“Markaziy Osiyo” xalqaro sanoat kooperatsiyasi markazi faoliyatini tartibga solish toʻgʻrisida

09.11.2023

Oʻzbekiston Respublikasi Hukumati bilan Qozogʻiston Respublikasi Hukumati oʻrtasida

Bitim

[Oʻzbekiston Respublikasi Tashqi ishlar vazirligi tomonidan davlat reyestrida 2023-yil 15-noyabrda 4536-KZ-2023-H tartib raqami bilan roʻyxatga olindi.]

Oʻzbekiston Respublikasi Hukumati va Qozogʻiston Respublikasi Hukumati, keyingi oʻrinlarda “Tomonlar” deb ataluvchilar,

Oʻzbekiston va Qozogʻiston sanoat rivojlanishining barqarorligini ragʻbatlantirish va rivojlantirish, xoʻjalik yurituvchi subyektlarning raqobatbardoshligi va innovatsion faolligini oshirish, mintaqaviy va xalqaro qoʻshilgan qiymat zanjirlariga ulanish, shuningdek, qulay investitsiya muhitini yaratish zarurligini anglagan holda,

bozor munosabatlari va eksportni qoʻllab-quvvatlash asosida ikki davlat xoʻjalik yurituvchi subyektlarining toʻgʻridan-toʻgʻri ishlab chiqarish hamkorligining hal qiluvchi oʻrnini hamda Tomonlar xoʻjalik yurituvchi subyektlari oʻrtasida sanoat va ilmiy-texnikaviy kooperatsiyani oʻrnatish va rivojlantirish uchun qulay shart-sharoit bilan taʼminlashni eʼtirof etib,

quyidagilar toʻgʻrisida kelishib oldilar:

1-bob. “Markaziy Osiyo” xalqaro sanoat kooperatsiyasi markazining huquqiy holati va boshqaruv organlari

1-modda

Oʻzbekiston va Qozogʻiston qismlaridan tashkil topgan sanoat kooperatsiyasi, iqtisodiy va investitsiyaviy hamkorlik majmuasi hisoblangan “Markaziy Osiyo” xalqaro sanoat kooperatsiyasi markazi (keyingi oʻrinlarda — “Markaz”) shartlari mazkur Bitim qoidalari, boshqa ikki tomonlama xalqaro shartnomalar, shuningdek, Tomonlar davlatlarining qonunchiligi bilan belgilanadigan huquqiy va iqtisodiy rejimga egadir.

2-modda

Markazning Qozogʻiston qismi Qozogʻiston Respublikasi yurisdiksiyasi doirasida faoliyat yuritadi.

Markazning Oʻzbekiston qismi Oʻzbekiston Respublikasi yurisdiksiyasi doirasida faoliyat yuritadi.

3-modda

Markazning Oʻzbekiston va Qozogʻiston qismlari Tomonlarning vakolatli organlari tarafidan boshqariladi.

Qozogʻiston Respublikasi Savdo va integratsiya vazirligi Markazning Qozogʻiston qismini boshqarish boʻyicha vakolatli organ hisoblanadi.

Oʻzbekiston Respublikasi Investitsiyalar, sanoat va savdo vazirligi Markazning Oʻzbekiston qismini boshqarish boʻyicha vakolatli organ hisoblanadi.

Vakolatli organlarning rasmiy nomlanishi oʻzgargan yoki qayta tashkil etilgan hollarda, Tomonlar diplomatik kanallar orqali darhol bir-birlarini xabardor qiladilar.

Tomonlar Markazni boshqarish va uning faoliyatini taʼminlash, investitsiyalarni jalb qilish, xoʻjalik yurituvchi subyektlarga kompleks xizmat koʻrsatish, Markazdagi maʼmuriy, ruxsat beruvchi va boshqa jarayonlarni (xizmatlarni) amalga oshirish boʻyicha Tomonlarning davlat organlari faoliyatini “yagona darcha” prinsipi asosida muvofiqlashtirish, boshqa xizmatlarni koʻrsatish maqsadida mazkur Bitim va oʻz davlatlarining qonunchiligiga muvofiq Markazning oʻz hududlaridagi qismida boshqaruv kompaniyalarini tashkil etadilar va (yoki) belgilaydilar.

