Iqtisodiy hamkorlik toʻgʻrisida

24.09.2024

Oʻzbekiston Respublikasi Hukumati bilan Slovakiya Respublikasi Hukumati oʻrtasida

Bitim

[Oʻzbekiston Respublikasi Tashqi ishlar vazirligi tomonidan davlat reyestrida 2024-yil 3-oktabrda 4575-SK-2024-H tartib raqami bilan roʻyxatga olindi.]

Oʻzbekiston Respublikasi Hukumati va Slovakiya Respublikasi Hukumati (keyingi oʻrinlarda “Ahdlashuvchi Tomonlar” deb ataluvchilar),

ikki davlat oʻrtasidagi doʻstona aloqalarni eʼtirof etib,

mavjud iqtisodiy munosabatlarni davom ettirish va mustahkamlash muhimligi va amaliy ahamiyatini anglagan holda,

tenglik va oʻzaro manfaatdorlikka asoslangan ularning iqtisodiy hamkorligini rivojlantirishni qoʻllab-quvvatlash istagida,

Oʻzbekiston Respublikasi va Slovakiya Respublikasining milliy qonunchiligiga muvofiq,

ularning xalqaro majburiyatlarini inobatga olgan holda,

quyidagilar toʻgʻrisida kelishib oldilar:

1-modda Bitimning maqsadi

1.1. Mazkur Bitimning maqsadi Ahdlashuvchi Tomonlar oʻrtasida tenglik va oʻzaro manfaatdorlik asosida hamda Ahdlashuvchi Tomonlar davlatlarining milliy qonunchiligiga muvofiq iqtisodiy hamkorlikni rivojlantirish va faollashtirish hisoblanadi.

1.2. Ahdlashuvchi Tomonlar oʻzlarining iqtisodiy va savdo aloqalarini bir-birlarining suvereniteti va hududiy yaxlitligini hurmat qilish asosida amalga oshiradilar.

1.3. Hamkorlik quyidagi sohalarni oʻz ichiga oladi, biroq ular bilan cheklanmaydi:

a) sanoat va qurilish sanoati;

b) transport va logistika;

c) investitsiyalar;

d) innovatsiyalar;

e) energetika va togʻ-kon sanoati;

f) turizm;

g) kichik va oʻrta biznes;

h) standartlashtirish, metrologiya va muvofiqlikni baholash;

i) qishloq va oʻrmon xoʻjaligi;

j) atrof-muhitni muhofaza qilish va suv resurslarini boshqarish;

k) telekommunikatsiya va axborot texnologiyalari;

l) oʻzaro manfaatdorlikka asoslangan iqtisodiy hamkorlikning boshqa yoʻnalishlari.

2-modda Hamkorlik shakllari

2.1. Ahdlashuvchi Tomonlar:

a) ikki mamlakat oʻrtasidagi iqtisodiy hamkorlikni rivojlantirish uchun barcha zarur choralarni koʻradilar;

b) har ikki mamlakatda ham iqtisodiy vaziyat, qoidalar, iqtisodiy dasturlar, biznes va oʻzaro manfaatli boshqa tegishli maʼlumotlar toʻgʻrisida axborot almashish uchun barcha zarur choralarni koʻradilar;

c) ikki tomonlama iqtisodiy hamkorlikka toʻsqinlik qiladigan muammolarni aniqlaydilar va ushbu muammolarni hal etish choralarini taklif etadilar.

2.2. Ahdlashuvchi Tomonlar:

a) ikki mamlakat hududida investitsiya faoliyati, iqtisodiy hamkorlik, qoʻshma korxonalar tashkil etish, kompaniyalarning vakolatxonalari va filiallarini ochishni ragʻbatlantiradilar;

b) ikki mamlakat xususiy sektorlarining ikkala mamlakatda boʻlib oʻtadigan xalqaro yarmarka va koʻrgazmalarda ishtirok etishini ragʻbatlantiradilar;

c) biznes delegatsiyalarining tashriflari almashinuvini qoʻllab-quvvatlaydilar va ragʻbatlantiradilar;

d) tegishli hududiy va mahalliy tuzilmalarni, kasb-hunar palatalarini, tadbirkorlik birlashmalarini va xususiy sektorni iqtisodiy hamkorlikning turli yoʻnalishlari boʻyicha loyihalarni amalga oshirish doirasidagi mavjud imkoniyatlarni oʻrganishga ragʻbatlantiradilar.

3-modda Qoʻshma komissiya

3.1. Ahdlashuvchi Tomonlar ikki tomonlama iqtisodiy hamkorlikni muvofiqlashtirish va ragʻbatlantirish maqsadida Ahdlashuvchi Tomonlarning tegishli tashkilotlari vakillaridan iborat Iqtisodiy hamkorlik boʻyicha Oʻzbek-Slovak Qoʻshma komissiyasini (keyingi oʻrinlarda “Qoʻshma komissiya” deb ataluvchi) tashkil etadilar.

3.2. Qoʻshma komissiya iqtisodiy hamkorlikni quyidagi yoʻllar bilan muvofiqlashtiradi va rivojlantiradi:

a) mazkur Bitimning maqsadlarini amalga oshirilishini nazorat qilish;

b) mazkur Bitimda koʻrsatilgan yoki keyinchalik Ahdlashuvchi Tomonlar oʻrtasida kelishilgan sohalarda hamkorlikni rivojlantirish;

c) mazkur Bitimda tuzilishi mumkin boʻlgan har qanday kelishuv va loyihani amalga oshirish jarayonida yuzaga kelishi mumkin boʻlgan toʻsiqlarni bartaraf etish boʻyicha tavsiyalar ishlab chiqish.

