilgan aholining har bir nafari uchun mehnatga haq toʻlashning eng kam miqdorining 0,3 foizi miqdorida — shaharlarda, 0,5 foizi miqdorida — tumanlarda;

(III) oila salomatligi boʻyicha maxsus oʻquv dasturi asosida tashkil etiladigan kurslarning barcha bosqichlarini muvaffaqiyatli tugatgan tibbiyot xodimlari uchun kurs yakuni boʻyicha beriladigan sertifikatga muvofiq bazaviy tarif stavkasining 100 foizi miqdorida. Bunda kursning har bir bosqichi yakuni boʻyicha sinovlardan ijobiy natijaga erishgan xodimlarga 25 foiz miqdorida ustama qoʻllaniladi;

(e) tuman (shahar) markaziy shifoxonalarida shifokorlarning oylik lavozim maoshlari — 20 foiz, oʻrta tibbiyot xodimlarining oylik lavozim maoshlari — 10 foiz miqdorida oshiriladi;

(j) oilaviy poliklinikalar va tuman (shahar) markaziy shifoxonalarining tibbiyot va farmatsevtika xodimlari uchun Tibbiyot muassasalarining moddiy ragʻbatlantirish va rivojlantirish jamgʻarmasi mablagʻlari hamda tibbiyot muassasasining budjetdan tashqari mablagʻlari hisobidan faoliyat samaradorligi koʻrsatkichlari (KPI) asosida oylik lavozim maoshi (bazaviy tarif stavkasi)ning 100 foizigacha miqdorda ustama joriy etiladi;

(z) tuman (shahar) sogʻliqni saqlash boʻlimlari va tibbiyot muassasalarida:

(I) rahbar xodimlar uchun tibbiyotni boshqarish (menejerlik) boʻyicha oʻquv dasturi yoʻlga qoʻyiladi hamda oʻquv dasturi yakuni boʻyicha sertifikatga ega boʻlgan rahbarlarga oylik lavozim maoshi (bazaviy tarif stavkasi)ning 100 foizi, rahbar oʻrinbosariga — 80 foizi hamda bosh hamshiraga — 50 foizi miqdorida ustama toʻlanadi;

(II) rahbar xodimlar uchun faoliyat samaradorligi koʻrsatkichlari (KPI) belgilanadi hamda Tibbiyot muassasalarining moddiy ragʻbatlantirish va rivojlantirish jamgʻarmasi va tibbiyot muassasasining budjetdan tashqari mablagʻlari hisobidan oylik lavozim maoshi (bazaviy tarif stavkasi)ning 100 foizigacha miqdorda ustama joriy etiladi;

(III) bir yil davomida faoliyat samaradorligi koʻrsatkichlarida (KPI) ijobiy (56 foizdan yuqori) natijalarga erishmagan rahbar xodimlar lavozimidan ozod qilinadi.

4. Tajriba-sinov loyihasi doirasida hududiy darajadagi tibbiyot muassasalari Sogʻliqni saqlash vazirligi tomonidan belgilanadigan roʻyxatga muvofiq tashkiliy, boshqaruv va moliyaviy jihatdan birlashtirilib koʻp tarmoqli shifoxonalarga aylantirilsin. Bunda:

(a) amaldagi shifoxonalar koʻp tarmoqli shifoxonaning yoʻnalishlar boʻyicha boʻlimlariga aylantiriladi hamda ularga respublika ixtisoslashtirilgan ilmiy-amaliy tibbiyot markazlari tomonidan tegishli yoʻnalishlar boʻyicha uslubiy rahbarlik amalga oshiriladi;

(b) boʻlimlar faoliyati amalda mavjud bino-inshootlarda tashkil qilinib, ular oʻrtasida bemorlar harakati uchun transport xizmati yoʻlga qoʻyiladi;

(v) boʻlimlarning ayrim tashxislash va yordamchi (ovqatlanish, kir yuvish, sterilizatsiya va boshqa) xizmatlari birlashtiriladi hamda autsorsing asosida tashkil etiladi;

(g) koʻp tarmoqli shifoxona unga birlashtirilgan boshqa tibbiyot muassasalarining huquqlari, majburiyatlari va shartnomalari boʻyicha huquqiy vorisi hisoblanadi;

(d) tibbiyot oliy taʼlim muassasalari mavjud boʻlgan hududlarda koʻp tarmoqli shifoxona oliy taʼlim muassasasining klinik bazasi sifatida faoliyat yuritadi.

