2025-2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini amalga oshirish chora-tadbirlari toʻgʻrisida (PQ-186-son)

19.05.2025

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2023-yil 11-sentabrdagi “Oʻzbekiston — 2030” strategiyasi toʻgʻrisida”gi PF-158-son Farmoni bilan aholi salomatligini taʼminlash sohasida belgilangan vazifalarni, shuningdek, onkologik va onkogematologik kasalliklarga chalingan bolalarni profilaktika qilish, tashxislash, davolash va reabilitatsiya qilish tizimini tubdan takomillashtirishga, ularning hayot sifatini yaxshilashga, kasalliklarni erta aniqlash, kompleks terapiya qilish va xalqaro standartlarga muvofiq uzoq muddatli kuzatuv olib borish imkonini beradigan qulay, yuqori texnologik va innovatsion tibbiy infratuzilmani yaratishga, pediatriya xizmati hamda bolalar onkologiyasi, gematologiyasi va immunologiyasi xizmatining moddiy-texnika bazasini mustahkamlashga yoʻnaltirilgan global va milliy strategik tashabbuslarni amalga oshirish maqsadida qaror qilaman:

I. Maqsadlar

1. Quyidagilar 2025 — 2030-yillarda Oʻzbekistonda bolalar saratoniga qarshi kurashishning asosiy maqsadlari etib belgilansin:

(a) bolalar saratonini erta bosqichlarda aniqlash holatlari ulushini 65 foizgacha oshirish;

(b) onkologik va onkogematologik kasalliklarga chalingan bolalarning bir yillik yashovchanligini 34 foizdan 90 foizgacha, besh yillik yashovchanligini esa kamida 60 foizgacha oshirish;

(v) saraton kasalligiga chalingan bolalarni 100 foiz ixtisoslashtirilgan tibbiy yordam bilan qamrab olish;

(g) onkogematologik kasalliklarga tashxis qoʻyish muddatlarini 4 kungacha va onkologik kasalliklarga tashxis qoʻyish muddatlarini 14 kungacha qisqartirish;

(d) onkologik va onkogematologik kasalliklarni davolashni 10 kundan 20 kungacha boʻlgan muddatda boshlash;

(e) birlamchi tibbiy-sanitariya yordami muassasalarida bolalar saratoni belgilarini aniqlash uchun sharoitlar yaratish;

(j) kadrlar salohiyatini oshirish, ustuvor tartibda hududlardagi tibbiyot muassasalarining moddiy-texnika bazasini mustahkamlash, bolalar saratoniga qarshi kurashishning barcha boʻgʻinlarida biznes jarayonlarni raqamlashtirish.

II. Bolalar saratoniga qarshi kurashish boʻyicha milliy dastur

2. Xalqaro ekspertlar va Jahon sogʻliqni saqlash tashkiloti ishtirokida 2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturi (keyingi oʻrinlarda — Dastur) ishlab chiqilganligi maʼlumot uchun qabul qilinsin.

3. Ushbu Farmon bilan belgilangan maqsad va ustuvor vazifalarga erishish uchun quyidagilar tasdiqlansin:

(a) 2025 — 2026-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini amalga oshirish boʻyicha kompleks chora-tadbirlar dasturi 1-ilovaga muvofiq;

(b) 2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini amalga oshirishning maqsadli koʻrsatkichlari 2-ilovaga muvofiq.

4. Belgilansinki, Dastur Vazirlar Mahkamasi tomonidan tasdiqlanadigan ikki yillik chora-tadbirlar rejalari asosida amalga oshiriladi.

III. Ustuvor vazifalar

5. Quyidagilar Dasturning ustuvor vazifalari etib belgilansin:

(a) saraton (onkologik, onkogematologik) kasalliklarga chalingan bolalarning profilaktikasi, diagnostikasi, kasalliklarni erta aniqlash, davolash va parvarishlash tizimini quyidagilar orqali takomillashtirish:

(i) tibbiyot brigadasi xodimlarining saraton kasalliklariga shubhalarni aniqlash uchun soʻrovnoma, tibbiy koʻrik va birlamchi skrining oʻtkazish boʻyicha malakasini oshirish;

(ii) barcha tuman (shahar)larda saraton va boshqa kasalliklarni erta bosqichlarda tashxislash imkonini beruvchi zarur uskunalar bilan jihozlangan markaziy laboratoriyalar xizmatini rivojlantirish;

(iii) saratonga shubha qilingan bolalarni tezlashtirilgan holda tashxislash va davolash tizimini (“yashil” yoʻlak) joriy etish, bunda bolalar onkologiyasi, gematologiyasi va immunologiyasi xizmatining butun vertikali boʻylab bemorlarni yoʻnaltirish reglamentini tasdiqlash va unga rioya qilishni nazarda tutish;

(iv) tibbiy maʼlumotlarni boshqarish jarayonlarini raqamlashtirish, tibbiyot xodimlarini oʻz faoliyatida axborot-kommunikatsiya texnologiyalarini qoʻllashga oʻqitish, shuningdek, sunʼiy intellekt imkoniyatlaridan faol foydalanish hisobiga tashxislash va davolash usullarini takomillashtirish;

(b) quyidagilar hisobiga koʻrsatilayotgan tibbiy yordam sifatini oshirish va oʻlim holatlarini kamaytirish:

(i) barcha darajalardagi saratonga qarshi kurashish muassasalari faoliyatiga innovatsion texnologiyalar va ilmiy-amaliy tadqiqotlar natijalarini joriy etish, shuningdek, hududlarning mutaxassis kadrlar bilan toʻldirilishini taʼminlash hamda ularning malakasini uzluksiz oshirish va tayyorlash tizimini yaratish;

(ii) xalqaro maslahatchilar va hamkorlarning tavsiyalariga muvofiq xalqaro standartlar va davolash protokollarini joriy etish;

(iii) Bolalar onkologiyasi, gematologiyasi va immunologiyasi ilmiy-amaliy tibbiyot markazi (keyingi oʻrinlarda — Markaz), shuningdek, hududiy bolalar koʻp tarmoqli tibbiyot markazlarining moddiy-texnika bazasini mustahkamlash orqali yuqori texnologik tibbiy yordam koʻrsatish infratuzilmasini shakllantirish;

(iv) tuman (shahar) tibbiyot birlashmalarini zamonaviy uskunalar bilan jihozlash hamda dori vositalari bilan uzluksiz taʼminlash;

(v) saraton kasalligiga chalingan bolalar va ularning oilalari uchun palliativ yordam va xospis tizimini takomillashtirish hisobiga bemorlarning hayot sifatini yaxshilash;

(g) profilaktik tadbirlarni faollashtirish va aholining bolalar saratoni haqida xabardorligini oshirish.

