Korrupsiyaga qarshi kurashish tizimini yanada takomillashtirish boʻyicha belgilangan ustuvor vazifalar ijrosini samarali tashkil etishga doir chora-tadbirlar toʻgʻrisida (PF-71-son)

21.04.2025

Oʻzbekiston Respublikasi Prezidentining

Farmoni

Joriy yilning 5-mart kuni Korrupsiyaga qarshi kurashish boʻyicha milliy kengashning kengaytirilgan yigʻilishida belgilangan ustuvor vazifalar ijrosini taʼminlash, shuningdek, korrupsiyaga qarshi kurashish boʻyicha yangi tizimni joriy etib, ushbu masalaga jamoatchilik, parlament va fuqarolik jamiyati institutlarini keng safarbar etish maqsadida qaror qilaman:

1. Korrupsiyaga qarshi kurashish boʻyicha milliy kengashning 2025-yil 5-martda oʻtkazilgan kengaytirilgan yigʻilishida belgilangan topshiriqlar ijrosini taʼminlash boʻyicha ishlab chiqiladigan normativ-huquqiy hujjatlar roʻyxati va amaliy chora-tadbirlar dasturi 1 va 2-ilovalarga muvofiq tasdiqlansin.

Vazirlik va idoralar rahbarlariga mazkur Farmon va uning ilovalarida belgilangan vazifalarni sifatli, oʻz vaqtida va soʻzsiz bajarilishi yuzasidan shaxsiy javobgarlik yuklansin.

2. Korrupsiyaga qarshi kurashish boʻyicha milliy kengash har yili hududlar kesimida Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, prokurorlar va ichki ishlar organlari boshliqlari bilan birgalikda korrupsiyaning oldini olish, unga qarshi kurashish, shu jumladan, maishiy korrupsiyaga barham berish, korrupsiyaga nisbatan murosasiz munosabatda boʻlish muhitini shakllantirish boʻyicha “yoʻl xarita”sini tasdiqlab, ijrosi ustidan nazoratni taʼminlasin.

3. Korrupsiya va jinoyatchilikka qarshi kurashishda parlamentning rolini tubdan oshirish maqsadida Oliy Majlis palatalariga quyidagilar tavsiya etilsin:

(a) har yili budjetdan eng koʻp mablagʻ oladigan uchta vazirlik va idorada korrupsiyaviy omillarni aniqlab, ularni bartaraf etish boʻyicha takliflar kiritish;

(b) vazir va hokimlar lavozimiga nomzodlar tegishlicha Oliy Majlis Qonunchilik palatasi va xalq deputatlari kengashlarida koʻrib chiqilayotganda ular tomonidan korrupsiyaning oldini olish boʻyicha aniq reja himoya qilinishiga oid tartibni qonun hujjatlarida belgilash;

(v) xalqaro tajribani oʻrganib, kibermakonda korrupsiyaga qarshi samarali kurashish boʻyicha mustahkam huquqiy baza yaratish yuzasidan takliflarni ishlab chiqish;

(g) masʼul idoralar vakillaridan iborat ishchi guruhlar tuzgan holda “jinoyatchilikka qarshi kurashish haftaligi” davomida har oyning 1 — 5 sanalarida reja asosida “qizil” toifadagi mahallalarga tushib, jinoyatlarning kelib chiqish sabablarini chuqur tahlil qilish, tuman (shahar), Qoraqalpogʻiston Respublikasi, viloyatlar va Toshkent shahar prokurorlari va ichki ishlar organlari boshliqlari faoliyati samaradorligini oshirish boʻyicha tavsiyalar berish hamda tuman (shahar) va mahallalarda ilgari surilgan xalqchil tashabbuslar asosida qonunlarni takomillashtirish boʻyicha takliflar ishlab chiqish.

4. Hududlarni kompleks ijtimoiy-iqtisodiy rivojlantirish boʻyicha sektorlar faoliyati quyidagicha yangi tartib asosida yoʻlga qoʻyilsin:

(a) prokuror, ichki ishlar va soliq organlari rahbarlari sektorlar faoliyati boʻyicha yuklatilgan vazifalardan ozod etiladi;

(b) sektorlar ishiga Bosh vazir oʻrinbosarlari va Oʻzbekiston mahallalari uyushmasi hamda uning hududiy boʻlinmalari masʼul etib belgilanadi.

Vazirlar Mahkamasi ikki oy muddatda sektorlarning yangi tartib asosida faoliyat yuritishi boʻyicha Oʻzbekiston Respublikasi Prezidenti qarori loyihasini kiritsin.

5. Iqtisodiyotda korrupsiyaviy omillarning oldini olish maqsadida belgilansinki:

(a) davlat xaridlarida sotib olinadigan tovar va xizmatlar narxi hamda uning oʻrtacha bozor narxi oʻrtasidagi tafovutning eng koʻp yoʻl qoʻyiladigan chegarasidan chetga chiqqan holda xaridlarni amalga oshirgan mansabdor shaxslar javobgarlikka tortiladi;

(b) 2025-yilning 1-iyulidan yirik investitsiya loyihalarida korrupsiyaga qarshi xalqaro standartlar hamda yirik auksion shartlarini raqobatbardoshlik ekspertizasidan oʻtkazish tartibi joriy etiladi;

(v) “Shaffof qurilish” milliy axborot tizimi (keyingi oʻrinlarda — “Shaffof qurilish” tizimi) qamrovi yanada oshirilib, bosqichma-bosqich xalqaro tashkilotlar ishtirokidagi loyihalarga joriy qilinadi.