5. Belgilab qoʻyilsinki, tuman (shahar) markaziy shifoxonalari va hududiy darajadagi tibbiyot muassasalarida tibbiyotning ikkilamchi darajasidagi ixtisoslashgan tibbiy xizmatlar koʻrsatiladi. Bunda ushbu tibbiyot muassasalarida tibbiyotning uchlamchi darajasidagi tibbiy xizmatlarni ham koʻrsatish tashkil etilishi mumkin.

III. Moliyaviy resurslar

6. Belgilansinki:

(a) mazkur Farmonda nazarda tutilgan chora-tadbirlar 2025-yilda tajriba-sinov loyihasi doirasida boʻshaydigan mablagʻlar, shuningdek, Sogʻliqni saqlash vazirligining asoslangan hisob-kitoblariga muvofiq respublika budjetidan ajratiladigan qoʻshimcha mablagʻlar hamda Samarqand viloyati mahalliy budjetidan qoʻshimcha ajratiladigan 20 milliard soʻm hisobidan moliyalashtiriladi;

(b) 2025-yilda mazkur Farmonning 1-ilovasiga muvofiq tajriba-sinov loyihasi joriy etiladigan hududlarda ushbu loyiha doirasida belgilangan tadbirlarni moliyalashtirish uchun tegishli mahalliy budjetlardan (Samarqand viloyati bundan mustasno) kamida 10 milliard soʻmdan mablagʻ ajratiladi;

(v) 2026-yildan boshlab Samarqand viloyati va mazkur Farmonning 1-ilovasiga muvofiq belgilangan tuman (shahar)lar tibbiyot muassasalarini tibbiy asbob-uskunalar bilan jihozlash hamda tajriba-sinov loyihasini joriy qilish bilan bogʻliq zarur mablagʻlar Davlat budjeti parametrlarini shakllantirishda nazarda tutiladi.

7. Belgilab qoʻyilsinki, tajriba-sinov loyihasi doirasida:

(a) maqbullashtiriladigan mablagʻlar olib qoʻyilmaydi hamda tibbiyot muassasalari faoliyatini tashkil etish, xodimlar oylik maoshlarini oshirish hamda ularga qoʻshimcha ustama toʻlash bilan bogʻliq xarajatlarni moliyalashtirishga yoʻnaltiriladi;

(b) hududiy darajadagi tibbiyot muassasalarini birlashtirish natijasida iqtisod qilinadigan mablagʻlar yangi tashkil etiladigan koʻp tarmoqli shifoxonalarning moddiy-texnik bazasini mustahkamlash, tibbiyot xodimlarini ragʻbatlantirish hamda bemorlar harakati uchun transport xizmatini yoʻlga qoʻyishga yoʻnaltiriladi.

8. Iqtisodiyot va moliya vazirligi tajriba-sinov loyihasi doirasida tibbiyot muassasalari uchun Tibbiyot muassasalarining moddiy ragʻbatlantirish va rivojlantirish jamgʻarmasi mablagʻlarini toʻliq hamda oylar kesimida teng miqdorlarda ajratilishini taʼminlasin.

9. Belgilansinki, Tibbiyot muassasalarining moddiy ragʻbatlantirish va rivojlantirish jamgʻarmasi mablagʻlari hisobidan tibbiyot muassasalari xodimlariga ustamalar ish haqi va unga tenglashtirilgan toʻlovlar bilan bir vaqtda toʻlab beriladi. Bunda jamgʻarma mablagʻlarini uning hisobidan moliyalashtirish koʻzda tutilmagan tadbirlarga yoʻnaltirish taqiqlanadi.