IV. Dasturni joriy etish loyihasi

6. Sogʻliqni saqlash vazirligining quyidagilarni nazarda tutuvchi Dasturni joriy etish loyihasini (keyingi oʻrinlarda — Loyiha) 2025-2026-yillarda Samarqand shahri va Ishtixon tumanidagi tibbiyot muassasalari bazasida amalga oshirish hamda uni kelgusida zarur shart-sharoitlar yaratilishiga qarab mamlakatning boshqa hududlariga parallel ravishda kengaytirish boʻyicha taklifiga rozilik berilsin:

(a) tibbiyot brigadasi xodimlarini saraton kasalliklariga birlamchi shubhalarni aniqlash boʻyicha soʻrovnoma va tibbiy koʻrik oʻtkazish hamda birlamchi skrining tartib-qoidalariga oʻqitish orqali tibbiyot xodimlarining onkologik va onkogematologik hushyorligini oshirish;

(b) bemorlarni yoʻnaltirishning kasalliklarni tuman darajasida aniqlash va birlamchi tashxis qoʻyish, hududiy va respublika darajalarida tashxisni tasdiqlash va yuqori texnologik davolash, reabilitatsiya qilish va palliativ yordam koʻrsatish tamoyili boʻyicha ishlaydigan yangi tizimini joriy etish;

(v) kasalliklarni erta aniqlash va tashxis qoʻyish samaradorligini oshirish, shuningdek, bemorning yoʻnaltirilishini nazorat qilish uchun tibbiyot xodimlarining bolalar bilan ishlash jarayonlarini raqamlashtirish va sunʼiy intellekt texnologiyalarini joriy etish;

(g) tuman (shahar), viloyat va respublika darajasidagi tibbiyot muassasalari xodimlarini qayta tayyorlash va malakasini oshirish;

(d) bemor bolalarga ambulatoriya va statsionar darajada palliativ yordam koʻrsatishni joriy etish.

V. Loyihani joriy etishning tashkiliy-texnik taʼminoti

7. Quyidagilar tasdiqlansin:

(a) Qoraqalpogʻiston Respublikasi va viloyatlar bolalar koʻp tarmoqli tibbiyot markazlari uchun qoʻshimcha binolarni qurish rejasi 3-ilovaga muvofiq;

(b) Tuman (shahar) tibbiyot birlashmalariga qarashli tibbiyot muassasalarini va bolalar shifoxonalarini jihozlash uchun tibbiy asbob-uskunalar roʻyxati 4-ilovaga muvofiq;

(v) Bolalar shifoxonalarini jihozlash uchun tibbiy asbob-uskunalar roʻyxati 4a-ilovaga muvofiq.

8. Raqamli texnologiyalar vazirligi va “Davlat axborot tizimlarini yaratish va qoʻllab-quvvatlash boʻyicha yagona integrator — “UZINFOCOM” MCHJ Sogʻliqni saqlash vazirligi bilan birgalikda:

(a) 2025-yil 1-iyulga qadar “Elektron sogʻliqni saqlash” axborot tizimida:

(i) onkologik va onkogematologik kasalliklarga chalingan bolalarni roʻyxatga olish, tashxislash, davolash, dispanser kuzatuvi hamda yoʻnaltirish jarayonlarini oʻz ichiga olgan bemorlarning raqamlashtirilgan marshrutini joriy etsin;

(ii) tibbiyot xodimlarini oʻqitish va foydalanuvchilar uchun qulay interfeys yaratish orqali shifokor qabuliga masofadan yozilish hamda onlayn konsultatsiyalar oʻtkazish imkoniyatini yaratsin;

(b) 2025-yil yakuniga qadar Loyihani amalga oshirish doirasida sunʼiy intellekt texnologiyalarini joriy etishni taʼminlasin.

9. Oʻzbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam koʻrsatishni yanada takomillashtirish chora-tadbirlari toʻgʻrisida”gi PQ-183-son qaroriga muvofiq, Vena tibbiyot universiteti (Avstriya) va “AME International” (Avstriya) kompaniyasi vakillaridan iborat konsorsium tomonidan quyidagilarni nazarda tutuvchi Oʻzbekistonda bolalar onkologiyasi, gematologiyasi va immunologiyasi xizmatini takomillashtirish boʻyicha master reja (keyingi oʻrinlarda — Master reja) ishlab chiqilganligi maʼlumot uchun qabul qilinsin:

(a) Markazda va bolalar onkologiyasi, gematologiyasi va immunologiyasi xizmatining vertikali boʻylab bolalarni yuqori samarali tashxislash, davolash, reabilitatsiya qilish va palliativ yordam koʻrsatish boʻyicha jahon standartlari, protokollari va tavsiyalarini joriy etish;

(b) bolalar onkologiyasi, gematologiyasi va immunologiyasi xizmatini boshqarish vertikalining samaradorligini oshirish, shu jumladan, kadrlar salohiyatini rivojlantirish, tibbiyot xodimlari uchun xorijiy stajirovkalar va boshqa taʼlimga oid tadbirlarni tashkil etish;

(v) Markaz hududida Master rejada nazarda tutilgan obyektlarni, shu jumladan, simulyatsiya markazi joylashgan aseptik blok, laboratoriya-diagnostika hamda radiologiya bloki va nur terapiyasi boʻlimini, poliklinika va maʼmuriy binoni loyihalashtirish, qurish, yangilash va jihozlash.

10. Markazga, istisno tariqasida, “AME International” kompaniyasi bilan toʻgʻridan-toʻgʻri muzokaralar oʻtkazish orqali kamida 50 foiz miqdorida avans toʻlovlarini amalga oshirish imkoniyati bilan 2025 — 2027-yillar davomida Master rejani boshqarish va amalga oshirish boʻyicha EPC shartnoma tuzishga ruxsat berilsin.

11. Bolalar onkologiyasi, gematologiyasi va immunologiyasi xizmatining akademik, ilmiy va kadrlar salohiyatini rivojlantirish hamda mintaqa davlatlari oʻrtasida bolalar onkogematologiyasi boʻyicha tajriba almashish maqsadida yetakchi Yevropa universitetlari klinikalari koʻmagida Markaz huzurida davlat muassasasi shaklida Bolalar saratoni boʻyicha xalqaro akademik xab (keyingi oʻrinlarda — Akademik xab) tashkil etilsin.

Amerika Qoʻshma Shtatlarining Dana-Farber Cancer institute tashkiloti Markazning asosiy hamkori etib belgilansin.

