Xalq deputatlari mahalliy Kengashlari uchun korrupsiyaga qarshi kurashishga oid uslubiy tavsiyalarni tasdiqlash toʻgʻrisida (KQ-174-V-son)

06.05.2025

Oʻzbekiston Respublikasi Oliy Majlisi Senati Kengashining

qarori

Oʻzbekiston Respublikasi Prezidentining 2025-yil 21-apreldagi PF-71-sonli Farmoni bilan tasdiqlangan Korrupsiyaga qarshi kurashish boʻyicha milliy kengashning 2025-yil 5-martda oʻtkazilgan kengaytirilgan yigʻilishida belgilangan topshiriqlar ijrosini taʼminlash boʻyicha amaliy chora-tadbirlar dasturining 11-bandini inobatga olib, Oʻzbekiston Respublikasi Oliy Majlisi Senati Kengashining 2025-yil 17-martdagi “Oʻzbekiston Respublikasi Prezidenti Sh.M. Mirziyoyev tomonidan Korrupsiyaga qarshi kurashish milliy kengashi majlisida belgilab berilgan ustuvor yoʻnalishlardan kelib chiqib, Oʻzbekiston Respublikasi Oliy Majlisining Senati hamda xalq deputatlari mahalliy Kengashlari oldida turgan vazifalar toʻgʻrisida”gi KQ-89-V-sonli Qarori 10-bandining ijrosini taʼminlash maqsadida “Oʻzbekiston Respublikasi Oliy Majlisining Senati toʻgʻrisida”gi Konstitutsiyaviy Qonunning 16-moddasiga muvofiq Oʻzbekiston Respublikasi Oliy Majlisi Senatining Kengashi qaror qiladi:

1. Xalq deputatlari mahalliy Kengashlari uchun korrupsiyaga qarshi kurashishga oid uslubiy tavsiyalar ilovaga muvofiq tasdiqlansin.

2. Xalq deputatlari viloyat, tuman, shahar Kengashlariga:

ushbu Qaror bilan tasdiqlangan Uslubiy tavsiyalarga qatʼiy rioya qilinishini taʼminlash;

Korrupsiyaga qarshi kurashish va xavfsizlik masalalari boʻyicha doimiy komissiyalar tomonidan har oyda bitta yoʻnalishda korrupsiyaviy omillarni aniqlab, ushbu masalalarni mahalliy Kengashlar sessiyalari muhokamasiga kiritib borish amaliyotini yoʻlga qoʻyish;

sessiya muhokamalaridan keyin Oliy Majlis palatalarining korrupsiyaga qarshi kurashishga masʼul qoʻmitalariga taklif kiritib borish ishlarini tashkil qilish tavsiya etilsin.

3. Oʻzbekiston Respublikasi Oliy Majlisi Senati devonining Hududiy vakillik organlari faoliyatini oʻrganish markazi Oʻzbekiston Respublikasi Oliy Majlisi Senatining Sud-huquq masalalari va korrupsiyaga qarshi kurashish qoʻmitasi bilan birgalikda ushbu Qaror ijrosini taʼminlashda xalq deputatlari viloyat, tuman, shahar Kengashlari kotibiyatlariga uslubiy jihatdan koʻmaklashsin.

4. Mazkur Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

5. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2025-yil 6-may,

KQ-174-V-son

Oʻzbekiston Respublikasi Oliy Majlisi Senati Kengashining 2025-yil 6-maydagi KQ-174-V-sonli Qaroriga ILOVA

Xalq deputatlari mahalliy Kengashlari uchun korrupsiyaga qarshi kurashishga oid uslubiy tavsiyalar

1-bob. Umumiy qoidalar

1. Mazkur Uslubiy tavsiyalar xalq deputatlari mahalliy Kengashlarining hududlarda korrupsiyaga qarshi kurashish masalalari yuzasidan faoliyatini samarali tashkil qilishga qaratilgan boʻlib, korrupsiyaga qarshi kurashish boʻyicha faoliyatni amalga oshirish tartib-taomillari va mexanizmlarini belgilaydi.

