“Mening fikrim” veb-portali orqali kelib tushgan elektron jamoaviy murojaatlarni koʻrib chiqishni yanada samarali tashkil etishga doir choralar toʻgʻrisida (463-V-son)

12.02.2025

Oʻzbekiston Respublikasi Oliy Majlisi Qonunchilik palatasi kengashining va Oʻzbekiston Respublikasi Oliy Majlisi Senati kengashining

qoʻshma qarori

Fuqarolarning jamoaviy murojaat qilishga doir konstitutsiyaviy huquqlarini taʼminlash, shuningdek fuqarolarni tashvishga solayotgan mintaqaviy va respublika ahamiyatiga molik muammolarni hal etish samaradorligini oshirish maqsadida Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2018-yil 2-apreldagi Qoʻshma qaroriga asosan “Mening fikrim” veb-portali tashkil etilib, fuqarolarning elektron jamoaviy murojaat qilish imkoniyati yaratilgan hamda murojaatlarni koʻrib chiqish tartibi belgilangan.

Shu bilan birga elektron jamoaviy murojaatlarni koʻrib chiqishning ochiqligini, oshkoraligini, begʻarazligi va xolisligini taʼminlash maqsadida Oʻzbekiston Respublikasi Oliy Majlisi Qonunchilik palatasining deputatlaridan, Senatining aʼzolaridan va boshqa bir qator idoralar vakillaridan iborat tarkibda ishchi komissiya tuzilgan.

Oʻtgan davr mobaynida “Mening fikrim” veb-portaliga 6 900 dan ziyod murojaat kelib tushgan boʻlib, belgilangan talablarga javob beradigan 495 ta murojaat ishchi komissiyaning qarori asosida “Mening fikrim” veb-portaliga ovoz toʻplash uchun joylashtirilgan.

Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari institutining “Mening fikrim” veb-portaliga kelib tushadigan elektron jamoaviy murojaatlar bilan ishlash borasidagi vazifalarini belgilash, shuningdek yangi saylangan Oʻzbekiston Respublikasi Oliy Majlisi Qonunchilik palatasining deputatlari va Senatining aʼzolari orasidan ishchi komissiya tarkibini shakllantirish zaruriyati yuzaga kelmoqda.

Yuqoridagilardan kelib chiqib, “Mening fikrim” veb-portali orqali kelib tushgan elektron jamoaviy murojaatlarni koʻrib chiqishni yanada samarali tashkil etish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. “Mening fikrim” veb-portali orqali elektron jamoaviy murojaatlar berish va ularni koʻrib chiqish tartibi toʻgʻrisidagi nizom 1-ilovaga muvofiq tasdiqlansin.

2. “Mening fikrim” veb-portaliga elektron jamoaviy murojaatni joylashtirish toʻgʻrisidagi yoki joylashtirishni rad etish haqidagi masalani dastlabki tarzda koʻrib chiqish boʻyicha ishchi komissiya 2-ilovaga muvofiq tarkibda Oʻzbekiston Respublikasi Oliy Majlisi palatalarining vakolatlari muddatiga tuzilsin.

3. Oʻzbekiston Respublikasi Raqamli texnologiyalar vazirligi:

“Mening fikrim” veb-portali joriy etilishini va uning uzluksiz faoliyat koʻrsatishini, texnik jihatdan qoʻllab-quvvatlanishini hamda xavfsizligini taʼminlasin;

Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari institutiga “Mening fikrim” veb-portali orqali elektron jamoaviy murojaatlar berish va ularni koʻrib chiqish tartibi toʻgʻrisidagi nizomning normalari amalda ishlashi hamda samaradorligi ustidan doimiy va har tomonlama monitoring oʻtkazilishida hamda uning tahlil qilinishida muntazam tashkiliy yordam koʻrsatsin.

4. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjetining parametrlarida ushbu Qoʻshma qarorni amalga oshirish bilan bogʻliq xarajatlarni moliyalashtirish uchun zarur mablagʻlarni nazarda tutsin.

5. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining ayrim qoʻshma qarorlari 3-ilovaga muvofiq oʻz kuchini yoʻqotgan deb topilsin.

6. Ushbu Qoʻshma qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev va Oʻzbekiston Respublikasi Oliy Majlisi Qonunchilik palatasi Spikerining oʻrinbosari R. Xakimov zimmasiga yuklatilsin.

7. Ushbu Qoʻshma qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh,

2025-yil 12-fevral,

463-V-son

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh,

2025-yil 12-fevral,

KQ-65-V-son

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2025-yil 12-fevraldagi 463-V/KQ-65-V-sonli qoʻshma qaroriga 1-ILOVA

“Mening fikrim” veb-portali orqali elektron jamoaviy murojaatlar berish va ularni koʻrib chiqish tartibi toʻgʻrisidagi

NIZOM

1-bob. Umumiy qoidalar

1. Ushbu Nizom vakolatli davlat organlariga “Mening fikrim” veb-portali orqali elektron jamoaviy murojaatlar berish va ularni koʻrib chiqish tartibini belgilaydi.

2. Ushbu Nizom koʻrib chiqilish tartibi fuqarolik protsessual, jinoyat-protsessual, jinoyat-ijroiya, iqtisodiy protsessual qonunchilik hujjatlarida, maʼmuriy javobgarlik toʻgʻrisidagi, maʼmuriy sud ishlarini yuritish toʻgʻrisidagi qonunchilik hujjatlarida hamda boshqa qonunchilik hujjatlarida belgilangan elektron jamoaviy murojaatlarga nisbatan tatbiq etilmaydi.

3. Ushbu Nizomda quyidagi asosiy tushunchalar qoʻllaniladi:

vakolatli davlat organlari — Oʻzbekiston Respublikasi Oliy Majlisining Qonunchilik palatasi va Senati, Oʻzbekiston Respublikasi Vazirlar Mahkamasi, shuningdek Qoraqalpogʻiston Respublikasi Joʻqorgʻi Kengesi, xalq deputatlari viloyatlar, Toshkent shahar, tumanlar (shaharlar) Kengashlari;

ishchi komissiya — “Mening fikrim” veb-portaliga elektron jamoaviy murojaatni joylashtirish toʻgʻrisidagi yoki joylashtirishni rad etish haqidagi masalani dastlabki tarzda koʻrib chiqish uchun vakolatli davlat organlari va moderator vakillaridan jamoatchilik asosida tuzilgan organ;

“Mening fikrim” veb-portali — fuqarolarning vakolatli davlat organlariga elektron jamoaviy murojaat berish boʻyicha konstitutsiyaviy huquqlari roʻyobga chiqarilishini taʼminlovchi maxsus veb-portal;

moderator — Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari instituti;

elektron jamoaviy murojaat (murojaat) — vakolatli davlat organlariga “Mening fikrim” veb-portali orqali elektron shaklda berilgan murojaat;

elektron jamoaviy murojaat tashabbuskori (bundan buyon matnda murojaat tashabbuskori deb yuritiladi) — vakolatli davlat organiga “Mening fikrim” veb-portali orqali murojaat qilgan, elektron jamoaviy murojaat berilgan kunda oʻn sakkiz yoshga toʻlgan Oʻzbekiston Respublikasi fuqarosi.

4. Elektron jamoaviy murojaatni koʻrib chiqishning asosiy prinsiplari quyidagilardan iborat:

qonuniylik;

elektron jamoaviy murojaatlarga tezkor munosabat bildirish;

kollegiallik;

xalq bilan muloqot;

shaffoflik.

5. Ushbu Nizomga muvofiq zarur miqdordagi ovozlarni toʻplagan elektron jamoaviy murojaatlar ularning miqdoridan qatʼi nazar teng ahamiyatga ega boʻladi.

6. Murojaatning mazmunida uning mohiyati va amalga oshirilish mexanizmi bayon etilgan boʻlishi kerak.

Murojaat tashabbuskori uning qaysi vakolatli davlat organiga yoʻllanganligini koʻrsatadi.

