Yoʻl harakati qoidabuzarliklarini jarima ballari asosida baholash tizimini joriy etish toʻgʻrisida (296-son)

06.05.2025

Oʻzbekiston Respublikasi Vazirlar Mahkamasining

qarori

Yoʻl harakati xavfsizligini taʼminlash tizimini takomillashtirish, zamonaviy axborot-kommunikatsiya texnologiyalarini joriy etgan holda yoʻl-transport hodisalarining oldini olish, shuningdek, haydovchilarning yoʻl harakati qoidalariga rioya etish borasidagi masʼuliyati va madaniyatini yanada oshirish maqsadida Vazirlar Mahkamasi qaror qiladi:

1. Oʻzbekiston Respublikasining “Yoʻl harakati xavfsizligi tizimi takomillashtirilishi munosabati bilan Oʻzbekiston Respublikasining Jinoyat, Jinoyat-protsessual kodekslariga hamda Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartirish va qoʻshimchalar kiritish haqida” 2025-yil 20-fevraldagi OʻRQ-1033-son Qonuniga muvofiq:

yoʻl harakati qoidabuzarliklari boʻyicha hisoblanadigan jarima ballari uchun maʼmuriy jazo qoʻllanilishi belgilangani;

transport vositasidan foydalanib sodir etilgan yoʻl harakati qoidalarini buzganlik uchun transport vositalarining haydovchilariga nisbatan jarima ballarini hisoblash ularni jazodan ozod etmasligi maʼlumot uchun qabul qilinsin.

2. Quyidagilarni nazarda tutuvchi Yoʻl harakati qoidabuzarliklarini jarima ballari asosida baholash tartibi toʻgʻrisidagi nizom ilovaga muvofiq tasdiqlansin:

transport vositasini boshqarish jarayonida yoʻl harakati qoidabuzarliklarini sodir etish holatlarini jarima ballari asosida baholash tartibi;

yoʻl harakati qoidabuzarliklarini jarima ballari asosida baholash jadvali;

haydovchilar tomonidan yoʻl harakati qoidalari buzilganda, jarima ballarini hisoblash tartibi;

haydovchilarning jarima ballari hisoblanishi boʻyicha murojaat qilish tartibi.

3. Belgilab qoʻyilsinki:

yoʻl harakati qoidabuzarliklarini jarima ballari asosida baholash yoʻl harakati xavfsizligini taʼminlash borasidagi qoʻshimcha chora hisoblanadi;

yoʻl harakati qoidabuzarliklari uchun jarima ballari Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining yagona avtomatlashtirilgan axborot tizimining “E-jarimaball” moduli orqali (keyingi oʻrinlarda — “E-jarimaball” moduli) inson omilisiz avtomatlashtirilgan tartibda hisoblab boriladi;

oʻn ikki oy mobaynida yoʻl harakati qoidalarini buzmagan transport vositalari haydovchilariga ragʻbatlantirish tariqasida, keyingi davrda yoʻl harakati qoidalarini birinchi marta buzganligi uchun birinchi jarima balli hisoblanmaydi;

haydovchilarning oxirgi huquqbuzarligi uchun jarima ballari hisoblangan vaqtdan boshlab, ular olti oy davomida yoʻl harakati qoidabuzarliklariga doir boshqa huquqbuzarlik sodir etmagan taqdirda, uning umumiy jarima ballaridan ikki jarima balli chegirib tashlanadi. Agar haydovchilar jarima ballarining umumiy miqdori ikki jarima ballidan kam boʻlgan taqdirda, barcha jarima ballari chegirib tashlanadi hamda jarima ballarini hisoblash muddati birinchi huquqbuzarlik sodir etilgan vaqtdan yangidan boshlanadi.

4. Oʻzbekiston Respublikasi Ichki ishlar vazirligi tegishli vazirlik va idoralar bilan birgalikda maxsus avtomatlashtirilgan foto va video qayd etish tizimida haydovchilarning shaxsiga aniqlik kiritish imkoniyati yaratilgandan keyin ushbu tizim orqali qayd etilgan yoʻl harakati qoidabuzarliklari boʻyicha jarima ballarini hisoblash amaliyotini joriy qilish yuzasidan Vazirlar Mahkamasiga asoslantirilgan xulosani kiritsin.