2-bob. Markazning joylashuv sxemasi, hududiy chegaralari va maydoni

4-modda

Markaz Tomonlar davlatlarining chegaraoldi hududlarida, Oʻzbekiston Respublikasi bilan Qozogʻiston Respublikasining davlat chegarasi chizigʻining har ikki tomonida, bevosita “Guliston” (Oʻzbekiston Respublikasi) va “Atameken” (Qozogʻiston Respublikasi) oʻtkazish punktlari yonida joylashgan.

Tomonlar davlatlarining qonunchiligi va mazkur Bitim qoidalariga muvofiq, Markazning Oʻzbekiston va Qozogʻiston qismlari Davlat chegarasi chizigʻidan boshlab chegara mintaqasidan tashqarida joylashgan.

Markazni boshqarish va uning hududida xoʻjalik yurituvchi subyektlarning faoliyati qatʼiy ravishda uning chegarasi doirasida olib boriladi.

Har bir Tomon uni oʻrab olish boʻyicha samarali choralar koʻrish majburiyatini oladi.

5-modda

Markazning umumiy maydoni 1 kv. km boʻlib, shundan Oʻzbekiston hududi 0,5 kv. kmni, Qozogʻiston hududi esa 0,5 kv. kmni tashkil etadi.

Markaz hududining geografik koordinatalari, joylashuvi sxemasi va chegaralari mazkur Bitimning ajralmas qismi boʻlgan ilovada keltirilgan.

Har bir Tomon Markazning oʻziga tegishli qismida fuqarolarning, tovarlar (yuklar) va transport vositalarining harakatlanishi ustidan nazoratni taʼminlash uchun ichki nazorat-oʻtkazish punktlarini tashkil etadi.

3-bob. Markazning faoliyat turlari, funksiyalari va vazifalari

6-modda

Tomonlar davlatlarining qonunchiligiga muvofiq, Markaz hududida xoʻjalik yurituvchi subyektlar Tomonlar davlatlari oʻrtasida sanoat kooperatsiyasini rivojlantirishga qaratilgan faoliyat turlarini olib borishlari mumkin.

Markaz hududida faoliyatni olib borish bilan bogʻliq masalalarda kelishmovchiliklar yuzaga kelgan hollarda, vakolatli organlar qoʻshma maslahatlashuvlar oʻtkazadilar.

7-modda

Markazning vazifalariga quyidagilar kiradi:

davlatlararo kooperatsiya aloqalarini rivojlantirish va Tomonlar davlatlarining kichik va oʻrta sanoat korxonalarini xalqaro qoʻshilgan qiymat zanjirlariga integratsiya qilish uchun qulay shart-sharoitlar yaratish;

chegaraoldi hududlarning ishlab chiqarish bazasidan foydalanish samaradorligini oshirish;

ishlab chiqarish jarayonlarini optimallashtirish va Markaz hududida tashkil etiladigan sanoat korxonalarining raqobatbardoshligini oshirish;

texnologik modernizatsiya, innovatsion va ilmiy hajmdor ishlab chiqarishni rivojlantirish, zamonaviy texnologiyalar integratsiyalashuvi;

korxonalar xarajatlarini ishlab chiqarilayotgan sanoat mahsulotlariga xizmat koʻrsatish autsorsingi hisobidan optimallashtirish;

Markaz hududida faoliyat yurituvchi sanoat korxonalarini ishlab chiqarish jarayoniga jalb etish va import oʻrnini bosuvchi mahsulotlar ishlab chiqarishni yoʻlga qoʻyish orqali Tomonlar davlatlarining sanoat kooperatsiyasini kengaytirish;

biznes-reja, shuningdek, sanoat kooperatsiyasini rivojlantirish rejalariga muvofiq, sanoat kooperatsiyasi maydonida sanoat mahsulotlari ishlab chiqarish, ishlarni bajarish va xizmat koʻrsatishni tashkil etish;

Tomonlar davlatlarining qonunchiligi va mazkur Bitimga muvofiq ishlab chiqarish kooperatsiyasi faoliyati uchun shart-sharoitlar yaratish va taʼminlash jarayoniga loyiha va qurilish tashkilotlarini jalb qilish.

4-bob. Markaz hududida soliqqa tortish, valyutani tartibga solish va valyuta nazorati, bank va sugʻurta faoliyati

8-modda

Markaz hududida soliqqa tortish Tomonlar davlatlarining qonunchiligi va ularning davlatlari aʼzo hisoblangan xalqaro shartnomalarga muvofiq amalga oshiriladi.