7. Murojaat davlat tilida va boshqa tillarda beriladi.

8. Murojaatda murojaat tashabbuskorining shaxsiga oid maʼlumotlar (familiyasi, ismi, otasining ismi, yashash joyi toʻgʻrisidagi maʼlumotlar, elektron pochta manzili, bogʻlanish uchun telefon raqami) koʻrsatilgan boʻlishi kerak.

9. Murojaat tashabbuskorining shaxsiga oid maʼlumotlar moderator tomonidan faqat xizmat maqsadida foydalaniladi va ular murojaat tashabbuskorining roziligisiz uchinchi shaxslarga berilishi mumkin emas.

10. Shaxsga oid maʼlumotlarning ishonchliligi uchun murojaatning tashabbuskori javobgar boʻladi.

11. Quyidagi masalalar murojaatning predmeti boʻlishi mumkin emas:

Oʻzbekiston Respublikasining hududiy yaxlitligini oʻzgartirish toʻgʻrisidagi;

Oʻzbekiston Respublikasi Davlat budjeti va soliqlar haqidagi;

amnistiya va afv etish toʻgʻrisidagi;

amaldagi konstitutsiyaviy tuzumni zoʻrlik bilan oʻzgartirishga daʼvat qilish haqidagi;

jamiyatning maʼnaviy qadriyatlariga putur yetkazadigan, fuqarolarning shaʼni va qadr-qimmatini yoki ishchanlik obroʻsini poymol qiladigan;

urush, zoʻravonlik, shafqatsizlikni targʻib qilish, millatlararo, irqiy, diniy adovatni, ekstremizm, separatizm va fundamentalizmni qoʻzgʻatish toʻgʻrisidagi;

terrorchilik harakatlarini sodir etishga, qonunga muvofiq jinoiy va oʻzga javobgarlikka sabab boʻladigan boshqa xatti-harakatlarni sodir etishga daʼvat qilish haqidagi;

giyohvandlik vositalarini, psixotrop moddalarni va ularning analoglarini, shuningdek prekursorlarni targʻib qilish toʻgʻrisidagi;

pornografik tusdagi axborotni targʻib qilish haqidagi;

reklama tusidagi maʼlumotlarni ilgari suradigan;

davlat sirlarini yoki qonun bilan qoʻriqlanadigan boshqa sirni oʻz ichiga olgan;

jamoat tartibini, aholi sogʻligʻi va xavfsizligini taʼminlashga doir favqulodda hamda shoshilinch chora-tadbirlar toʻgʻrisidagi;

Oʻzbekiston Respublikasining maʼmuriy-hududiy tuzilishini oʻzgartirish haqidagi;

vakolatli davlat organining vakolatlariga kirmaydigan;

tezkor-qidiruv faoliyatini, surishtiruv va tergovni amalga oshiruvchi organlarning, sudlarning vakolatlariga kiradigan;

mansabdor shaxslarni tayinlash (saylash) va ozod qilish bilan bogʻliq boʻlgan;

shaxsiy ehtiyojdan yoki shikoyatdan iborat boʻlgan;

tuhmatdan yoki boʻhtondan iborat boʻlgan;

mazmuni va maʼnosiga koʻra veb-portalga kelib tushgan, joylashtirilgan murojaatlarga oʻxshash boʻlgan yoxud qabul qilingan paytidan eʼtiboran bir yillik muddat oʻtmagan, vakolatli davlat organining qarori qabul qilib boʻlingan;

vakolatli davlat organiga nisbatan aniq talablarni nazarda tutmaydigan;

Oʻzbekiston Respublikasining xalqaro shartnomalaridan kelib chiqadigan majburiyatlarning bajarilishi toʻgʻrisidagi;

davlat organlari va tashkilotlarini tuzish, tugatish va qayta tashkil etish haqidagi;

shakliga, mazmuniga va maʼnosiga koʻra qonun hujjatlari bilan tartibga solingan qoidalarga oʻxshash boʻlgan.

12. “Mening fikrim” veb-portaliga joylashtirilgan murojaatlardan jamoatchilik fikrini oʻrganish va aks ettirish uchun foydalanilishi mumkin.

