Huquqiy eksperiment tariqasida davlat xizmatlarini koʻrsatish bilan bogʻliq maʼmuriy hujjatlar boʻyicha nizolarni sudgacha koʻrib chiqishning yangi tartibini joriy etish toʻgʻrisida (PQ-188-son)

19.05.2025

Oʻzbekiston Respublikasi Prezidentining

Qarori

Jismoniy va yuridik shaxslarning huquqlari va qonuniy manfaatlarini himoya qilishda qoʻshimcha qulayliklar yaratish, shuningdek, davlat xizmatlarini koʻrsatishdagi maʼmuriy hujjatlar boʻyicha nizolarni sudgacha koʻrib chiqish tizimini takomillashtirish maqsadida qaror qilaman:

1. Oʻzbekiston Respublikasi Prezidentining 2024-yil 24-maydagi “Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida”gi PF-80-son Farmoniga muvofiq 2026-yil 1-iyulga qadar huquqiy eksperiment tariqasida:

(a) Toshkent shahrida qonunchilik hujjatlariga muvofiq boʻlmagan ayrim davlat xizmatlarini koʻrsatish boʻyicha maʼmuriy hujjatlarni sudgacha koʻrib chiqishning yangi tartibi joriy etilishi;

(b) Oʻzbekiston Respublikasi Adliya vazirligi hamda Toshkent shahar adliya boshqarmasi huzurida apellyatsiya kengashlari (keyingi oʻrinlarda — apellyatsiya kengashlari) tashkil etilishi;

(v) maʼmuriy organlarning davlat xizmatlarini koʻrsatish sohasidagi qonunchilik hujjatlariga muvofiq boʻlmagan maʼmuriy hujjatlarini apellyatsiya kengashlari tomonidan koʻrib chiqish manfaatdor shaxslarning shikoyatlari hamda davlat xizmatlarini koʻrsatishni monitoring qilish natijalariga koʻra amalga oshirilishi;

(g) apellyatsiya kengashlarining qarorlari yuzasidan manfaatdor shaxs tomonidan sud tartibida shikoyat qilinishi mumkinligi, maʼmuriy organlar uchun esa mazkur qarorlar qatʼiy hisoblanishi va ularning ustidan shikoyat qilinishi mumkin emasligi belgilanganligi maʼlumot uchun qabul qilinsin.

2. Quyidagilar:

(a) Davlat xizmatlarini koʻrsatish boʻyicha maʼmuriy hujjatlarning qonunchilikka muvofiqligini sudgacha koʻrib chiqish tartibi toʻgʻrisidagi vaqtinchalik nizom (keyingi oʻrinlarda — Vaqtinchalik nizom) 1-ilovaga muvofiq;

(b) Oʻzbekiston Respublikasi Adliya vazirligi huzuridagi Apellyatsiya kengashining namunaviy tarkibi 2-ilovaga muvofiq;

(v) Toshkent shahar adliya boshqarmasi huzuridagi Apellyatsiya kengashining namunaviy tarkibi 3-ilovaga muvofiq tasdiqlansin.

3. Belgilansinki:

(a) apellyatsiya kengashlari Vaqtinchalik nizomda nazarda tutilgan davlat xizmatlari yuzasidan qabul qilingan maʼmuriy hujjatlarning qonunchilik hujjatlariga muvofiqligini sudgacha koʻrib chiquvchi yuridik shaxs maqomiga ega boʻlmagan kollegial organlar hisoblanadi;

(b) Adliya vazirligi va Toshkent shahar adliya boshqarmasi tegishliligiga koʻra apellyatsiya kengashlarining ishchi organlari hisoblanadi;

(v) apellyatsiya kengashlari maʼmuriy hujjatlarni sudgacha koʻrib chiqish orqali ularni qisman yoki toʻliq bekor qilish, shuningdek, maʼmuriy hujjatlarga oʻzgartirish kiritish boʻyicha maʼmuriy organga majburiyat yuklash haqida qarorlar qabul qilish vakolatiga ega;

(g) apellyatsiya kengashlari oʻz faoliyatini davlat organlari, boshqa tashkilotlar va mansabdor shaxslardan mustaqil ravishda amalga oshiradi;

(d) apellyatsiya kengashlarining qarorlari qonunchilikda belgilangan tartibda “E-qaror” elektron tizimiga joylashtirib boriladi.

4. Huquqiy eksperiment doirasida tegishli davlat xizmatlarini koʻrsatish boʻyicha vakolatli organlarning birinchi rahbarlariga quyidagilarni taʼminlash boʻyicha shaxsiy masʼuliyat yuklansin:

(a) apellyatsiya kengashlarining qonuniy talablarini soʻzsiz bajarish;

(b) apellyatsiya kengashlari qarorlarining ijrosini taʼminlash;

(v) axborot tizimlarida shikoyatlarni koʻrib chiqish bosqichlarini uzluksiz kuzatib borish hamda apellyatsiya kengashlarining qarorlari ijrosini taʼminlash yuzasidan texnik imkoniyatlarni joriy etish.