2. Ushbu Uslubiy tavsiyalar Oʻzbekiston Respublikasining Konstitutsiyasi, “Mahalliy davlat hokimiyati toʻgʻrisida”gi, “Korrupsiyaga qarshi kurashish toʻgʻrisida”gi Oʻzbekiston Respublikasining qonunlari, Oʻzbekiston Respublikasi Prezidentining farmon va qarorlari, Oliy Majlis palatalarining qarorlari va boshqa qonun hujjatlariga asosan ishlab chiqilgan.

3. Mazkur uslubiy tavsiyalarda quyidagi asosiy tushunchalar qoʻllanadi:

korrupsiya — shaxsning oʻz mansab yoki xizmat mavqeyidan shaxsiy manfaatlarini yoxud oʻzga shaxslarning manfaatlarini koʻzlab moddiy yoki nomoddiy naf olish maqsadida qonunga xilof ravishda foydalanishi, xuddi shuningdek, bunday nafni qonunga xilof ravishda taqdim etish;

korrupsiyaga oid huquqbuzarlik — korrupsiya alomatlariga ega boʻlgan, sodir etilganligi uchun qonunchilikda javobgarlik nazarda tutilgan qilmish;

manfaatlar toʻqnashuvi — shaxsning shaxsiy (bevosita yoki bilvosita) manfaatdorligi uning oʻz lavozim yoki xizmat majburiyatlarini lozim darajada bajarishiga taʼsir koʻrsatayotgan yoxud taʼsir koʻrsatishi mumkin boʻlgan hamda shaxsiy manfaatdorlik bilan fuqarolarning, tashkilotlarning, jamiyatning yoki davlatning huquqlari, qonuniy manfaatlari oʻrtasida qarama-qarshilik yuzaga kelayotgan (mavjud manfaatlar toʻqnashuvi) yoki yuzaga kelishi mumkin boʻlgan (ehtimoliy manfaatlar toʻqnashuvi) vaziyat;

korrupsiyani keltirib chiqaruvchi omillar — korrupsiyaning koʻrinishlari uchun, korrupsiyaga oid huquqbuzarliklarni sodir etish uchun imkoniyat yaratadigan normalar;

normativ-huquqiy hujjatlarning va ular loyihalarining korrupsiyaga qarshi ekspertizasi — normativ-huquqiy hujjatlardagi va ularning loyihalaridagi korrupsiyani keltirib chiqaruvchi omillarni aniqlashga, aniqlangan korrupsiyani keltirib chiqaruvchi omillarni bartaraf etishga qaratilgan tavsiyalar ishlab chiqish va choralar koʻrishga yoʻnaltirilgan tadbirlar majmui;

4. Xalq deputatlari mahalliy Kengashlarining korrupsiyaga qarshi kurash sohasidagi asosiy vazifalari quyidagilardan iborat:

hududda korrupsiyaga qarshi kurashish sohasidagi ishlarning holatini kompleks oʻrganish hamda ushbu sohadagi faoliyatni takomillashtirish yuzasidan takliflar ishlab chiqish;

mahalliy davlat hokimiyati organlari faoliyatida korrupsiyaning oldini olishga koʻmaklashish;

korrupsiyaga qarshi chora-tadbirlarni tashkil etish va amalga oshirishda ishtirok etish;

korrupsiyaga qarshi kurashish sohasidagi qonun hujjatlariga rioya etilishi ustidan taʼsirchan deputatlik nazoratini taʼminlash;

davlat organlari, huquqni muhofaza qiluvchi organlar, nodavlat notijorat tashkilotlari va fuqarolar bilan oʻzaro hamkorlik qilish;

aholining huquqiy ongi va madaniyatini yuksaltirishga, ularda korrupsiyaga qarshi murosasiz munosabatni shakllantirishga koʻmaklashish.

Qonunchilik hujjatlarida xalq deputatlari mahalliy Kengashlarining zimmasiga korrupsiyaga qarshi kurashish sohasida boshqa vazifalar yuklatilishi mumkin.