6. Mazkur Farmonning 5-bandida belgilangan topshiriqlar ijrosini samarali tashkil etish maqsadida:

(a) Iqtisodiyot va moliya vazirligi ikki oy muddatda:

(i) davlat xaridlarida sotib olinadigan tovar va xizmatlar narxi boʻyicha belgilangan talablarni buzganlik uchun javobgarlikni nazarda tutuvchi qonun loyihasini ishlab chiqib, kiritsin;

(ii) Hisob palatasi, Bosh prokuratura huzuridagi Iqtisodiy jinoyatlarga qarshi kurashish departamenti bilan birgalikda budjet va budjetdan tashqari mablagʻlar hisobidan asosiy vositalarni xarid qilish boʻyicha talablarni kuchaytirsin;

(iii) Hisob palatasi bilan birgalikda davlat buyurtmachilari tomonidan toʻgʻridan-toʻgʻri shartnomalar boʻyicha xarid qilinadigan tovarlar (ishlar, xizmatlar) turlarini kamida ikki karra qisqartirish boʻyicha Oʻzbekiston Respublikasi Prezidenti qarori loyihasini kiritsin;

(b) Investitsiyalar, sanoat va savdo vazirligi, Raqobatni rivojlantirish va isteʼmolchilar huquqlarini himoya qilish qoʻmitasi Korrupsiyaga qarshi kurashish agentligi bilan birgalikda uch oy muddatda yirik investitsiya loyihalarini korrupsiyaga qarshi xalqaro standartlar asosida baholash hamda yirik auksion shartlarini raqobatbardoshlik ekspertizasidan oʻtkazish tartib-taomillarini belgilovchi Hukumat qarori loyihasini Vazirlar Mahkamasiga kiritsin;

(v) 2025-yil yakuniga qadar Iqtisodiyot va moliya vazirligi hamda Investitsiya, sanoat va savdo vazirligi xalqaro moliya tashkilotlar bilan birgalikda xalqaro tender obyektlari boʻyicha subpudratchilarni “Shaffof qurilish” tizimi orqali jalb qilish, qiymati 2 mln AQSH dollarigacha boʻlgan xalqaro moliya tashkilotlar hisobidan moliyalashtiriladigan mahalliy tenderlarni “Shaffof qurilish” tizimida oʻtkazish hamda xalqaro tenderlar boʻyicha jalb qilingan chet el pudrat tashkilotlari shartnoma qiymatining kamida 60 foizini oʻz kuchi bilan bajarish tartibini joriy etish choralarini koʻrsin;

(g) Qurilish va uy-joy kommunal xoʻjaligi vazirligi “Shaffof qurilish” tizimini xalqaro tashkilotlar ishtirokidagi loyihalarga joriy etish uchun ushbu tizimda tegishli imkoniyatlarni yaratsin.

7. Vazirlar Mahkamasi 2026-yil 1-yanvarga qadar vazirlik va idoralar, mahalliy hokimliklar tomonidan koʻrsatiladigan barcha davlat xizmatlarini tuman (shahar) kesimida aholining oʻzi baholaydigan tizimni joriy etsin.

Bunda aholi tomonidan “qoniqarsiz” deb baholangan davlat xizmatlarini koʻrsatuvchi vazirlik, idora rahbarlari hamda tuman (shahar) hokimlarining shaxsiy javobgarligi belgilansin.

8. Adliya vazirligi:

(a) bir oy muddatda Raqamli texnologiyalar vazirligi bilan birgalikda sunʼiy intellekt asosida aholining kundalik hayotida uchraydigan savollariga mobil telefon orqali sodda va qulay shaklda javob olish imkoniyatini beradigan onlayn platformani ishga tushirsin;

(b) Raqamli texnologiyalar vazirligi bilan birgalikda uch oy muddatda vazirlik va idoralar, mahalliy hokimliklar tomonidan koʻrsatiladigan barcha davlat xizmatlarini tuman (shahar) kesimida aholining oʻzi baholaydigan yangi tizimni joriy etishni nazarda tutuvchi Hukumat qarori loyihasini ishlab chiqsin va Vazirlar Mahkamasiga kiritsin;

(v) uch oy muddatda Advokatlar palatasi bilan birgalikda fuqarolarga sifatli yuridik yordam koʻrsatilishida advokatlar faoliyatiga toʻsqinlik qilayotgan omillarni bartaraf etishga qaratilgan qonun loyihasini Vazirlar Mahkamasiga kiritsin.

9. Mazkur Farmonda belgilangan vazifalarning oʻz vaqtida va toʻliq bajarilishini taʼminlash Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidentining maslahatchilari D.B. Kadirov va R.Q. Davletovlar zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2025-yil 21-aprel,

PF-71-son

Oʻzbekiston Respublikasi Prezidentining 2025-yil 21-apreldagi PF-71-son Farmoniga 1-ILOVA

Korrupsiyaga qarshi kurashish boʻyicha milliy kengashning 2025-yil 5-martda oʻtkazilgan kengaytirilgan yigʻilishida belgilangan topshiriqlar ijrosini taʼminlash boʻyicha ishlab chiqiladigan normativ-huquqiy hujjatlar

ROʻYXATI

Oʻzbekiston Respublikasi Prezidentining 2025-yil 21-apreldagi PF-71-son Farmoniga 2-ILOVA

Korrupsiyaga qarshi kurashish boʻyicha milliy kengashning 2025-yil 5-martda oʻtkazilgan kengaytirilgan yigʻilishida belgilangan topshiriqlar ijrosini taʼminlash boʻyicha

AMALIY CHORA-TADBIRLAR DASTURI