5. Adliya vazirligi Raqamli texnologiyalar vazirligi bilan birgalikda ikki oy muddatda Oʻzbekiston Respublikasi Yagona interaktiv davlat xizmatlari portalida va tegishli davlat xizmatlarini koʻrsatish boʻyicha vakolatli organlarning axborot tizimlarida quyidagi qoʻshimcha imkoniyatlarni yaratsin:

(a) apellyatsiya kengashlarining qarorlarini manfaatdor shaxslarning shaxsiy kabinetiga yuborish;

(b) manfaatdor shaxslar tomonidan maʼmuriy organning davlat xizmatini koʻrsatish bilan bogʻliq qarori ustidan berilgan shikoyatni ushbu davlat xizmatini koʻrsatish boʻyicha ilgari berilgan ariza bilan oʻzaro bogʻlash;

(v) apellyatsiya kengashlari tomonidan vakolatli organlarning maʼmuriy hujjatini oʻzgartirish, qisman yoki toʻliq bekor qilish haqida qaror qabul qilingan taqdirda, ushbu davlat xizmatini koʻrsatish boʻyicha berilgan arizalar Yagona interaktiv davlat xizmatlari portalida qayta koʻrib chiqish bosqichiga oʻtkazilishini taʼminlash;

(g) shikoyatlar statistikasiga oid maʼlumotlarni eʼlon qilib borish.

6. Manfaatdor vazirlik va idoralarning rahbarlari apellyatsiya kengashlari aʼzolarining mazkur kengashlar faoliyatida muntazam ravishda ishtirok etib borishini taʼminlasin.

7. Adliya vazirligi va Toshkent shahar adliya boshqarmasiga apellyatsiya kengashlari tomonidan shikoyatlarni hamda davlat xizmatlarini koʻrsatishni monitoring qilish natijalarini koʻrib chiqish jarayonida mutaxassis va ekspertlarni jalb qilish va ular bilan fuqarolik-huquqiy tusdagi shartnomalar tuzish huquqi berilsin.

Bunda apellyatsiya kengashlari faoliyati bilan bogʻliq barcha xarajatlarni moliyalashtirish, shu jumladan, jalb qilingan mutaxassis va ekspertlarga haq toʻlash Adliya vazirligining va Toshkent shahar adliya boshqarmasining budjetdan tashqari mablagʻlari va qonunchilik hujjatlarida taqiqlanmagan boshqa manbalar hisobidan amalga oshiriladi.

8. Adliya vazirligi huquqiy eksperiment natijalari boʻyicha maʼmuriy hujjatlarni sudgacha koʻrib chiqishning yangi tartibini toʻliq joriy etish yuzasidan takliflarni 2026-yil 1-avgustga qadar Vazirlar Mahkamasiga kiritsin.

9. Mazkur qarorning ijrosini samarali tashkil qilishga masʼul va shaxsiy javobgar etib adliya vaziri A.D. Tashkulov belgilansin.

10. Qaror ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidentining maslahatchisi D.B. Kadirov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2025-yil 19-may,

PQ-188-son

Oʻzbekiston Respublikasi Prezidentining 2025-yil 19-maydagi PQ-188-son qaroriga 1-ILOVA

Davlat xizmatlarini koʻrsatish boʻyicha maʼmuriy hujjatlarning qonunchilikka muvofiqligini sudgacha koʻrib chiqish tartibi toʻgʻrisida

VAQTINCHALIK NIZOM

1-bob. Umumiy qoidalar

1. Mazkur Vaqtinchalik nizom Oʻzbekiston Respublikasi Adliya vazirligi huzuridagi Apellyatsiya kengashi va Toshkent shahar adliya boshqarmasi huzuridagi Apellyatsiya kengashi (keyingi oʻrinlarda — apellyatsiya kengashlari)ning maqomi, asosiy vazifalari, huquq va majburiyatlarini, shuningdek, ularning faoliyatini tashkil etish hamda apellyatsiya kengashlari tomonidan maʼmuriy hujjatlarning qonunchilikka muvofiqligini sudgacha koʻrib chiqish tartibini belgilaydi.

Mazkur Vaqtinchalik nizom qoidalari arizalar qaysi hududdan berilganidan qatʼi nazar Toshkent shahrida koʻrsatiladigan quyidagi davlat xizmatlariga nisbatan tatbiq etiladi:

tadbirkorlik subyektlarini davlat roʻyxatidan (qayta davlat roʻyxatidan) oʻtkazish;

tadbirkorlik subyektlari boʻlmagan yuridik shaxslarni (davlat organlari va muassasalari, uy-joy mulkdorlari shirkatlari, yuridik shaxslar birlashmalari, advokatlik tuzilmalarini) davlat roʻyxatidan (qayta davlat roʻyxatidan) oʻtkazish;

tadbirkorlik subyektlarini ixtiyoriy tugatish;

kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish;

fuqarolik holati dalolatnoma yozuvlarini oʻzgartirish, toʻldirish;

tegishli hududdagi adliya organlari va muassasalaridan hamda fuqarolik holati dalolatnomalarini qayd etish organlaridan chiqadigan rasmiy hujjatlarga apostil qoʻyish;

jismoniy shaxslarni Professional mediatorlar reyestriga kiritish;

yuridik maslahatchilar tashkilotini Yuridik maslahat xizmatlarini koʻrsatuvchi tijorat tashkilotlari reyestriga kiritish;

nodavlat sud-ekspertiza tashkilotlari sud ekspertlariga sud eksperti sifatida kasbiy layoqatni tasdiqlovchi sertifikat berish;

davlat umumiy oʻrta taʼlim tashkilotlari pedagog kadrlarini kasbiy sertifikatlash;

yoshlarning xalqaro IT-sertifikatlarni olish xarajatlarini qoplab berish;