2-bob. Mahalliy Kengashlarning norma ijodkorligi faoliyatida korrupsiyaga qarshi kurashish

5. Mahalliy Kengashlarning norma ijodkorligi faoliyatida korrupsiyaga qarshi kurashishning maqsadi — deputatlar, doimiy (muvaqqat) komissiyalar, partiya guruhlari yoki boshqa tashabbuskorlar tomonidan mahalliy Kengash qarori loyihasini ishlab chiqish, uni sessiyada muhokama qilish va qabul qilish jarayonida korrupsiya xavfining oldini olish, shuningdek, ochiqlik va shaffoflikni taʼminlashdan iborat.

6. Mahalliy Kengash qarori loyihasida korrupsiya holatlari vujudga kelishiga sharoit yaratadigan normalar (bandlar), shuningdek, korrupsiyani keltirib chiqaruvchi omillar koʻzda tutilishi taqiqlanadi.

7. Mahalliy Kengash qarori va uning loyihasidagi korrupsiyani keltirib chiqaruvchi asosiy omillar jumlasiga quyidagilarni kiritish mumkin:

normalarning barqarorligi va huquqiy jihatdan muvofiqligi bilan bogʻliq boʻlgan korrupsiyani keltirib chiqaruvchi omillar;

vakolatlar, huquq va majburiyatlar bilan bogʻliq boʻlgan korrupsiyani keltirib chiqaruvchi omillar;

maʼmuriy tartib-taomillar bilan bogʻliq boʻlgan korrupsiyani keltirib chiqaruvchi omillar.

8. Normalarning barqarorligi va huquqiy jihatdan muvofiqligi bilan bogʻliq boʻlgan korrupsiyani keltirib chiqaruvchi omillar jumlasiga quyidagilarni kiritish mumkin:

soʻzlarning notoʻgʻri qoʻllanilishi;

noaniq va asossiz havolalarning qoʻllanilishi;

normativ-huquqiy hujjatlarda qarama-qarshiliklarning mavjudligi.

9. Vakolatlar, huquq va majburiyatlar bilan bogʻliq boʻlgan korrupsiyani keltirib chiqaruvchi omillar jumlasiga quyidagilarni kiritish mumkin:

diskretsion vakolatlarning kengligi;

vakolatlarning noaniqligi;

bir-birini takrorlovchi vakolatlar va vazifalarning mavjudligi;

oʻz vakolatiga kirmaydigan masalalar boʻyicha normativ-huquqiy va boshqa hujjatlar qabul qilinishi;

vazifani yoki topshiriqni bajarish uchun ijrochida zarur boʻlgan vakolatlar va resurslarning mavjud emasligi;

oʻz vaqtida tartibga solinmaslik;

manfaatlar toʻqnashuvi;

afzalliklarning asossiz ravishda belgilanishi;

normativ-huquqiy hujjatning kuchga kirishini asossiz ravishda kechiktirish;

huquq va majburiyatlarning nomutanosibligi.

10. Maʼmuriy tartib-taomillar bilan bogʻliq boʻlgan korrupsiyani keltirib chiqaruvchi omillar jumlasiga quyidagilarni kiritish mumkin:

maʼmuriy tartib-taomillarning mavjud emasligi yoki toʻliq emasligi;

belgilangan qoidalardagi istisno holatlarning asossiz ravishda qoʻllanilishi;

ortiqcha va asossiz talablar belgilanishi;

vaqt chegaralarining noaniqligi;

toʻlovlar miqdorlarining noaniqligi;

mahalliy budjet, uning qoʻshimcha manbalari mablagʻlari sarflanishining aniq va shaffof tartib-taomillari mavjud emasligi;

soliqlar va yigʻimlarni hisoblash hamda undirish tartib-taomillarining murakkabligi yoki noaniqligi;

davlat xaridlari bilan bogʻliq masalalar boʻyicha aniq va shaffof tartib-taomillarning mavjud emasligi;

huquq va imtiyozlar beruvchi hamda maʼmuriy tartib-taomillarni belgilaydigan tanlov (auksion, tender) tartib-taomillaridan boʻyin tovlash imkoniyatini beruvchi normalarning mavjudligi;

tadbirlarni amalga oshirish usullarining murakkabligi va ularni moliyalashtirish manbalarining noaniqligi.