9-modda

Markazning Oʻzbekiston va Qozogʻiston qismlari hududlarida valyuta nazorati Tomonlar davlatlarining qonunchiligiga muvofiq amalga oshiriladi.

10-modda

Markaz hududida toʻlovlar va pul oʻtkazmalari Tomonlar davlatlarining qonunchiligiga muvofiq belgilanadigan joriy operatsiyalar uchun erkin ayirboshlash prinsipi asosida amalga oshiriladi.

11-modda

Markazning Oʻzbekiston va Qozogʻiston qismlarida banklar filiallarini ochish, shuningdek, ularning faoliyati Tomonlar davlatlarning qonunchiligiga muvofiq olib boriladi, tartibga solinadi va nazoratga olinadi.

12-modda

Markaz hududida joylashgan korxonalar, muassasalar va tashkilotlarda sugʻurta shartnomalari ular joylashgan davlatning qonunchiligida belgilangan tartibda tuziladi.

5-bob. Markaz hududidagi qurilish normalari

13-modda

Transport infratuzilmasi, suv taʼminoti, elektr taʼminoti, telekommunikatsiya, muhandislik muhofazasi va boshqa muhandislik kommunikatsiyalari, nazorat punkti, nazorat va tekshirish infratuzilmasini, maʼmuriy boshqaruvni tashkil etish, shuningdek, Markaz hududini chegaralash boʻyicha loyihalash, qurish va taʼmirlash ishlarini moliyalashtirish har bir Tomonning mablagʻlari, xususan, ularning qonunchiligida taqiqlanmagan har qanday manbalar hisobidan amalga oshiriladi.

Markaz hududida turli biznes binolari, terminallar va tadbirkorlik faoliyati uchun boshqa obyektlar qurilishini moliyalashtirish Tomonlar davlatlarining qonunchiligiga muvofiq xoʻjalik yurituvchi subyektlarning oʻz mablagʻlari hisobidan amalga oshiriladi.

Markaz hududida Tomonlar davlatlarining qonunchiligini hisobga olgan holda, xalqaro qurilish meʼyorlari, qoidalari, standartlarini qoʻllashga ruxsat beriladi.

Markaz hududida qurilish ishlari bosh rejalar asosida amalga oshiriladi. Markazning har bir qismi bosh rejalarini ishlab chiqish, ularga oʻzgartirish va qoʻshimchalar kiritish Tomonlar davlatlarning qonunchiligida oʻrnatilgan tartibda amalga oshiriladi.

6-bob. Ish tartibi, fuqarolar, tovarlar (yuklar) va transport vositalarining harakatlanishini nazorat qilish tartibi

14-modda

Markazning bir qismidan boshqa qismiga harakatlanayotgan shaxslar, transport vositalari, yuklar, tovarlar va hayvonlar Tomonlar davlatlarining qonunchiligi va ularning davlatlari aʼzo hisoblangan xalqaro shartnomalarga muvofiq xalqaro qatnov uchun ochiq boʻlgan “Guliston” (Oʻzbekiston Respublikasi) va “Atameken” (Qozogʻiston Respublikasi) nazorat-oʻtkazish punktlarida chegara, bojxona va boshqa turdagi nazoratidan oʻtkaziladi.

Tomonlar davlatlarining, uchinchi davlatlar fuqarolari va fuqaroligi boʻlmagan shaxslar, Tomonlar davlatlaridan birining Markazi hududiga faoliyat yuritayotgan nazorat punktlari orqali amaldagi hujjatlar asosida kirishlari, undan chiqishlari va vaqtincha boʻlib turishlari mumkin.

Markazning Qozogʻiston qismi har kuni soat 10:00 dan 19:00 gacha faoliyat yuritadi.

Markazning Oʻzbekiston qismi har kuni soat 09:00 dan 18:00 gacha faoliyat yuritadi.

7-bob. Markaz hududida xavfsizlik va qonuniy tartibni taʼminlash

15-modda

Tomonlar Markazning oʻzlariga tegishli qismida xavfsizlikni taʼminlash va jamoat tartibi saqlash boʻyicha davlat organlarini, shuningdek, zarurat boʻlganda, oʻz davlatining tegishli ruxsatnomasiga (litsenziyaga) ega boʻlgan, shartnoma asosida muhofaza faoliyatini amalga oshiruvchi tashkilotlarni joylashtirishlari mumkin.