IV. Tibbiyot xodimlarining bilim va koʻnikmalarini rivojlantirish

10. Belgilansinki, tibbiyot brigadasi xodimlarini va oilaviy poliklinikalarning katta hamshiralarini oila salomatligi hamda rahbar xodimlarni menejerlik boʻyicha oʻqitish yuzasidan maxsus oʻquv dasturlarini ishlab chiqish va oʻqitish tibbiyot taʼlim muassasalari tomonidan amalga oshiriladi. Bunda:

(a) tajriba-sinov loyihasi doirasida tibbiyot xodimlarini oʻqitish bilan bogʻliq tadbirlar tibbiy taʼlim muassasalari bazasida tashkil etiladi;

(b) oila salomatligi boʻyicha maxsus oʻquv dasturining keyingi bosqichlarini avvalgi bosqich boʻyicha oʻquv kurslari yakunlangandan soʻng bir yil davomida muvaffaqiyatli tugatmagan tibbiyot xodimlari uchun avvalgi bosqichlar yakuni bilan belgilangan ustamalar bekor qilinadi;

(v) tibbiyot xodimlarini oʻqitish va oʻqitish yakunlari boʻyicha bilimlarini baholashda shaffoflikni taʼminlash maqsadida ularni oʻqitish va baholash bir-biridan mustaqil tizimlarda amalga oshiriladi;

(g) tibbiyot xodimlarini oʻqitish, oʻquv kurslarini tashkil etish hamda xodimlar bilimini baholash bilan bogʻliq xarajatlar Davlat budjetidan tibbiyot xodimlarining malakasini oshirish uchun ajratilgan mablagʻlar hamda Tibbiyotni rivojlantirish davlat maqsadli jamgʻarmasi mablagʻlari hisobidan moliyalashtiriladi.

V. Sohani raqamlashtirish

11. Sogʻliqni saqlash vazirligining quyidagilarni ustuvor ravishda dastlab Samarqand viloyatidagi hamda mazkur Farmonning 1-ilovasiga muvofiq tasdiqlangan tuman (shahar)lardagi tibbiyot muassasalariga ajratish toʻgʻrisidagi taklifiga rozilik berilsin:

(a) Oʻzbekiston Respublikasi Prezidentining 2024-yil 5-sentabrdagi “Davlat tibbiy sugʻurtasi mexanizmlarini joriy etishga oid chora-tadbirlar toʻgʻrisida”gi PQ-311-son qarori doirasida xarid qilinadigan axborot-kommunikatsiya jihozlari va tarmoq qurilmalarining taqsimlashdan ortgan qismini;

(b) Oʻzbekiston Respublikasi va “KfW” banki (Germaniya Federativ Respublikasi) oʻrtasida tuzilgan bitimlar asosida amalga oshirilayotgan “Raqamli sogʻliqni saqlash islohotlarini qoʻllab-quvvatlash” loyihasi doirasida xarid qilinadigan axborot-kommunikatsiya jihozlarini.

12. Raqamli texnologiyalar vazirligi Sogʻliqni saqlash vazirligi bilan birgalikda bir oy muddatda:

(a) tibbiyotni isloh qilish uchun jalb qilingan turkiyalik mutaxassislar tavsiyalari asosida “Elektron sogʻliqni saqlash” axborot tizimini tajriba-sinov loyihasi talablariga moslashtirsin. Bunda mazkur axborot tizimida:

(I) aholini tibbiyot brigadalari, oilaviy shifokorga biriktirish, onlayn qabulga yozish, qabullarni amalga oshirish jurnallarini yuritishni elektron shaklga oʻtkazish, oilaviy shifokordan tor doiradagi mutaxassisga va shifoxonalarga elektron yoʻllanmalar berish yoʻlga qoʻyiladi;

(II) tibbiyot brigadasiga biriktirilgan aholi roʻyxati shakllantiriladi, ularning kasallik tarixi, surunkali kasalliklar turlari boʻyicha dispanser hisobida turadigan bemorlarning reyestri yuritiladi hamda statistik maʼlumotlarning elektron bazasi yaratiladi;

(III) tibbiyot brigadasi, shu jumladan, xususiy oilaviy shifokor va unga biriktirilgan aholi oʻrtasida tomonlarning huquq va majburiyatlarini belgilovchi elektron bitim tuzish joriy etiladi;

(IV) statsionar muassasalarda bemorlarni yotqizish, tibbiy statistik shakllarni elektron yuritish hamda maʼlumotlarni Davlat tibbiy sugʻurtasi jamgʻarmasiga uzatish imkoniyatlari yaratiladi;

(V) tibbiyot tashkilotlari va Davlat tibbiy sugʻurtasi jamgʻarmasi oʻrtasida elektron shaklda shartnoma tuzish joriy etiladi;