11. Ushbu bobda nazarda tutilgan korrupsiyani keltirib chiqaruvchi omillarni aniqlash maqsadida mahalliy Kengash qarori loyihasi tegishincha xalq deputatlari viloyat, Toshkent shahar Kengashi kotibiyatining bosh yuriskonsulti, tuman (shahar) adliya boʻlimi huzuridagi Yuridik xizmat markazi tomonidan oʻtkaziladi.

12. Qaror loyihasining korrupsiyaga qarshi ekspertizasi natijalariga koʻra xulosa tuziladi.

Qaror loyihasining korrupsiyaga qarshi ekspertizasi natijalari huquqiy ekspertizani oʻtkazish natijalari boʻyicha tuziladigan xulosada ham aks ettirilishi mumkin.

13. Mahalliy Kengash qarori loyihasining korrupsiyaga qarshi ekspertizasi natijalari boʻyicha tuzilgan xulosada quyidagilar koʻrsatilishi kerak:

qaysi normativ-huquqiy hujjatga koʻra qaror loyihasini ishlab chiqish topshirilgan boʻlsa, oʻsha normativ-huquqiy hujjat toʻgʻrisidagi maʼlumotlar (nomi, qabul qilingan sanasi, raqami, eʼlon qilingan rasmiy manbasi, topshiriq bayon etilgan tegishli moddasi yoki bandi (kichik bandi, xatboshisi), shuningdek, yuqori turuvchi organning topshiriqlari yoki tashabbuskor davlat organi toʻgʻrisidagi maʼlumotlar (organning nomi, topshiriqning (topshiriq mavjud boʻlganda) raqami va sanasi, zarur boʻlgan taqdirda, topshiriq bergan mansabdor shaxs);

qaror loyihasining mohiyati va ahamiyatining qisqacha bayoni;

korrupsiyani keltirib chiqaruvchi omillar mavjudligi yoki mavjud emasligi toʻgʻrisidagi maʼlumotlar (tegishli xulosa asoslantirilgan holda);

aniqlangan korrupsiyani keltirib chiqaruvchi omillarni bartaraf etishga doir (ularni bartaraf etish choralari koʻrsatilgan holda) takliflar va tavsiyalar.

14. Qaror loyihasining korrupsiyaga qarshi ekspertizasi natijalari boʻyicha xulosa mahalliy Kengash qarori loyihasini ishlab chiquvchi hamda mahalliy Kengash tomonidan majburiy ravishda koʻrib chiqilishi lozim.

15. Mahalliy Kengash qarorlari loyihalarining korrupsiyaga qarshi ekspertizasi Xalq deputatlari viloyat, tuman, shahar Kengashi qarorlari loyihalarini ishlab chiqish hamda ularni huquqiy ekspertizadan oʻtkazish uslubiyotida koʻrsatilgan huquqiy ekspertiza muddati ichida oʻtkaziladi.

16. Qaror loyihasida korrupsiyani keltirib chiqaruvchi omil aniqlangan taqdirda qaror loyihasini ishlab chiquvchi yoki mahalliy Kengash tomonidan uni bartaraf etish choralari koʻriladi.

17. Mahalliy Kengash qarori loyihasi jamoatchilik muhokamasiga qoʻyilgan taqdirda loyiha yuzasidan korrupsion omil mavjudligi boʻyicha kelib tushgan fikr-mulohazalar majburiy ravishda koʻrib chiqilishi, ular rad etilgan taqdirda asoslantirilishi lozim.

3-bob. Mahalliy budjetni tasdiqlash va uning ijrosini nazorat qilishda korrupsiyaga qarshi kurashish

18. Ushbu bobning maqsadi mahalliy budjetni ishlab chiqish, muhokama qilish, tasdiqlash va uning ijrosini nazorat qilishda korrupsiya xavf-xatarlarining oldini olish, shuningdek, budjet jarayonining shaffofligi va hisobdorligini oshirishdan iborat.