2-bob. Fuqarolarning murojaat qilish huquqi kafolatlari

13. Fuqarolarning “Mening fikrim” veb-portali orqali vakolatli davlat organlariga murojaat qilish huquqi kafolatlanadi.

14. Murojaat qilish huquqi ixtiyoriy ravishda amalga oshiriladi. Hech kim biron-bir murojaatni himoya qilish yoki unga qarshi chiqish harakatlarida ishtirok etishga majbur qilinishi mumkin emas.

15. Murojaat qilish huquqining amalga oshirilishi boshqa shaxslarning huquqlari, erkinliklari va qonuniy manfaatlarini buzmasligi, shuningdek jamiyat va davlat manfaatlariga zid kelmasligi kerak.

16. Murojaat qilish huquqidan foydalanishda fuqarolarning jinsiga, irqiga, millatiga, tiliga, diniga, eʼtiqodiga, ijtimoiy kelib chiqishiga, ijtimoiy mavqeyiga qarab kamsitilishiga yoʻl qoʻyilmaydi.

17. Vakolatli davlat organlari murojaatlar koʻrib chiqilayotganda Oʻzbekiston Respublikasining Konstitutsiyasi va qonunlari talablariga rioya etishi, ularni toʻliq, xolis va oʻz vaqtida koʻrib chiqish uchun choralar koʻrishi, fuqarolarning buzilgan huquqlari tiklanishini, qonuniy manfaatlari va erkinliklari himoya qilinishini taʼminlash boʻyicha oʻz vakolatlari doirasida choralar koʻrishi shart.

18. Murojaat qabul qilinishi va koʻrib chiqilishi shart, bundan ushbu Nizomning 2, 6 va 11-bandlarida nazarda tutilgan hollar mustasno.

Ushbu Nizom 8-bandining talablariga rioya etmaganlik ham murojaatni “Mening fikrim” veb-portaliga joylashtirishni rad etishga sabab boʻlishi mumkin.

19. Murojaat koʻrib chiqilayotganda murojaat tashabbuskorining roziligisiz uning shaxsiy hayoti haqidagi maʼlumotlar oshkor qilinishiga yoʻl qoʻyilmaydi.

Murojaat tashabbuskori toʻgʻrisidagi, murojaatga taalluqli boʻlmagan maʼlumotlarni aniqlashtirishga yoʻl qoʻyilmaydi.

20. Murojaat tashabbuskorini, uning oila aʼzolarini murojaat berilishi munosabati bilan taʼqib etish taqiqlanadi.

3-bob. Murojaatni berish va koʻrib chiqish tartibi

21. Vakolatli davlat organiga murojaat berish uchun fuqaro id.gov.uz veb-saytida roʻyxatdan oʻtadi va murojaatni “Mening fikrim” veb-portalida shakllantiradi.

22. “Mening fikrim” veb-portali murojaatni kamida besh nafar kishidan iborat guruh qoʻllab-quvvatlashi uchun ovoz yigʻish maqsadida maxsus havolani murojaat tashabbuskoriga joʻnatadi.

Qoʻllab-quvvatlovchi zarur miqdordagi ovozlar soni yigʻilgan taqdirda, murojaat ushbu Nizomning 2, 6, 8 va 11-bandlarida belgilangan talablarga muvofiqligini tekshirish maqsadida moderator tomonidan ekspertiza oʻtkazish uchun qabul qilinadi.

23. Moderator oʻn besh kun ichida murojaatni ekspertizadan oʻtkazadi.

Ishchi komissiya moderatorning ekspertizasidan keyin murojaatni “Mening fikrim” veb-portaliga joylashtirish toʻgʻrisida yoki joylashtirishni rad etish haqida qaror qabul qiladi. Ishchi komissiya oʻz ishiga ilm-fanning turli sohalaridagi mutaxassislar va ekspertlarni jalb qilishga haqli.