12. Belgilansinki, Akademik xab ilmiy-taʼlim muassasasi hisoblanadi hamda unga quyidagi asosiy vazifalar yuklatiladi:

(a) xalqaro sertifikatlashtirish va uzluksiz tibbiy taʼlim tizimi boʻyicha ballar toʻplash standartlariga mos keladigan xalqaro taʼlim dasturlarini joriy etish;

(b) qayta tayyorlash va malaka oshirishni tashkil etish orqali bolalar onkologiyasi, gematologiyasi va immunologiyasi xizmati uchun malakali tibbiy va ilmiy kadrlarni tayyorlash;

(v) bolalarda onkologik va onkogematologik kasalliklarni erta aniqlash, tashxislash va davolashning zamonaviy usullarini ishlab chiqish va joriy etishga qaratilgan bolalar onkologiyasi, gematologiyasi va immunologiyasi sohasida ilgʻor klinik va amaliy tadqiqotlarni tatbiq qilish va innovatsiyalarni joriy etish;

(g) tibbiyot muassasalarining bolalar onkologiyasi, gematologiyasi va immunologiyasi sohasidagi ilmiy salohiyatni rivojlantirish va mustahkamlash, shuningdek, xalqaro hamkorlikni hamda global akademik va tadqiqot tarmoqlariga integratsiyalashuvni rivojlantirish;

(d) yetakchi xorijiy farmatsevtika kompaniyalari va tibbiyot markazlari bilan birgalikda Sogʻliqni saqlash vazirligining talablariga muvofiq belgilangan tartibda istiqbolli dori vositalari va davolash metodikalarining klinik sinovlarini oʻtkazish;

(e) strategik rejalashtirish va profilaktik chora-tadbirlar ishlab chiqish uchun bolalar saratoni bilan kasallanishning epidemiologik tendensiyalarini tahlil qilish va prognozlash.

Ushbu bandda nazarda tutilgan vazifalarni amalga oshirish uchun Akademik xabga xalqaro taʼlim tashkilotlar, xorijiy va mahalliy ekspertlarni Akademik xabning faoliyatini moliyalashtirish manbalari hisobidan toʻgʻridan-toʻgʻri shartnomalar asosida jalb qilish huquqi beriladi.

13. Oʻzbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam koʻrsatishni yanada takomillashtirish chora-tadbirlari toʻgʻrisida”gi PQ-183-son qarori bilan tasdiqlangan Bolalar onkologiyasi, gematologiyasi va immunologiyasi ilmiy-amaliy tibbiyot markazining kuzatuv kengashiga:

(a) Akademik xabning taʼsis hujjatlarini, xarajatlar va daromadlar smetasini hamda tuzilmasini tasdiqlash;

(b) Akademik xabda tahsil olish uchun budjet mablagʻlari hisobidan grant kvotalarini belgilash;

(v) xorijiy tinglovchilar uchun oʻqitish xarajatlari miqdorini belgilash huquqi berilsin.

14. Belgilab qoʻyilsinki, 2028-yil 1-yanvarga qadar respublikada ishlab chiqarilmaydigan va belgilangan tartibda tasdiqlangan roʻyxatlar boʻyicha Akademik xab uchun olib kiriladigan oʻquv va ilmiy laboratoriya jihozlari, kompyuter texnikasi, multimedia mahsulotlari, oʻquv va ilmiy-metodik adabiyotlar, inventar va moddiy-texnika resurslari bojxona toʻlovlaridan (qoʻshilgan qiymat soligʻi va bojxona rasmiylashtiruvi yigʻimlaridan tashqari) ozod qilinadi.

15. Vazirlar Mahkamasi ikki hafta muddatda Akademik xab faoliyatini tashkil etish va joylashtirish boʻyicha qaror qabul qilsin hamda uni moliyalashtirish manbai etib Oʻzbekiston Respublikasining respublika budjeti mablagʻlari belgilansin.

VI. Moliyaviy taʼminot

16. Iqtisodiyot va moliya vazirligi Markazning asoslangan hisob-kitoblari asosida 2025-yilda onkologik, onkogematologik va immunologik kasalliklarga chalingan bolalarni dori vositalari bilan taʼminlash uchun qoʻshimcha mablagʻlar ajratsin, 2026-yildan boshlab Davlat budjeti parametrlarini shakllantirishda zarur mablagʻlarni nazarda tutsin.

17. Sogʻliqni saqlash vazirligi Iqtisodiyot va moliya vazirligi bilan birgalikda Dasturni amalga oshirish doirasida zarur moddiy-texnik bazaning tayyorligi va kadrlar taʼminotidan kelib chiqib, tibbiyot muassasalarining shtat normativlari qayta koʻrib chiqilishini hamda zarur mutaxassislar lavozimlari kiritilishini taʼminlasin.

18. Belgilab qoʻyilsinki:

(a) mazkur qaror ijrosini taʼminlash bilan bogʻliq xarajatlar 2025-yilda Davlat budjetidan qoʻshimcha ajratiladigan mablagʻlar hisobidan moliyalashtiriladi, 2026-yildan boshlab Davlat budjeti parametrlarida nazarda tutiladi;

(b) hududiy bolalar koʻp tarmoqli tibbiyot markazlari uchun qoʻshimcha binolarni qurishni moliyalashtirish 2025 — 2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi mablagʻlari hisobidan amalga oshiriladi;

(v) Tibbiyot muassasalarini jihozlash xalqaro moliya institutlari va “KfW” banki (Germaniya Federativ Respublikasi) mablagʻlari, Sogʻliqni saqlash vazirligiga ajratilgan mablagʻlar, shuningdek, Oʻzbekiston Respublikasi benefitsiar boʻlgan xalqaro kelishuvlar doirasida amalga oshiriladi;

(g) Akademik xabni yaratish va jihozlash xalqaro moliya institutlari va texnik koʻmak mablagʻlari hisobidan amalga oshiriladi.

19. Investitsiyalar, sanoat va savdo vazirligi Iqtisodiyot va moliya vazirligi hamda Sogʻliqni saqlash vazirligi bilan birgalikda ikki oy muddatda Avstriya hukumati va Yevropa Ittifoqi, xalqaro moliya institutlari va xorijiy hukumat moliya tashkilotlari mablagʻlari, shu jumladan, Islom taraqqiyot bankining texnik koʻmak va imtiyozli kredit mablagʻlarini Master rejani boshqarish va amalga oshirish loyihasini birgalikda moliyalashtirish, shuningdek, Akademik xabni yaratish va jihozlash loyihasini amalga oshirish uchun jalb qilsin.

VII. Qaror ijrosini tashkil etish, taʼminlash va nazorat

20. Sogʻliqni saqlash vazirligi bir hafta muddatda Dasturni oʻzining rasmiy veb-saytida joylashtirsin.

21. Sogʻliqni saqlash vazirligiga Loyiha amalga oshirilishiga va boshqa hududlarda bosqichma-bosqich joriy etilishiga qarab Dastur parametrlariga, shuningdek, qurilish-montaj ishlarini toʻxtatish, loyihalarga oʻzgartirish kiritish va tibbiyot muassasalarini jihozlash dasturlariga tuzatishlar kiritish huquqi berilsin.

22. 2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturi chora-tadbirlarini amalga oshirish boʻyicha ishchi guruh (keyingi oʻrinlarda — Ishchi guruh) 5-ilovaga muvofiq tarkibda tuzilsin, uning asosiy vazifalari etib normativ-huquqiy hujjatlar loyihalarini sifatli ishlab chiqish, shuningdek, Dasturni amalga oshirishga koʻmaklashish belgilansin.

23. Qurilish va uy-joy kommunal xoʻjaligi vazirligi Markaz bilan kelishgan holda ikki oy muddatda xalqaro standartlarga koʻra bolalar onkogematologiyasi boʻlinmalari uchun 30 — 80 oʻringa moʻljallangan binolarning (zarur hollarda, nur diagnostikasi va terapiyasi uchun binolar bilan birga) namunaviy loyihalarini ishlab chiqsin.