19. Budjet jarayonidagi korrupsiyaga oid xavf-xatarlar quyidagi bosqichlarda vujudga kelishi mumkin:

mahalliy budjet loyihasini tuzish (budjet takliflarini shakllantirishda shaffoflikning yoʻqligi; shaxsiy manfaatlarni ilgari surish; dasturiy maqsadga yoʻnaltirilgan yondashuvga eʼtibor bermaslik);

mahalliy budjetni mahalliy Kengashda koʻrib chiqish va tasdiqlash (manfaatlar toʻqnashuvi; muhokamalarda va tuzatishlarda shaffoflikning yoʻqligi; daromad va xarajatlar prognozlarini asossiz ravishda oʻzgartirish; jamoatchilik ishtirokining yoʻqligi);

mahalliy budjet ijrosini taʼminlash (budjet mablagʻlarini maqsadsiz sarflanishi, davlat xaridlari toʻgʻrisidagi qonunchilikka rioya etmaslik; budjet ijrosi toʻgʻrisidagi maʼlumotlarni yashirish; xarajatlarning samaradorligi ustidan nazoratning sustligi);

mahalliy budjet ijrosini nazorat qilish (budjet ijrosi ustidan tekshiruvlarning yetarli emasligi; tekshiruvni (nazoratni) amalga oshiruvchi shaxslarning yetarli koʻnikmalarga ega emasligi; aniqlangan kamchiliklarga nisbatan taʼsirchan choralar koʻrilmasligi) va boshqalar.

20. Ushbu bob 19-bandida nazarda tutilgan korrupsiyaga oid xavf-xatarlarning oldini olish maqsadida quyidagi choralar koʻrish maqsadga muvofiq hisoblanadi:

shaffoflikni oshirish — budjet jarayonini raqamlashtirish, uning barcha bosqichlarini ochiq manbalarda eʼlon qilib borish, davlat xaridlarining ochiqligini taʼminlash;

manfaatlar toʻqnashuvini boshqarish — manfaatlar toʻqnashuvi boʻlgan shaxslarni qarorlar qabul qilish jarayonidan chetlashtirish;

jamoatchilik nazorati — budjet jarayonini nazorat qilish uchun jamoatchilik vakillari ishtirokini taʼminlash, shu jumladan budjet ijrosini oʻrganishga oid nazorat-tahlil tadbirlariga va muhokamalarga fuqarolarni jalb qilish, fuqarolarning budjet jarayonini monitoring qilish imkoniyatlari haqida xabardorligini oshirish;

deputatlik nazorati — budjet ijrosini baholash uchun mustaqil auditorlarni jalb qilish, budjet ijrosini bevosita joyiga chiqqan holda oʻrganish, huquqbuzarliklar aniqlangan taqdirda bu haqdagi axborot darhol huquqni muhofaza qiluvchi organlarga taqdim etish.

21. Mahalliy Kengash tomonidan budjet loyihasini koʻrib chiqishda u maqsad va kutilayotgan natijalarning shaffofligini taʼminlovchi dasturiy-maqsadli tamoyil asosida shakllantirilganligiga eʼtibor qaratiladi.

Zarur hollarda, mahalliy Kengash budjet xarajatlarining asosliligini baholash uchun mahalliy Kengash huzuridagi ekspertlik guruhi aʼzolarini, shuningdek, mustaqil ekspertlarni jalb qilishi mumkin.

22. Mahalliy Kengash sessiyasida budjet loyihasini koʻrib chiqish va muhokama qilishda “mahalla yettiligi”, jamoatchilik vakillari taklif etilishi mumkin.

23. Mahalliy budjetga asoslantirilmagan, shuningdek, jamoatchilik muhokamasisiz oʻzgartirish va qoʻshimchalar kiritilishi mumkin emas.

Mahalliy budjetga oʻzgartirish va qoʻshimchalar kiritish toʻgʻrisidagi mahalliy Kengash qarorida ushbu oʻzgartirish va qoʻshimchalar kimning taklifi asosida kiritilganligi aniq koʻrsatilishi shart.

24. Mahalliy budjet ijrosining borishi toʻgʻrisidagi hisobotlar har chorakda mahalliy Kengashning rasmiy sahifalarida eʼlon qilinadi.