“Bir million dasturchi” loyihasi doirasida oʻquv kurslarini muvaffaqiyatli tamomlagan yoshlarga, shuningdek, IT-park rezidentining oʻquvchisi yoki bitiruvchisi boʻlgan yoshlarga isteʼmol krediti orqali kompyuter xarid qilish uchun kafillik berish hamda mazkur kreditlarning foiz toʻlovlarini kompensatsiya qilish;

xalqaro imtihon tizimlari boʻyicha yuqori ball (daraja) olgan yoshlarga oʻqish va imtihon topshirish xarajatlarini toʻliq qoplab berish;

suv taʼminoti va suvni chiqarib tashlash tarmoqlariga ulanish uchun texnik shartlarni olish;

issiqlik taʼminoti tarmoqlariga ulanish uchun texnik shartlarni olish;

elektr energiyasini oʻlchash vositasi va tizimini plombalash hamda elektr taʼminoti shartnomasini tuzish;

elektr energiyasini hisobga olish uskunasini (hisoblagichni) qiyoslashdan oʻtkazish (yechish va ulash bilan birga);

ichimlik va issiq suvni hisobga olish uskunasini (hisoblagichni) qiyoslashdan oʻtkazish (yechish va ulash bilan birga);

elektr energiyasini hisobga olish uskunasini (hisoblagichni) yechish, oʻrnatish va tamgʻalash;

ichimlik suvini hisobga olish uskunasini (hisoblagichni) yechish, oʻrnatish va tamgʻalash;

ulanadigan quvvati 20 kVtdan yuqori boʻlmagan elektr tarmoqlariga ulanish uchun texnik shartlarni olish;

1,2 MPa bosimdan yuqori boʻlmagan gaz tarmoqlariga ulanish uchun texnik shartlarni olish.

2. Apellyatsiya kengashlari tegishliligiga koʻra respublika darajasidagi davlat organlari va tashkilotlarining hamda ularning Toshkent shahridagi hududiy boʻlinmalarining tegishli davlat xizmatlarini koʻrsatish bilan bogʻliq maʼmuriy hujjatlarining qonunchilik hujjatlariga muvofiqligini sudgacha koʻrib chiquvchi yuridik shaxs maqomiga ega boʻlmagan kollegial organlar hisoblanadi.

3. Apellyatsiya kengashlari tomonidan maʼmuriy hujjatlarning qonunchilik hujjatlariga muvofiqligini koʻrib chiqish uchun manfaatdor shaxslarning shikoyatlari hamda davlat xizmatlari koʻrsatilishini monitoring qilish natijalari asos boʻladi.

4. Ushbu Vaqtinchalik nizomda quyidagi asosiy tushunchalardan foydalaniladi:

vakolatli organ — tegishli davlat xizmatlari yuzasidan maʼmuriy hujjatni qabul qilgan maʼmuriy organ;

manfaatdor shaxs — huquqlari va qonuniy manfaatlari tegishli davlat xizmatlari yuzasidan qabul qilingan maʼmuriy hujjatga bevosita daxldor boʻlgan jismoniy va yuridik shaxs;

shikoyat — manfaatdor shaxs yoki uning vakili tomonidan vakolatli organlarning tegishli davlat xizmatlari yuzasidan qabul qilgan maʼmuriy hujjatlari ustidan yoʻllangan shikoyat.

5. Apellyatsiya kengashlari tomonidan shikoyatlarni koʻrib chiqqanlik uchun toʻlovlar undirilmaydi.

6. Manfaatdor shaxslar tomonidan apellyatsiya kengashlariga shikoyat qilish ixtiyoriy boʻlib, bu ularning tegishli davlat organlari va tashkilotlarining yuqori turuvchi organlariga yoki bevosita sudga murojaat qilish huquqini cheklamaydi.

7. Sudlarda koʻrib chiqilgan yoki koʻrib chiqilayotgan masalalar boʻyicha yoʻllangan shikoyatlar apellyatsiya kengashlari tomonidan koʻrib chiqilmaydi.

8. Apellyatsiya kengashlari oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari va qarorlariga, Vazirlar Mahkamasining qarorlariga, shuningdek, ushbu Vaqtinchalik nizomga va boshqa qonunchilik hujjatlariga amal qiladi.

9. Apellyatsiya kengashlari oʻz faoliyatini davlat organlari, boshqa tashkilotlar va mansabdor shaxslardan mustaqil ravishda amalga oshiradi.

10. Apellyatsiya kengashlari murojaatlarni koʻrib chiqishda teng huquqlilik, xolislik, qonuniylik, kollegiallik va huquqni qoʻllash amaliyotining bir xilligini taʼminlash hamda murojaat etuvchilarning huquqlari va qonuniy manfaatlariga rioya qilish prinsiplariga asoslanadi.

2-bob. Apellyatsiya kengashlarining asosiy vazifalari

11. Quyidagilar apellyatsiya kengashlarining asosiy vazifalari hisoblanadi:

mazkur Vaqtinchalik nizomning 1-bandida nazarda tutilgan davlat xizmatlari (keyingi oʻrinlarda — tegishli davlat xizmatlari) yuzasidan qabul qilingan maʼmuriy hujjatlarning qonunchilik hujjatlariga muvofiqligini sudgacha koʻrib chiqish;

vakolatli organlarning maʼmuriy-huquqiy faoliyatida yagona huquqni qoʻllash amaliyotini shakllantirish va taʼminlash yuzasidan choralarni amalga oshirish;

shikoyatlarni koʻrib chiqishda aniqlangan qonunchilik hujjatlaridagi tafovut va huquqiy boʻshliqlarni bartaraf etish yuzasidan takliflar ishlab chiqish.