24. Qoraqalpogʻiston Respublikasi Vazirlar Kengashi, viloyatlar hokimliklari:

(a) bolalar onkogematologiyasi boʻlinmalari bloklari binolarini qurishda tasdiqlangan namunaviy loyihalarga qatʼiy rioya etilishi, yer uchastkalari ajratilishi va tayyorlanishi, zarur muhandislik kommunikatsiyalari olib borilishini taʼminlasin;

(b) Dastur va uni amalga oshirish boʻyicha kompleks chora-tadbirlar dasturida nazarda tutilgan tadbirlarning oʻz vaqtida sifatli ijro etilishini taʼminlasin.

25. Sogʻliqni saqlash vazirligi quyidagilarni nazarda tutuvchi normativ-huquqiy hujjatlar loyihasini Vazirlar Mahkamasiga kiritsin:

(b) ikki oy muddatda Kam uchraydigan (orfan) va boshqa irsiy-genetik kasalliklarga chalingan bolalarga tibbiy va ijtimoiy yordam koʻrsatishni tashkil etish boʻyicha 2025 — 2030-yillarga moʻljallangan chora-tadbirlar dasturini;

(v) 2025-yil yakuniga qadar Ekologiya, atrof-muhitni muhofaza qilish va iqlim oʻzgarishi vazirligi, Maktabgacha va maktab taʼlimi vazirligi, Qishloq xoʻjaligi vazirligi, Oʻzbekiston mahallalari uyushmasi bilan birgalikda onkologik va gematologik kasalliklarni oʻz ichiga olgan yuqumli boʻlmagan kasalliklarga qarshi kurashish boʻyicha profilaktik chora-tadbirlar dasturini.

26. Oliy Majlis palatalariga Oliy Majlis Senati va Qonunchilik palatasi, xalq deputatlari mahalliy kengashlari majlislarida tegishli davlat organlari rahbarlarining mazkur qarorni amalga oshirish doirasida qilingan ishlari toʻgʻrisidagi hisobotlarini muntazam eshitib borishni tashkil etish tavsiya etilsin.

27. Oʻzbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam koʻrsatishni yanada takomillashtirish chora-tadbirlari toʻgʻrisida”gi PQ-183-son qaroriga 6-ilovaga muvofiq oʻzgartirish va qoʻshimchalar kiritilsin.

28. Sogʻliqni saqlash vazirligi Oʻzbekiston Milliy axborot agentligi va Oʻzbekiston Milliy teleradiokompaniyasi bilan birgalikda ommaviy axborot vositalarida mazkur qarorning maqsad va vazifalari, shuningdek, Dasturning amalga oshirilishi va maqsadli koʻrsatkichlariga erishilishining borishi keng yoritilishini taʼminlasin.

29. Mazkur qarorning samarali ijrosini tashkil etish uchun shaxsiy javobgarlik sogʻliqni saqlash vaziri A.A. Xudayarov zimmasiga yuklansin.

30. Qaror ijrosini muhokama qilib borish, uning ijrosi uchun masʼul boʻlgan tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti Administratsiyasining Ijtimoiy rivojlanish departamenti rahbari O.K. Abduraxmanov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2025-yil 19-may,

PQ-186-son

Oʻzbekiston Respublikasi Prezidentining 2025-yil 19-maydagi PQ-186-sonli qaroriga 1-ILOVA

2025-2026-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini amalga oshirish boʻyicha