5. Oʻzbekiston Respublikasi Ichki ishlar vazirligi 2025-yil 1-iyunga qadar:

a) Raqamli texnologiyalar vazirligi bilan birgalikda:

haydovchilar tomonidan yoʻl harakati qoidalari buzilganda, ularga jarima ballarini hisoblashning “E-jarimaball” modulini ishlab chiqsin va amaliyotga joriy etsin. Bunda transport vositalari haydovchilariga oʻzining jarima ballari haqidagi maʼlumotlarni “E-jarimaball” moduli va maxsus mobil ilova hamda Yagona interaktiv davlat xizmatlari portali orqali olish imkoniyatini yaratsin;

transport vositalari haydovchilarining yoʻl harakati qoidalarini buzganligi uchun toʻplagan har bir balli haqida ularning mobil aloqa vositalariga bu haqida “SMS” xabar yuborish orqali ogohlantirish tartibini joriy qilsin;

jarima ballari asosida transport vositasini boshqarish huquqidan mahrum etilgan shaxslarning elektron maʼlumotlar bazasini joriy etsin;

b) Oʻzbekiston Respublikasi Oliy sudi bilan birgalikda haydovchilarning yoʻl harakati qoidabuzarliklari uchun toʻplagan jarima ballari toʻgʻrisidagi maʼlumotlarni elektron shaklda transport vositalarini boshqarish huquqidan mahrum qilinishini taʼminlash uchun Oliy sudning tegishli axborot tizimlariga taqdim etish tizimini yaratsin;

v) manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

6. Belgilansinki, ushbu qarorda nazarda tutilgan chora-tadbirlarni amalga oshirish Oʻzbekiston Respublikasi Ichki ishlar vazirligining budjetdan tashqari jamgʻarmasi mablagʻlari hisobidan moliyalashtiriladi.

7. Mazkur qaror 2025-yil 1-iyundan kuchga kiradi.

8. Ushbu qarorning bajarilishini nazorat qilish Oʻzbekiston Respublikasi ichki ishlar vaziri A.A. Tashpulatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 6-may,

296-son

Vazirlar Mahkamasining 2025-yil 6-maydagi 296-son qaroriga ILOVA

Yoʻl harakati qoidabuzarliklarini jarima ballari asosida baholash tartibi toʻgʻrisida

NIZOM

1-bob. Umumiy qoidalar

1. Ushbu Nizom transport vositasini boshqarish jarayonida yoʻl harakati qoidabuzarliklarini sodir etish holatlarini jarima ballari asosida baholash, jarima ballarini hisoblash, hisoblangan jarima ballari boʻyicha murojaat qilish va ularni koʻrib chiqish tartibini belgilaydi.

2. Ushbu Nizom quyidagilarga nisbatan tatbiq etilmaydi:

Oʻzbekiston Respublikasining Maʼmuriy javobgarlik toʻgʻrisidagi kodeksining (keyingi oʻrinlarda — Kodeks) 341-moddasida koʻrsatib oʻtilmagan yoʻl harakati qoidabuzarliklariga doir moddalarga;

Oʻzbekiston Respublikasida vaqtincha boʻlib turgan yoki tranzit harakatlanib oʻtayotgan chet el transport vositalarining haydovchilariga;

Oʻzbekiston Respublikasi Tashqi ishlar vazirligida akkreditatsiyadan oʻtgan xorijiy davlatlarning diplomatik vakolatxonalari va konsullik muassasalari, xalqaro (davlatlararo, hukumatlararo) tashkilotlar va ularning vakolatxonalari, shuningdek, ushbu vakolatxonalar hamda tashkilotlarning haydovchilariga (Oʻzbekiston Respublikasi fuqarolari va Oʻzbekiston Respublikasida doimiy yashovchi shaxslar ushbu tashkilotlarning maʼmuriy-texnik va xizmat koʻrsatuvchi xodimlari boʻlgan holatlar bundan mustasno).

3. Haydovchilarning yoʻl harakati qoidalariga rioya etmaslik holatlari oʻn ikki balli jarima ballari asosida ushbu Nizomga 1-ilovaga muvofiq sxema boʻyicha oʻn ikki oy davomida baholab boriladi.

Bunda Kodeksning tegishli moddalarida nazarda tutilgan huquqbuzarliklar sodir etilgani uchun asosiy jazo bilan birga ushbu Nizomda belgilangan tartibda jarima ballari hisoblanadi.

4. Jarima ballari haydovchilar qoidabuzarlikni birinchi marta sodir etgan kundan boshlab, keyingi yil shu kunga qadar amalda hisoblanadi (keyingi oʻrinlarda — jarima ballarini hisoblash davri).