12. Manfaatdor shaxslarning shikoyatlari apellyatsiya kengashlari tomonidan maʼmuriy tartib-taomillar toʻgʻrisidagi qonunchilikka muvofiq koʻrib chiqiladi.

3-bob. Apellyatsiya kengashlarining huquq va majburiyatlari

13. Apellyatsiya kengashlari quyidagi huquqlarga ega:

vakolatli organlarning tegishli davlat xizmatlari yuzasidan qabul qilgan maʼmuriy hujjatlarining qonunchilik hujjatlariga muvofiqligini sudgacha koʻrib chiqish natijasiga asosan ushbu maʼmuriy hujjatlarni oʻzgartirish, qisman yoki toʻliq bekor qilish toʻgʻrisida qarorlar qabul qilish (bundan qonunchilikka muvofiq faqat sud tartibida oʻzgartiriladigan yoki bekor qilinadigan hujjatlar mustasno);

oʻziga yuklangan vazifalarni bajarish uchun zarur boʻlgan hujjatlar va axborotlarni, shuningdek, boshqa asoslovchi maʼlumotlarni respublika ijro etuvchi hokimiyat organlari, mahalliy davlat hokimiyati organlari, fuqarolarning oʻzini oʻzi boshqarish organlari va boshqa tashkilotlardan bepul tarzda soʻrash va olish, bunda vakolatli organlar tomonidan soʻralgan maʼlumotlar besh ish kunidan kechiktirmasdan taqdim etilishi lozim;

zarurat boʻlganda, xorijiy mutaxassis va ekspertlarni, shuningdek, davlat organlari, ilmiy va taʼlim muassasalari, nodavlat notijorat tashkilotlardan mutaxassis va ekspertlarni taklif qilish hamda ishchi va ekspert guruhlarini tashkil etish.

Apellyatsiya kengashlari qonunchilik hujjatlariga muvofiq boshqa huquqlarga ham ega boʻlishi mumkin.

14. Apellyatsiya kengashlari quyidagilarga majbur:

qonunchilik hujjatlariga va mazkur Vaqtinchalik nizom talablariga qatʼiy rioya qilish;

manfaatdor shaxslarning shaʼni va qadr-qimmatini kamsitishga hamda ularning shaxsiy hayotiga aralashishga yoʻl qoʻymaslik;

maʼmuriy shikoyatlarning koʻrib chiqilishi natijasi yuzasidan asoslangan qarorlar qabul qilish;

maʼmuriy hujjatlarni koʻrib chiqish davomida olingan axborotning, agar bunday axborotni tarqatish qonunchilik hujjatlari bilan cheklangan boʻlsa, sir saqlanishini taʼminlash.

Apellyatsiya kengashlariga qonunchilik hujjatlariga muvofiq boshqa majburiyatlar ham yuklanishi mumkin.

4-bob. Apellyatsiya kengashlari faoliyatini tashkil etish tartibi

15. Apellyatsiya kengashlari tarkibiga tegishliligiga koʻra ularning raisi, rais oʻrinbosari, kotibi va aʼzolari kiradi. Bunda apellyatsiya kengashlari kotibi ishlarni koʻrib chiqish yakunlari boʻyicha ovoz berishda ishtirok etmaydi.

16. Quyidagi holatlarda apellyatsiya kengashlari aʼzolari uning tarkibidan chiqariladi:

ular ishlayotgan tashkilot bilan tuzilgan mehnat shartnomalari bekor qilinganda;

ularga nisbatan chiqarilgan sudning ayblov hukmi qonuniy kuchga kirganda;

sudning qonuniy kuchga kirgan hal qiluv qarori asosida muomala layoqati cheklanganda, shuningdek, ular muomalaga layoqatsiz, bedarak yoʻqolgan yoki vafot etgan deb topilganda;

oʻz arizasiga koʻra;

vafot etganda.

17. Apellyatsiya kengashlari aʼzolari quyidagi hollarda kun tartibiga kiritilgan masalalar yuzasidan majlisda ishtirok etishi mumkin emas va rad qilinishi lozim, agar ular:

maʼmuriy hujjatni koʻrib chiqish natijasidan shaxsan, bevosita yoki bilvosita manfaatdor boʻlsa yoxud uning xolisligi va begʻarazligiga shubha tugʻdiradigan boshqa holatlar mavjud boʻlsa;

manfaatdor shaxsning, shuningdek, tegishli davlat xizmatlari yuzasidan maʼmuriy hujjatni qabul qilgan vakolatli organ mansabdor shaxsining yaqin qarindoshi boʻlsa.

Ushbu bandning ikkinchi va uchinchi xatboshilarida koʻrsatilgan asoslar mavjud boʻlsa, apellyatsiya kengashlari aʼzosi oʻzini oʻzi rad qilish haqida arz qilishi shart.

18. Manfaatdor shaxslar ushbu Vaqtinchalik nizomning 17-bandidagi asoslarga koʻra apellyatsiya kengashlari aʼzosini rad qilish haqida arz qilishi mumkin.

19. Oʻzini oʻzi rad qilish yoki rad qilish haqidagi ariza asoslantirilgan boʻlishi va shikoyatni apellyatsiya kengashlari tomonidan koʻrish boshlanguniga qadar maʼlum qilinishi kerak.

