Davlat soliq xizmati organlari tomonidan soliq toʻlovchilar faoliyatida amalga oshiriladigan soliq nazorati tadbirini videotasvirga olish tartibi toʻgʻrisidagi nizomga oʻzgartirishlar kiritish haqida (3207-1-son)

14.04.2025

Oʻzbekiston Respublikasi soliq qoʻmitasining

Qarori

[Oʻzbekiston Respublikasi Adliya vazirligi tomonidan 2025-yil 14-aprelda roʻyxatdan oʻtkazildi, roʻyxat raqami 3207-1]

Oʻzbekiston Respublikasining Soliq kodeksi va Oʻzbekiston Respublikasining 2024-yil 21-noyabrdagi OʻRQ-1003-son “Oʻzbekiston Respublikasining ayrim qonun hujjatlariga raqamli dalillar bilan ishlash tizimini takomillashtirishga qaratilgan oʻzgartirish va qoʻshimchalar kiritish toʻgʻrisida”gi Qonuniga muvofiq Oʻzbekiston Respublikasi Soliq qoʻmitasi qaror qiladi:

1. Oʻzbekiston Respublikasi Davlat soliq qoʻmitasining 2019-yil 27-noyabrdagi 2019-58-son qarori (roʻyxat raqami 3207, 2019-yil 30-dekabr) (Qonun hujjatlari maʼlumotlari milliy bazasi, 30.12.2019-y., 10/20/3207/0001-son) bilan tasdiqlangan Davlat soliq xizmati organlari tomonidan soliq toʻlovchilar faoliyatida amalga oshiriladigan soliq nazorati tadbirini videotasvirga olish tartibi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur qaror Oʻzbekiston Respublikasi Savdo-sanoat palatasi bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.

Rais Sh. KUDBIYEV

Toshkent sh.,

2025-yil 7-aprel,

2025-06-son

Kelishildi:

Savdo-sanoat palatasi raisi D. VAXABOV

2025-yil 3-aprel

Oʻzbekiston Respublikasi Soliq qoʻmitasining 2025-yil 7-apreldagi 2025-06-son qaroriga ILOVA

Davlat soliq xizmati organlari tomonidan soliq toʻlovchilar faoliyatida amalga oshiriladigan soliq nazorati tadbirini videotasvirga olish tartibi toʻgʻrisidagi nizomga kiritilayotgan oʻzgartirishlar

1. 8-bandda:

oltinchi xatboshi chiqarib tashlansin;

yettinchi — toʻqqizinchi xatboshilar tegishli ravishda oltinchi — sakkizinchi xatboshilar deb hisoblansin;

oltinchi xatboshidagi “fiskal xotirali nazorat-kassa mashinalarini” degan soʻzlar “nazorat-kassa texnikasini” degan soʻzlar bilan almashtirilsin.

2. 9-bandda:

toʻrtinchi xatboshidagi “nazorat kassa mashinasi (virtual kassa)” degan soʻzlar “nazorat-kassa texnikasi” degan soʻzlar bilan almashtirilsin;

sakkizinchi xatboshidan “ashyoviy” degan soʻz chiqarib tashlansin.

3. 11-banddan “ashyoviy” degan soʻz chiqarib tashlansin.