Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek Oʻzbekiston Respublikasi savdo-sanoat palatasining xorijiy mamlakatlaridagi savdo-investitsiya uylari orqali olib chiqilayotgan tovarlarni bojxonada rasmiylashtirish tartibi toʻgʻrisidagi nizomni tasdiqlash haqida (189-son)
09.08.2005
Oʻzbekiston Respublikasi Vazirlar Mahkamasining
qarori
Vazirlar Mahkamasi qaror qiladi:
1. Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek Oʻzbekiston Respublikasi Savdo-sanoat palatasining xorijiy mamlakatlardagi savdo-investitsiya uylari orqali olib chiqilayotgan tovarlarni bojxonada rasmiylashtirish tartibi toʻgʻrisidagi nizom 1-ilovaga muvofiq tasdiqlansin.
2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.
3. Quyidagilar:
Vazirlar Mahkamasining “Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali olib chiqilayotgan tovarlarni bojxonada rasmiylashtirish tartibi toʻgʻrisidagi nizomni tasdiqlash haqida” 2000-yil 8-iyuldagi 260-son qarori (Oʻzbekiston Respublikasi QT, 2000-y., 7-son, 36-modda);
Vazirlar Mahkamasining 2001-yil 2-fevraldagi 65-18-son qaroriga 6-ilovaning 3-bandi;
Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish va ayrimlarini oʻz kuchini yoʻqotgan deb hisoblash toʻgʻrisida” 2003-yil 14-yanvardagi 17-son qaroriga 1-ilovaning 26-bandi (Oʻzbekiston Respublikasi QT, 2003-y., 1-son, 7-modda) oʻz kuchini yoʻqotgan deb hisoblansin.
4. Vazirliklar va idoralar bir oy muddatda oʻzlarining normativ hujjatlarini mazkur qarorga muvofiqlashtirsinlar.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari V.A. Golishev zimmasiga yuklansin.
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2005-yil 9-avgust,
189-son
Vazirlar Mahkamasining 2005-yil 9-avgustdagi 189-son qaroriga 1-ILOVA
Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek Oʻzbekiston Respublikasi Savdo-sanoat palatasining xorijiy mamlakatlardagi savdo investitsiya uylari orqali olib chiqilayotgan tovarlarni bojxonada rasmiylashtirish tartibi toʻgʻrisida
NIZOM
1. Ushbu Nizom Oʻzbekiston Respublikasining Bojxona kodeksiga hamda boshqa qonunchilikka muvofiq, Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek Oʻzbekiston Respublikasi Savdo-sanoat palatasi (keyingi oʻrinlarda Palata deb ataladi) aʼzolari boʻlgan xoʻjalik yurituvchi subyektlar tomonidan Palataning xorijiy mamlakatlardagi savdo-investitsiya uylari orqali olib chiqilayotgan tovarlarni bojxonada rasmiylashtirish tartibini belgilaydi.
2. Ushbu Nizomda quyidagi tushunchalardan foydalaniladi:
chet eldagi korxonalar — Oʻzbekiston Respublikasi xoʻjalik yurituvchi subyektlari tomonidan xorijiy mamlakatlarda taʼsis etilgan savdo uylari, vakolatxonalar (shu jumladan yuridik shaxs boʻlmasdan), korxonalar, hamda Oʻzbekiston Respublikasi Savdo-sanoat palatasining xorijiy mamlakatlardagi savdo-investitsiya uylari;
eksportchilar — tovarlarni xorijiy mamlakatlardagi oʻzlari taʼsis etgan savdo uylari, vakolatxonalar, korxonalar nomiga olib chiquvchi xoʻjalik yurituvchi subyektlar, shuningdek Oʻzbekiston Respublikasi Savdo-sanoat palatasi aʼzolari boʻlgan, tovarlarni Palataning xorijiy mamlakatlardagi savdo-investitsiya uylari nomiga olib chiquvchi xoʻjalik yurituvchi subyektlar.
3. Eksportchilar tomonidan tovarlarni chet eldagi korxonalar nomiga olib chiqish eksportning bojxona rejimida:
konsignatsiya shartnomalari (kontraktlar)va shartnomalarning boshqa shakllari asosida — hisob-kitoblar toʻgʻrisida maʼlumotnoma taqdim etmasdan;
kontraktsiz asosda (tovarlar namunalari, chet eldagi korxonalar nomiga oʻz ehtiyojlari uchun yetkazib beriladigan mol-mulklar) qonunchilikka muvofiq amalga oshiriladi. Bunda olib chiqilgan tovarlar hisobi bojxona organlari tomonidan yukning bojxona deklaratsiyasi asosida yuritiladi.