Apellyatsiya kengashlari aʼzolarini rad qilish tegishliligiga koʻra apellyatsiya kengashlari raislarining tashabbusiga koʻra ham koʻrib chiqilishi mumkin.

20. Shikoyat koʻrilayotganda oʻzini oʻzi rad qilish yoki rad qilish haqida ariza berishga, agar oʻzini oʻzi rad qilish yoki rad qilish uchun asos ariza bergan shaxsga shikoyatni mazmunan koʻrish boshlanganidan keyin maʼlum boʻlib qolgan taqdirda yoʻl qoʻyiladi.

Ayni bir shaxs tomonidan ayni bir asos boʻyicha takroran rad qilish bildirilishi mumkin emas. Takroran rad qilish bildirilgan taqdirda, u koʻrib chiqilmaydi.

21. Apellyatsiya kengashlari aʼzolarining oʻzini oʻzi rad qilishi yoki uni rad qilish toʻgʻrisidagi masala tegishliligiga koʻra apellyatsiya kengashlari raislari tomonidan hal etiladi.

22. Apellyatsiya kengashlarining raislari:

apellyatsiya kengashlari faoliyatiga rahbarlik qiladi va zimmasiga yuklatilgan vazifalarning bajarilishi uchun shaxsan javobgar hisoblanadi;

apellyatsiya kengashlarining majlislarini chaqiradi va ularda raislik qiladi;

apellyatsiya kengashlari vakolatiga taalluqli masalalarni koʻrib chiqish uchun kiritadi;

davlat organlari, nodavlat notijorat tashkilotlar bilan munosabatlarda apellyatsiya kengashlari nomidan ish koʻradi;

apellyatsiya kengashlari nomidan qarorlarni, majlislar bayonnomalarini va boshqa hujjatlarni imzolaydi;

apellyatsiya kengashlari majlislari kun tartibini belgilaydi;

apellyatsiya kengashlari tomonidan qabul qilingan qarorlarning ijrosini nazorat qiladi;

apellyatsiya kengashlari ishining samaradorligini oshirishga qaratilgan boshqa chora-tadbirlarni amalga oshiradi.

23. Apellyatsiya kengashlari raislari boʻlmagan taqdirda, ularning vazifalarini tegishliligiga koʻra ularning oʻrinbosarlari bajaradi.

24. Apellyatsiya kengashlarining kotiblari:

manfaatdor shaxslarning shikoyatlarini ish yurituvga qabul qiladi;

apellyatsiya kengashlarining navbatdagi majlisiga barcha zarur materiallarning oʻz vaqtida va sifatli tayyorlanishini taʼminlaydi;

kun tartibiga muvofiq apellyatsiya kengashlari majlislari oʻtkazilishini tashkil etadi;

apellyatsiya kengashlari majlisi oʻtkaziladigan sana, joy va taklif etiladigan shaxslar roʻyxatini apellyatsiya kengashlarining raislari bilan kelishadi;

apellyatsiya kengashlarining aʼzolarini va taklif etilgan shaxslarni apellyatsiya kengashlari majlisi oʻtkaziladigan joy, sana va vaqt haqida yozma yoki elektron shaklda xabardor qiladi;

kun tartibidagi masalalarni koʻrib chiqish uchun zarur boʻlgan materiallarni apellyatsiya kengashlari aʼzolariga tarqatadi;

apellyatsiya kengashlari majlislari qarorlari va bayonnomalarini rasmiylashtiradi hamda qarorlar nusxalarining apellyatsiya kengashlari aʼzolari hamda boshqa manfaatdor shaxslarga joʻnatilishini taʼminlaydi;

apellyatsiya kengashlari qarorlarining mazkur Vaqtinchalik nizomda belgilangan tartibda “E-qaror” elektron tizimiga joylashtirib borilishini taʼminlaydi;

apellyatsiya kengashlari qarorlarining ijro holatini oʻrganib boradi hamda uning natijalarini apellyatsiya kengashlari majlisida koʻrib chiqish uchun kiritadi;

apellyatsiya kengashlarining faoliyatini uslubiy, tashkiliy-huquqiy va tashkiliy-texnik jihatdan taʼminlash boʻyicha apellyatsiya kengashlari raislariga takliflar kiritadi;

apellyatsiya kengashlari majlislari qarorlari, bayonnomalari hamda manfaatdor shaxslarning shikoyatlarini koʻrib chiqish davomida toʻplangan boshqa hujjatlarning belgilangan tartibda saqlanishi va tegishli arxivlarga topshirilishini taʼminlaydi;

apellyatsiya kengashlarining zimmasiga yuklangan vazifalarga muvofiq boshqa vakolatlarni amalga oshiradi.

25. Apellyatsiya kengashlarining aʼzolari:

apellyatsiya kengashlari zimmasiga yuklangan vazifalarni bajarish uchun vakolatli organlar tomonidan tashkil etiladigan hayʼat majlislarida va boshqa tadbirlarda ishtirok etishga;

vakolatli organlar faoliyatining samaradorligini oshirish boʻyicha takliflar va tavsiyalarni ishlab chiqishda qatnashishga;

apellyatsiya kengashlari majlislarida oʻz fikrini mustaqil ravishda bildirishga;

apellyatsiya kengashlari zimmasiga yuklangan vazifalarga muvofiq boshqa vakolatlarni ham amalga oshirishga haqli.