(VI) tibbiyot muassasasi xodimlari toʻgʻrisidagi maʼlumotlar hamda ularning faoliyati samaradorligi koʻrsatkichlarini (KPI) baholash raqamlashtiriladi;

(VII) tibbiyot muassasalarida dori va sarflov vositalari harakati, tibbiy jihozlar va ulardan foydalanish koʻrsatkichlari, tashxislash va davolash xizmatlari koʻrsatishning elektron hisobi yuritiladi;

(VIII) barcha turdagi tibbiy hisobotlarni, shuningdek, statistik maʼlumotlar tahlilini elektron shaklda yuritish boʻyicha modullar yaratiladi hamda qogʻoz shaklidagi barcha tibbiy hisobotlar bekor qilinadi;

(b) tajriba-sinov loyihasi doirasida tibbiyot muassasalarini lokal tarmoqlar, muhandislik infratuzilmasi vositalari, axborot-kommunikatsiya jihozlari va tarmoq qurilmalari bilan taʼminlash choralarini koʻrsin;

(v) tajriba-sinov loyihasi doirasida tibbiyot muassasalaridagi jarayonlarni toʻliq raqamlashtirish orqali qogʻoz shaklidagi barcha tibbiy hujjatlar hamda hisobotlarni bekor qilish choralarini koʻrsin.

VI. Farmon ijrosini tashkil etish, taʼminlash va nazorat

13. Sogʻliqni saqlash tizimini tashkil etishning yangi modelini tajriba-sinov tariqasida joriy qilish boʻyicha chora-tadbirlar rejasi 3-ilovaga muvofiq tasdiqlansin.

14. Sogʻliqni saqlash tizimini tashkil etishning yangi modelini tajriba-sinov tariqasida joriy qilish boʻyicha ishchi komissiya (keyingi oʻrinlarda — Ishchi komissiya) 4-ilovaga muvofiq tarkibda tashkil etilsin.

15. Quyidagilar Ishchi komissiyaning asosiy vazifalari etib belgilansin:

(a) tibbiy xizmatlarni aholiga yanada yaqinlashtirish maqsadida birlamchi tibbiy-sanitariya yordami koʻrsatishning yangi tizimini joriy etish hamda masʼullarni belgilash;

(b) tajriba-sinov loyihasi joriy etiladigan har bir hudud uchun vazirlik va idoralar vakillaridan iborat ishchi guruhni shakllantirish;

(v) tajriba-sinov loyihasida nazarda tutilgan tadbirlarning amaliyotga tatbiq etilishini har oyda kamida bir marta muhokama qilish orqali nazorat qilish;

(g) tajriba-sinov loyihasi doirasida raqamlashtirish boʻyicha dasturiy taʼminotlar va modullar oʻz vaqtida ishlab chiqilishi hamda amaliyotga joriy etilishini, tibbiyot muassasalarining zarur aloqa va texnika vositalari, jumladan, kompyuter texnikasi bilan taʼminlanishini nazorat qilish;

(d) hududiy darajadagi ixtisoslashgan tibbiyot muassasalari negizida koʻp tarmoqli tibbiyot muassasasi faoliyatini tashkil etish;

(e) tajriba-sinov loyihasi yakunlari boʻyicha erishilgan ijobiy natijalar asosida sogʻliqni saqlash tizimini tashkil etishning yangi modelini respublikaning boshqa hududlarida joriy etish choralarini koʻrish.

16. Sogʻliqni saqlash vazirligiga Ishchi komissiya bilan kelishilgan holda tajriba-sinov loyihasi doirasida, zarur hollarda, jalb qilingan xorijiy ekspertlarning tavsiyalari asosida ushbu Farmonda belgilangan qoidalarga oʻzgartirish va qoʻshimchalar kiritish vakolati berilsin.

17. Oliy Majlis palatalariga:

(a) quyidagilar boʻyicha parlament nazoratini yoʻlga qoʻyish:

(I) birlamchi tibbiy-sanitariya yordami koʻrsatishning sifati hamda ommabopligini oshirish, tibbiyot xodimlarining jamiyatdagi oʻrni va maqomini kuchaytirish, ularni xizmat majburiyati bilan bogʻliq boʻlmagan barcha turdagi ishlarga jalb qilish boʻyicha;

(II) sogʻliqni saqlash sohasi boʻyicha qabul qilingan rivojlantirish dasturlarida belgilangan topshiriqlarni amalga oshirish hamda erishilgan natijalar boʻyicha;

(b) sogʻliqni saqlash tizimida amalga oshirilayotgan islohotlarning mazmunini aholiga toʻgʻri yetkazish hamda ushbu Farmonda belgilangan chora-tadbirlarning amalga oshirilishida Hukumatga koʻmaklashish tavsiya etilsin.