16-modda

Markaz hududida joylashgan xavfsizlikni taʼminlash va jamoat tartibini saqlash boʻyicha davlat organlarining vazifalariga quyidagilar kiradi:

Markaz hududida xavfsizlik va huquqiy tartibni taʼminlash;

Tomonlar davlatlarining qonunchiligiga muvofiq har xil turdagi huquqbuzarliklar va jinoyatlarning oldini olish va ularga qarshi kurashish;

Markazning oʻziga tegishli qismida nazorat va patrullik qilish.

Markaz hududida xavfsizlik va huquqiy tartibotni taʼminlash maqsadida Tomonlarning davlat organlari idoralararo darajada oʻzaro hamkorlikning tegishli mexanizmini oʻrnatadilar.

17-modda

Tomonlar samarali nazoratni amalga oshirish maqsadida Markaz perimetri atrofida nazorat tizimi va yoritish moslamalari bilan jihozlangan maxsus toʻsiq oʻrnatadilar.

8-bob. Markaz hududida davlat nazorati

18-modda

Tomonlar Markaz hududida tegishli sanitariya-epidemiologik, veterinariya, fitosanitariya nazorati va texnik jihatdan tartibga solish davlat nazorati, shuningdek, oʻz davlatlari qonunchiligiga muvofiq boshqa nazorat turlarini amalga oshiradilar.

19-modda

Tomonlarning masʼul organlari yuqumli kasalliklarni nazorat qilish, oʻsimliklar va hayvonlar karantini sohasida oʻzaro hamkorlikni amalga oshiradilar va mustahkamlaydilar, shuningdek, epizootik va fitosanitariya holati, epidemiologik vaziyat va ularni bartaraf etish boʻyicha oʻz vaqtida koʻrilgan choralar toʻgʻrisida oʻzaro xabardor qilishlari lozim.

9-bob. Markaz hududida mehnat faoliyati masalalari

20-modda

Fuqarolar mehnat faoliyati qabul qiluvchi davlatning qonunchiligiga asosan amalga oshiradilar.

10-bob. Kuchga kirishi, amal qilishni tugatish va oʻzgartirishlar kiritish

21-modda

Mazkur Bitimni talqin qilish va qoʻllashda kelishmovchiliklar yuzaga kelgan taqdirda, Tomonlar ularni maslahatlashuvlar va muzokaralar yoʻli bilan hal qiladilar.

Tomonlar oʻzaro kelishuvga binoan, mazkur Bitimga uning ajralmas qismi boʻlgan va alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

22-modda

Mazkur Bitim nomuayyan muddatga tuziladi va Tomonlar uning kuchga kirishi uchun zarur boʻlgan davlat ichki protseduralarini bajarganligi toʻgʻrisida diplomatik kanallar orqali soʻnggi yozma xabarnoma olingan sanadan boshlab 30 (oʻttiz) kalendar kun oʻtgandan soʻng kuchga kiradi.

Har bir Tomon boshqa Tomonni diplomatik kanallar orqali yozma ravishda xabardor qilish orqali mazkur Bitimning amal qilishini tugatishi mumkin. Bunday holatda, mazkur Bitim ushbu xabarnoma olingan sanadan boshlab toʻqson (90) kalendar kun oʻtgandan soʻng tugatiladi.

Toshkent shahrida, 2023-yil 9-noyabrda, ikki nusxada, har biri oʻzbek, qozoq va rus tillarida tuzildi, bunda barcha matnlar bir xil kuchga ega.

Matnlar oʻrtasida tafovutlar yuzaga kelgan taqdirda, Tomonlar rus tilidagi matnga murojaat qiladilar.

Oʻzbekiston Respublikasi Hukumati bilan Qozogʻiston Respublikasi Hukumati oʻrtasida “Markaziy Osiyo” xalqaro sanoat kooperatsiyasi markazi faoliyatini tartibga solish toʻgʻrisidagi Bitimga ILOVA

“Markaziy Osiyo” xalqaro sanoat kooperatsiyasi markazi hududining geografik koordinatalari, joylashuv sxemasi va chegaralari