26. Apellyatsiya kengashlari faoliyatiga fuqarolik-huquqiy tusdagi shartnomalarga asosan boshqa tashkilotlardan mutaxassis va ekspertlar jalb qilinishi mumkin.

5-bob. Manfaatdor shaxslar tomonidan shikoyat qilish hamda apellyatsiya kengashlari tomonidan shikoyatlarni koʻrib chiqish tartibi

27. Manfaatdor shaxslar yoki ularning vakillari tomonidan shikoyat qilish hamda ularni (davlat xizmatlari koʻrsatilishini monitoring qilish natijalarini) apellyatsiya kengashlarida koʻrib chiqish ushbu Vaqtinchalik nizomning 1-ilovasidagi sxemaga muvofiq amalga oshiriladi.

28. Manfaatdor shaxs yoki uning vakili davlat xizmatlari markaziga kelib murojaat qilganda davlat xizmatlari markazi xodimi manfaatdor shaxs nomidan, Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali shikoyat qilgan taqdirda esa mustaqil ravishda ushbu Vaqtinchalik nizomning 2-ilovasiga muvofiq namunaviy shakldagi shikoyatni elektron tarzda toʻldiradi.

29. Agar shikoyat manfaatdor shaxsning vakili tomonidan berilgan boʻlsa, shikoyatga ishonchnomaning yoki vakil vakolatlarini tasdiqlovchi boshqa hujjatning koʻchirma nusxasi ilova qilinishi lozim.

Shikoyatga boshqa asoslovchi maʼlumotlar va hujjatlar ham ilova qilinishi mumkin.

30. Manfaatdor shaxs yoki uning vakili davlat xizmatlari markaziga kelib murojaat etganda, uning shikoyati davlat xizmatlari markazi xodimi tomonidan toʻldirilib, manfaatdor shaxs yoki uning vakili tomonidan tasdiqlanganidan soʻng real vaqt rejimida apellyatsiya kengashlariga elektron shaklda yuboriladi.

YIDXP orqali murojaat qilinganda shikoyat tegishli davlat xizmati turidan kelib chiqib, avtomatik tarzda apellyatsiya kengashlariga elektron shaklda yuboriladi.

31. Toshkent shahar adliya boshqarmasi huzuridagi Apellyatsiya kengashining ish yurituvida boʻlgan ishlar Oʻzbekiston Respublikasi Adliya vazirligi huzuridagi Apellyatsiya kengashi tomonidan koʻrib chiqish uchun talab qilib olinishi mumkin.

32. Apellyatsiya kengashlarining kotibi (keyingi oʻrinlarda — kotib) manfaatdor shaxsning shikoyatini u kelib tushgan kunda, ish vaqti tugaganidan keyin kelib tushgan boʻlsa, keyingi ish kunida roʻyxatdan oʻtkazadi.

Kotib ikki ish kuni ichida kelib tushgan shikoyatdagi maʼlumotlarning toʻgʻriligini, shuningdek, ushbu Vaqtinchalik nizomning 33-bandida nazarda tutilgan talablarga muvofiqligini tekshiradi.

33. Quyidagi holatlarda shikoyatlarni koʻrib chiqish apellyatsiya kengashlari tomonidan rad etiladi:

shikoyatda koʻtarilgan masalalar (holatlar) sudda koʻrib chiqilgan yoki koʻrib chiqilayotgan boʻlsa;

shikoyat tegishli davlat xizmatlariga taalluqli boʻlmasa;

manfaatdor shaxs tomonidan yolgʻon (qalbaki) maʼlumotlar taqdim etilganda;

maʼmuriy hujjat kuchga kirganiga oʻttiz kundan oʻtgan boʻlsa.

34. Shikoyat rad etilgan taqdirda, kotib tegishli xulosa tuzadi va xulosa apellyatsiya kengashlari raislari tomonidan tasdiqlanib, manfaatdor shaxs bu haqda bir ish kuni ichida yozma yoki elektron shaklda xabardor qilinadi.

35. Shikoyat apellyatsiya kengashlariga kelib tushgan kundan boshlab oʻn besh kun ichida koʻrib chiqiladi.

Shikoyatlarni koʻrib chiqish uchun qoʻshimcha oʻrganish va (yoki) tekshirish, qoʻshimcha materiallarni soʻrab olish talab etilganda, ularni koʻrib chiqish muddati apellyatsiya kengashlari raislari tomonidan uzogʻi bilan yana oʻn besh kunga uzaytirilishi mumkin.

36. Kotib apellyatsiya kengashlari aʼzolarini, manfaatdor shaxs yoki uning vakilini hamda vakolatli organni apellyatsiya kengashlari majlisi oʻtkaziladigan kundan kamida uch kun oldin majlis oʻtkaziladigan joy, sana va vaqt haqida yozma yoki elektron shaklda xabardor qiladi.

37. Apellyatsiya kengashlarining aʼzolari oʻz majlislarida koʻrib chiqiladigan masalalarni muhokama qilish va hal qilishda oʻz vakolatini boshqa shaxslarga oʻtkazish huquqiga ega emas.

38. Apellyatsiya kengashlarining majlislari zaruratga koʻra, lekin kamida bir oyda bir marta oʻtkaziladi.

39. Apellyatsiya kengashlarining majlisi, agar unda aʼzolarning yarmidan koʻpi ishtirok etayotgan boʻlsa, vakolatli hisoblanadi.