18. Belgilab qoʻyilsinki, aholi oʻrtasida profilaktik tibbiy koʻriklar va barcha skrining tadbirlari faqat Sogʻliqni saqlash vazirligi tomonidan tasdiqlangan tartibga muvofiq va belgilangan muddatlarda tashkil etiladi. Bunda boshqa tashkilotlarning ushbu jarayonga aralashuvi taqiqlanadi.

19. Hisob palatasi va Bosh prokuratura huzuridagi Iqtisodiy jinoyatlarga qarshi kurashish departamenti sogʻliqni saqlash tizimini takomillashtirish bilan bogʻliq jarayonlarda yuzaga keladigan muammolar va kamchiliklarni tezkor bartaraf etishda Sogʻliqni saqlash vazirligiga muntazam koʻmaklashib borish choralarini koʻrsin.

20. Oʻzbekiston Respublikasi Prezidentining ayrim hujjatlariga 5-ilovaga muvofiq oʻzgartirish va qoʻshimchalar kiritilsin.

21. Sogʻliqni saqlash vazirligi uch oy muddatda manfaatdor vazirlik va idoralar bilan birgalikda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

22. Mazkur Farmonning ijrosini samarali tashkil qilishga masʼul va shaxsiy javobgar etib sogʻliqni saqlash vaziri A.A. Xudayarov belgilansin.

23. Farmon ijrosini muhokama qilib borish, ijro uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidenti Administratsiyasi Ijtimoiy rivojlanish departamenti rahbari O.Q. Abduraxmanov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2025-yil 19-may,

PF-88-son

Oʻzbekiston Respublikasi Prezidentining 2025-yil 19-maydagi PF-88-son Farmoniga 1-ILOVA

Sogʻliqni saqlash tizimini tashkil etishning yangi modeli tajriba-sinov tariqasida joriy qilinadigan tuman (shahar)lar

ROʻYXATI

Oʻzbekiston Respublikasi Prezidentining 2025-yil 19-maydagi PF-88-son Farmoniga 2-ILOVA

Birlamchi tibbiy-sanitariya yordami muassasalari tibbiyot xodimlarining mehnatiga haq toʻlash boʻyicha bazaviy tarif stavkalari

MIQDORLARI

Izohlar:

1) amaldagi qonunchilik hujjatlarida zararli mehnat sharoitlari uchun ularning tarif stavkasiga (lavozim maoshiga) qoʻllaniladigan ustamalar bazaviy lavozim maosh miqdorlariga nisbatan qoʻllaniladi;

2) Oʻzbekiston Respublikasi Prezidentining 2022-yil 25-apreldagi “Birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish boʻyicha qoʻshimcha chora-tadbirlar toʻgʻrisida”gi PQ-215-son qaroriga muvofiq olis va chekka hududlardagi oilaviy shifokor punktlari va oilaviy poliklinikalarda faoliyat yuritayotgan barcha shifokorlarning oylik ish haqiga qoʻshimcha 2 million soʻm miqdorida har oylik ustama belgilanadi;

3) Oʻzbekiston Respublikasi Prezidentining 2022-yil 17-maydagi “Tibbiyot muassasalari xodimlarini moddiy qoʻllab-quvvatlash hamda ragʻbatlantirishni kuchaytirish chora-tadbirlari toʻgʻrisida”gi PF-136-son Farmoniga muvofiq fan doktori (Doctor of Science), fan nomzodi yoki falsafa doktori (PhD) ilmiy darajalari uchun lavozim maoshiga tegishli foizlar (30 — 60 foiz) miqdorida qoʻshimcha ustamalar toʻlanadi;

4) Vazirlar Mahkamasining 2019-yil 6-sentabrdagi “Mehnat bozorida mehnat munosabatlarini tartibga solishga doir qoʻshimcha chora-tadbirlar toʻgʻrisida”gi 743-son qaroriga muvofiq qatnov va qatnash tusidagi ishlar bilan bogʻliq tuman va tarmoq koeffitsiyentlari, ustamalar toʻlanadi;

5) Vazirlar Mahkamasining 2005-yil 21-dekabrdagi “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi 276-son qaroriga muvofiq oliy maʼlumotga ega boʻlgan tibbiyot hamshiralari tarif stavkasiga (lavozim maoshiga) qoʻllaniladigan ustamalar bazaviy lavozim maosh miqdorlariga nisbatan qoʻllaniladi.