3.3. Qoʻshma Komissiya Ahdlashuvchi Tomonlardan birining soʻroviga koʻra va boshqa Ahdlashuvchi Tomonning roziligi bilan zaruriyat boʻyicha navbatma-navbat ikki mamlakatda uchrashadi.

3.4. Har bir Ahdlashuvchi Tomon oʻz tarafidan Raisni (“Hamrais” deb ataluvchi) tayinlaydi va har bir Hamrais Qoʻshma komissiyaning tegishli qismi uchun kotibni tayinlaydi.

3.5. Qabul qiluvchi Ahdlashuvchi Tomon yigʻilish sanasi va kun tartibini taklif etadi hamda ushbu Ahdlashuvchi Tomon kotibi bayonnomani tayyorlash uchun masʼul hisoblanadi.

3.6. Har bir Ahdlashuvchi Tomon oʻz delegatsiyalarining Qoʻshma komissiya yigʻilishlari bilan bogʻliq xarajatlarini qoplaydi.

3.7. Qoʻshma komissiya doirasida mazkur Bitimning 1-moddasi 1.3-bandida koʻrsatilgan hamkorlikning alohida yoʻnalishlari bilan shugʻullanuvchi ishchi guruhlar tuziladi.

4-modda Xalqaro shartnomalar

4.1. Mazkur Bitim Oʻzbekiston Respublikasi yoki Slovakiya Respublikasi tarafidan uchinchi tomonlar bilan tuzilgan amaldagi xalqaro shartnomalardan kelib chiqadigan, shuningdek, ikkala davlatning xalqaro tashkilotlarga aʼzoligidan kelib chiqadigan huquq va majburiyatlariga daxl qilmaydi.

4.2. Mazkur Bitim Slovakiya Respublikasining Yevropa Ittifoqiga aʼzoligidan kelib chiqadigan majburiyatlariga daxl qilmagan holda qoʻllaniladi. Shu bois, mazkur Bitimning qoidalari Yevropa Ittifoqi toʻgʻrisidagi Shartnoma boʻyicha majburiyatlarni bekor qiladigan yoki boshqacha taʼsir qiladigan tarzda talqin qilinishi yoki amalga oshirilishi mumkin emas.

5-modda Kelishmovchiliklarni hal etish

Mazkur Bitimni talqin qilish yoki amalga oshirishdan kelib chiqadigan har qanday kelishmovchiliklar Ahdlashuvchi Tomonlar Oʻrtasida diplomatik kanallar orqali muzokaralar va maslahatlashuvlar orqali hal qilinadi.

6-modda Oʻzgartirishlar

Mazkur Bitimga Ahdlashuvchi Tomonlarning oʻzaro yozma roziligiga koʻra oʻzgartirishlar kiritilishi mumkin. Bunday oʻzgartirishlar mazkur Bitimning ajralmas qismi hisoblanadigan alohida bayonnomalar orqali rasmiylashtiriladi va mazkur Bitimning 7-moddasiga muvofiq kuchga kiradi.

7-modda Kuchga kirishi, amal qilish muddati va tugatilishi

7.1. Mazkur Bitim Ahdlashuvchi Tomonlar tarafidan diplomatik kanallar orqali ushbu Bitimning kuchga kirishi uchun zarur boʻlgan tegishli davlat ichki tartib-tamoyillari bajarilganligini tasdiqlovchi oxirgi yozma xabarnomani olingan sanadan soʻng 30 (oʻttizinchi) kunda kuchga kiradi.

7.2. Mazkur Bitim 5 (besh) yil muddatga tuziladi va Ahdlashuvchi Tomonlardan biri uning amal qilishini tugatish niyati toʻgʻrisida belgilangan muddatdan 6 (olti) oy oldin boshqa Ahdlashuvchi Tomonni yozma ravishda xabardor qilmasa, oʻz-oʻzidan keyingi besh (5) yillik muddatlarga amal qiladi.

7.3. Mazkur Bitim kuchga kirgan sanadan eʼtiboran 1995-yil 16-mayda Toshkent shahrida imzolangan Oʻzbekiston Respublikasi Hukumati va Slovakiya Respublikasi Hukumati oʻrtasida savdo-iqtisodiy va ilmiy-texnikaviy hamkorlik toʻgʻrisidagi Bitim hamda 1997-yil 23-dekabrda Bratislava shahrida imzolangan ushbu Bitimning 1-raqamli Qoʻshimchasi qoidalari Oʻzbekiston Respublikasi va Slovakiya Respublikasi oʻrtasidagi oʻzaro munosabatlarga nisbatan qoʻllanilishi tugatiladi.

Nyu-York shahrida 2024-yil 24-sentabr sanasida ikki nusxada, har biri oʻzbek, slovak va ingliz tillarida tuzildi, bunda barcha matnlar teng autentikdir.

Mazkur Bitim qoidalarini talqin qilishda tafovutlar yuzaga kelgan taqdirda, ingliz tilidagi matn ustuvor hisoblanadi.

(imzolar)