KOMPLEKS CHORA-TADBIRLAR DASTURI

T/rTadbirlar nomiAmalga oshirish mexanizmiBajarish muddatiMoliyalashtirish manbalariMasʼul ijrochilarI. Tashkiliy-huquqiy taʼminot1.Bolalar saratoni bilan kurashish boʻyicha milliy rejani tasdiqlash.1. 2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturi konsepsiyasi asosida Bolalar saratoniga qarshi kurashishning 2026 — 2035-yillarga moʻljallangan milliy rejani ishlab chiqish.2025-yil avgust–Sogʻliqni saqlash vazirligi,Bolalar onkologiyasi, gematologiyasi va immunologiyasi ilmiy-amaliy tibbiyot markazi(keyingi oʻrinlarda — Markaz)2. Milliy rejani Jahon sogʻliqni saqlash tashkilotining tavsiyalari asosida xalqaro standartlarga muvofiq shaklda tasdiqlash hamda vazirlikning rasmiy veb-saytida joylashtirish2026-yil iyun 2.Palliativ va xospis yordami koʻrsatishning huquqiy va tashkiliy asoslarini takomillashtirish.1. Oʻzbekiston Respublikasining “Fuqarolar sogʻligʻini saqlash toʻgʻrisida”gi Qonuniga palliativ va xospis yordami koʻrsatishning huquqiy va tashkiliy asoslarini nazarda tutuvchi oʻzgartirish va qoʻshimchalar kiritish yuzasidan qonun loyihasini ishlab chiqish.2025-yil noyabr–Sogʻliqni saqlash vazirligi, Oʻzbekiston texnik jihatdan tartibga solish agentligi, Markaz2. Palliativ yordam shifokori va palliativ yordam hamshirasi lavozimlarini joriy etish maqsadida Xizmatchilarning asosiy lavozimlari va ishchilar kasblari klassifikatoriga oʻzgartirish kiritish.3.2025-2026-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini joriy etish uchun huquqiy baza yaratish.2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini 2025-2026-yillarda Samarqand shahri va Ishtixon tumanida joriy etish boʻyicha normativ-huquqiy hujjat loyihasini ishlab chiqish va Vazirlar Mahkamasiga kiritish.2025-yil may–Sogʻliqni saqlash vazirligi, Samarqand viloyati hokimligi,Markaz4.Bolalar saratoni boʻyicha xalqaro akademik xab tashkil etish va uning faoliyat yuritishi uchun normativ-huquqiy bazani ishlab chiqish.1. Bolalar saratoni boʻyicha xalqaro akademik xab faoliyatini tashkil etish toʻgʻrisidagi normativ-huquqiy hujjat loyihasini ishlab chiqish va tasdiqlash uchun Vazirlar Mahkamasiga kiritish. Bunda quyidagilarni belgilash:(a) vazifalar va funksiyalar;(b) bino bilan taʼminlash va jihozlashni oʻz ichiga olgan moddiy-texnik bazani yaratish;(v) boshqa tashkiliy masalalar.2025-yil may–Sogʻliqni saqlash vazirligi, Markaz, Iqtisodiyot va moliya vazirligi, Oliy taʼlim, fan va innovatsiyalar vazirligi2. Akademik xabni rivojlantirish konsepsiyasini ishlab chiqish va Vazirlar Mahkamasiga kiritish.2025-yil sentabr5.Ambulator darajada palliativ yordam koʻrsatish uchun zarur boʻlgan normativ-huquqiy bazani ishlab chiqish.Bemorlarni uyda parvarish qilish, ularga palliativ va xospis yordami koʻrsatish tartibini ishlab chiqish va Vazirlar Mahkamasiga kiritish.2025-yil dekabr–Sogʻliqni saqlash vazirligi, MarkazII. Bolalar saratonini profilaktika qilish, tashxislash va davolash tizimini takomillashtirish6.Milliy standartlar va klinik protokollarni tasdiqlash.1. Xalqaro tavsiyalarga muvofiq bolalar saratonini tashxislash va davolash boʻyicha standartlar va milliy klinik protokollarni tasdiqlash.2025-yil dekabr–Sogʻliqni saqlash vazirligi, Markaz2. Shubhali alomatlar aniqlanganda, bemorlarni yoʻnaltirishda va tibbiyot muassasalari oʻrtasidagi oʻzaro aloqada tibbiyot xodimlarining faoliyatini tartibga soluvchi standart operatsion tartiblarni ishlab chiqish va joriy etish. 3. JSST tomonidan tavsiya etilgan xalqaro mezonlar asosida bolaning funksional holatini baholash tizimini joriy etish.7.2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini 2025-2026-yillarda Samarqand shahri va Ishtixon tumanida joriy etish loyihasini (keyingi oʻrinlarda — Loyiha) amalga oshirish.1. Markaz qoshida Loyihani amalga oshirish guruhini tuzish.2025-yil iyunOnkologik va gematologik kasalliklarga chalingan bolalarni sogʻlomlashtirishga koʻmaklashish jamgʻarmasi mablagʻlariDavlat budjeti mablagʻlariSogʻliqni saqlash vazirligi, Iqtisodiyot va moliya vazirligi2. Samarqand viloyatida Loyihani amalga oshirish guruhi aʼzolarining samarali ishlashi uchun sharoitlar yaratish choralarini koʻrish.2025-yil iyul3. Birlamchi tibbiy-sanitariya yordami tizimi tibbiyot xodimlarini oʻqitish orqali ularning onkologik va onkogematologik hushyorligini oshirish.Reja-grafik asosida4. Shahar, viloyat va respublika darajasidagi tibbiyot xodimlarini qayta tayyorlash va ularning malakasini oshirish. 5. Ambulator darajada palliativ yordam koʻrsatishni joriy etish, bemorlarni uyda parvarish qilish, ularga palliativ va xospis yordami koʻrsatishni yoʻlga qoʻyish.9.Loyihaning amaliyotga joriy etilishi va uning ijrosini nazorat qilish.Loyihaning implementatsiyasi boʻyicha monitoring rejasini ishlab chiqish va uning nazoratini taʼminlash.2026-yil iyun–Sogʻliqni saqlash vazirligi,Strategik islohotlar agentligi,“Sogʻliqni saqlash loyihalari markazi” loyiha ofisiIII. Reabilitatsiya va palliativ yordam hamda ijtimoiy qoʻllab-quvvatlash tizimini joriy etish10.Onkologik va onkogematologik kasalliklarga chalingan bolalarni tibbiy reabilitatsiya qilish tizimini rivojlantirish.1. Hududiy bolalar koʻp tarmoqli tibbiyot markazlarida onkologik va onkogematologik kasalliklarga chalingan bolalarni reabilitatsiya qilish uchun 5 — 10 oʻrinli boʻlimlar tashkil etish.2025-2026-yillarDavlat budjeti mablagʻlari, xalqaro moliya institutlari mablagʻlari, xalqaro grantlarSogʻliqni saqlash vazirligi, Iqtisodiyot va moliya vazirligi, Investitsiyalar, sanoat va savdo vazirligi, Oʻzbekiston kasaba uyushmalari federatsiyasi2. Hududiy bolalar koʻp tarmoqli tibbiyot markazlarini reabilitatsiya uskunalari va texnologiyalari bilan jihozlash.3. Onkologik va onkogematologik tashxis bilan davolash kurslaridan soʻng davomli tibbiy reabilitatsiyaga muhtoj bemor bolalar uchun maxsus muassasalarda sanator-sogʻlomlashtirishni tashkil qilish.11.Bolalarni reabilitatsiya qilish boʻyicha milliy standartlarni ishlab chiqish va joriy etish.1. Standartlar, klinik protokollar va tavsiyalar, jismoniy, psixologik va nutritiv reabilitatsiya dasturlarini tayyorlash. 