Oʻzbekiston Respublikasi Prezidentining 2025-yil 19-maydagi PF-88-son Farmoniga 3-ILOVA

Sogʻliqni saqlash tizimini tashkil etishning yangi modelini tajriba-sinov tariqasida joriy qilish boʻyicha

CHORA-TADBIRLAR REJASI

Oʻzbekiston Respublikasi Prezidentining 2025-yil 19-maydagi PF-88-son Farmoniga 4-ILOVA

Sogʻliqni saqlash tizimini tashkil etishning yangi modelini tajriba-sinov tariqasida joriy qilish boʻyicha ishchi komissiya

TARKIBI

Izohlar:

1. Ishchi komissiya aʼzolari boshqa ishga oʻtgan taqdirda, uning tarkibiga ushbu lavozimga yangi tayinlangan yoki tegishli funksiyalarni bajarish zimmasiga yuklangan shaxslar kiritiladi.

2. Ishchi komissiya raisiga mazkur roʻyxatga xorijiy ekspertlar va tibbiyot muassasalarining soha boʻyicha mutaxassislarini hamda jamoatchilik vakillarini kiritish vakolati beriladi.

Oʻzbekiston Respublikasi Prezidentining 2025-yil 19-maydagi PF-88-son Farmoniga 5-ILOVA

Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2003-yil 26-fevraldagi “Sogʻliqni saqlash tizimini yanada isloh qilish chora-tadbirlari toʻgʻrisida”gi PF-3214-son Farmoniga 2-ilovada:

(a) 5-band quyidagi tahrirda bayon etilsin:

“5. Yoshga oid pensiyaga chiqqan ishlamaydigan shaxslar, shuningdek, Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiya, Davlat xavfsizlik xizmati, Oʻzbekiston Respublikasi Prezidenti davlat xavfsizlik xizmati, Bojxona qoʻmitasi va Elektron texnologiyalarni rivojlantirish markazi tizimidagi tashkilotlarda xizmat davri boʻyicha pensiyaga chiqqan ishlamaydigan shaxslar”;

(b) 7-band quyidagi tahrirda bayon etilsin:

“7. Chernobil AESi falokatini tugatishda ishtirok etgan va yadro poligonida harbiy xizmatni oʻtagan shaxslar”;

(v) quyidagi mazmundagi 19-band bilan toʻldirilsin:

“19. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha gematologiya kasalliklariga chalingan shaxslar6”;

(g) izoh qismida:

(I) 1-kichik band quyidagi tahrirda bayon etilsin:

“1) Tibbiy yordam Respublika ixtisoslashtirilgan ona va bola salomatligi ilmiy-amaliy tibbiyot markazi hamda Respublika perinatal markazida koʻrsatiladi”;

(II) quyidagi mazmundagi 6-kichik band bilan toʻldirilsin:

“6) Tibbiy yordam Respublika ixtisoslashtirilgan gematologiya ilmiy-amaliy tibbiyot markazida koʻrsatiladi”.

2. Oʻzbekiston Respublikasi Prezidentining 2018-yil 7-noyabrdagi “Davlat tibbiyot muassasalari va sogʻliqni saqlashni boshqarish organlari xodimlarini moddiy ragʻbatlantirishni kuchaytirish chora-tadbirlari toʻgʻrisida”gi PQ-4007-son qarori 5-bandi “a” kichik bandining ikkinchi xatboshisidagi “miqdorining 2 foizi” soʻzlaridan keyin “sogʻliqni saqlash tizimini tashkil etishning yangi modeli joriy qilingan hududlarda tashkil etilgan tuman (shahar) sogʻliqni saqlash boʻlimlari tasarrufidagi tibbiyot muassasalari bundan mustasno” soʻzlari bilan toʻldirilsin.

