2006-yil 3-oktabrda imzolangan Fuqarolarning oʻzaro kelib-ketishlari toʻgʻrisidagi Bitimga oʻzgartirish kiritish toʻgʻrisida

18.07.2024

Oʻzbekiston Respublikasi Hukumati bilan Qirgʻiziston Respublikasi Hukumati oʻrtasida

Bayonnoma

[Oʻzbekiston Respublikasi Tashqi ishlar vazirligi tomonidan davlat reyestrida 2024-yil 18-iyulda 4563-KG-2024 (2)-H) tartib raqami bilan roʻyxatga olindi.]

Oʻzbekiston Respublikasi Hukumati va Qirgʻiziston Respublikasi Vazirlar Mahkamasi, keyingi oʻrinlarda Tomonlar deb ataluvchilar,

Oʻzbekiston Respublikasi Fargʻona viloyatining Soʻx tumani va Shohimardon, Choʻngʻara (Chon-Gara), Toshtepa (Tosh-Dobo) aholi punktlarida doimiy va vaqtincha yashovchi Oʻzbekiston Respublikasi fuqarolarining kelib-ketishlarini tartibga solish maqsadida,

2006-yil 3-oktabrdagi Oʻzbekiston Respublikasi Hukumati bilan Qirgʻiziston Respublikasi Hukumati oʻrtasida fuqarolarning oʻzaro kelib-ketishlari toʻgʻrisidagi Bitimning (keyingi oʻrinlarda — “Bitim”) 4 va 13-moddalariga amal qilgan holda hamda 2023-yil 27-yanvarda imzolangan Oʻzbekiston Respublikasi Hukumati bilan Qirgʻiziston Respublikasi Hukumati oʻrtasida 2006-yil 3-oktabrdagi fuqarolarning oʻzaro kelib-ketishlari toʻgʻrisidagi Bitimga oʻzgartirishlar kiritish toʻgʻrisidagi Bayonnomaga amal qilgan holda,

quyidagilar toʻgʻrisida kelishib oldilar:

1-modda

Bitimning 1-moddasi quyidagi mazmundagi uchinchi xatboshi bilan toʻldirilsin:

“3. Fargʻona viloyatining Soʻx tumani va Shohimardon, Choʻngʻara (Chon-Gara), Toshtepa (Tosh-Dobo) aholi punktlarida doimiy va vaqtincha yashovchi Oʻzbekiston Respublikasi fuqarolari Qirgʻiziston Respublikasi hududida boʻlish muddatini hisoblamagan holda tranzit orqali Qirgʻiziston Respublikasining Botken viloyati Qadamjoy tumani hududi orqali kirishlari va chiqishlari mumkin.”.

2-modda

1-moddada koʻrsatilgan fuqarolarning yashash joyi Oʻzbekiston Respublikasining vakolatli davlat organi tarafidan doimiy yoki vaqtincha roʻyxatga olish toʻgʻrisida berilgan hujjat asosida belgilanadi.

Bunday hujjatlar namunalari diplomatik kanallar orqali yuboriladi.

3-modda

Bitim matnidagi “vaqtincha propiska va roʻyxatga olinish” degan soʻzlar tegishli kelishiklarda “yashash joyi boʻyicha doimiy va vaqtincha roʻyxatga olish” degan soʻzlar bilan almashtirilsin.

4-modda

Mazkur Bayonnoma imzolangan kundan boshlab vaqtincha qoʻllaniladi va Bitimning 16-moddasida nazarda tutilgan tartibda kuchga kiradi hamda Bitim bilan bir vaqtda oʻz kuchini yoʻqotadi.

Toshkent shahrida, 2024-yil 18-iyulda, ikki asl nusxada, har biri oʻzbek, qirgʻiz va rus tillarida tuzildi, bunda barcha matnlar bir xil kuchga ega.

Mazkur Bayonnoma qoidalarini talqin qilishda kelishmovchiliklar yuzaga kelgan taqdirda, Tomonlar rus tilidagi matnga murojaat qiladilar.

(imzolar)