2025-2026-yillar–Sogʻliqni saqlash vazirligi, Ijtimoiy himoya milliy agentligi, Markaz2. Xalqaro amaliyotlarni joriy qilish va fanlararo yondashuvni taʼminlash.12.Bolalarga palliativ yordam koʻrsatish boʻyicha standartlar va klinik protokollarni ishlab chiqish va joriy etish.Bolalarga sifatli palliativ yordam koʻrsatishni taʼminlaydigan standartlar va milliy klinik protokollar hamda uslubiy tavsiyalarni ishlab chiqish.2025-yil dekabr–Sogʻliqni saqlash vazirligi,Markaz13.Palliativ va xospis yordami koʻrsatishni takomillashtirish.1. Davlat organlari, nodavlat tashkilotlar va boshqa manfaatdor tomonlar ishtirokida “Palliativ va xospis yordamini qoʻllab-quvvatlash assotsiatsiyasi” nodavlat notijorat tashkilotini tuzish.2025-yil noyabr–Sogʻliqni saqlash vazirligi,Adliya vazirligi,Kambagʻallikni qisqartirish va bandlik vazirligi2. Assotsiatsiyaning davlat va xususiy tibbiyot muassasalari bilan oʻzaro hamkorligi boʻyicha takliflar ishlab chiqish.14.Farzandiga saraton tashxisi qoʻyilgan oilalarni ijtimoiy himoya bilan qamrab olish.Nodavlat notijorat tashkilotlar bilan hamkorlikda saraton tashxisi qoʻyilgan bolalarning oilalarni ijtimoiy uy, ijtimoiy transport bilan taʼminlash va ularga psixologik yordam koʻrsatishni tashkil etish boʻyicha takliflar ishlab chiqish va Vazirlar Mahkamasiga kiritish.2025-yil noyabr–Ijtimoiy himoya milliy agentligi,Sogʻliqni saqlash vazirligiIV. Raqamli texnologiyalar va bemorlarni yoʻnaltirishning integratsiyalashgan tizimini joriy etish15.Bemorlarni raqamli yoʻnaltirish mexanizmini ishlab chiqish va joriy etish.1. Loyiha doirasida sunʼiy intellektni joriy etish boʻyicha texnik topshiriqni ishlab chiqish. 2025-yil iyulDavlat budjeti mablagʻlari, xalqaro moliya institutlari mablagʻlariRaqamli texnologiyalar vazirligi,Sogʻliqni saqlash vazirligi,Markaz2. “Elektron sogʻliqni saqlash” axborot tizimida onkologik va onkogematologik kasalliklarga chalingan bolalarni roʻyxatga olish, tashxislash, davolash, dispanser kuzatish va yoʻnaltirish jarayonlarini avtomatlashtirishni taʼminlaydigan, shu jumladan, sunʼiy intellekt texnologiyalaridan foydalanish orqali bemorlarni yoʻnaltirish mexanizmini ishlab chiqish va joriy etish. 3. Tibbiy maʼlumotlarni qayta ishlash va davolashning maqbul yoʻnalishini prognoz qilish uchun intellektual algoritmlarni joriy etish orqali bemorlarni yoʻnaltirish jarayonlarining samaradorligi va shaffofligini oshirish. 4. Tibbiy yordamning qulayligini oshirish va sogʻliqni saqlash muassasalariga tushadigan yuklamani kamaytirish maqsadida shifokor qabuliga masofadan yozilish va onlayn maslahatlar oʻtkazish funksiyasini ishga tushirish.Bunda bemor bolalar va ularning yaqin qarindoshlari uchun masofadan turib sogʻligʻi toʻgʻrisidagi maʼlumotlarni uzatish, shikoyatlar asosida keyingi qadamlar toʻgʻrisida koʻrsatmalar olish (onkonavigator) imkoniyatlarini yaratish.5. Koʻrsatilgan raqamli yechimlarni tegishli darajada ishlatishni taʼminlash uchun tibbiy, maʼmuriy va texnik xodimlarni oʻqitishni tashkil etish.Reja-grafik asosida6. Tibbiyotning barcha boʻgʻinlarida onkologik va onkogematologik kasalliklarga tashxis qoʻyish, shubhali holatlarga aniqlik kiritish maqsadida masofadan turib (teletibbiyot orqali) malakali mutaxassislardan iborat konsilium yigʻilishlarini tashkil qilish.16.Raqamli texnologiyalar va sunʼiy intellektdan foydalangan holda bolalarda onkologik va onkogematologik kasalliklarni tashxislash va davolash samaradorligini monitoring qilish uchun raqamli vositalarni ishlab chiqish va joriy etish.1. Tashxislash, yoʻnaltirish qoidalariga rioya qilish va davolash natijalarini baholash uchun raqamli tahliliy boshqaruv panellari va avtomatlashtirilgan hisobotlarni yaratish. 2025-2026-yillarDavlat budjeti mablagʻlari, xalqaro moliya institutlari mablagʻlariRaqamli texnologiyalar vazirligi, Sogʻliqni saqlash vazirligi, Markaz2. Monitoring markazini “Onkologik yoʻnaltirish” moduli va “Kanser-registr” bilan integratsiya qilish.3. Standartlardan chetga chiqishlarga tezkor munosabat bildirish uchun xabar berish va qayta aloqa tizimini shakllantirish.V. Tibbiyot muassasalari infratuzilmasi va moddiy-texnika bazasini rivojlantirish17.Oʻzbekistonda bolalar onkologiyasi, gematologiyasi va immunologiyasi xizmatini takomillashtirish boʻyicha master rejani amalga oshirish.1. Vena tibbiyot universiteti va “AME International” kompaniyasi bilan Loyihani samarali boshqarish va amalga oshirish boʻyicha EPC shartnomasini tuzish. Bunda:(a) xalqaro standartlarga muvofiq bolalar onkologiyasi, gematologiyasi va immunologiyasi milliy xizmatining butun vertikal boshqaruv tizimi samaradorligini oshirish, jumladan, oʻqitish va tibbiyot muassasalarini kadrlar salohiyati bilan taʼminlash, mutaxassislarning xorijiy klinikalarda stajirovkadan oʻtashini va boshqa oʻquv tadbirlarini tashkil etish hamda tajriba almashish;(b) master-rejaga muvofiq, Markaz hududidagi barcha rejalashtirilgan binolar (simulyatsiya markazi joylashgan aseptik blok, laboratoriya-tashxis bloki, radiologiya bloki va nur terapiyasi boʻlimi, poliklinika bloki, maʼmuriyat binosi)ni loyihalash, qurish, renovatsiya qilish va jihozlash. 2025-yil iyulDavlat budjetidan ajratilgan mablagʻlar, xalqaro moliya institutlari va xorijiy davlatlar moliya tashkilotlari mablagʻlariSogʻliqni saqlash vazirligi,Iqtisodiyot va moliya vazirligi,Investitsiyalar, sanoat va savdo vazirligi,Markaz2. Imtiyozli uzoq muddatli kreditlar berish orqali Loyihani hamkorlikda moliyalashtirish masalasini Avstriya va Yevropa Ittifoqining tegishli organlari, xalqaro moliya institutlari va tashkilotlari, jumladan, Islom taraqqiyot banki bilan ishlab chiqish. 