Jarima ballarini hisoblash davrida jami jarima ballari oʻn ikki ballga yetmasa, toʻplangan ballar keyingi jarima ballarini hisoblash davri uchun hisoblanishiga yoʻl qoʻyilmaydi va jarima ballarini hisoblash yangidan boshlanadi.

2-bob. Haydovchilar tomonidan yoʻl harakati qoidalari buzilganda, jarima ballarini hisoblash tartibi

5. Haydovchilar tomonidan sodir etilgan yoʻl harakati qoidabuzarligi uchun jarima ballari ushbu Nizomga 2-ilovadagi jadvalda keltirilgan ballarni qoʻshib borish orqali hisoblanadi.

51. Jarima ballari, Yoʻl harakati qoidalari buzilgani holati:

a) Davlat yoʻl harakati xavfsizligi xizmati xodimlari tomonidan rasmiylashtirilgan maʼmuriy bayonnomalar boʻyicha qabul qilingan qarorlar asosida transport vositalarini bevosita boshqargan haydovchilarga nisbatan;

b) maxsus avtomatlashtirilgan foto va video qayd etish tizimlari orqali qayd etilgan Kodeksda nazarda tutilgan tegishli qoidabuzarliklar uchun rasmiylashtirilgan jarima solish toʻgʻrisidagi qarorlar asosida transport vositasining mulkdori yoki mazkur transport vositasidan fuqarolik-huquqiy munosabatlar asosida belgilangan tartibda foydalangan shaxsga nisbatan hisoblanadi.

52. Yoʻl harakati qoidalari buzilgani holati maxsus avtomatlashtirilgan foto va video qayd etish texnika vositalari orqali qayd etilganda jarima ballari hisoblanadigan haydovchining shaxsi quyidagi tartibda aniqlanadi:

a) transport vositasining mulkdori (jismoniy va yuridik shaxs) tomonidan:

jismoniy shaxs oʻziga tegishli boʻlgan transport vositasidan fuqarolik-huquqiy munosabatlar asosida belgilangan tartibda foydalanuvchi boshqa haydovchiga yoki yuridik shaxsning transport vositasidan foydalanish uchun masʼul boʻlgan shaxsiga topshirilgani toʻgʻrisidagi maʼlumotlarni kiritib borish uchun tegishli axborot tizimlarida shaxsiy elektron kabinet ochiladi;

boshqa haydovchi toʻgʻrisidagi maʼlumotlar ushbu haydovchiga transport vositasi boshqarish uchun topshirilishidan oldin shaxsiy elektron kabinetiga kiritiladi;

transport vositasini amalda boshqarish uchun qabul qilgan haydovchi tomonidan mazkur maʼlumotlar tasdiqlanadi;

b) maxsus avtomatlashtirilgan foto va video qayd etish tizimi orqali qayd etilgan qoidabuzarlik uchun jarima ballari hisoblanadigan (qoidabuzarlik sodir etgan) haydovchi toʻgʻrisidagi aniq maʼlumot mavjud boʻlmagan (shaxsiy elektron kabinet orqali tasdiqlanmagan) holatlarda jarima ballari mazkur qoidabuzarlik sodir etilgan transport vositasining mulkdoriga nisbatan (unda haydovchilik guvohnomasi mavjud boʻlsa) qoʻllaniladi;

v) maxsus avtomatlashtirilgan foto va video qayd etish tizimi orqali qayd etilgan qoidabuzarlik uchun jarima ballari hisoblanadigan (qoidabuzarlik sodir etgan) haydovchining shaxsi toʻgʻrisidagi aniq maʼlumot mavjud boʻlmagan (shaxsiy elektron kabinet orqali tasdiqlanmagan), shuningdek, mulkdoriga nisbatan jarima ballarini qoʻllash imkonsiz (haydovchilik guvohnomasi mavjud boʻlmasa) boʻlgan transport vositalarida sodir etilgan qoidabuzarliklar uchun hisoblanadigan jarima ballari yigʻindisi 12 balldan oshganda, mazkur transport vositasi jarima maydonchasiga joylashtirish orqali vaqtincha ushlab turiladi.

6. Haydovchilarning yoʻl harakati qoidalarini buzganligi uchun jarima ballari Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining yagona avtomatlashtirilgan axborot tizimi “E-jarimaball” moduli (keyingi oʻrinlarda — “E-jarimaball” moduli) orqali inson omilisiz avtomatlashtirilgan tartibda hisoblanadi.