3. Oʻzbekiston Respublikasi Prezidentining 2021-yil 28-iyuldagi “Sogʻliqni saqlash sohasida ixtisoslashtirilgan tibbiy yordam koʻrsatish tizimini yanada takomillashtirish chora-tadbirlari toʻgʻrisida”gi PQ-5199-son qarorida:

(a) 1-bandning “g” kichik bandida:

(I) ikkinchi xatboshidagi “2-ilovasida” soʻzlari “2-ilovasi I boʻlimida” soʻzlari bilan almashtirilsin;

(II) quyidagi mazmundagi uchinchi xatboshi bilan toʻldirilsin:

“Mazkur qarorning 2-ilovasi II boʻlimida nazarda tutilgan davlat tibbiyot muassasalarining shoshilinch tibbiy yordam va gemodializ boʻlinmalarini saqlash xarajatlari Davlat tibbiy sugʻurtasi jamgʻarmasi orqali bajarilgan ish hajmiga bogʻlanmagan holda bir satrda moliyalashtiriladi”;

(b) 2-ilovada:

(I) I boʻlimning 1-bandi quyidagi tahrirda bayon etilsin:

“1. Respublika ixtisoslashtirilgan allergologiya va klinik immunologiya ilmiy-amaliy tibbiyot markazi”;

(II) II boʻlimda:

nomlanishidagi “2025-yil 1-apreldan” soʻzlari “2025-yil 1-iyuldan” soʻzlari bilan almashtirilsin;

quyidagi mazmundagi 13-band bilan toʻldirilsin:

“13. Mudofaa vazirligining Markaziy harbiy klinik gospitali”;

izoh qismi quyidagi mazmundagi xatboshi bilan toʻldirilsin:

“Bolalar onkologiyasi, gematologiyasi va immunologiyasi ilmiy-amaliy tibbiyot markazi 2027-yil 1-yanvardan boshlab Davlat budjeti mablagʻlari hisobiga imtiyozli toifaga kiruvchi shaxslarni elektron axborot tizimi orqali hisobga olish va navbat asosida davolanishga yoʻllash tizimiga oʻtkaziladi”;

(v) 3-ilovada:

(I) 1-pozitsiya “Talab etiladigan maʼlumotlar” ustuni quyidagi mazmundagi 7-band bilan toʻldirilsin:

“7. Sogʻliqni saqlash vazirligi tomonidan tasdiqlanadigan roʻyxat boʻyicha gematologiya kasalliklari toʻgʻrisida maʼlumot”;

(II) 5-pozitsiya “Talab etiladigan maʼlumotlar” ustuni quyidagi tahrirda bayon etilsin:

“1. Vatan himoyasi va el-yurt tinchligi yoʻlida yaralanganligi, kontuziya yoki mayib boʻlganligi oqibatida halok boʻlgan harbiy xizmatchining (xodimning) oila aʼzolari toʻgʻrisidagi maʼlumot.

2. Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiya, Davlat xavfsizlik xizmati, Oʻzbekiston Respublikasi Prezidenti davlat xavfsizlik xizmati, Bojxona qoʻmitasi va Elektron texnologiyalarni rivojlantirish markazi tizimidagi tashkilotlarda xizmat davri boʻyicha pensiyaga chiqqan ishlamaydigan shaxslar toʻgʻrisida maʼlumot”.

4. Oʻzbekiston Respublikasi Prezidentining 2023-yil 4-apreldagi “Iqtisodiy islohotlarni amalga oshirishda ilmiy yondashuvlarni kengaytirish va boshqaruv kadrlarini tayyorlash tizimini yanada takomillashtirish chora-tadbirlari toʻgʻrisida”gi PQ-108-son qarorida:

(a) 6-band quyidagi mazmundagi toʻrtinchi xatboshi bilan toʻldirilsin:

“Bunda Oliy maktabga ijtimoiy soliqning 12 foiz miqdordagi stavkasi qoʻllaniladi”;

(b) 2-ilovaning 1-bandi quyidagi tahrirda bayon etilsin:

“1. ”Biznesni boshqarish” (MBA) hamda iqtisodiyotning talab yuqori boʻlgan boshqa taʼlim yoʻnalishlari va mutaxassisliklari boʻyicha bakalavrlar va magistrlar tayyorlash, shuningdek oliy taʼlimdan keyingi taʼlimni amalga oshirish”.