24. Moderator murojaatning maʼnosi bir xil tushunilishini taʼminlash maqsadida grammatika, imlo va punktuatsiya qoidalaridan kelib chiqqan holda, murojaatni turlicha talqin etish imkonini istisno etadigan tarzda uning matnini tahrir qilishga haqli.

Murojaat tashabbuskori murojaat “Mening fikrim” veb-portaliga joylashtirilgunga qadar uning matnini tahrir qilish natijalari haqida moderator tomonidan xabardor etiladi.

25. Murojaat Ishchi komissiyaning ijobiy qarori asosida moderator tomonidan “Mening fikrim” veb-portaliga bir ish kuni ichida joylashtiriladi.

26. Murojaatni “Mening fikrim” veb-portaliga joylashtirish rad etilganda murojaat tashabbuskoriga rad etish sabablari tushuntirilgan tegishli bildirish bir ish kuni ichida yuboriladi.

Moderator oʻz faoliyatining ochiqligi va shaffofligini taʼminlash maqsadida joylashtirilishi rad etilgan murojaatlarni “Mening fikrim” veb-portaliga rad etish sabablarini tushuntirgan holda joylashtirishga haqli.

27. Murojaat “Mening fikrim” veb-portalida joylashtirilgan sana murojaat boʻyicha umumiy ovoz berish boshlangan sana deb hisoblanadi.

28. Umumiy ovoz berish murojaatning matni “Mening fikrim” veb-portalida joylashtirilgan kundan boshlab toʻqson kun ichida oʻtkaziladi.

Murojaat boʻyicha umumiy ovoz berish qoʻllab-quvvatlovchi zarur miqdordagi ovozlar soni toʻplanganidan keyin tugallangan deb hisoblanadi.

29. Murojaat boʻyicha umumiy ovoz berish “bir odam — bir ovoz” prinsipi boʻyicha oʻtkaziladi.

30. Oʻzbekiston Respublikasi Oliy Majlisining palatalari va Oʻzbekiston Respublikasi Vazirlar Mahkamasi nomiga yoʻllangan murojaat kamida oʻn mingta qoʻllab-quvvatlovchi ovozni, Qoraqalpogʻiston Respublikasi Joʻqorgʻi Kengesi, xalq deputatlari viloyatlar, Toshkent shahar Kengashlari nomiga yoʻllangan murojaat kamida besh mingta qoʻllab-quvvatlovchi ovozni, xalq deputatlari tumanlar (shaharlar) Kengashlari nomiga yoʻllangan murojaat kamida mingta qoʻllab-quvvatlovchi ovozni toʻplashi kerak.

31. Qoʻllab-quvvatlovchi zarur miqdordagi ovozlar sonini toʻplay olmagan murojaat ovoz berishni oʻtkazish muddatlari oʻtgach, qoʻllab-quvvatlanmagan deb hisoblanadi va “Mening fikrim” veb-portalining arxiviga oʻtkaziladi.

32. Qoʻllab-quvvatlovchi zarur miqdordagi ovozlar sonini toʻplagan murojaat moderator tomonidan keyingi ish kunidan kechiktirmay vakolatli davlat organiga yuboriladi.

33. Murojaatni koʻrib chiqish va u boʻyicha qaror qabul qilish tartibi vakolatli davlat organlarining faoliyatini tartibga soluvchi tegishli normativ-huquqiy hujjatlar bilan tartibga solinadi.

34. Vakolatli davlat organining murojaatni koʻrib chiqish boʻyicha majlisiga murojaat tashabbuskori taklif etilishi mumkin.

35. Qoʻllab-quvvatlovchi zarur miqdordagi ovoz toʻplagan murojaatni koʻrib chiqish va u boʻyicha qaror qabul qilish muddati murojaat vakolatli davlat organiga kelib tushgan paytdan eʼtiboran oltmish kundan oshmasligi kerak.

36. Vakolatli davlat organi tomonidan murojaatni koʻrib chiqish natijalari boʻyicha qabul qilingan qaror moderator tomonidan “Mening fikrim” veb-portaliga joylashtiriladi.