4-bob. Davlat organlari va tashkilotlarining hisobot (axborot)larini eshitishda korrupsiyaga qarshi kurashish

25. Ushbu bobning maqsadi davlat organlari va tashkilotlari mansabdor shaxslarining hisobot (axborot)larini eshitishni tashkil etish orqali mahalliy Kengashlarning korrupsiyaga qarshi kurashish sohasidagi faoliyati samaradorligini oshirish, bu borada eshituvlarni tashkil etish va oʻtkazish masalasida yagona yondashuvni shakllantirish, davlat organlari va tashkilotlari faoliyatida korrupsiya xavfini aniqlashga koʻmaklashish, davlat organlarining vakillik organlari va jamiyat oldidagi ochiqligi va hisobdorligini oshirishdan iborat.

26. Mahalliy Kengash tomonidan davlat organlari va tashkilotlarining hisobot (axborot)larini eshitishda korrupsiyaga qarshi kurashish quyidagi shakllarda amalga oshirilishi mumkin:

korrupsiyaga qarshi kurashish boʻyicha faoliyatni amalga oshiruvchi tegishli davlat organi mansabdor shaxsining hisoboti (axboroti)ni eshitish (Korrupsiyaga qarshi kurashish agentligi vakili, tegishli hudud prokurori, hududiy ichki ishlar, adliya organi rahbari, Bosh prokuratura huzuridagi Iqtisodiy jinoyatlarga qarshi kurashish departamentining hududiy boʻlinmasi vakili);

davlat organlari va tashkilotlarining hisoboti (axboroti)ni eshitish jarayonida ularning sohada korrupsiyaga qarshi kurashish borasidagi faoliyatini muhokama qilish.

27. Davlat organi va tashkiloti mansabdor shaxsining hisoboti (axboroti)ni eshitish boʻyicha nazorat-tahlil tadbiri rejalashtirishdan boshlanadi.

Hisobot (axborot)ni eshitish rejalashtirishda birinchi navbatda tegishli hududda korrupsiya xavfi yuqori boʻlgan sohalarda funksiyalarni bajaradigan davlat organlari, tashkilotlari tanlab olinadi.

28. Davlat organi yoki tashkiloti mansabdor shaxsi mahalliy Kengashga hisobot (axborot)ni yozma shaklda quyidagi boʻlimlarni inobatga olgan taqdim etadi:

davlat organi va tashkilotining tegishli davrdagi faoliyatining umumiy tavsifi;

korrupsiyaning oldini olish boʻyicha koʻrilgan choralar (shu jumladan, korrupsiyaga qarshi standartlar, xodimlarni oʻqitish, manfaatlar toʻqnashuvini boshqarish va boshqalar);

korrupsiyaga qarshi kurashish boʻyicha qonun hujjatlarining aniqlangan buzilishlari va koʻrilgan choralar toʻgʻrisida maʼlumot;

ichki nazorat va korrupsiya xavf-xatarlari monitoringi natijalari toʻgʻrisidagi maʼlumotlar;

korrupsiyaga qarshi kurashish boʻyicha ishlarni takomillashtirish boʻyicha koʻrilayotgan choralar va takliflar.

29. Davlat organi yoki tashkiloti mansabdor shaxsi mahalliy Kengashga hisobot (axborot)ni ushbu masala sessiyada muhokama qilinishidan kamida 10 kun oldin — tasdiqlovchi hujjatlar (statistik maʼlumotlar, tekshirish hisobotlari va boshqalar)ni ilova qilgan holda taqdim qiladi.

30. Mahalliy Kengash tomonidan davlat organi yoki tashkiloti mansabdor shaxsining hisoboti (axboroti)ni tahlil qilish quyidagi usullar orqali amalga oshiriladi:

hisobot (axborot)dagi maʼlumotlarni mustaqil oʻrganish va monitoring natijalari bilan solishtirish;

davlat organlari va tashkilotlarining xabarlarini koʻrib chiqish;

jismoniy va yuridik shaxslarning korrupsiyaga oid murojaatlari, ommaviy axborot vositalari, Internet jahon axborot tarmogʻi va ijtimoiy tarmoqlarda yoritilgan materiallarni tahlil qilish;

oldingi eshituvlardan soʻng berilgan tavsiyalarning bajarilishini baholash va boshqalar.