3. Bolalar onkologiyasi, gematologiyasi va immunologiyasi xizmatini takomillashtirish master-rejasini amalga oshirish.2025 — 2027-yillar18.Respublika ixtisoslashtirilgan pediatriya ilmiy-amaliy tibbiyot markazi, bolalar shifoxonalari, shuningdek, tuman tibbiyot birlashmalarining moddiy-texnika bazasini mustahkamlash.1. Samarqand viloyati tibbiyot muassasalarining moddiy-texnika bazasini mustahkamlash, jumladan, tibbiyot muassasalarini qurish, taʼmirlash va rekonstruksiya qilish hamda jihozlash.2025-2026-yillarDavlat budjeti mablagʻlari, xalqaro moliya institutlari va xorijiy davlatlar moliya tashkilotlari mablagʻlari,qonunchilik hujjatlari bilan taqiqlanmagan boshqa manbalarSamarqand viloyati hokimligi, Sogʻliqni saqlash vazirligi, Iqtisodiyot va moliya vazirligi,MarkazQurilish va uy-joy kommunal xoʻjaligi vazirligi,Sogʻliqni saqlash vazirligi,MarkazQoraqalpogʻiston Respublikasi Vazirlar Kengashi, viloyatlar hokimliklari,Sogʻliqni saqlash vazirligi,MarkazQashqadaryo va Surxondaryo viloyatlari hokimliklari,Sogʻliqni saqlash vazirligi,MarkazSogʻliqni saqlash vazirligi,Iqtisodiyot va moliya vazirligi2. Xalqaro standartlarga muvofiq, hududiy bolalar koʻp tarmoqli tibbiyot markazlari bazasida 110 oʻringacha bloklarning namunaviy loyihasini ishlab chiqish.2025-yil avgust3. Hududiy bolalar koʻp tarmoqli tibbiyot markazlari bazasida (ambulator, statsionar davolash, palliativ parvarishlash va reanimatsiya uchun) 110 oʻringacha boʻlinma tashkil etish (qurish, rekonstruksiya qilish, taʼmirlash va jihozlash).2025 — 2027-yillar4. Qashqadaryo va Surxondaryo viloyatlarida qurilayotgan onkogematologiya boʻlimlari loyihalarini xalqaro standartlar talablariga moslashtirish.2025 — 2027-yillar5. Respublika ixtisoslashtirilgan pediatriya ilmiy-amaliy tibbiyot markazi, shahar va respublika bolalar shifoxonalari, shuningdek, tuman tibbiyot birlashmalarini zarur asbob-uskunalar bilan jihozlash.2025 — 2027-yillarVI. Kadrlar salohiyatini mustahkamlash, ilmiy faoliyatni rivojlantirish va xalqaro hamkorlik19.Tibbiyot muassasalarini zarur kadrlar bilan taʼminlash.Samarqand viloyati va boshqa hududlarda 2025–2030-yillarda bolalar saratoniga qarshi kurash boʻyicha Oʻzbekiston Respublikasi milliy dasturini joriy etish jarayonida tibbiyot muassasalarining shtat normativlarini qayta koʻrib chiqish, zaruratga koʻra, tor soha (bolalar onkolog-gematologi, palliativ yordam shifokori, palliativ yordam hamshirasi va boshqalar) mutaxassislari shtat birliklarini kiritish.2025-2026-yillarDavlat budjeti mablagʻlariSogʻliqni saqlash vazirligi, Iqtisodiyot va moliya vazirligi20.Birlamchi tibbiy-sanitariya yordami muassasalari tibbiyot xodimlari uchun “Onkologik hushyorlik” oʻquv dasturini amalga oshirish.1. Tibbiyot xodimlarining onkologik hushyorligini oshirish boʻyicha kompleks taʼlim dasturini ishlab chiqish va ularni oʻqitish. 2025-2026-yillarDavlat budjetidan ajratilgan mablagʻlar, xalqaro grantlarSogʻliqni saqlash vazirligi,Markaz2. Bolalarda xavfli oʻsmalarga shubha boʻlganda klinik fikrlash boʻyicha raqamli oʻquv modullari, chek-listlari va algoritmlarini yaratish.3. Oʻzlashtirilgan material samaradorligini baholash va olingan bilimlarni klinik amaliyotda qoʻllashni nazorat qilish.21.Bolalarni tibbiy reabilitatsiya qilish va palliativ yordam koʻrsatish sohasida mutaxassislar tayyorlash.Pediatriya xizmati hamda bolalar onkologiyasi, gematologiyasi va immunologiyasi xizmati uchun tiklovchi tibbiyot va palliativ yordam yoʻnalishlarida tibbiyot xodimlari uchun kurslar, malaka oshirish dasturlari va sertifikatlashni tashkil etish.Reja-grafik asosidaDavlat budjeti mablagʻlariSogʻliqni saqlash vazirligi,Markaz22.Bolalar onkologiyasi va onkogematologiyasi sohasidagi mintaqaviy darajadagi kadrlarni ragʻbatlantirish va qoʻllab-quvvatlash tizimini joriy etish.1. Bolalar onkologiyasi va onkogematologiyasi sohasidagi kadrlar faoliyati samaradorligini baholash tizimi koʻrsatkichlarini ishlab chiqish va faoliyat natijadorligidan (KPI) kelib chiqib, moddiy ragʻbatlantirish choralarini qoʻllash.2025-yil dekabr–Sogʻliqni saqlash vazirligi, Raqamli texnologiyalar vazirligi, Markaz2. Bolalar onkologiyasi va onkogematologiyasi sohasidagi kadrlar faoliyati samaradorligini baholash tizimini raqamlashtirish.2026-yildan boshlab3. Kadrlarni ragʻbatlantirish va qoʻllab-quvvatlash tizimini joriy etish.VII. Aholining bolalar saratoni masalalari boʻyicha xabardorligini oshirish23.Bolalarda onkologik kasalliklarni erta aniqlash boʻyicha axborot-maʼrifiy kampaniya olib borish.1. Aholining bolalardagi onkologik va gematologik kasalliklar belgilari haqida xabardorligini oshirish va oʻz vaqtida tibbiy yordamga murojaat qilish zarurligi masalasida kompleks muloqot dasturini ishlab chiqish va amalga oshirish. Bunda videoroliklar, bukletlar, infografika kabi multimediali axborot materiallarini tayyorlash hamda internet platformalari, televideniye, radio va bosma nashrlar orqali maʼlumotlarni tarqatish.2025-2026-yillarIjrochilar mablagʻlariSogʻliqni saqlash vazirligi,Madaniyat vazirligi,OʻzA,OʻzMTRK,Markaz,ommaviy axborot vositalari2. Milliy dasturning maqsad va vazifalari, shuningdek, uning amalga oshirilishi jarayoni va maqsadli koʻrsatkichlarga erishish haqidagi maʼlumotlar ommaviy axborot vositalarida keng yoritilishini taʼminlash.24.Maktab oʻquvchilarida tibbiy yordamga erta murojaat qilish madaniyatini va sogʻlom turmush tarzini shakllantirish.1. Bolalarning salomatligi boʻyicha profilaktika tadbirlarini ishlab chiqish.2025-2026-yillarDavlat budjetidan ajratilgan mablagʻlar,hamkorlik dasturlariSogʻliqni saqlash vazirligi,Maktabgacha va maktab taʼlimi vazirligi 2. Salomatlik va oʻz sogʻligʻi haqida gʻamxoʻrlik qilish madaniyatini oshirish boʻyicha maktablarda maʼrifiy tadbirlarni tashkil etish.25.Palliativ yordam boʻyicha jamoatchilikning xabardorligini oshirish va koʻngillilar harakatini rivojlantirish.Palliativ yordamning maqsadlari, vazifalari va ahamiyati haqida axborot-maʼrifiy kampaniyalarni ishlab chiqish va amalga oshirish. Jamiyatda palliativ yordam koʻrsatish toʻgʻrisida ijobiy tasavvurni shakllantirish. Koʻngillilarni jalb qilish, ularni etika asoslari, bemorlar oilalarini kuzatish va qoʻllab-quvvatlash boʻyicha oʻqitish.2025-2026-yillarDavlat budjeti mablagʻlari,hamkorlik dasturlariSogʻliqni saqlash vazirligi, nodavlat notijorat tashkilotlar, ommaviy axborot vositalari, Markaz