Majlisni oʻtkazish uchun kvorum shakllanmagan taqdirda, apellyatsiya kengashlarining yangi majlisi oʻtkaziladigan sana eʼlon qilinadi.

40. Apellyatsiya kengashlarining majlislarini ularning raislari olib boradi. Rais ishtirok eta olmagan holatlarda, majlisni tegishliligiga koʻra ularning oʻrinbosarlari olib boradi.

Apellyatsiya kengashlarining majlislariga boshqa davlat organlari, nodavlat notijorat tashkilotlar, fuqarolik jamiyati institutlarining vakillari ham taklif etilishi mumkin.

Apellyatsiya kengashlarining majlislari kengash raisining qaroriga koʻra va manfaatdor shaxsga bu haqda xabar berilgan holda audio- va videotasvirga, shuningdek, fotosuratga olinishi mumkin.

Audio- va videoyozuv, fotosuratlar manfaatdor shaxs va vakolatli organga taqdim etilishi mumkin.

41. Apellyatsiya kengashlarining aʼzolari, manfaatdor shaxs yoki uning vakili hamda vakolatli organ mansabdor shaxslari majlislarda videokonferensaloqa vositalaridan foydalangan holda ishtirok etishi mumkin.

42. Apellyatsiya kengashlari majlisining vaqti va joyi toʻgʻrisida tegishli tartibda xabardor qilingan manfaatdor shaxsning va ishga aloqador boshqa shaxslarning kelmaganligi shikoyatni apellyatsiya kengashlari tomonidan ularning ishtirokisiz koʻrib chiqish uchun toʻsqinlik qilmaydi.

43. Apellyatsiya kengashlari oʻz majlislarida manfaatdor shaxsning talablari va eʼtirozlarini asoslovchi holatlar, shuningdek, ishni toʻgʻri hal qilish uchun ahamiyatga ega boʻlgan boshqa holatlar mavjudligi yoki mavjud emasligini aniqlaydi.

44. Apellyatsiya kengashlarining qarori majlisda ishtirok etayotgan apellyatsiya kengashlari aʼzolarining oddiy koʻpchilik ovozi bilan qabul qilinadi. Bunda hech bir aʼzo ovoz berishda betaraf qolishga haqli emas.

Ovozlar teng boʻlgan hollarda majlisga raislik qiluvchining ovozi hal qiluvchi ovoz hisoblanadi.

45. Apellyatsiya kengashlarining majlisi yakunlari boʻyicha quyidagi qarorlardan biri rasmiylashtiriladi:

maʼmuriy hujjatni oʻzgartirishsiz oʻz kuchida qoldirish;

maʼmuriy hujjatga oʻzgartirish kiritish boʻyicha vakolatli organga majburiyat yuklash;

maʼmuriy hujjatni qisman yoki toʻliq bekor qilish hamda vakolatli organ tomonidan davlat xizmatini koʻrsatish boʻyicha arizani qayta koʻrib chiqish.

46. Apellyatsiya kengashlarining qarori majlisda ishtirok etgan barcha aʼzolar tomonidan (zaruratga koʻra elektron shaklda) imzolanadi.

Qabul qilingan qarorga qoʻshilmagan apellyatsiya kengashlari aʼzosi qarorni imzolab, oʻzining alohida fikrini yozma shaklda taqdim qiladi. Alohida fikr ish materiallariga qoʻshib qoʻyiladi.

Bunda apellyatsiya kengashlarining qarorlari tegishliligiga koʻra Adliya vazirligi va Toshkent shahar adliya boshqarmasida qonunchilikda belgilangan tartibda saqlanadi.

47. Apellyatsiya kengashlarining qarorlari uch ish kunidan kechiktirmay “E-qaror” elektron tizimida joylashtiriladi, bunda mazkur qarorda qonunchilikda oshkor qilinishi taqiqlangan maʼlumotlarning oshkor qilinishiga yoʻl qoʻyilmaydi.

48. Apellyatsiya kengashlarining qarorlari ustidan manfaatdor shaxs tomonidan sud tartibida shikoyat qilinishi mumkin, vakolatli organlar uchun esa mazkur qarorlar qatʼiy hisoblanadi va ular tomonidan qaror ustidan shikoyat qilinishi mumkin emas.

49. Apellyatsiya kengashlarining majlis bayonnomasi kotib tomonidan imzolanadi va majlisga raislik qiluvchi tomonidan tasdiqlanadi.

50. Apellyatsiya kengashlarining qarorlari uch ish kuni ichida vakolatli organ va manfaatdor shaxsga yuboriladi.

51. Apellyatsiya kengashlarining qarorlari vakolatli organlar uchun majburiy hisoblanadi.

Vakolatli organ mansabdor shaxslari qaror va u bilan bogʻliq boshqa maʼlumotlarni uchinchi shaxslarga oshkor etishga haqli emas.

52. Apellyatsiya kengashlari tomonidan vakolatli organning maʼmuriy hujjatini oʻzgartirish, qisman yoki toʻliq bekor qilish haqida qaror qabul qilingan taqdirda, ushbu davlat xizmatini koʻrsatish boʻyicha berilgan ariza YIDXP va (yoki) vakolatli organlarning tegishli xizmatlar boʻyicha axborot tizimlarida qayta koʻrib chiqish bosqichiga qaytariladi. Bunda manfaatdor shaxslar tomonidan davlat xizmatini koʻrsatish boʻyicha qayta ariza berish talab etilmaydi.