31. Mahalliy Kengash tomonidan davlat organi yoki tashkiloti mansabdor shaxsining hisoboti (axboroti)ni baholash quyidagi mezonlar asosida amalga oshiriladi:

taqdim etilgan maʼlumotlarning toʻliqligi va haqqoniyligi;

korrupsiyaga qarshi amalga oshirilgan chora-tadbirlarning samaradorligi;

aniqlangan qoidabuzarliklarga oʻz vaqtida tezkorlik bilan chora koʻrilganligi;

mahalliy davlat hokimiyati organlari va jamoatchilik bilan oʻzaro hamkorlik darajasi va boshqalar.

32. Mahalliy Kengash sessiyasida tegishli mansabdor shaxsning korrupsiyaga qarshi kurashish boʻyicha hisoboti (axboroti)ni muhokama qilish jarayonida deputatlar tomonidan quyidagi masalalarga eʼtibor qaratilishi maqsadga muvofiq hisoblanadi:

korrupsiyaga qarshi kurashish ishlarining samaradorligini reyting baholash natijalari;

normativ-huquqiy hujjatlar va ular loyihalarining korrupsiyaga qarshi ekspertizasi;

korrupsiyaga qarshi kurashish sohasidagi dasturlarning amalga oshirilishini taʼminlash borasidagi ishlar;

tegishli davrda korrupsiya xavfini minimallashtirish boʻyicha koʻrilgan choralar;

korrupsiyaga oid huquqbuzarliklarning oldini olishga, bunga imkon beruvchi omillarni bartaraf etishga doir chora-tadbirlar samaradorligi;

faoliyat ochiqligini taʼminlash, raqamlashtirish, xodimlarning korrupsiyaga qarshi kurashish sohasidagi huquqiy savodxonligini oshirish;

faoliyat davomida manfaatlar toʻqnashuvining oldini olish va uni bartaraf etishga doir chora-tadbirlar;

davlat xaridlarini amalga oshirish jarayonidagi korrupsion holatlar va ularning oldini olishga qaratilgan chora-tadbirlar;

jismoniy va yuridik shaxslarning korrupsiyaga oid murojaatlari hamda ularni koʻrib chiqish natijalari;

korrupsiyaga qarshi kurashish boʻyicha amaldagi qonunchilikni takomillashtirish, ushbu sohadagi ishlarni yaxshilash yuzasidan takliflar va boshqalar.

5-bob. Yakunlovchi qoidalar

33. Xalq deputatlari mahalliy Kengashlari, ularning doimiy komissiyalari va deputatlarning korrupsiyaga qarshi kurashishga oid faoliyatini axborot-tahliliy va tashkiliy jihatdan taʼminlash mahalliy Kengash kotibiyati tomonidan amalga oshiriladi. Kotibiyat ularni zarur hujjatlar, axborot va maʼlumot materiallari, shuningdek, ushbu faoliyati bilan bogʻliq masalalar boʻyicha mutaxassislarning maslahatlari bilan taʼminlaydi.

34. Xalq deputatlari mahalliy Kengashlari, ularning doimiy komissiyalari va deputatlar korrupsiyaga qarshi kurashishga doir faoliyatni amalga oshirishda davlat organlari va tashkilotlari, shu jumladan huquqni muhofaza qiluvchi organlar va maxsus tuzilmalar, nodavlat notijorat tashkilotlari va fuqarolar bilan hamkorlik qiladi.

35. Mahalliy Kengashlar raislari Uslubiy tavsiyalar talablariga rioya qilish uchun shaxsan masʼuldir.

36. Mazkur Uslubiy tavsiyalarda belgilangan talablar buzilishida aybdor boʻlgan shaxslar belgilangan tartibda javobgarlikka tortilishi mumkin.

37. Ushbu Uslubiy tavsiyalarga oʻzgartirish va qoʻshimchalar kiritish, shuningdek, uni oʻz kuchini yoʻqotgan deb topish Oʻzbekiston Respublikasi Oliy Majlisi Senati Kengashining Qarori bilan amalga oshiriladi.