4-bob. Yakunlovchi qoidalar

37. Murojaatni berish va koʻrib chiqish chogʻida yuzaga keladigan nizolar qonunchilikda belgilangan tartibda hal etiladi.

38. Ushbu Nizom normalarini buzganlikda aybdor shaxslar belgilangan tartibda javobgar boʻladi.

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2025-yil 12-fevraldagi 463-V/KQ-65-V-sonli Qoʻshma qaroriga 2-ILOVA

“Mening fikrim” veb-portaliga elektron jamoaviy murojaatni joylashtirish toʻgʻrisidagi yoki joylashtirishni rad etish haqidagi masalani dastlabki tarzda koʻrib chiqish boʻyicha ishchi komissiya

TARKIBI

Abdullayev Ilxom Zayirovich—Oʻzbekiston Respublikasi Oliy Majlisi Qonunchilik palatasi Innovatsion rivojlanish va axborot texnologiyalari masalalari qoʻmitasining raisi, ishchi komissiya raisiQozixonova Orzigul Muydinovna—Oʻzbekiston Respublikasi Oliy Majlisi Senatining Yoshlar, xotin-qizlar, madaniyat va sport masalalari qoʻmitasining raisiMarufova Gulnora Maxmudovna—Oʻzbekiston Respublikasi Oliy Majlisi Senatining Fan, taʼlim va sogʻliqni saqlash masalalari qoʻmitasida doimiy asosda ishlovchi senatorXolmaxamatova Shaxnoza Baxtiyor qizi—Oʻzbekiston Respublikasi Oliy Majlisi Qonunchilik palatasi Innovatsion rivojlanish va axborot texnologiyalari masalalari qoʻmitasining aʼzosiInoyatova Noiba Tolipovna —Oʻzbekiston Respublikasi Oliy Majlisi Qonunchilik palatasi Mehnat, sogʻliqni saqlash va ijtimoiy masalalar qoʻmitasi aʼzosiPardayev Azamat Kenjaboyevich —Oʻzbekiston Respublikasi Oliy Majlisi Qonunchilik palatasi Demokratik institutlar va fuqarolik jamiyatini rivojlantirish masalalari qoʻmitasining aʼzosiDavlyatov Valisher Xakimjanovich—Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari instituti direktorining oʻrinbosariDoniyorov Shohruh Baxtiyorovich—Oʻzbekiston Respublikasi Bosh vaziri kotibiyati Axborot-tahlil va yuridik taʼminlash departamenti boʻlimi boshligʻi (kelishuv asosida)Kuranbayev Shodlikbek Ulugbekovich—Oʻzbekiston Respublikasi Oliy Majlisi Qonunchilik palatasi huzuridagi Parlament tadqiqotlari institutining bosh ilmiy xodimi, ishchi komissiya kotibi.

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2025-yil 12-fevraldagi 463-V/KQ-65-V-sonli Qoʻshma qaroriga 3-ILOVA

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining oʻz kuchini yoʻqotgan deb topilayotgan qoʻshma qarorlari

1. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2018-yil 2-apreldagi “Fuqarolarning jamoaviy murojaat qilishga doir konstitutsiyaviy huquqlarini taʼminlash boʻyicha qoʻshimcha chora-tadbirlar toʻgʻrisida”gi 1600-III/KQ-322-III-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2018-yil, № 4, 257-modda).

2. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2019-yil 2-fevraldagi “Mening fikrim” veb-portali orqali elektron jamoaviy murojaat qilish va ularni koʻrib chiqish tartibi toʻgʻrisidagi nizomga oʻzgartish va qoʻshimchalar kiritish haqida”gi 2310-III/KQ-503-III-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2019-yil, № 2, 153-modda).

3. Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2022-yil 10-martda qabul qilingan “Mening fikrim” veb-portali orqali kelib tushgan elektron jamoaviy murojaatlarni koʻrib chiqish samaradorligini taʼminlash toʻgʻrisida”gi 1931-IV/KQ-318-IV-sonli Qoʻshma qarori (Oʻzbekiston Respublikasi Oliy Majlisi palatalarining Axborotnomasi, 2022-yil, № 3, 336-modda).