7. Haydovchilar oʻzining jarima ballari haqidagi maʼlumotlarni istalgan paytda “E-jarimaball” moduli yoki maxsus mobil ilova orqali olishlari mumkin.

Haydovchilar tomonidan sodir etilgan qoidabuzarliklar sakkiz jarima balliga teng boʻlganda, ular bu haqida “E-jarimaball” modulida shakllangan maʼlumotlar asosida avtomatlashtirilgan tarzda mobil aloqa vositalariga “SMS” xabar yuborish yoʻli bilan ogohlantiriladi.

8. Yoʻl harakati qoidabuzarliklari boʻyicha hisoblangan jarima ballari miqdori bir yil davomida oʻn ikki balldan oshgan hollarda haydovchilarning qoidabuzarliklari toʻgʻrisidagi maʼlumotlar (elektron maʼmuriy bayonnomalar) Qoraqalpogʻiston Respublikasi, viloyatlar va Toshkent shahar sudlari orqali jarima ballari belgilangan miqdordan oshganligi uchun maʼmuriy jazoni qoʻllash uchun jinoyat ishlari boʻyicha tuman (shahar) sudlariga inson omilisiz avtomatik tarzda elektron shaklda yuboriladi.

Bu haqida haydovchilarga ularning mobil aloqa vositalariga “E-jarimaball” moduli orqali “SMS” xabar yuborish orqali maʼlum qilinadi.

Haydovchilar tomonidan yoʻl harakati qoidalari buzilganligi holati yuzasidan eʼtiroz bildirilib, maʼmuriy huquqbuzarlik boʻyicha ishlar koʻrib chiqish uchun sudlarga yuborilganda, jarima ballari sudlarning yakuniy qarorlariga asosan hisoblanadi.

Sud tomonidan maʼmuriy huquqbuzarlik sodir etilgan deb topilsa, jarima ballari huquqbuzarlik sodir etilgan kundan boshlab hisoblanadi.

Sud qarori bilan maʼmuriy huquqbuzarlik toʻgʻrisidagi ish bekor qilinib, haydovchi maʼmuriy javobgarlikdan ozod etilsa, ushbu qoidabuzarliklar boʻyicha haydovchiga jarima ballari hisoblanmaydi.

Bunda sudning qarori “E-jarimaball” moduliga yuklanadi va bekor qilingan huquqbuzarlik boʻyicha qayd etilgan jarima balli avtomatik tarzda hisobdan chiqariladi.

9. Oʻn ikki oy mobaynida yoʻl harakati qoidalarini buzmagan haydovchilarga ragʻbatlantirish tariqasida, keyingi jarima ballarini hisoblash davrida sodir etgan birinchi yoʻl harakati qoidasini buzganligi uchun birinchi jarima balli hisoblanmaydi. Bunda ular asosiy jazodan ozod etilmaydi.

Haydovchilarning oxirgi huquqbuzarligi uchun jarima balli hisoblangan vaqtdan boshlab, ular olti oy davomida ushbu Nizomning 3-bandi ikkinchi xatboshisida koʻrsatib oʻtilgan Kodeksning moddalarida nazarda tutilgan huquqbuzarliklarni sodir etmagan taqdirda, ularning umumiy jarima ballaridan ikki jarima balli chegirib tashlanadi.

Bunda haydovchilarning jarima ballari umumiy miqdori ikki jarima ballidan kam boʻlgan taqdirda, barcha jarima ballari chegirib tashlanadi hamda jarima ballarini hisoblash muddati birinchi huquqbuzarlik sodir etilgan vaqtdan yangidan boshlanadi.

3-bob. Jarima ballari boʻyicha murojaat qilish va ularni koʻrib chiqish tartibi

10. Haydovchilar jarima ballari boʻyicha Davlat yoʻl harakati xavfsizligi xizmatining tegishli boʻlinmalariga (keyingi oʻrinlarda — boʻlinmalar) qonunchilikda belgilangan muddatlarda murojaat qilishlari mumkin.

11. Haydovchilarning jarima ballari boʻyicha murojaatlari mazmunidan kelib chiqqan holda, boʻlinmalar tomonidan qonunchilikda belgilangan muddatlarda koʻrib chiqiladi.