5. Oʻzbekiston Respublikasi Prezidentining 2024-yil 5-sentabrdagi “Davlat tibbiy sugʻurtasi mexanizmlarini joriy etishga oid chora-tadbirlar toʻgʻrisida”gi PQ-311-son qarorida:

(a) 3-bandning birinchi xatboshisidagi “2025-yil 1-iyuldan” soʻzlari “2026-yil 1-yanvardan” soʻzlari bilan almashtirilsin;

(b) 6-band quyidagi mazmundagi “d1”kichik band bilan toʻldirilsin:

“d1) aholiga zarur tibbiy xizmatlardan teng foydalanish imkoniyatini taʼminlash maqsadida Davlat budjetidan tibbiy xizmatlar xaridi uchun ajratilgan mablagʻlar Jamgʻarma tomonidan yagona yondashuv asosida hududlar va tibbiyot muassasalari oʻrtasida qayta taqsimlanadi”;

(v) 8-band “b” kichik bandining birinchi xatboshisidagi “1-aprelga qadar” soʻzlari “1-iyulga qadar” soʻzlari bilan almashtirilsin;

(g) 10-bandda:

(I) quyidagi mazmundagi uchinchi xatboshi bilan toʻldirilsin:

“tibbiyot muassasalarini moliyalashtirishda yangi toʻlov usullarini (aholi jon boshiga, davolangan holatlar boʻyicha va boshqalar) joriy qilish uchun mahalliy budjetlardan Jamgʻarmaga oʻtkaziladigan mablagʻlar Jamgʻarmaning yagona shaxsiy gʻazna hisobvaragʻida jamlanishini hamda hududlar va tibbiyot muassasalari oʻrtasida qayta taqsimlanishini”;

(II) uchinchi xatboshi toʻrtinchi xatboshi deb hisoblansin;

(d) 7-ilovaning 9-bandi oʻn birinchi xatboshisidan “Jamgʻarma mablagʻlaridan oqilona va maqsadli foydalanilishini hamda davlat tibbiy sugʻurtasi dasturi doirasida” soʻzlari chiqarib tashlansin.

6. Oʻzbekiston Respublikasi Prezidentining 2024-yil 29-noyabrdagi “Tibbiyot muassasalarini farmatsevtika mahsulotlari va tibbiy jihozlar bilan taʼminlash tizimini takomillashtirish chora-tadbirlari toʻgʻrisida”gi PQ-408-son qarorida:

(a) 2-band “a” kichik bandining beshinchi xatboshisi quyidagi mazmundagi beshinchi — yettinchi xatboshilar bilan almashtirilsin:

“Bunda:

original dori vositalari hamda yopiq turdagi laboratoriya uskunasi roʻyxati Sogʻliqni saqlash vazirligi tomonidan tasdiqlanadi hamda vazirlikning rasmiy veb-saytiga joylashtiriladi va muntazam yangilab boriladi;

toʻgʻridan-toʻgʻri shartnomalar asosida sotib olinadigan dori vositalari va tibbiy buyumlarning shoshilinch va tez tibbiy yordam koʻrsatish uchun zarur miqdorda va hajmda xarid qilinishi boʻyicha masʼuliyat va shaxsiy javobgarlik tibbiyot muassasasi rahbari zimmasiga yuklatiladi”;

(b) 1-ilovaning 3-pozitsiyasida:

“Amalga oshirish mexanizmi” ustunida:

1-band oʻz kuchini yoʻqotgan deb hisoblansin;

2-band quyidagi tahrirda bayon etilsin:

“2. Dori vositalari va tibbiy buyumlar xaridini toʻgʻridan-toʻgʻri shartnomalar asosida amalga oshirish tartibini ishlab chiqish. Bunda original dori vositalari hamda yopiq turdagi laboratoriya uskunasi roʻyxati Sogʻliqni saqlash vazirligi tomonidan tasdiqlanadi va rasmiy veb-saytiga joylashtirib boriladi”;

“Ijro muddati” ustunida:

“2024-yil dekabr” soʻzlari chiqarib tashlansin;

“2025-yil mart” soʻzlari “2025-yil iyul” soʻzlari bilan almashtirilsin.