Oʻzbekiston Respublikasi Prezidentining 2025-yil 19-maydagi PQ-186-sonli qaroriga 2-ILOVA

2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturini amalga oshirishning

MAQSADLI KOʻRSATKICHLARI

Oʻzbekiston Respublikasi Prezidentining 2025-yil 19-maydagi PQ-186-sonli qaroriga 3-ILOVA

Qoraqalpogʻiston Respublikasi va viloyatlar bolalar koʻp tarmoqli tibbiyot markazlari uchun qoʻshimcha binolarni qurish

REJASI

T/rHududlarBino quvvati (shifo oʻrni)Jami2025-yil2026-yil2027-yil1.Qoraqalpogʻiston Respublikasi80802.Andijon viloyati80803.Buxoro viloyati40404.Jizzax viloyati30305.Navoiy viloyati30306.Namangan viloyati50507.Samarqand viloyati80808.Sirdaryo viloyati30309.Toshkent viloyati505010.Fargʻona viloyati505011.Xorazm viloyati4040JAMI56080120360

Izohlar:

Qoʻshimcha binolarni qurish 2025 — 2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida sogʻliqni saqlash sohasiga ajratilgan mablagʻlar hisobidan amalga oshiriladi.

Qashqadaryo va Surxondaryo viloyatlarida qurilayotgan onkogematologiya boʻlimlari loyihalari xalqaro standartlar talablariga moslashtiriladi.

Oʻzbekiston Respublikasi Prezidentining 2025-yil 19-maydagi PQ-186-sonli qaroriga 4-ILOVA

Tuman (shahar) tibbiyot birlashmalariga qarashli tibbiyot muassasalarini va bolalar shifoxonalarini jihozlash uchun tibbiy asbob-uskunalar

ROʻYXATI

Izohlar:

Sogʻliqni saqlash vazirligiga loyiha doirasida taqsimlanmagan mablagʻlarni ehtiyojdan kelib chiqib qayta taqsimlash vakolati beriladi.

Tibbiyot muassasalarini tibbiy asbob-uskunalar bilan jihozlash 2026-2027-yillarda “KfW” banki granti mablagʻlari hisobidan amalga oshiriladi.

Oʻzbekiston Respublikasi Prezidentining 2025-yil 19-maydagi PQ-186-sonli qaroriga 4a-ILOVA

Bolalar shifoxonalarini jihozlash uchun tibbiy asbob-uskunalar

ROʻYXATI

Izohlar:

Sogʻliqni saqlash vazirligiga loyiha doirasida taqsimlanmagan mablagʻlarni ehtiyojdan kelib chiqib qayta taqsimlash vakolati beriladi.

Hududiy bolalar koʻp tarmoqli tibbiyot markazlarini laboratoriya uskunalari bilan jihozlash “KfW” banki krediti, qolgan tibbiy asbob-uskunalar xalqaro moliya institutlari mablagʻlari hisobidan amalga oshiriladi.

* Chiziqli tezlatkich, PET-KT, siklotron 2027-2028-yillarda xarid qilinadi.

Oʻzbekiston Respublikasi Prezidentining 2025-yil 19-maydagi PQ-186-sonli qaroriga 5-ILOVA

2025 — 2030-yillarda bolalar saratoniga qarshi kurashish boʻyicha Oʻzbekiston Respublikasi milliy dasturi chora-tadbirlarini amalga oshirish boʻyicha ishchi guruh

TARKIBI

Izoh: Ishchi guruh aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Oʻzbekiston Respublikasi Prezidentining 2025-yil 19-maydagi PQ-186-sonli qaroriga 6-ILOVA

Oʻzbekiston Respublikasi Prezidentining 2024-yil 21-maydagi “Onkologik, gematologik va immunologik kasalliklarga chalingan bolalarga tibbiy yordam koʻrsatishni yanada takomillashtirish chora-tadbirlari toʻgʻrisida”gi PQ-183-son qaroriga kiritilayotgan oʻzgartirish va qoʻshimchalar

1. 4-bandda:

a) birinchi xatboshi “injiniring” soʻzidan keyin “(pudratchi)” soʻzi bilan toʻldirilsin;

b) quyidagi mazmundagi beshinchi xatboshi bilan toʻldirilsin:

“ushbu markaz va respublika hududlarida zarur davolash-diagnostika bloklari va korpuslarini loyihalashtirish va qurish orqali bolalar gematologiyasi, onkologiyasi va immunologiyasi sohasida bolalarga yuqori texnologiyali tibbiy xizmatlar koʻrsatishning zamonaviy infratuzilmasini shakllantirish”;

v) beshinchi xatboshi oltinchi xatboshi deb hisoblansin;

g) oltinchi xatboshidagi “biznes reja” soʻzlari “strategiya” soʻzi bilan almashtirilsin;

d) quyidagi mazmundagi yettinchi xatboshi bilan toʻldirilsin:

“Bunda xorijiy tibbiyot klinikalari, injiniring (pudrat) va konsalting kompaniyalari bilan shartnomalar, shu jumladan EPC shartnomalari tuzilishi (ular boʻyicha ish va xizmatlar uchun toʻlovlar amalga oshirilishi) mumkin”.

2. 5-bandning oltinchi va yettinchi xatboshilari quyidagi tahrirda bayon etilsin:

“Iqtisodiyot va moliya vazirligi hamda Tiklanish va taraqqiyot jamgʻarmasi tomonidan ajratiladigan mablagʻlar aseptik, laboratoriya diagnostika bloklari va simulyatsiya markazi, radiologiya bloki va nur terapiyasi boʻlimini tashkil etish va jihozlash, Markazni rivojlantirish konsepsiyasini (master rejani), texnik va loyiha hujjatlarini ishlab chiqish va amalga oshirish bilan bogʻliq ishlar (xizmatlar)ga haq toʻlash uchun yoʻnaltiriladi;

ajratiladigan mablagʻlar hisobidan moliyalashtirilishi koʻzda tutilgan shartnomalar, shu jumladan, EPC-shartnomalari, “Loyihalar va import kontraktlarini kompleks ekspertiza qilish markazi” DUK tomonidan ekspertizadan oʻtkaziladi”.

3. 8-bandning birinchi xatboshisi quyidagi tahrirda bayon qilinsin:

“8. Tajriba-sinov loyihasi doirasida Markaz va u bilan shartnomalar tuzgan xorijiy klinikalar, injiniring (pudratchi) va konsalting kompaniyalariga, istisno tariqasida, uch yil muddatga quyidagi huquqlar berilsin”.

4. 11-bandda:

a) “a” kichik bandning ikkinchi xatboshisida “boʻlgan” soʻzidan keyin “(ikkinchi darajali budjet mablagʻlari taqsimlovchisi)” soʻzlari bilan toʻldirilsin;

b) “v” kichik bandning toʻrtinchi xatboshisidagi “uch oy muddatda” soʻzlari “2026-yilda” soʻzlari bilan almashtirilsin.

5. 12-bandning “a” kichik bandida:

a) ikkinchi xatboshidan “Tibbiyotni rivojlantirish davlat maqsadli jamgʻarmasiga ajratilgan mablagʻlar hisobidan” soʻzlari chiqarib tashlansin;

b) beshinchi xatboshidagi “kraudfanding” soʻzi “fandrayzing” soʻzi bilan almashtirilsin.

6. 14-bandning uchinchi xatboshisidagi “hamda” soʻzi “, 2027-yildan esa ularni” soʻzlari bilan almashtirilsin.

7. 2-ilovaning matni quyidagi tahrirda bayon etilsin:

“Bolalar onkologiyasi, gematologiyasi va immunologiyasi ilmiy-amaliy tibbiyot markazining kuzatuv kengashi

TARKIBI

Izoh: Bolalar onkologiyasi, gematologiyasi va immunologiyasi ilmiy-amaliy tibbiyot markazi kuzatuv kengashiga aʼzolarining koʻpchilik ovozi bilan mazkur tarkibga oʻzgartirish kiritish huquqi beriladi”.

8. 4-ilovaning 12-pozitsiyasi chiqarib tashlansin.