12. Murojaatlarni koʻrib chiqish natijalariga koʻra boʻlinmalar quyidagi qarorlardan birini qabul qiladi:

maʼmuriy huquqbuzarlik toʻgʻrisidagi ish boʻyicha qarorni bekor qilish haqida;

maʼmuriy huquqbuzarlik toʻgʻrisidagi ishni tugatish haqida;

murojaatni qanoatlantirishni rad etish toʻgʻrisida.

13. Murojaatlarni koʻrib chiqish natijalariga koʻra boʻlinmalar tomonidan quyidagi hollarda maʼmuriy huquqbuzarlik toʻgʻrisidagi ish boʻyicha qarorni bekor qilish yoki tugatish haqida qaror qabul qilinadi:

jarima ballarini hisoblashda texnik xatolik yuz berganligi aniqlanganda;

jarima ballari ushbu Nizom talablarini buzgan holda hisoblanganda;

haydovchilarning maʼmuriy qoidabuzarligi oxirgi zarurat holatida sodir etilgan deb topilganda;

maʼmuriy ish Kodeksning 271 yoki 329-moddalariga muvofiq tugatilganda.

14. Murojaatlarda koʻrsatilgan sabablar oʻz tasdigʻini topmagan taqdirda, boʻlinmalar tomonidan murojaatni rad etish toʻgʻrisida qaror qabul qilinadi.

15. Haydovchilar Davlat yoʻl harakati xavfsizligi xizmati boʻlinmalari qarorlaridan norozi boʻlgan taqdirda, ushbu qaror yuzasidan yuqori turuvchi organlarga va (yoki) sudga shikoyat qilishlari mumkin hamda ushbu organlarning qarorlari jarima ballarini oʻzgartirishga asos hisoblanadi.

4-bob. Yakunlovchi qoida

16. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Yoʻl harakati qoidabuzarliklarini jarima ballari asosida baholash tartibi toʻgʻrisidagi nizomga 1-ILOVA

Yoʻl harakati qoidabuzarliklarini jarima ballari asosida baholash

SXEMASI

Bosqichlar Subyektlar Tadbirlar Muddatlar Haydovchilarga birinchi qoidabuzarlik sodir etilgan kundan boshlab jarima ballarining hisoblanishi boshlanadi. Birinchi qoidabuzarlik sodir etilgan kundan boshlab keyingi yilning shu kuniga qadar 1-bosqich “E-jarimaball” moduli Haydovchilar tomonidan sodir etilgan qoidabuzarliklar boʻyicha qabul qilingan qarorlar “E-jarimaball” moduliga avtomatik tarzda kiritiladi.Sodir etilgan qoidabuzarlik sakkiz jarima balliga teng boʻlganda, bu haqida haydovchining mobil aloqa vositasiga “SMS” xabar yuborish orqali haydovchi ogohlantiriladi.Olti oy davomida yoʻl harakati sohasida boshqa huquqbuzarlik sodir etmagan haydovchilarning umumiy jarima ballaridan ikki jarima balli chegirib tashlanadi. Yil davomida Sakkiz jarima ballga yetganda2-bosqich “E-jarimaball” moduli Soʻnggi jarima balli qayd etilgan sanadan olti oy oʻtgach Jarima ballari oʻn ikkitadan oshganda, yoʻl harakati qoidalarini buzgan haydovchilarning hujjatlari maʼmuriy jazo qoʻllash uchun sudlarga yuboriladi va bu haqida ularga “SMS” xabar orqali maʼlum qilinadi.Haydovchilar jarima ballari boʻyicha DYHXXga murojaat qilishlari mumkin. DYHXX tomonidan qonunchilik hujjatlariga muvofiq 3-bosqich “E-jarimaball” moduli Murojaat qonunchilikda belgilangan muddatda DYHXX tomonidan taqdim etilgan hujjatlar qonunda belgilangan tartibda koʻrib chiqiladi. 4-bosqich Sud Belgilangan muddatda

Yoʻl harakati qoidabuzarliklarini jarima ballari asosida baholash tartibi toʻgʻrisidagi nizomga 2-ILOVA

Oʻzbekiston Respublikasining Maʼmuriy javobgarlik toʻgʻrisidagi kodeksining haydovchilar tomonidan sodir etilgan yoʻl harakati qoidabuzarligi uchun jarima ballari hisoblanishi belgilangan moddalari va jarima ballarining miqdorlari toʻgʻrisidagi

JADVAL