53. Apellyatsiya kengashlarining maʼmuriy hujjatni oʻzgartirish haqidagi qaroriga asosan qayta koʻrib chiqish bosqichiga oʻtgan arizalar uch ish kuni ichida hamda qisman yoki toʻliq bekor qilish haqidagi qaror yuzasidan qayta koʻrib chiqish bosqichiga oʻtgan arizalar tegishli davlat xizmatini koʻrsatish boʻyicha reglamentlarda belgilangan muddatlarda va manfaatdor shaxsdan haq undirilmasdan vakolatli organ tomonidan koʻrib chiqiladi.

54. Davlat xizmatlarini koʻrsatish boʻyicha arizalar qayta koʻrib chiqilganidan soʻng vakolatli organ bir ish kuni ichida bu haqda apellyatsiya kengashlarini xabardor qilishi shart.

Vakolatli organ rahbarlari va ularning oʻrinbosarlari tomonidan apellyatsiya kengashlarining oʻz vakolatlari doirasida qabul qilgan qarorlarining ijrosi taʼminlamaganligi davlat xizmatlari koʻrsatish sohasidagi qonunchilikni buzish hisoblanadi.

6-bob. Tegishli davlat xizmatlari koʻrsatilishini monitoring qilish natijalarini apellyatsiya kengashlari tomonidan koʻrib chiqish tartibi

55. Tegishli davlat xizmatlari koʻrsatilishini monitoring qilish Adliya vazirligi va Toshkent shahar adliya boshqarmasi tomonidan qonunchilikda belgilangan tartibda amalga oshiriladi. Monitoring natijalari boʻyicha apellyatsiya kengashlari tomonidan qonunchilikka muvofiqligi koʻrib chiqiladigan maʼmuriy hujjatlar har oy yakunida kotiblarga taqdim etib boriladi.

56. Kotiblar monitoring natijalari boʻyicha taqdim etilgan maʼmuriy hujjatlarni apellyatsiya kengashlari tomonidan qonunchilikka muvofiqligini koʻrib chiqish uchun uch ish kuni ichida apellyatsiya kengashlari muhokamasiga kiritadi va bu haqda manfaatdor shaxslarni yozma yoki elektron shaklda xabardor qiladi.

57. Tegishli davlat xizmatlari koʻrsatilishini monitoring qilish natijalari boʻyicha maʼmuriy hujjatlarning qonunchilikka muvofiqligi apellyatsiya kengashlari tomonidan ushbu Vaqtinchalik nizomning 5-bobida belgilangan tartibda koʻrib chiqiladi.

7-bob. Yakunlovchi qoidalar

58. Vakolatli organ tomonidan manfaatdor shaxsga yetkazilgan zararni qoplash bilan bogʻliq masalalar sud tartibida hal etiladi.

59. Apellyatsiya kengashlari tomonidan shikoyatlarni koʻrib chiqish paytida maʼmuriy huquqbuzarlik alomatlari mavjudligi aniqlangan taqdirda, tegishli hujjatlar qonunchilik hujjatlarida belgilangan tartibda maʼmuriy huquqbuzarlik toʻgʻrisidagi ishlarni koʻrib chiqish vakolatiga ega boʻlgan organlarga yuboriladi.

60. Apellyatsiya kengashlari faoliyati bilan bogʻliq xarajatlarni moliyalashtirish, shu jumladan, jalb qilingan mutaxassis va ekspertlarga haq toʻlash Adliya vazirligining va Toshkent shahar adliya boshqarmasining budjetdan tashqari mablagʻlari va qonunchilik hujjatlarida taqiqlanmagan boshqa manbalar hisobidan amalga oshiriladi.

61. Ushbu Vaqtinchalik nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Davlat xizmatlarini koʻrsatish boʻyicha maʼmuriy hujjatlarning qonunchilikka muvofiqligini sudgacha koʻrib chiqish tartibi toʻgʻrisidagi vaqtinchalik nizomga 1-ILOVA

Apellyatsiya kengashlariga shikoyat qilish va shikoyatlar (davlat xizmatlari koʻrsatilishini monitoring qilish natijalari)ni koʻrib chiqish

SXEMASI

Davlat xizmatlarini koʻrsatish boʻyicha maʼmuriy hujjatlarning qonunchilikka muvofiqligini sudgacha koʻrib chiqish tartibi toʻgʻrisidagi vaqtinchalik nizomga 2-ILOVA

Apellyatsiya kengashlariga manfaatdor shaxslar tomonidan yuboriladigan shikoyatning

NAMUNAVIY SHAKLI

Oʻzbekiston Respublikasi Prezidentining 2025-yil 19-maydagi PQ-188-son qaroriga 2-ILOVA

Oʻzbekiston Respublikasi Adliya vazirligi huzuridagi Apellyatsiya kengashining

NAMUNAVIY TARKIBI

Izoh:

Apellyatsiya kengashi aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Zaruratga koʻra, Apellyatsiya kengashi faoliyatiga boshqa mutaxassis va ekspertlar jalb etilishi mumkin.

Oʻzbekiston Respublikasi Prezidentining 2025-yil 19-maydagi PQ-188-son qaroriga 3-ILOVA

Toshkent shahar adliya boshqarmasi huzuridagi Apellyatsiya kengashining

NAMUNAVIY TARKIBI

Izoh:

Apellyatsiya kengashi aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Zaruratga koʻra, Apellyatsiya kengashi faoliyatiga boshqa mutaxassis va ekspertlar jalb etilishi mumkin.