6. Tovar konsignatsiya shartlarida, bank kafolatnomasi yoki siyosiy va tijorat tavakkalchiliklaridan eksport kontraktlarini sugʻurtalash polisini taqdim etmasdan eksportchi tomonidan chet eldagi korxona nomiga:
Palataga aʼzo boʻlgan eksportchining oʻz mahsulotlari Palataning savdo-investitsiya uylari nomiga eksport qilinganda;
eksportchining oʻz mahsulotlari ustav jamgʻarmasida eksportchining ulushi kamida 51 foizni tashkil qiladigan chet eldagi korxona nomiga eksport qilinganda;
vazirliklar, idoralar, uyushmalar va kompaniyalarning tarkibiy boʻlinmalari hisoblanadigan korxonalar tomonidan vazirlik, idora, uyushma yoki kompaniyaning, shuningdek, ularning ixtisoslashtirilgan tashqi savdo firmalari va kompaniyalarining ustav jamgʻarmasidagi ulushiga tegishli ravishda kamida 51 foizni tashkil etgan chet eldagi tegishli korxona nomiga eksport qilinganda;
“Oʻzsanoateksport” AJ, “Oʻzagroeksport” AJ yoki “Oʻrta Osiyo Trans” AJ tomonidan ustav jamgʻarmasida tashkilotlar ulushi tegishli ravishda kamida 51 foizni tashkil qiladigan chet eldagi korxona nomiga eksport qilinganda;
“Oʻzbekneftgaz” AJ, “Oʻzkimyosanoat” AJ, “Oʻzsanoateksport” AJ, “Oʻzagroeksport” AJ, shuningdek, ularning tuzilmasiga kiruvchi tashkilotlar, ustav jamgʻarmasida mazkur tashkilotlarning umumiy ulushi kamida 51 foizni tashkil qiladigan Qozogʻiston Respublikasidagi savdo uylari manziliga yetkazib berilishi mumkin.
7. Eksportchining ilgari amalga oshirilgan eksportga yetkazib berishlar boʻyicha toʻlov muddati oʻtgan debitorlik qarzi mavjud boʻlganda yoki sotilmagan tovar (tez buziladigan tovarlardan tashqari) tegishli muddatlarda qaytarib olib kelinmaganda bojxona organlari keyingi eksport shartnomalari (kontraktlari) boʻyicha tovarlarning chetga olib chiqilishini rad etishga haqlidir.
Konsignatsiya shartlarida keyingi eksportga yetkazib berishlar faqat ushbu qarz toʻlangandan keyin amalga oshirish mumkin.
8. Davlat bojxona qoʻmitasi xoʻjalik yurituvchi subyektlarning mahsulotlarni chet eldagi korxona orqali eksport qilinishi hisobini yuritish maqsadida har oyda Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Investitsiyalar va tashqi savdo vazirligi, Davlat soliq qoʻmitasi hamda Davlat statistika qoʻmitasiga tegishli statistik maʼlumotlarni belgilangan tartibda taqdim etadi.
9. Yuqorida koʻrsatib oʻtilgan eksport operatsiyalari boʻyicha xorijiy valyutadagi tushumlarning tushishi Davlat soliq qoʻmitasi tomonidan Tashqi savdo operatsiyalari yagona elektron axborot tizimi orqali qonunchilikda belgilangan tartibda nazorat qilinadi.
Valyuta tushumlarining oʻz vaqtida va toʻliq tushishi yuzasidan javobgarlik qonunchilikka muvofiq chet eldagi korxonalar rahbarlari va eksportchilar zimmasiga yuklanadi.
Eksport kontraktlari boʻyicha mahsulotlar sotishdan valyuta tushumi eksportchilarning Oʻzbekiston Respublikasi tijorat banklaridagi hisobvaraqlariga oʻtkaziladi.
Nizomga ILOVA
(ilova Oʻzbekiston Respublikasi Vazirlar Mahkamasining 2019-yil 10-avgustdagi 661-sonli qarori tahririda — Qonun hujjatlari maʼlumotlari milliy bazasi, 11.08.2019-y., 09/19/661/3571-son)
Vazirlar Mahkamasining 2005-yil 9-avgustdagi 189-son qaroriga 2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
2. Vazirlar Mahkamasining “Birjadan tashqari valyuta bozorini yanada rivojlantirish va mustahkamlash chora-tadbirlari toʻgʻrisida” 2000-yil 29-iyundagi 245-son qarori (Oʻzbekiston Respublikasi QT, 2000-y., 6-son, 33-modda) 4-bandining ikkinchi xat boshi “(savdo uylari, savdo vakolatxonalari, shuʼba korxonalar, firma doʻkonlari, dilerlik shoxobchalari va konsignatsiya omborlari)” soʻzlaridan keyin “shuningdek — Oʻzbekiston Respublikasi Savdo-sanoat palatasi aʼzolari — xoʻjalik yurituvchi subyektlar tomonidan Palataning savdo-investitsiya uylari nomiga” soʻzlari bilan toʻldirilsin.